Shqiptarët do të kenë mundësi të udhëtojnë pa viza drejt Arabisë Saudite.
Këshilli i Ministrave vendosi në mbledhjen e sotme miratimin e memorandumit të bashkëpunimit, ndërmjet Këshillit të Ministrave të Republikës së Shqipërisë dhe qeverisë së Mbretërisë së Arabisë Saudite, për heqjen reciproke të vizave për qëndrim afatshkurtër për mbajtësit e pasaportave diplomatike të shërbimit dhe private për shtetasit e të dyja vendeve.
Vendimi hyn në fuqi pas botimin në “Fletoren Zyrtare”./atsh
Kryetari i Partisë Demokratike Lulzim Basha zhvilloi sot një takim me delagacionin e KiE. Basha deklaroi gjatë këtij takimi se rruga për daljen nga kriza kalon nga zbatimi i standardeve demokratike europiane.
“Gjatë takimit me Presidentin e Kongresit të Autoriteteve Lokale të Këshillit të Europës, Z. Anders Knape, Sekretarin e Përgjithshëm Andreas Kiefer, Presidenten e Dhomës së Rajoneve znj. Ms Gunn Marit HELGESEN, Presidentin e Dhomës së Autoriteteve lokale z. Xavier CADORET, dhe delegacionin që i shoqëronte, ju shpreha mirënjohjen për vëmendjen që ky institucion ka treguar përherë ndaj vendit tonë”-, shprehet Basha.
Basha shton se, “Shqipëria e cila ndodhet në një krizë të thellë politike dhe ekonomike, ku korrupsioni e krimi i lidhur me politikën po gërryen themelet e shoqërisë dhe shqiptarët po largohen çdo ditë, e ka jetike ndihmën dhe mbështetjen e miqve dhe partnerëve tanë”.
“Rruga për daljen nga kriza kalon nga zbatimi i standarteve demokratike europiane, forcimi i rolit të qytetarëve që nis me garantimin e votës, duke ju dhënë mundësi atyre, që të lirë nga diktati i krimit dhe paratë e korrupsionit, të vendosin për qeverinë e tyre vendore dhe qendrore sa më shpejt”-, përfundon Basha./atsh
Deputeti i Partisë Socialiste, Damian Gjiknuri mori pjesë në Uashington, me ftesë të Senatit amerikan, në forumin mbi teknologjinë 5G.
Në këtë forum u diskutua mbi teknologjinë 5G, aspektet e sigurisë dhe rreziqet potenciale nga ndërhyrjet e palëve të treta.
Gjithashtu gjatë këtij forumi u veçua dhe roli i Shqipërisë si vendi i parë që shprehu gatishmërinë për të nënshkruar marrëveshjen me SHBA për sigurinë e rrjeteve 5G.
“Në Uashington, ku me ftesë të Senatit amerikan, pata kënaqësinë të merrja pjesë në forumin ku u diskutua mbi teknologjinë 5G, aspektet e sigurisë dhe rreziqet potenciale nga ndërhyrjet e palëve të treta. U veçua roli i Shqipërisë si vendi i parë që shprehu gatishmërinë për të nënshkruar marrëveshje me SHBA për sigurinë e rrjeteve 5G”, shprehet Gjiknuri./atsh
Luftë ndaj informalitetit biznesit që operon në sektorin veterinar, investime shtetërore në zhvillimin e një procesi monitorimi të sektorit, për garantimin e sigurisë ushqimore në thertore, janë disa risitë që do të sjellin ndryshimet në ligjin për shërbimet veterinare, në Shqipëri.
Sipas relacionit që shoqëron këtë projektligj, “reduktimi i transmetimit të sëmundjeve si rezultat i rritjes së kontrollit të lëvizjes së kafshëve, rritjes së biosigurisë në fermë dhe tregtimit të kafshëve në tregje të miratuara dhe kontrolluara reduktojnë shpenzimet për mjekimin e kafshëve, si dhe dëmin ekonomik për subjektet të shkaktuar nga ngordhja e tyre”.
Projekligji parashikon edhe disa lloje ndikimesh jo të drejtpërdrejta ekonomike, që janë pa vlerë monetare të drejtpërdrejtë në buxhet dhe konsistojnë në formalizimin e subjekteve që zhvillojnë aktivitetin e mbarështimit dhe tregtimit të kafshëve të gjalla dhe produkteve shtazore si dhe rritjen e përgjegjësisë së subjekteve që aktualisht zhvillojnë aktivitetin në këtë fushë si rezultat i forcimit të kontrollit të shëndetit dhe mirëqenies së kafshëve, duke rritur në këtë mënyrë sigurinë e ushqimeve me origjinë shtazore të cilat kanë një risk të lartë në shëndetin e njeriut, e si pasojë shpenzimet për kujdesin shëndetësor, reduktohen.
“Ky ligj zbatohet për operatorët e biznesit që ushtrojnë veprimtaritë e parashikuara në këtë ligj dhe miratimi i këtij ligji do të çojë në uljen deri në reduktim të informalitetit në këtë fushë. Numri i subjekteve që zhvillojnë veprimtarinë në fushën e shëndetit dhe mirëqenies së kafshëve do të rritet dhe licencimi i këtyre veprimtarive që kërkon pajisjen me lejen e mjedisit për secilin subjekt që ushtron aktivitetin, para licencimit”- citon projektligji./atsh
Deputeti i Partisë Socialiste Alket Hyseni u shpreh për paketën Anti KÇK se, “ligji, akti normativ ka parashikuar dy momente të ndryshme. Njëri është ai i verifikimit normal, kur kryhet një procedurë normale nga ana e OFL-së dhe Drejtorit të Policisë dhe një rast ekstra ku merren masat e parandalimit, kur ka dyshime që personi, mund të ndikojë në zhdukjen e provave, pasurive të veprave penale dhe në këto raste ndërhyrja është e menjëhershme”.
Në një intervistë televizive, Hyseni tha se, “ky është ndryshimi mes dy rasteve, që dikujt i është çuar formulari dhe ka 48-orë kohë për ta plotësuar dhe pastaj studiohet dhe analizohet me tërësinë e informacioneve që kanë agjencitë ligj zbatuese dhe dilet në një konkluzion paraprak nga Drejtori i Policisë dhe ia referon prokurorit dhe rasti tjetër është emergjenca siç është vepra penale kur kryhen veprime për të zhdukur viktimën , mjetet me të cilat është kryer krimi”.
“Ndiq paratë, bëja të zezë krimit mundësinë që të përfitojë paratë e krimit”, ky është misioni i aktit normativ , tha ai. Duhet të jemi koshientë që ka njerëz që janë gati të sakrifikojnë vitet burg, mjafton që të përfitojnë produktet e veprës kriminale.
“Nuk ka asnjë dispozitë që përjashton Gjykatën dhe prokurorinë. Nga koha kur vihet në lëvizje mekanizmi i hetimit e deri në kohën e fillimit të procedurave, krimi ka pasur gjithë kohën e nevojshme për të ndikuar në hetim, ashtu sikurse, – tha ai janë të gjitha mekanizmat ligjor për të kërkuar ç’dëmtim për çdo rast të padrejtë”.
Hyseni tha se, deri dje kishte zëra që lufta kundër krimit nuk ishte në nivelet e duhura, sot që po e bëjmë, janë ngritur një batalion njerëzish dhe janë shqetësuar për të drejtat e njeriut. Por duhet të ndajmë luftën kundër krimit dhe të drejtat e njeriut. Sot jemi në një gjë konkrete që vjen si pasojë e një reforme të vazhdueshme. Pak më parë kemi kaluar ligjin për drejtorinë e administrimit të pasurive të sekuestruara dhe ndryshimet këtu, konsistojnë edhe me mënyrën e re të administrimit të aseteve të krimit, që në fund të fundit edhe nëse konfiskohen të shkojnë në të mira publike ti kthehen komuniteteve dhe jo të humbin”.
“Reforma në Drejtësi po vijon me krijimin e disa institucioneve, ndaj është i nevojshme ky ligj që është me efekt veprimi, një vjeçar deri në 31 dhjetor 2020” – tha ai/atsh
Këshilli i Ministrave miratoi sot Aktin Normativ “Për masat parandaluese në kuadër të forcimit të luftës kundër terrorizmit, krimit të organizuar, krimeve të rënda dhe konsolidimit të rendit e sigurisë publike”, ku detajohen masat parandaluese me karakter të përkohshëm në kuadër të forcimit të luftës ndaj organizatave dhe grupeve të strukturuara kriminale, organizatave terroriste, bandave të armatosura, individëve të përfshirë në krime të rënda si dhe procedurat, kompetencat e kriteret për zbatimin e këtyre masave ndaj subjekteve të këtij akti normativ.
Qëllimi i këtij akti normativ është ndërhyrja emergjente dhe me karakter të përkohshëm në kushtet e nevojës së forcimit dhe ashpërsimit të luftës kundër krimit të organizuar, organizatave dhe grupeve të strukturuara kriminale, si dhe çdo grupi tjetër kriminal e terrorist, bandave të armatosura, individëve të përfshirë në krimet e rënda, me synim konsolidimin e sigurisë në vend, përmes rritjes së kapacitetit dhe nivelit të zbulimit, gjurmimit dhe parandalimit të krimit të organizuar, krimeve të rënda, terrorizmit dhe përdorimit prej krimit të organizuar të pronave me origjinë të paligjshme.
Masat parandaluese me karakter pasuror të parashikuara në këtë akt normativ nuk vendosen mbi pasurinë që, para hyrjes në fuqi të këtij akti normativ, është në proces shqyrtimi gjyqësor ose për të cilën është disponuar me vendim gjykate në zbatim të legjislacionit penal, ligjit për parandalimin dhe goditjen e krimit të organizuar, trafikimit, korrupsionit dhe krimeve të tjera nëpërmjet masave parandaluese kundër pasurisë si dhe legjislacionit mbi financimin e terrorizmit.
Subjekte të këtij akti normativ janë:
Personat, që deri në momentin e hyrjes në fuqi të këtij akti normativ janë dënuar me vendim penal të formës së prerë, brenda apo jashtë territorit të Republikës së Shqipërisë, me përjashtim të personave për të cilët ka vendim pafajësie, për:
pjesëmarrje dhe kryerje të krimeve nga organizata kriminale, banda e armatosur dhe grupi i strukturuar kriminal, të parashikuara nga kreu XI i Kodit Penal;
pjesëmarrje dhe kryerje të krimeve nga organizata terroriste e të krimeve për qëllime terroriste, parashikuar nga kreu VII i Kodit Penal;
Sipas këtij akti normativ krijohet Komiteti Kombëtar të Koordinimit për Parandalimin dhe Luftën Kundër Krimit të Organizuar. Komiteti kryesohet nga ministri i Brendshëm dhe ka në përbërje ministrin e Drejtësisë, ministrin e Financave dhe Ekonomisë, Prokurorin e Përgjithshëm, drejtuesin e Prokurorisë së Posaçme kundër Korrupsionit dhe Krimit të Organizuar, drejtorin e Shërbimit Informativ të Shtetit, drejtorin e Përgjithshëm të Policisë së Shtetit, drejtorin e Qendrës së Koordinimit kundër Ekstremizmit të Dhunshëm, drejtorin e Përgjithshëm të Drejtorisë së Parandalimit të Pastrimit të Parave.
Personat e tretë, të cilët rezultojnë pronarë ose bashkëpronarë të aseteve ose pasurive të sekuestruara, brenda afatit 30-ditor të vleftësimit të masës së sekuestros, thirren nga gjykata të ndërhyjnë në proces për të shprehur qëndrimin dhe pretendimet e tyre në lidhje me masën e sekuestros.
Personat e tretë duhet të provojnë se titulli i tyre i pronësisë nuk është i fituar apo i rrjedhur si rezultat i krimit të organizuar, veprimtarisë terroriste apo krimeve të rënda, të përcaktuara në këtë akt normativ.
Masat parandaluese me karakter pasuror do të zbatohen:
Për personat fizikë dhe juridikë të njoftuar nga Komiteti i Sanksioneve të Kombeve të Bashkuara ose një organ tjetër kompetent ndërkombëtar për të urdhëruar ngrirjen e fondeve ose burimeve ekonomike, kur ka dyshime të arsyeshme për të besuar se fondet ose burimet mund të shpërndahen, të fshihen ose të përdoren për financimin e organizatave ose aktiviteteve terroriste, përfshirë ato ndërkombëtare.
Ndaj pasurive të personave të parashikuar në nenin 5, të këtij akti normativ, në pronësi ose të zotëruara në mënyrë të tërthortë nga:
personat e afërm (bashkëshortët, fëmijët, të paralindurit, të paslindurit, vëllezërit dhe motrat, bashkëjetuesit për periudhën e 5 viteve të fundit) për të cilët prezumohet regjistrimi i rremë, përveçse kur provohet e kundërta;
personat fizikë ose juridikë, për të cilët ka të dhëna të mjaftueshme se pasuritë ose veprimtaritë e tyre zotërohen, pjesërisht ose plotësisht, në mënyrë të tërthortë nga personat e parashikuar në nenin 5, si subjekte të këtij akti normativ, ose janë përdorur, kanë lehtësuar apo kanë ndikuar në një formë të caktuar në kryerjen e veprimtarive të jashtëligjshme prej tyre. /atsh
E bërë nga indet e përdorura, ajo do të ndihmojë në eksperimentimin në mënyrë të sigurt me valvulat artificiale të zemrës dhe pajisjet e tjera mjekësore.
E përshkruar në revistën ”Science Robotics”, ajo u krijua nga ekipi i Institutit të Teknologjisë në Masaçusets (MIT) i koordinuar nga Ellen Roche, në bashkëpunim me Universitetin Amerikan të Harvardit, Universitetin e Teknologjisë ”Nanyang” në Singapor dhe Kolegjin Mbretëror të Kirurgëve Irlandezë.
”Pajisja është një përzierje e indeve kardiake dhe një sistemi pompimi robotik: pra emri ‘zemër hibride biorobotike’ është një matricë sintetike që mund të mbështillet rreth një barkusheje dhe të bymehet’, për të vepruar si pompë, siç do të bënte një muskul i zemrës”, deklaruan autorët.
“Ne filluam nga barkushja e majtë sepse është më e vështira për t’u riprodhuar, për shkak të presioneve më të larta në të cilat ajo vepron. Qëllimi i këtij studimi mbi zemrën bionike është që të lejojë në të ardhmen testimin dhe zhvillimin e pajisjeve kardiake më shpejt dhe me kosto më të ulët duke simuluar atë që ndodh natyrshëm në zemrën e njeriut”, theksoi autoria e studimit Ellen Roche./ atsh
Pas “Lasgushit” dhe “Migjenit”, linjës së fluturimeve “Air Albania” i shtohet edhe avioni që mban emrin e poetit të shquar të Rilindjes Kombëtare, “Naimit”, i cili do të mbulojë linjat Verona, Bergamo, Pisa në Itali.
Lajmi u bë i ditur nga kryeministri Edi Rama, i cili theksoi se “ja dhe Naimi po vjen pas Lasgushit e Migjenit, siç jua kam thënë duke marrë mbrapsht shumë nënqeshje e përqeshje, po s’ka gjë, pak nga pak do ta mësojnë edhe nënqeshësit e përqeshësit se unë them atë që bëj dhe bëj atë që them”.
“Tani po ju them pas Naimit vjen Fishta dhe mirëpres me buzëqeshje çdo nënqeshje e përqeshje. (Se mos thotë ndonjëri që e kam harruar Nolin. Jo, gabon, por Nolit i duhet zgjatja e pistës sepse do të bëjë Amerikën, prandaj më duhet ta mbyll me atë fjalën magjike, që aq shumë inat e kanë shumë miq këtu: Durim)”, u shpreh kryeministri Rama.
“Air Albania”, e themeluar në maj të vitit të kaluar me qendër në Tiranë, u krijua nga partneriteti i Albcontrol, një degë e Ministrisë shqiptare të Ekonomisë dhe Turizmit dhe Turkish Airlines. Fluturimi i parë drejt aeroportit të ri të Stambollit, u krye më 19 prill. /atsh
