Irina

Ministrja e Kulturës, Elva Margariti ka shprehur ngushëllimet familjarëve të aktorit Shpëtim Zani, i cili u nda sot nga jeta.

Ministrja thotë se Zanit iu desh vetëm një rol për të hyrë në historinë e kinematografisë shqiptare. “Shpëtim Zanit iu desh vetëm një rol që të hynte në historinë e kinematografisë shqiptare. Ai u nda nga jeta heshtur, por duke lënë pas një portret të pazëvendësueshëm, atë të Colit, në filmin “Debatik”. Lamtumirë djaloshi i përjetshëm!” – thotë Margariti.

Ishte viti i largët 1960 kur regjisori i mirënjohur Hysen Hakani e përzgjodhi atë për rolin kryesor në filmin “Debatik” (1961), një djalë i shkathët, që binte në sy për lojën e bukur, krejt natyrshëm, dhe që fitoi admirimin dhe dashurinë e publikut për vite e vite me radhë.

Shpëtim Zani, i njohur për rolin e Colit në filmin “Debatik”, është ndarë nga jeta ditën e sotme, si pasojë e një ataku kardiak. /atsh

Jo vetëm festë, urime për më shumë shpresë dhe harmoni, por edhe ftesë për çdo vizitorë, turist e pelegrin për të firmosur peticionin kundër shkatërrimit të malit të Tomorit, pro mbrojtjes dhe shpalljes së tij Park Kombëtar ishin pjesë e Pelegrinazhit në malin e shenjtë të Tomorit në Berat.

Në ceremoninë e organizuar me këtë rast ishin të pranishëm presidenti Ilir Meta, ministri i Turizmit dhe Mjedisit, Blendi Klosi, Kryegjyshi Botëror i Bektashinjve, Baba Mondi, besimtarë bektashinj, qytetarë nga Berati dhe qytete të ndryshme të vendit.

“Pasuria e malit të Tomorit i përket të gjithëve dhe duhet mbrojtur pa kushte. Të rinjtë e Smile Albania në Berat vijuan mbledhjen e firmave edhe në ditët e pelegrinazhit në malin e Tomorit duke dëshmuar ditë pas dite interesin dhe këmbënguljen e banorëve dhe turistëve për të mbështetur mbrojtjen e kësaj pasurie natyrore”-, theksoi ministri Klosi.

Sipas njoftimit për shtyp të Ministrisë së Turizmit dhe Mjedisit, presidenti Ilir Meta, i pranishëm në ceremoninë festive në Tomor gjithashtu firmosi peticionin e drejtuar nga të rinjtë e Smile për shpalljen e malit të Tomorit, Park Kombëtar, duke u renditur kështu publikisht tek zërat kundër shkatërrimit të Tomorit nga bizneset e guroreve, për rrjedhojë edhe kundër vendimit abuziv të gjykatës Administrative të Tiranës.

Mbledhja e firmave do të vijojë edhe në ditët në vijim, në Tomor dhe në atraksione të tjera turistike të Beratit, për t’iu drejtuar më pastaj organeve të drejtësisë, si argument i padiskutueshëm për rrëzimin e vendimit të Administratives.

Tashmë është kthyer në traditë çdo vit që në datat 20 deri në 25 gusht të zhvillohet pelegrinazhi në malin e Tomorit, për kremtimin e festës bektashiane të Abaz Aliut.

Pelegrinë të shumtë nga rrethe te ndryshme të vendit, por edhe nga Kosova, Maqedonia e vende të tjera vizitojnë malin e Tomorit në festën rituale të përvitshme. Në majën e 2379 metrave të malit të Tomorit, në Berat, gjendet një teqeja e Kulmakut, e rregulluar vitet e fundit ku besimtarët e vizitorët ndezin qirinj e bëjnë ritualet e këtij sekti fetar, për fat e mbarësi./atsh

Ndërmarrja e Ujësjellës-Kanalizimeve Vlorë prej kohësh ka nisur përgatitjet për sezonin e dimrit.

Ndërsa janë realizuar dhe po realizohen disa ndërhyrje të rëndësishme në rrjetin e kanalizimeve, gjatë ditës së sotme është duke u kryer një punë voluminoze për pastrimin e kanalit te “Bishti i Kalldrëmit”.

“Ky kanal që vjen nga zona e “Kuzum Babasë” dhe shkarkon te kanali i “Siavit”, cilësohet si ndër të rëndësishmit e grumbullimit të ujërave të bardha apo thënë ndryshe të shiut”, bën të ditur UK, Vlorë.

Ndërmarrja e Ujësjellës-Kanalizime, do ta vijojë punën edhe në zona të tjera të qytetit, me qëllim garantimin e funksionimit normal gjatë sezonit të dimrit, të kanaleve, por edhe të rrjetit të kanalizimeve në tërësi.

Ditët e fundit UK Vlorë po i kushton një vëmendje të veçantë edhe riparimit të avarive në rrjetin e furnizimit me ujë pranë Drejtorisë Rajonale të Punësimit, si dhe në Stacionin e Pompave të Ujit në Llakatund për vendosjen në punë të tij, duke riparuar defektin. /atsh

Një nga kriteret kryesore që duhet të plotësojnë fermerët për të përfituar nga fondet e programit IPARD II, është se aplikanti duhet të provojë pronësinë mbi tokën/ndërtesën ose ndërtesat e lidhura me investimin ose të drejtën e përdorimit me afat të paktën 10 vjet që nga data e dorëzimit të aplikimit.

Agjencia e Zhvillimit Bujqësor dhe Rural, (AZHBR) bën të ditur se, dokumentacioni që e përmbush këtë kriter është:

Fotokopje e certificatës së pronësisë, e lëshuar nga Zyra e Regjistrimit të Pasurive të Paluajtshme mbi tokën dhe ndërtesën, ku do të kryhet investimi, shoqëruar nga harta treguese, kartela e pasurisë dhe planimetria.

Sipas AZHBR-së, kërkohet: Fotokopje e vërtetimit të pronësisë lëshuar nga Zyra e Regjistrimit të Pasurisë së Paluajtshme mbi token dhe ndërtesën, ku do të kryehet investimi shoqëruar me hartën treguese, kartela e pasurisë dhe planimetria.

Fotokopje e kontratës së qirasë me një afat të paktën 10-vjeçar pas datës së aplikimit e noterizuar.

Fotokopje e Certifikatës së Pronësisë e lëshuar nga Zyra e Regjistrimit të Pasurive të Paluajtshme mbi tokës dhe ndërtesën të personave të cilët kanë lëshuar me qira tokën dhe ndërtesën e shoqëruar nga harta tregtare ku të paraqitet regjistrimi i kontratës së qirasë kartela e pasurisë dhe planimetria.

Vitet e fundit, për herë të parë Shqipëria ka arritur të jetë pjesë e një programi më të hapur europian për mbështetjen e bujqësisë. Programi IPARD II, në total me një fond prej 94 milionë euro, adreson mbështetje të drejtpërdrejtë për investime në bujqësi dhe agroturizëm. /atsh