Irina

Koronavirusi/ Apeli i mjekut Beqiri: Sigurisht që do ia dalim! Qëndroni në shtëpi, do t’i bënit një shërbim gjigant familjes tuaj

Aktualitet, Lajmi i fundit, Opinione, Shendetesi / /

A do ja dalim? Sigurisht që Po! Me një kusht, askush të mos takojë askënd për disa ditë, më e mira 2 javë. Qëndroni në shtëpitë tuaja duke evituar çdo kontakt me persona të tjerë dhe do t’i bënit një shërbim gjigant familjes dhe atdheut tuaj, vetizolohuni”.

Ky është apeli i mjekut të njohur Arben Beqiri, i cili ndan këshillat e tij për tejkalimin e situatës së krijuar nga koronavirusi.

“A do ja dalim? Këtë pyetje ma bëjnë këto ditë shumë miq, të afërm, pacientë të shqetësuar nga lajmet e përditshme mbi pandeminë nga COVID-19. Me keqardhje konstatoj që rrugët e Tiranës janë të mbushura dhe vetëm ndonjë maskë tek-tuk të kujton që nuk është ditë e zakonshme pushimi”, thekson ai.

Beqiri thekson se “nuk ka të ngjarë që ne ta kalojmë këtë situatë më lehte se vendet e tjera, por duke qenë pak më të vonuar në prekjen nga kjo pandemi kemi mundësi të mësojmë shumë nga eksperienca e të tjerëve”.

“Nuk ekzistojnë as veprime, masa apo buxhete magjike që të mund të zgjidhin situatën. Por ekzistojnë të gjitha premisat që përhapja e këtij infeksioni tepër ngjitës të kufizohet në maksimum! Nuk duhet të lejojmë që për çdo dy pacientë që dalin nga terapia intensive 5 të rinj të shtrohen në terapinë intensive. Kjo do të bllokonte plotësisht sistemin shëndetësor”, u shpreh ai.

Beqiri vlerësoi se “mjekët dhe infermierët po punojnë dhe do të vazhdojnë të punojnë pa u lodhur për t’u ardhur në ndihmë të sëmurëve. Me kënaqësi konstatoj që vlerësimi për ta sot është në maksimum. Shpresoj që të mos harroni, dhe që kjo të vazhdojë edhe pas kësaj pandemie”./atsh

Koronavirusi/ Apeli i mjekut Beqiri: Sigurisht që do ia dalim! Qëndroni në shtëpi, do t’i bënit një shërbim gjigant familjes tuaj Read More »

Bashkëpunim gjermano-francezo-shqiptar në hulumtimin e qytetit antik të Apolonisë

Aktualitet, Art-Kulture / /

Qendra e gërmimeve në Apoloni, në afërsi të Fierit, është një vend ku sot takohen arkeologe dhe arkeologë nga shtete të ndryshme.

Gjatë një vizite me studiuese dhe studiues të ndryshëm ambasadori gjerman në Shqipëri, Peter Zingraf, ambasadorja e Francës në Shqipëri, Christina Vasak dhe ajo greke Sophia Philippidou vizituan qendrën e gërmimeve në Apoloni.

“Ambasadori Gjerman Zingraf dhe kolegia franceze Christina Vasak si dhe ajo greke Sophia Philippidou mundën të bindeshin lidhur me fraktin, se sa mirë funksionon bashkëpunimi gjermano-francezo-shqiptar në hulumtimin e këtij qyteti antik”, thekson ambasada gjermane në një njoftim.

“Në kuadrin e një takimi ndërkombëtar në kontekstin e muajit të frankofonisë, ekipe të ndryshme kishin patur mundësi të prezantonin paraprakisht në Tiranë rezultatet e punës së tyre”, shton Ambasada e Gjermanisë në Tiranë./atsh

Bashkëpunim gjermano-francezo-shqiptar në hulumtimin e qytetit antik të Apolonisë Read More »

Çdo qytetar të bëjë detyrën e vet, masa drastike në terren

Aktualitet / /

Kryeministri Edi Rama i bëri thirrje sot çdo qytetari që të bëjë detyrën e vet, ndërsa theksoi se masa drastike janë marrë në terren për personat e kthyera nga vendet e prekura.

“Mënyra se si ne reagojmë dhe masat që ne do të marrim ndryshojnë edhe formën që merr epidemia dhe aftësinë për ta vënë në kontroll pasi nëse shpërthen kolapson sistemin. Kolapsoi në Itali, ka ardhur puna që Italia trajnon mjekë të profileve të tjera për të bërë reanimatorin, të mos ketë pajisje, sepse masat u morën në një ritëm që rezulton të mos jetë i duhuri”, tha Rama.

Ai kërkoi që të mos bëhen karshillëqe, pasi koronavirusi është kërcënim jo vetëm personal, por edhe për të afërmit e miqtë. “Në Itali u bënë shumë karshillëqe nga të rinj e të reja duke thënë se nuk ‘pyesim për koronën’, ‘këto nuk ndihmojnë’”, tha Rama.

Kryeministri paralajmëroi se tani që flasim do të fillojnë të dalin forcat e Policisë dhe ato ushtarake për të kontrolluar ata që duhet të jenë në shtëpi, sepse ata duhen mbrojtur, dhe familjet e tyre, se nesër mund të jetë vonë./atsh

Çdo qytetar të bëjë detyrën e vet, masa drastike në terren Read More »

Manastirliu: Në rast se nuk zbatohen rregullat, mund të kemi disa qindra të prekur me koronavirus

Aktualitet / /

Ministrja e Shëndetësisë dhe Mbrojtjes Sociale, Ogerta Manastirliu deklaroi sot se në rast se qytetarët nuk respektojnë rregullat dhe masat drastike të ndërmarra nga qeveria, sipas planit parashikohen qindra të prekur me koronavirus.

“Plani ynë i bazuar në planin e Organizatës Botërore të Shëndetësisë në tre drejtime kryesore, kufizo përhapjen e virusit, vono përhapjen e tij, lehtëso pasojat e tij ka rëndësi edhe në atë që po bëjmë sot si qeveri dhe ministri e Shëndetësisë duke zbatuar një plan masash agresiv, një plan masash i cili ndryshon çdo ditë në bazë të dinamikës dhe të gjithë ngjarjeve që ndodhin në territor në raport me epidemiologjinë, në raport me zbulimin e rasteve dhe kontakteve të tyre. Është e rëndësishme për të theksuar dhe për t’iu dhënë një informacion sesi qëndron e vërteta kur flasim për zbatimin e rregullave dhe prandaj e kemi vënë theksin në zbatimin e rregullave. Sa më shumë masa marrim në këtë moment duke forcuar ditë pas dite masat, aq më shumë, aq në kurbën normale që është kurba lejla, ne do të vijojmë normalitetin e pandemisë sa i përket asaj që do të ndodhë në Shqipëri. Ne kemi realizuar disa skenarë. Sigurisht që këto janë skenarë që rifreskohen çdo ditë, janë fleksibël. Në skenarët tanë ne parashikojmë disa qindra të prekur në Shqipëri, të cilëve padyshim duhet t’u ofrojmë mundësinë që të marrin shërbimin adekuat në sistemin tonë shëndetësor”, -u shpreh Manastirliu.

Duke iu referuar grafikut të Qendres së Kontrollit dhe Parandalimit të Sëmundjeve, ajo tha se “në këtë grafik të thjeshtë dhe shumë të kuptueshëm të Qendrës së Kontrollit dhe Parandalimit të Sëmundjeve i cili thotë se nëse ne nuk i zbatojmë rregullat e nëse nuk merren masat e duhura, atëherë vendos në rrezik sistemin shëndetësor sepse nuk arrin dot sistemi shëndetësor të përballojë fluksin që do të shkojë në spitale për raste të cilat duhet të trajtohen. Dhe duhet të kuptojmë diçka që sistemi duhet të jetë i përgatitur jo vetëm për raste që janë dhe duhet të trajtohen me koronavirusin e ri por ndërkohë duhet të trajtojë të gjitha rastet të cilat vuajnë nga sëmundje të tjera, të cilat kanë nevojë të marrin shërbim shëndetësor”.

Ministrja u bëri apel edhe mjekëve e infermierëve të jenë të kujdesshëm.

“Thirrja edhe njëherë: sa më shumë ne të zbatojmë masat që qeveria ndërmerr aq më pak kosto do të kemi. Ndaj është momenti i duhur që të reflektojmë për sjelljen individuale. Pikërisht, kjo kurbë apo këto kurba na mësojnë si të sillemi, çfarë të masash të marrin dhe të vlerësojmë kapacitetet tona. Sigurisht që, kapacitete tona varen nga shumë elementë që është numri i mjekëve, infermiereve, mundësia për t’u ruajtur për mjekët dhe infermierët është shumë e rëndësishme nëpërmjet materialeve të mbrojtjes personale, pajisjeve të mbrojtjes personale, sepse ka shumë rëndësi që mjekët dhe infermierët të mos preken nga virusi. Kam një thirrje për mjeket dhe infermierë: ju lutem të jeni të kujdesshëm dhe mos neglizhoni në përdorimin e mjeteve mbrojtëse sipas OBSH”, -tha ndër të tjera Manastirliu./atsh

Manastirliu: Në rast se nuk zbatohen rregullat, mund të kemi disa qindra të prekur me koronavirus Read More »

COVID 19/ Ushtria në mbështetje të Policisë për kontrollet, postblloqe në Tiranë dhe në rrethe

Aktualitet, Lajmi i fundit / /

Në kuadër të masave të ndërmarra nga qeveria për të minimizuar mundësinë për përhapjen e koronavirusin, Covid 19, Shefi i Shtabit të përgjithshëm të Forcave të Armatosura, Bardhyl Kollçaku ka nisur inspektimet në të gjitha postoblloqet e ngritura në Tiranë.

Sipas njoftimit të Ministrisë së Mbrojtjes, Shefi i Shtabit të FA, Kollçaku dhe komandanti i Policisë Ushtarake, Altin Kurti, nisën inspektimet nga piramida, për të kaluar në të gjitha postoblloqet e ngritura nga FA-të dhe Policia në Tiranë.

Kollçaku deklaroi se detyrat e FA-ve janë në mbështetje të Policisë së Shtetit për të kontrolluar apo sensibilizuar qytetarët, kryesisht ata që kanë udhëtuar në Itali e Greqi. Sipas tij, nuk ka një afat se sa do të zgjasë ky plan por deklaroi se do të jenë edhe në qytete të tjera jo vetëm në Tiranë.

“Detyrat e FA-ve në këto moment janë që të jenë në mbështetje të policisë së shtetit për të kontrolluar, sensibilizuar qytetarët, kryesisht ata që kanë udhëtuar në Itali e Greqi për t’i detyruar të vetëkarantinohen. Do të vazhdojnë për aq kohë sa është e nevojshme. Planet tona janë fleksibël. Aktualisht shtrihen dhe në qytete të tjera të Shqipërisë, ka një plan të detajuar”,- deklaroi Kollçaku.atsh

COVID 19/ Ushtria në mbështetje të Policisë për kontrollet, postblloqe në Tiranë dhe në rrethe Read More »

Masat ndaj koronavirusin/ Pezullohet përkohësisht veprimtaria e organeve administrative shtetërore të Policisë Rrugore

Aktualitet, Lajmi i fundit, Problematika / /

Në kuadër të masave të marra me qëllim parandalimin e përhapjes së coronavirusit, Drejtori i Përgjithshëm i Policisë së Shtetit Ardi Veliu ka nxjerrë urdhrin “Për pezullimin e përkohshëm të veprimtarisë dhe shërbimeve të OASH-ve për trajtimin e kundërvajtjeve administrative”.

Nisur nga situata e krijuar në vend, në kushtet e mbrojtjes dhe të parandalimit të përhapjes së virusit COVID 19, të nevojës për shmangien e kontakteve fizike të punonjësve të Policisë Rrugore në seancat e verifikimeve të kundërvajtjeve administrative prej organeve administrative shtetërore vendore, me qëllim vijimin e procedurës administrative dhe të shqyrtimit në një format në mungesë të kundërvajtësit dhe kufizimin e kontakteve fizike, deri në normalizimin e situatës shëndetësore në vend, ky urdhër, për një periudhë dyjavore, parashikon:

Pezullimin e veprimtarisë së organeve administrative shtetërore të Policisë Rrugore pranë sektorëve të Policisë Rrugore në Drejtoritë Vendore të Policisë, në mënyrën si zhvillohet sot me prezencën e kundërvajtësit.

Aktiviteti administrativ i OASH-ve për shqyrtimin e masave plotësuese dhe ato me gjobë do të vazhdojë të zhvillohet në mungesë të kundërvajtësve, duke shmangur praninë e tyre në zhvillimin e seancave verifikuese dhe të shqyrtimit të tyre.

Vendimet e marra nga ana e OASH-ve do t’u dërgohen me postë të zakonshme kundërvajtësve dhe menjëherë, sapo vendimi të merret, pasqyrohet në E-GJOBA.

Agjentët verifikues dhe patrullat e Policisë Rrugore, në çdo rast që konstatojnë shkelje rrugore që janë objekt shqyrtimi pranë OASH-ve, i transmetojnë kundërvajtësit detyrimin për mosparaqitjen në OASH dhe i kërkojnë, kundrejt miratimit të tij, një numër telefoni celular, të cilin e vendosin në rubrikën e “adresës” tek procesverbali i konstatimit të shkeljes, në të gjitha kopjet. OASH-ja respektive, në rastet kur është e mundur, i dërgon në numrin e deklaruar nga qytetari në aplikacionin WhatsApp, vendimin në formatin PDF. Njëkohësisht, me procedurë të rregullt postare i dërgon kundërvajtësit, vendimin e firmosur dhe vulosur.

Në të gjitha rastet do të respektohen afatet e përcaktuara në Kodin Rrugor./atsh

Masat ndaj koronavirusin/ Pezullohet përkohësisht veprimtaria e organeve administrative shtetërore të Policisë Rrugore Read More »

Koronavirusi/ Nuk është çështja sa trima apo guximtarë jemi, por sa të vetëdijshëm dhe sa solidarë

Aktualitet, Lajmi i fundit / /

Kryeministri Edi Rama ka apeluar sot të gjithë që të shmangin sa më shumë lëvizjet për të mos përhapur koronavirusin.

“Fëmija yt nuk rrezikohet në jetën e tij larg qoftë, por duke pasur kontakte të afërta fizike jashtë shtëpisë mund ta transportojë virusin jashtë shtëpisë. Vajza dhe djem që me të gjithë të drejtën e Zotit dhe të robit kanë dëshirë që të shkojnë dhe të argëtohen në mbrëmje duhet ta dinë që u bënë shumë party në Milano me temën ne s’pyesim për koronën. Ashtu sikundër u bënë edhe shumë shfaqje aerobike në palestra ne i thyejmë brinjët koronës. Nuk janë gjëra të duhura, përkundrazi janë me dëm të madh për të gjithë’, tha Rama.

“E dyta ti mund të mos e marrësh vesh kurrë që e kishe koronavirusin. 80% s’kanë për ta marrë vesh kurrë sepse e ke dhe s’ka asnjë simptomë, por t’i e transporton dhe tek dikush shfaqet një simptomë dhe tek dikush tjetër që është hallka më e dobët godet. Kjo është arsyeja që nuk është çështja sa trima apo guximtarë jemi, por sa të vetëdijshëm dhe sa solidarë jemi. Sa të gatshëm jemi, duke sakrifikuar një stil jetese që është e përditshmja jonë dhe duke e vendosur të përditshmen tonë në atë pikë ku jemi të frontit të madh të një lufte me një armik të padukshëm”, theksoi Rama.

Për mediat, Rama tha se, ”sigurisht që mund të jemi të detyruar që të shkojmë larg edhe në raport me mediat, por midis të shkuarit larg në raport me mediat, për t’u siguruar që nuk ka burime faktesh alternative, sepse faktet janë një. Mendimet janë alternative dhe me këtë rast nuk është koha për të dhënë mendime për çështje që janë strikte të kufizuara në fushën e një grupi të ngushtë njerëzish, ekspertësh dhe autoritetesh të shëndetësisë, por padyshim që shumë më mirë është që me atë fuqi dhe me atë mundësi për të komunikuar me ata që ju ndjekin të bëni më të mirën që në këtë luftë të fitojë qetësia, vendosmëria, informacioni dhe gatishmëria dhe jo paniku, pasiguria, ankthi e kështu me radhë”.

“E përsëris këtu s’ka vend për frikë. Nëse sot mesazhi im ishte ndryshe nga ditët e tjera, sepse sot është një ditë ndryshe nga ditët e tjera. Nesër do të jetë një ditë tjetër nga ditët e tjera. Vetëm kështu ne mund ta fitojmë këtë luftë. Ndryshe na merr përpara inercia e të marrurit me sportivitet të një beteje që është luftë nuk është lojë”, tha Rama./atsh

Koronavirusi/ Nuk është çështja sa trima apo guximtarë jemi, por sa të vetëdijshëm dhe sa solidarë Read More »

Manastirliu-Bashës: Mos e prishni gjakun e shqiptarëve duke përhapur panik

Aktualitet, Debat, Opinione, Problematika / /

Ministrja e Shëndetësisë dhe Mbrojtjes Sociale, Ogerta Manastirliu reagoi sot ndaj deklaratave të kreut të Partisë Demokratike, Lulzim Basha në lidhje me maskat e shpërndara për personelin mjekësor.

“Zoti Basha, Ministria e Shëndetësisë dhe Mbrojtjes Sociale, të cilën për turpin tuaj, ju e quani “rrumpallë”, ka privilegjin të jetë e rrethuar nga njerëz dhe profesionistë të shkëlqyer, të cilët janë vënë në krye të kësaj lufte të paparë që ka përfshirë të gjithë botën. Janë bluza të bardha me autoritet dhe integritet, të cilët në jetën e tyre private besojnë në ide e alternativa të ndryshme politike”, thekson Manastirliu.

“Janë ekspertë të shkëlqyer të shëndetit publik. Ata janë njerëz që u shërbejnë çdo ditë qytetarëve, pa dallim. Mes tyre ka edhe simpatizantë të partisë tuaj. Por në punë, ata e kanë aftësinë që të lënë në shtëpi aftësitë politike. Dhe sot janë të gjithë bashkë, në këtë përpjekje të jashtëzakonshme kundër një epidemie që po sfidon të gjithë botën, dhe padyshim edhe Shqipërinë”, shton ajo.

“Juve ndoshta nuk e kuptoni sa keq dukeni kur sajoni, gënjeni apo shani dhe fyeni ministrinë e tyre. Sepse Ministria e Shëndetësisë, është më në fund ministria e tyre. Nuk është e Ministres, as e partisë, aq më pak e qokave si deri dje. Unë jam ministrja e tyre dhe ata janë graviteti i punës sime, janë fuqia e angazhimit tim Ata janë burimi i sigurisë që kam, se ne do t’ia dalim kësaj lufte! me ose pa ju zoti basha, ne do t’ia dalim!”, thotë Manastirliu

“Ka njerëz të nderuar, profesionistë të respektuar, në atë që ju e quani “task-forca opozitare”. Po opozitën e kujt jeni duke bërë bashkë, ju dhe politikanët e maskave të skaduara zoti Basha? Ju pyes sepse ju s’keni nevojë për ata që të sajoni, gënjeni, shani apo fyeni ministrinë që është edhe e tyrja! Nuk ju duhen farsa si e sotmja, ku tre politikanë me “bombë në duar” pozonin me një qendër shëndetësore në sfond për të frikësuar njerëzit dhe profesionistët e shëndetit. Ju s’keni nevojë për ata, për të vazhduar me avazin e vjetër të akuzave e të kërcënimeve me prokurori. Personeli mjekësor sot nuk ka nevojë për “detektivët” tuaj, po për mbështetjen e të gjithëve, përfshirë edhe ju!”, shton ajo.

Ne, thekson Manastirliu, “Ministria e Shëndetësisë e kam fjalën, nuk jemi as të përsosur as të pagabueshëm. Po si mundët të na quani kriminelë edhe sot, kur Shqipëria e tërë i ka sytë nga personeli ynë mjekësor që sot jemi një, bashkë me çdo shqiptar dhe për çdo shqiptar?! Unë jam mësuar të mos habitem nga agresiviteti i retorikës suaj. Por kjo e sotmja më habiti. Një rënie e fortë në standartin e komunikimit, në kohën më të gabuar të mundshme”.

“Shpresoj fort të ketë qenë një lajthitje, si ajo “task-forca” shëndetësore opozitare, të cilës nuk i gjen dot një të dytë në asnjë vend të botës. Ju ftoj sinqerisht që, deri kur të kemi përfunduar këtë betejë me virusin, të heshtni, atëherë kur nuk keni ç’të thoni. Nuk është luftë politike kjo, Z. Basha. Eshtë luftë për shëndetin dhe sigurinë e mbarë popullit. Mua këtu do të më keni. Kur ta kemi mundur epideminë, do të keni kohë që të rifilloni me avazin tuaj. Por deri atëherë, kujtojini vetes se nuk jeni vetëm politikan. Jeni burrë, prind, bir i një familjeje. Mos e prishni gjakun e të gjitha familjeve të Shqipërisë, duke përhapur panik dhe folur në hava.Të flasësh kohë në kohë krize si kjo e epidemisë, nuk është thjesht e pajustifikueshme. Eshtë e dënueshme në çdo aspect”, thotë Manastirliu./atsh

Manastirliu-Bashës: Mos e prishni gjakun e shqiptarëve duke përhapur panik Read More »