Irina

Rritja e numrit të turistëve/ WizzAir 5 destinacione të reja low cost

Aktualitet / /

Wizz Air”, linja më e madhe ajrore me kosto të ulët në Europën Qendrore dhe Lindore, njoftoi sot 5 linja të reja nga Tirana për në Itali duke filluar nga vera e 2020-ës.

Të gjithë pasagjerët, individë apo nga bizneset, do të përfitojnë nga lidhjet e shpeshta për të arritur dhe zbuluar pesë destinacione interesante italiane si: Milano, Bergamo, Bologna, Verona, Venecia, Treviso dhe Pisa.

Këto fluturime me tarifat e ulëta të Wizz nga Tirana në Itali do të fillojnë nga 29 marsi 2020.

Duke iu përgjigjur kërkesave të klientëve të saj dhe të angazhuar për të krijuar mundësi më të volitshme udhëtimi, “Wizz Air” dyfishoi rrjetin e saj nga Tirana, duke ofruar në vitin 2020 një total prej 10 fluturimesh për 5 vende që do të kontribuojnë më tej në rritjen e turizmit në hyrje dhe dalje dhe përmirësimin e lidhjeve të biznesit midis këtyre vendeve.

George Michalopoulos, drejtori i shitjeve i “Wizz Air” tha: “‘Wizz Air’ është angazhuar fuqimisht në krijimin e mundësive të reja për pasagjerët e saj shqiptarë dhe sot ne jemi të entuziazmuar që dyfishojmë numrin e fluturimeve që operojmë në Tiranë dhe njoftojmë pesë fluturime të reja nga kryeqyteti i Shqipërisë drejt Italisë. Ne besojmë se këto fluturime përfaqësojnë një hap tjetër të rëndësishëm përpara në zgjerimin e rrjetit tonë, ndërsa më shumë udhëtarë mund të shijojnë tarifat më të ulëta të ‘Wizz Air’ me shërbim të jashtëzakonshëm në bord. Ne mirëpresim të gjithë udhëtarët në bordin e një prej flotave më të reja dhe më të besueshme të Europës”.

“Wizz Air” është kompania më e madhe ajrore në Europën Lindore dhe Qendrore. Flota ajrore e saj përfshin 120 njësi ajrore të tipit “Airbus A320”, “Airbus A321” dhe “Airbus A321neo”. “Wizz Air” fluturon drejt 700 drejtimeve nga 25 baza ajrore.

“Wizz Air” shërben si pikë lidhëse për 154 destinacione nga 45 vende të ndryshme.

Destinacionet Ditët e fluturimeve Data e nisjes Çmimet duke filluar nga**
Tirana – Milano Bergamo Përditë 29 mars 2020 EUR 29.99**
Tirana – Bologna Monday, Wednesday, Friday, Sunday 1 maj 2020 EUR 29.99**
Tirana – Verona Monday, Wednesday, Friday, Sunday 1 maj 2020 EUR 29.99**
Tirana – Venecia (treviso) Tuesday, Thursday, Saturday 1 gusht 2020 EUR 29.99**
Tirana – Pisa (Toskana) Tuesday, Thursday, Saturday 31 mars 2020 EUR 29.99**/atsh

Rritja e numrit të turistëve/ WizzAir 5 destinacione të reja low cost Read More »

Policia shumë herë më e mirëpaguar se dje, për herë të parë në 30 vite forcat speciale nuk janë tradhtuar në operacionet e tyre

Aktualitet, Lajmi i fundit / /

Policia e Shtetit sot është shumë herë më e mirëpaguar se dje dhe për herë të parë në historinë e 30 viteve nuk është trysnuar nga urdhrat nga lart, në kundërshtim me ligjin apo nga influenca të çdo lloj natyre”, – deklaroi sot Kryeministri Edi Rama.

Në inaugurimin e repartit të ri të forcave speciale RENEA, Rama theksoi se “për herë të parë në 30 vite, forcat speciale nuk janë tradhtuar në operacionet e tyre”.

Kryeministri vlerësoi Policinë e Shtetit, përtej të gjithë vështirësisë së jashtëzakonshme në të cilën u vunë si rezultat i provokimeve nga palët demonstruese.

“Në 6 muajt marramendës të protestave të dhunshme të opozitës, u shfaq në sytë e opinionit publik vendas dhe atij të interesuar jashtë Shqipërisë, fytyra e një Policie Shteti profesionale dhe proporcionale në raport me protestën”, – deklaroi Rama.

Rama tha se “vitin e shkuar vijoi procesi i përafrimit të standardeve me policitë simotra të vendeve europiane”.

“U hap rruga për herë të parë në Policinë e Shtetit për studentët ekselentë dhe u forcua më tutje struktura e bazuar në meritokracinë në provesin e rritjes në detyrë në Policinë e Shtetit. U zbatuan për herë të parë metoda të reja kundër krimit, përfshi edhe krimin kibernetik, siç vërteton edhe progresraporti i 2019. U rrit niveli i respektimit të të drejtave të njeriut”, – tha Rama.

Duke u ndalur te investimet në Policinë e Shtetit, Rama tha se “vazhdoi rinovimi i flotës së automjeteve dhe sot nuk ka pikë diskutimi që në çdo aspekt Policia e Shtetit është në ditën e saj më të mirë krahasuar me çdo ditë të djeshme”. “Por nuk ka pikë diskutimi se krahasuar me të nesërmen nuk mjafton”, – tha Rama.

Kryeministri theksoi se “Policia e Shtetit po kryen dhe një proces pastrimi, përmes një vetingu që po ecën me të gjithë kujdesin dhe domosdoshmërinë e nevojshme”.

“Nuk kemi bërë sa kemi dashur për shpërblimin e Policisë së Shtetit, por kemi bërë sa kemi mundur sot. Sot, Policia e Shtetit është shumë herë më e mirëpaguar se dje. Kemi respektuar maksimalisht autoritetin e Policisë së Shtetit, autoritetet drejtuese të saj që për herë të parë në historinë e 30 viteve nuk janë të trysnuar nga urdhrat nga lart, në kundërshtim me ligjin, apo nga influenca të çdolloj natyre. Apo forcave speciale, që nuk janë tradhtuar në operacionet e tyre, për herë të parë në 30 vite”, – tha Rama./atsh

Policia shumë herë më e mirëpaguar se dje, për herë të parë në 30 vite forcat speciale nuk janë tradhtuar në operacionet e tyre Read More »

Rritje e forcës goditëse ndaj krimit në 2019, u sekuestruan mbi 60 milionë euro asete kriminale

Aktualitet, Lajmi i fundit / /

“Vitin e kaluar u shpërbënë më shumë se dyfishi i grupeve kriminale krahasuar me 2018, u shumëfishuan asetet e sekuestruara dhe kishim mbi 60 milionë euro vetëm në 2019”, – deklaroi sot Kryeministri Edi Rama.

I pranishëm në inaugurimin e ambienteve të reja të repartit RENEA, Rama tha se u rrit ndjeshëm forca goditëse ndaj të gjitha veprave të rënda apo më pak të rënda penale.

“Lamë pas një vit domethënës për Policinë e Shtetit, tejet i komplikuar dhe në njëfarë mënyre i pakrahasueshëm me asnjë vit tjetër, gjatë së cilit të gjithë treguesit kryesorë të kriminalitetit dhe veprave të tjera penale njohën rënie. Është për të ardhur keq që në atmosferën e rënduar artificialisht nga disa drejtime dhe në kushtet e një xhungle informacioni krijohet hera-herës përshtypja tejet e gabuar mbi situatën e kriminalitetit në Shqipëri”, – tha Rama.

Ndërkohë, sipas tij, “faktet flasin më së miri për rënien e vazhdueshme të treguesve kryesorë të kriminalitetit”.

“Nga ana tjetër, faktet flasin për një rritje domethënëse të zbulueshmërisë së krimeve nga Policia e Shtetit. Jemi të vetëdijshëm se lufta me krimin nuk mbaron asnjëherë dhe matet thjesht dhe vetëm me raportin e forcës përmes fakteve dhe shifrave mes shtetit dhe krimit. Ky raport në gjithë këto vite ka ardhur duke rritur forcën e shtetit dhe duke ulur forcën e krimit”, – tha Rama./atsh

Rritje e forcës goditëse ndaj krimit në 2019, u sekuestruan mbi 60 milionë euro asete kriminale Read More »

Një spital ultramodern për kirurgjinë/ Pas 90 vitesh në QSUT, kirurgjia shqiptare ka një tempull të ri

Shendetesi / /

Pas 90 vitesh në godinën e vjetër në QSUT, kirurgjia shqiptare ka një tempull të ri, ku gjithçka është fjala e fundit e teknologjisë dhe po ashtu organizimi në funksion të pacientit është në nivelin më të lartë bashkëkohor”, – deklaroi sot Kryeministri Edi Rama në përurimin e spitalit të kirurgjisë në QSUT.

Rama tha se “tashmë kemi një spital ultramodern për kirurgjinë”. “Spitali i ri “Frederik Shiroka” çon në një tjetër nivel shërbimet mjekësore në Shqipëri. 7 salla moderne operacioni për kirurgjinë e përgjithshme, kirurgjinë speciale dhe urologjinë. Aparatura mjekësore të teknologjisë së fundit. Njësi terapie intensive me pajisje bashkëkohore dhe kushte optimale. Laborator i nivelit të lartë teknologjik dhe 120 shtretër dhe dhoma me kushte si në spitalet më të mira të Europës për pacientët”, – tha Kryeministri.

Kryeministri tha se “nuk e ekzagjeroj kur them se ky spital është vepra më e madhe e 90 viteve në Shqipëri në shëndetësinë e vendit, për nga cilësia dhe thellësia e projektit dhe kapacitetet teknologjike që vendos në dispozicion të mjekëve dhe të ekipeve mjekësore”.

“Ndjehem shumë i nderuar dhe njëkohësisht nuk ka kompliment më inkurajues sesa fjalët e profesorit që ka shoqëruar një periudhë të rëndësishme të historisë së kirurgjisë shqiptare dhe fjalia e tij se, kjo është një ëndërr e bërë realitet”, – tha Rama.

Kryeministri u shpreh se “nuk mbaron këtu, sepse ëndrra ime që në momentin e parë ishte që QSUT të transformohet në gjithë perimetrin e saj, në një shëmbëlltyrë të ambicies sonë për shëndetësinë në Shqipëri”.

“Sot, spitali i kirurgjisë ka përfunduar, por QSUT është një kantier. Mjafton rruga për të hyrë deri këtu me shumë njerëz nëpër këmbë, gjë që nuk ndodh në spitalet e tjera. Është nevoja e një vazhdimësie në punën transformuese, si për sa i përket infrastrukturës së brendshme, edhe në hapësirën rreth e rrotull”, – tha Rama.

“Ndaj, jo vetëm puna në vazhdim në spitalin e Sëmundjeve të Brendshme, model i shkëlqyer transformimi, apo me pediatrinë që po ndërtohet nga ana tjetër, por edhe puna me gjithë pjesën e jashtme për të pasur më në fund një parkim, që do të grumbullojë të gjitha mjetet në hyrje dhe do ta kthejë hapësirën brenda perimetrit të QSUT-së një hapësirë ku lëvizin vetëm autoambulancat, është domosdoshmëri”, – tha Rama./atsh

Një spital ultramodern për kirurgjinë/ Pas 90 vitesh në QSUT, kirurgjia shqiptare ka një tempull të ri Read More »

Nga 1 janari 24 shërbime që lidhen me punësimin merren online, Kuqi për ATSH: I kursejmë qytetarit 2 mijë orë pune

Aktualitet / /

Revolucioni dixhital 2020 ka nisur transformimin rrënjësor të marrëdhënies së qytetarit me zyrat e Shërbimit Kombëtar të Punësimit duke i shkurtuar 2 mijë orë pune, të cilat i shpenzonte në radhë pranë sporteleve.

Çdo punëmarrës dhe punëdhënës nga 1 janari i këtij viti po merr online 24 shërbime që lidhen me punësimin.

Drejtore e Shërbimeve të Punësimit dhe Migracionit pranë Shërbimit Kombëtar të Punësimit, Iliada Kuqi, në një intervistë për ATSH-në bën të ditur se në kuadër të reformës për kalimin e shërbimeve dhe ofrimin e tyre online janë regjistruar 24 shërbime në “e-Albania.al”.

“Gamën më të madhe të shërbimeve e zënë lejet e punës. Tashmë çdo punëkërkues e punëmarrës i interesuar për t’u pajisur me një leje pune apo certifikatë regjistrimi për të huajt që janë të punësuar në Shqipëri, mund të aplikojnë online për marrjen e tyre”, deklaroi Kuqi.

Lidhur me parashikimet se sa kohë do t’i kursehet qytetarëve për të marrë këto shërbime online, Kuqi theksoi se, duke u bazuar mbi shifrat e një viti më parë, ku u morën përafërsisht 3500 leje pune dhe certifikata regjistrimi, qytetarit dhe punëdhënësve do t’i kursehen përafërsisht 120 mijë minuta.

Kuqi bën të ditur se në fazën e parë, zyrat e punës do të ofrojnë edhe shërbim në sportele duke asistuar këdo që do të ketë nevojë për të marrë shërbimin online.

“Pranë çdo zyre pune është dhënë udhëzimi që të jenë funksionale edhe sportelet për t’u ardhur në ndihmë aplikantëve për të proceduar dhe për të marrë aplikimet”, theksoi Kuqi.

Deri në fund të vitit, qytetarët shqiptarë do të kenë mundësinë e aplikimeve më të shpejta e më të thjeshta për dokumente, jo vetëm në krejt rajonin, po edhe në krahasim me plot vende të tjera të Europës.

/atsh

Nga 1 janari 24 shërbime që lidhen me punësimin merren online, Kuqi për ATSH: I kursejmë qytetarit 2 mijë orë pune Read More »

Gjykata pushon çështjen Basha, Balla: Vendimi nga gjyqtarë që nuk kanë kaluar Vetingun

Aktualitet, Opinione, Politike / /

Kryetari i grupit parlamentar të PS-së Taulant Balla ka reaguar sot në lidhje me mbylljen e çështjes për kryetarin e PD-së Lulzim Basha, duke deklaruar se vendimi është marrë nga gjyqtarë që nuk kanë kaluar Vetingun dhe që zbatojnë parimin “kap çfarë të kapësh”.

Balla shprehet se “kush mendon se kjo dosje e rëndë me të pandehur kryesor Lulzim Bashën, mund të mbyllet kështu pa u hetuar aspak në themel, pa u marrë në pyetje të gjithë personat e përfshirë, e ka shumë gabim. Kjo nuk është një çështje vetëm e drejtësisë shqiptare. Nxitimi i stimuluar i ndonjë prokurori dhe gjyqtari që nuk e ka kaluar procesin e Vetingut dhe që zbaton parimin “kap çfarë të kapësh”, shfaqi sot këtë teatër të turpshëm për sytë e shqiptarëve dhe jo vetëm”.

Balla shton se “Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë”.

“Apelimi i këtij vendimi absurd dhe rikthimi i çështjes për hetim të plotë duke dhënë edhe garancitë nga Gjykata për marrjen në pyetje të përfituesit të parave Nik Muzin, janë hapat e vetëm për të hedhur dritë e për të bërë drejtësi në këtë dosje të rëndë”, shprehet ai.

/atsh

Gjykata pushon çështjen Basha, Balla: Vendimi nga gjyqtarë që nuk kanë kaluar Vetingun Read More »

Rama citon Shën Terezën: Paqja fillon me një buzëqeshje

Aktualitet / /

Kryeministri Edi Rama zgjodhi sot fjalët e Shën Terezës për të përcjellë mesazhin e tij përmes rubrikës “Fjalë të Shenjta”.

“Paqja fillon me një buzëqeshje”. Ishin këto fjalë të Shën Terezës, që Kryeministri Rama përcolli mëngjesin e sotëm, duke dhënë një tjetër mesazh përmes fjalëve të shenjta.

Duke cituar fjalë të shenjta nga librat e shenjtë, por edhe nga personalitetet botërore, Kryeministri Rama ka përcjellë këto javë apelin e solidaritetit dhe ndihmës njerëzore ndaj të prekurve nga tërmeti i 26 nëntorit./atsh

Rama citon Shën Terezën: Paqja fillon me një buzëqeshje Read More »

Zgjidhet kryetar i PS-së Vlorë Anduel Tahiraj

Aktualitet, Lajmi i fundit, Politike / /

Asambleja e Partisë Socialiste të Vlorës përmbylli me sukses procesin e zgjedhjes së kryetarit për katër vitet e ardhshme, duke zgjedhur me 267 vota Anduel Tahiraj.

Deputeti i Partisë Socialiste qarku Vlorë, Damian Gjiknuri u shpreh sot se “nga 325 anëtarë në votim morën pjesë 292 anëtarë”.

“Kandidati Anduel Tahiraj mori 267 vota, kandidatja Albana Hodaj mori 10 vota ndërsa 15 u deklaruan të pavlefshme”, informoi Gjiknuri.

Ai përgëzoi kandidatët për garën dhe i uroi suksese kryetarit Tahiraj në këtë mandat në krye të PS-së Vlorë./atsh

Zgjidhet kryetar i PS-së Vlorë Anduel Tahiraj Read More »