Irina

Tirana është përzgjedhur sërish si histori suksesi për transformimin në një qytet miqësor me fëmijët dhe mjedisin, në një nga aktivitetet më të rëndësishme të jetës politike, urbanistike dhe arkitekturore italiane që u mbajt në Rimini.

Kryetari i bashkisë së Tiranës, Erion Veliaj mori pjesë në edicionin e 40 të Takimit për Miqësi Midis Popujve, ku morën pjesë personalitete të ndryshme të politikës, urbanistikës dhe arkitekturës nga Italia dhe vende të ndryshme të botës.

Në panelin me titull “Qyteti i sotëm, qyteti i së nesërmes”, krahas kryetarit të bashkisë së Milanos, Giuseppe Sala dhe arkitektit të njohur Stefano Boeri, kryebashkiaku Veliaj solli sfidat me të cilat përballen sot qytetet si Tirana, për t’u bërë qytete më të jetueshme për të gjithë. Ai theksoi punën e madhe të bërë nga bashkia e Tiranës në shtimin e këndeve të lojërave në çdo lagje, ndërtimin e shkollave të reja, projektin ambicioz të Pyllit Orbital, ku deri në vitin 2030 parashikohet të mbillen 2 milionë pemë, por edhe një sërë projektesh të tjera infrastrukturore që janë realizuar në bashkëpunim me studio prestigjioze të arkitekturës në botë.

“Kemi bërë disa projekte të mira në Tiranë. Kur folëm për Planin Urbanistik në mandatin e parë, askush nuk mendonte se do mbaronim Bulevardin e Ri, që do fillonim shkollat e reja, ndaj këtë vit, më në fund, disa nga projektet që kanë filluar në traditën e vjetër të Tiranës të para 100 viteve me arkitektë italianë, po i vazhdojmë pas 100 vitesh. Kemi nisur punë për ndërtimin e shkollave të reja “Kristo Frashëri” dhe “Nënë Tereza”, dhe besoj se koncepti i shkollave 24-orëshe do të jetë ndoshta edhe e reja më e madhe e mandatit tonë të dytë. Kemi bërë shkollën “Kosova”, së shpejtim hapim shkollën “Servete Maçi”. Por, unë besoj se 17 shkollat e reja, do ta transformojnë vërtet realitetin e tyre”, – u shpreh Veliaj.

Duke u ndalur te Bulevardi i Ri, ai theksoi se ajo që mbetet tashmë për t’u bërë është finalizimi i projekti me një tjetër shesh ceremonial. “Kemi një plan edhe për fundin e Bulevardit të Ri, që lumi i Tiranës të mos shihet si një vend ku derdhen ujërat e zeza dhe ndotja, por me qytetarët e ndërgjegjësuar ta mbajmë pastër ujin, si një element që mund të transformojë një komunitet. Dikur në ujin e Lanës hidhej çdo mbeturinë, derdhej çdo kanalizim, por me ndërhyrjen e Edi Ramës sot Lana është në fakt segmenti më i gjelbër i qytetit. Të njëjtën gjë duam të bëjmë me Lumin e Tiranës dhe besoj se shumë shpejt, me miqtë e Abu Dabit, duke negociuar kredinë ose duke shtuar disa fonde në formë granti, do ta përfundojmë edhe atë projekt”, – tha Veliaj.

Si pjesë e strategjisë së Bashkisë së Tiranës për një qytet të qëndrueshëm, Veliaj theksoi se shumë shpejt do të nisë fushata e re e mbjelljeve të pemëve në Tiranë. “Në tetor do të fillojmë operacionin e Pyllit Orbital, ndaj ftesa është e hapur për të gjitha kompanitë, individët, kush ka ditëlindje ose përvjetorë për të kujtuar. Kemi mbjellë 250 mijë pemë, nga 2 milionë që kemi në plan deri në vitin 2030. Por, ky është një vit fantastik, tani që jemi ndërgjegjësuar me verën e nxehtë që ka bërë në Tiranë. Besoj se është një mënyrë jo vetëm për t’i bërë qytetit një qokë, ose për t’i bërë qejfin fëmijëve, apo për të kujtuar dikë me një pemë, por realisht për të shpëtuar të ardhmen tonë, duke i mbushur qytetet tona me gjelbërim. Këtë vit fushatën do ta hapim fushatën pak më herët, që të përfitojmë nga stina e shirave dhe ta mbajmë 6 muaj, për të thyer rekordin tonë të mbjelljes së pemëve”, shtoi ai.

Arkitekti i njohur italian, Stefano Boeri vlerësoi punën e bërë nga bashkia e Tiranës për ta shndërruar atë në një qytet për njerëzit, para se të jetë një qytet për makinat. “Jemi të lumtur që morëm pjesë në një takim, i cili vlerësohet si një nga momentet më të rëndësishme të politikës italiane prej 40 vitesh. Kemi folur për qytetet, për të ardhmen e tyre. Ishte edhe Giuseppe Sala, i cili përfaqëson një tjetër qytet të madh europian, si Milano. Ajo që më ka pëlqyer më shumë është mënyra sesi të dy kanë folur për qytetet si hapësira jetësore, kanë folur për njerëzit, për familjet, për fëmijët, për komunitetin. Kjo për të kuptuar se qytetet përbëhen nga njerëzit përpara se të bëhen për shtëpitë, pallatet, hapësirat”, tha Boeri. /atsh

Skemat kombëtare të mbështetjes në bujqësi, po nxisin fermerët të shtojnë investimet edhe në bletari nga viti në vit.

Agjencia e Zhvillimit Bujqësorë dhe Rurale (AZHBR) bën të ditur se, gjatë vitit 2019 u rrit në 962 numri i fermerëve që aplikuan dhe u kualifikuan për subvencion në bletërritës në të gjithë vendin, kundrejt 600 aplikimeve që u regjistruan një vit më parë.

90% e fermave që kanë aplikuar kanë 100-150 koshere në zotërim dhe vlera e subvencionit të ofruar nga skema kombëtare arrin deri në 150 mijë lekë për fermë.

Nga prodhimi i mjaltit dhe nënprodukteve të tjera, fermerët sigurojnë fitime të kënaqshme. Por zhvillimi i eksporteve nga bletaria do të shtojë edhe më shumë të ardhurat për sipërmarrësit e këtij sektori.

Shqipëria për vetë florën e pasur që ka dhe kushtet e motit, ofron mundësi shumë të mira për prodhimin e mjaltit cilësor dhe me shije të veçantë.

Sot prodhimi dhe tregtimi i mjaltit është ende në nivele të konsumit të brendshëm dhe eksportohet vetëm në vendet e rajonit. Certifikimi i këtij prodhimi sipas standardeve europiane pritet të zgjerojë gjeografinë e eksporteve të mjaltit “Made in Albania”./atsh

Zv.kryeministri Erion Braçe reagoi sërish sot për debatin e krijuar lidhur me emrin e stadiumit kombëtar.

“Si ka mundësi që në FSHF, askush, edhe ky më i dituri drejtor, nuk ndan dot atë që është
“kombëtare” nga ajo që është “lokale”, nuk ndan dot atë që është “publike” nga ajo që është “private”? As që dua përgjigje nga të tillë, por patjetër që kam përgjigje për “argumentat” e drejtorit”, tha Braçe.

Braçe theksoi se “e para, stadiumi “Qemal Stafa” e ka emrin dhe nuk ka asnjë akt t’i ketë hequr këtë emër”.

E dyta, sipas Braçes, “stadiumi ‘Qemal Stafa’ është kombëtar, në kryeqytet, nuk është stadium në Brighton”. “Për këtë arsye ju solla si shembull stadiume të tillë historike në Londër, Berlin, Paris, Romë, Madrid. Në asnjë prej tyre emri nuk është tregtuar! Ju nuk flisni për to e për këtë fakt! Se ja bën ‘muuuu’ që nuk shitet as tek bankat, as tek nafta, as tek telefonia, as tek sigurimet ajo që është kombëtare historike”, shtoi ai.

Braçe tha se “Wembley u ribë nga e para, por emri nuk u tregtua”. “Sa për argumentin tregtar se shet emri ekzistues më shumë se emri i një kompanie, më vlen të të kujtoj se çdo gjë e bukur, e madhe dhe historike në futbollin tonë, lidhet me “Qemal Stafën”! Nuk ja hiqni dot njeriu nga mendje këtë”, shtoi ai.

Po ashtu, Braçe tha se “stadiumi ‘Qemal Stafa’, do të jetë një aset i një institucioni publik, asfare privat, siç FSHF”. “Të paktën, juridikisht është kështu, paçka se si administrohet është e tillë, publike. Vënia në të njëjtin kandar të asetit të një institucioni publik me asetin e një klubi privat futbolli, kudo në dynja, është qesharake deri në dhimbje! Juventus zotni është një klub privat futbolli, sovran për të vendosur nga pikëpamja tregtare për stemën (ju nuk ndryshoni dot stemën e Shqipërisë), për fanellën, sponsorin në të (ju nuk mund të vendosni sponsor në fanellën e kombëtares), asetin, stadiumin, emrin e tij (ju nuk mund të tregtoni atë që është, “Qemal Stafën” dhe atë që është kombëtare)”, tha ai.

“Së katërti, drejtor e të gjithë sa jeni… Shisni garën tuaj! E bëni dot? Nuk besoj; ua thonë kompanitë e marketingut. Nuk shesin dot as edhe një ndeshje tuajën, finale, jo më garën!
Edhe Kosova e shet garën, ju jo! Bëjeni garë, bëjeni të drejtë, të ndershme, cilësore dhe shiteni! Aty keni të drejta ju! Emri i kompanisë në stadium, shet produktin e saj, jo futbollin tuaj”, shtoi ai./atsh