Irina

Sezoni turistik/ 1100 udhëtarë me tragete vetëm ditën e sotme në portin e Vlorës

Aktualitet, Turizem / /

Në portin e Vlorës, i dyti më i madh në vend, ditët e para të gushit kanë shënuar një fluks të lartë udhëtarësh, të cilët kanë ardhur nga vendi fqinj, Italia.

“Gjatë ditës së sotme në portin e Vlorës kanë ardhur rreth 1100 pasagjerë, 102 autovetura dhe 22 autobusa”, bën të ditur porti i Vlorës.

Sipas portit, një numër i konsiderueshëm i udhëtarëve janë emigrantë që kthehen për pushime në atdhe, por edhe turistë që vizitojnë Shqipërinë.

Autoritetet portuale kanë punuar me intensitet të lartë për përpunimin e udhëtarëve dhe automjeteve, ndërsa kanë marrë të gjitha masat për ti shërbyer sa më mirë fluksit të ditës së sotme e në vazhdimësi.

“Me hapjen e terminalit të ri përpunimi i pasagjerëve dhe i automjeteve ka qënë cilësor dhe i shpejtë”, shprehet porti.

Vetëm gjatë fundjavës që lamë pas në portin e Vlorës kanë ardhur rreth 3050 pasagjerë dhe 440 automjete./atsh

Sezoni turistik/ 1100 udhëtarë me tragete vetëm ditën e sotme në portin e Vlorës Read More »

Rama publikon momente me Zahon në bregdet

Aktualitet / /

Bregdeti i jugut të Shqipërisë përveç turistëve vendas dhe të huaj është zgjedhja edhe e Kryeministrit Edi Rama në këto ditë vere.

Në një foto të publikuar sot në rrjetet sociale, Kryeministri Rama shfaqet me djalin e tij të vogël 5 vjeçar, Zahon.

Duke e cilësuar “Fotoja e ditës”, kreu i qeverisë, bashkë me djalin e tij të vogël kanë fiksuar në fotografi një moment nga qëndrimi i tyre buzë detit Jon.

Kjo nuk është hera e parë që Rama poston fotografi me të birin, Zaho në momente nga jeta e tyre e përditshme./atsh

Rama publikon momente me Zahon në bregdet Read More »

Ëmbëlsirat nëse konsumohen në kohën e duhur nuk janë të dëmshme për shëndetin

Shendetesi / /

Kur flitet për ëmbëlsirat, asnjë nuk i reziston dot dhe mund t’i konsumojë ato në çdo moment të ditës. Ka shumë persona që mendojnë se është më mirë që ëmbëlsirat të konsumohen në mëngjes, sepse trupi e asimilon gjatë ditës. Por, cila është e vërteta?

Në të vërtetë ëmbëlsirat duhet të konsumohen rreth orës 5 pasdite, kohë kur në trup ekziston sasia më e vogël e insulinës. Kështu nuk do të prishni punën e pankreasit dhe metabolizmi do të jetë i balancuar. Sidomos gjatë pushimeve, adhuruesit e ëmbëlsirave e kanë zakon të hanë një copë ëmbëlsirë gjatë darkës. Sipas nutricionistëve, nuk ka asgjë të keqe të hash diçka të ëmbël pas darke, por, kuptohet, në sasi të moderuar. Nëse nuk do ta kontrolloni veten për ëmbëlsira pas darke, sasia e sheqerit do të rritet dhe rezervat në trup po ashtu.

Ekspertët thonë se kur hani shumë ëmbëlsira gjatë një dite, sasia e madhe e sheqerit të bën të ndihesh i zemëruar dhe të kërkosh më shumë ëmbëlsira të tjera, kjo sepse rritet presioni i gjakut. Prandaj, në rastet kur e kuptoni se e keni tepruar me ëmbëlsira, hani proteina dhe fibra, shkoni në stërvitje dhe konsumoni ushqime probiotike. /atsh

Ëmbëlsirat nëse konsumohen në kohën e duhur nuk janë të dëmshme për shëndetin Read More »

Çokollata e zezë largon depresionin

Shendetesi / /

Është një lajm që me siguri do të kënaqë dashamirësit e ”arit të zi”.

”Çokollata e errët, e konsumuar rregullisht, mban larg depresionin, duke ulur rrezikun deri në 70%”, sipas një studimi të ri, botuar në revistën ‘’Depression and Anxiety’’.

Studimi u krye në 13 626 njerëz që morën pjesë në Anketën Kombëtare të Provimit të Shëndetit dhe të Ushqyerit ndërmjet viteve 2007-2008 dhe 2013-2014.

Konsumi i përditshëm i çokollatës u llogarit duke i pyetur ata të kujtonin se çfarë kishin ngrënë në dy periudha 24-orëshe midis tre dhe 10 ditëve distancë, ndërsa simptomat depresive u vlerësuan duke përdorur një pyetësor specifik.

Në përgjithësi, 11,1% raportuan se hanin rregullisht çokollatë, ku 1,4% prej tyre preferonin të zezën.

Sarah Jackson, i cili drejtoi studimin, thotë se rezultatet japin “disa prova” që konsumi i çokollatës veçanërisht asaj të zezës mund të zvogëlojë rrezikun e depresionit./atsh

Çokollata e zezë largon depresionin Read More »

900 të rinj francezë promovojnë Vlorën si destinacion europian të turizmit

Aktualitet, Lajmi i fundit, Turizem / /

900 të rinj francezë qëndruan në Vlorë për ta prezantuar atë si një destinacion të mirëfilltë në rrjetin e qyteteve turistike europiane, në kuadër të turneut sportiv, kulturor dhe solidariteti Europ’Raid.

Të rinjtë francezë të mahnitur nga bukuria e qytetit bregdetar, që ofron plazhe, monumente të shumta kulturore dhe peizazhe fantastike, zgjodhën për të tretin vit radhazi përsëri Vlorën për ta bërë pjesë të turit të tyre.

Europ’Raid, përfaqëson një nismë që nxit dhe konkretizon idenë për të përshkuar me makina më shumë se 10000 km rrugë përgjatë 23 vendeve europiane dhe për t’i promovuar ato .

Të rinjtë u vendosën në plazhin e vjetër ku shijuan perëndimin e diellit, ushqimin dhe aktivitetin e përgatitur për ta.

Ata festuan deri në orët e para të mëngjesit nën tingujt e muzikës në një disko verore.

Organizatori i Europ’Raid, Benjamin Laidin, u shpreh se “jam shumë i lumtur që jam kthyer sërish në Vlorë, për herë të tretë dhe me një numër akoma më të madh turistësh. Më pëlqeu shumë Vlora, ishte një organizim perfekt dhe sigurisht vitin tjetër do të vijmë përsëri në këtë qytet të bukur”.

Ndërsa një i ri francez shprehet se “jemi të lumtur që jemi në Shqipëri dhe kemi shumë dëshirë të udhëtojmë dhe të zbulojmë vendin”.

Europ’Raid konsiderohet një ngjarje unike kulturore, që synon zbulimin e një trashëgimie, një kulture, një historie, një populli … Nga Mesdheu deri në Detin e Zi, nëpërmjet Karpateve dhe maleve Tatra, Rinit dhe Danubit, në rivierën shqiptare, Europ’Raid rizbulon peizazhin natyror, qytetet e famshme dhe vende historike europiane: si sheshin e Shën Markut në Venecia, Akropolin e Athinës, xhamitë e Stambollit, Murin e Berlinit, apo kanalet e Amsterdamit.

Europ’Raid gjithashtu do të thotë më tepër kontakte mes popujve. Çdo natë, me dëshirën për të ndarë kulturën e tyre, pjesëmarrësit zbulojnë kultura lokale të vendeve ku kalojnë.

Me makina Peugeot 205, ata duhet të udhëtojnë më shumë se 10.000 kilometra, gati 450 kilometra në ditë, duke e bërë Europ’Raid një nga turet sportive më të gjata në botë.

Turizmi shqiptar është futur tashmë në rrjetin e vendeve turistike europiane dhe botërore./atsh

900 të rinj francezë promovojnë Vlorën si destinacion europian të turizmit Read More »

Betohet kryebashkiaku i Selenicës, Gjiknuri: Rruga e Lumit të Vlorës, konfirmon fuqinë transformuese të PS

Aktualitet, Lajmi i fundit, Politike / /

Gjatë ditës së sotme është konstituuar Këshilli Bashkiak i Selenicës dhe u betua kryetari i bashkisë, Pëllumb Binaj.

Ish-kryetari i Bashkisë Selenicë, Përparim Shametaj (njëkohësisht edhe kryetar i PD-së) është larguar duke i lënë zyrën kryebashkiakut të zgjedhur në 30 qershor.

Pas marrjes së detyrës së kryetarit të ri, Damian Gjiknuri, koordinator politik i PS-së në qarkun e Vlorës vlerësoi ish-kryetarin.

“Ka qenë një proces politik i rëndësishëm me vështirësitë e tij. Në Selenicë patëm disa kandidatë dhe këtu u bë një garë e vërtetë, reale dhe ku doli përfaqësuesi i zgjedhur nga populli. Tani i takon Kryetarit të Bashkisë për të krijuar urat e komunikimit, për të qenë pranë dhe atyre qytetarëve që votuan kundër apo që nuk morën pjesë në votim”, tha Gjiknuri.

“Rikthimi i kësaj njësie vendore në drejtimin e Partisë Socialiste është garancia më e mirë për të ecur në drejtimin e duhur për Selenicën që duam. Rruga e Lumit të Vlorës si një premtim që po realizohet e konfirmon më së miri fuqinë transformuese të PS në qeverisje”, theksoi Gjiknuri.

Kryetari i Bashkisë së Selenicës, Binaj i falënderoi të gjithë për këtë kurorëzim të suksesshëm të këtij aksioni politik për zgjedhjet e 30 qershorit.

“Unë që nesër nis punën për të përballuar sfidat që janë në këtë bashki. Bashkë me Këshillin Bashkiak, bashkë me të gjithë përfaqësuesit e forcës që unë përfaqësojë, do të nisim punën për të përballuar katërcipërisht punët e mëdha që na presin përpara”, tha Binaj në fjalën e tij./atsh

Betohet kryebashkiaku i Selenicës, Gjiknuri: Rruga e Lumit të Vlorës, konfirmon fuqinë transformuese të PS Read More »

Vlorë, fluks i lartë udhëtarësh vendas e të huaj, 3050 në fundjavën e parë të gushtit

Aktualitet, Turizem / /

Sezoni turistik i këtij viti vijon të ketë një fluks të lartë udhëtarësh dhe turistësh të huaj, në portin Vlorës, i dyti më i madh në vendin tonë.

“Gjatë kësaj fundjave në portin e Vlorës kanë ardhur rreth 3050 pasagjerë dhe 440 automjete”, bën të ditur porti i Vlorës.

Autoritetet portuale kanë marrë të gjitha masat për të përballuar fluksin e emigrantëve dhe turistëve që hyjnë apo dalin përmes portit detar të Vlorës, duke hapur sportele shtesë.

Gjatë sezonit të verës në port po punohet me 6 sportele në terminal për përballimin e fluksit të udhëtarëve dhe 3 për makinat.

Qyteti i Vlorës gjatë këtij sezoni turistik është kthyer në një nga destinacionet më të preferuara për vizitorët vendas dhe të huaj. Në portin e Vlorës gjatë muajve të verës operojnë edhe anije turistike, të cilat nisen çdo ditë drejt ishullit të Sazanit dhe gadishullit të Karaburunit./atsh

Vlorë, fluks i lartë udhëtarësh vendas e të huaj, 3050 në fundjavën e parë të gushtit Read More »