Irina

Në institucionin e Prefektit u zhvillua ditën e sotme një takim pune me drejtoreshën e Zyrës Vendore të Arsimit Gjirokastër- Libohovë-Dropull, Albana Hasani me qëllim trajtimin e problematikave të ndryshme dhe marrjen e masave në pёrputhje me politikat, strategjitё kombёtare dhe kurrikulёn e arsimit parauniversitar të përcaktuara nga Ministria e Arsimit, Sportit dhe Rinisë.

Prefekti i qarkut Gjirokastër, Astrit Aliaj, i uroi suksese në detyrën e re Hasanit dhe vlerësoi punën e bërë gjatë këtij viti në kuadër të mbarëvajtjes së procesit mësimor, si dhe në cilësinë e arsimit parauniversitar në qarkun tonë.

Ndër të tjera, Prefekti i qarkut kërkoi nga ana e ZVA Gjirokastër-Libohovë-Dropull raportime jo vetëm mujore duke qenë se arsimi është prioritet i institucionit të Prefektit të qarkut Gjirokastër.

Gjatë këtij takimi u diskutua në lidhje me problematikat më të ndjeshme që kanë të bëjnë me çështjen e arsimit të tilla vlerësimet e dosjeve të mësuesve, lëvizjen e nxënësve në shkollat e qytetit, lëvizjet paralele të mësuesve,etj.

Nga ana e drejtoreshës Hasani u paraqitën situatat aktuale të çështjeve të diskutuara dhe masat e marra për zgjidhjen e tyre nga ana e ZVA Gjirokastër.

Në përfundim të takimit, Prefekti i qarkut theksoi rëndësinë e bashkëpunimit të vazhdueshëm me të gjitha ZVA e qarkut Gjirokastër si dhe me institucionet arsimore në drejtim të përmirësimit të cilësisë së arsimit.//atsh

E ftuar në një studio televizive, deputetja e PS, Mirela Kumbaro foli për integrimin europian të Shqipërisë duke thënë se në këtë rrugë, duhet të jemi të gjithë bashkë në emër të interesit kombëtar.

“Duke patur parasysh datën e rëndësishme që na ofrohet lidhur me integrimin europian, ne na duhet që të jemi të gjithë në tavolinë dhe besoj që askush nuk e ka monopolin të vendosë kush nuk duhet të jetë. Unë besoj dhe këtë e them në emër të mazhorancës, që duhet të jemi të gjithë. Përtej inateve, përtej problemeve të brendshme partiake që mund të ketë, ka një interes që shkon përtej kësaj. Është interesi kombëtar. Këtu, nëse duhet t’i japim dorën njëri-tjetrit, duhet t’ia japim për hir të interesit kombëtar i cili në fakt na detyron që të heqim dorë nga ajo që në fakt presidenti e ka quajtur teka, qoftë dhe të opozitës”, – tha Kumbaro.

Ndërkohë duke folur për Po-në e Bundestagut gjerman, ajo tha se kushtet e paraqitura janë detyra që janë duke u kryer. “Ato që listoi vendimi i Bundestagut gjerman që u quajtën kushte, nuk janë gjë tjetër përveç se një përputhje pikë për pikë me ato detyra që ne i kemi vënë vetes dhe që jemi në një kalendar duke i zhvilluar”, – u shpreh Kumbaro.

Kumbaro u ndal edhe tek raporti i Komisionit të Venecias për ligjshmërinë e veprimeve të Presidentit Meta. “E rëndësishme për mua, si qytetare, si deputete, – nënvizon Kumbaro, – është fakti që ai mendim paraprak i quajti legjitime zgjedhjet e 30 qershorit. Nëse Komisioni i Venecias e quan tejkalim të kompetencave kushtetuese të presidentit nxjerrjen e dekreteve, do të thotë që mbetet në fuqi dekreti kushtetues, ai me të cilin KQZ zhvilloi dhe organizoi zgjedhjet vendore në 30 qershor”. /atsh

Ministri i Shtetit për Mbrojtjen e Sipërmarrjes, Eduard Shalsi ka theksuar të mërkurën në mbrëmje, se papunësia është në kuotat më të ulta historike 11,7%.

Gjatë një interviste televizive, ministri Shalsi, theksoi se qeveria është e fokusuar në kualifikimin e fuqisë punëtore. Duke folur për rritjen ekonomike ai tha se luhatjet janë normale, në një proces të vazhdueshëm të rritjes ekonomike, teksa shtoi se gjatë muajit shtator numërohen rreth 12 000 biznese të hapura.

“Nëse do t’i referohemi shifrave, papunësia është në kuotat më të ulta historike 11,7%. Nga ana tjetër po bëjmë çmos për kualifikimin e fuqisë punëtore. Ka disa paradokse, kur vjen puna për të interpretuar të dhëna dhe shifra të ndryshme. Unë sapo jam kthyer nga një vizitë në vendet e Lindjes dhe sot Çekia, Sllovenia, Rumania, po ndeshen me vështirësi për kushte më të mira pune dhe paga më të mira. Sot është e vështirë të ndalosh një të ri që gjen kushte më të mira në Gjermani apo vende të tjera të Europës”, – tha Shalsi.

Ministri shtoi se “nëse lexojmë raportin e fundit të shqiptarëve që dalin jashtë Shqipërisë për turizëm është në terma krahasueshme me vendet e zhvilluara. Nga ana tjetër kam një të dhënë, mesatarja e shpenzimeve familjare ka shkuar 74 mijë lekë të reja në muaj. Çështja është se ku jemi, ku e kemi potencialin dhe ku duhet të shkojmë. Sot kemi gjatë muajit shtator 12 000 biznese të hapura dhe 4 000 biznese të mbyllura”.

Duke folur për rritjen ekonomike, sipas Shalsit, në rast se merr qeverisjen kur rritja ekonomike e trashëguar është 0% dhe tenton të rritesh me shpejtësi, ndodh që të kesh dhe luhatje të tilla.

“Në fakt parashikimi për rritje ekonomike nuk kanë qenë vetëm të qeverisë, por edhe të institucioneve financiare ndërkombëtare. Projeksionin e tyre, institucionet financiare ndërkombëtare e kanë bazuar në disa parametra të cilat janë reale”, – tha Shalsi.

“Dy janë faktorët kryesorë që kanë sjell luhatje. Një është sektori i lojërave të fatit, zyrtarisht i njohur si zëri i ‘Arte dhe Argëtim’ dhe e dyta është sektori energjetik, që për shkak të thatësirës ka ndikuar jo pak”, – theksoi Shalsi.

“Nëse disa vite më parë kishim sektorin energjetik në kolaps, ku gjysma e shqiptarëve nuk e paguante energjinë elektrike, sot e paguajnë dhe ky sektorë e ka kaluar rrezikun. Shqipëria ka nevojë për një stabilitet strukturor në gjenerimin e të ardhurave. Kur shkon nga një rritje ekonomike 0% dhe tenton të ngrihesh, dhe ke një ngritje të vazhdueshme ekonomike, luhatje të tilla janë normale”, tha Shalsi./atsh

“Prodhimet e shegës së Karavastasë, eksportohen jashtë vendit, ndihmon ekonominë dhe rrit punësimin në zonë”, tha sot zv.kryeministri Erjon Braçe.

“Shega e Karavastasë! Nuk janë topat e vitit të ri; Këto janë shegë të kuqe, të pjekura dhe plot shije! Vjelë këtë të dielë dhe paketuar për eksport tani. Ky është prodhim që ndihmon ekonominë, punësimin gjithashtu!”, tha ai.

“Pra, është e rëndësishme që shega piqet, por me e rëndësishme se shega personale është ferma e shegëve që prodhon, punëson, eksporton! Faleminderit Shpëtimit, Ilirit, agronomeve, çdo punëtori në Bedat/Karavasta. Super punë!”, theksoi Braçe. /atsh

Presidenti i Republikës, Ilir Meta apeloi për më shumë vëmendje e përkujdesje me dashuri e dhembshuri.

Me rastin e Ditës Ndërkombëtare të të Moshuarve, Presidenti i Republikës, Ilir Meta priti dje në një takim një grup të moshuarish.

Gjatë bashkëbisedimit me ta, Presidenti Meta theksoi domosdoshmërinë që shoqëria jonë, në shembullin e Shenjtores Nënë Tereza, të kujdeset me më shumë dashuri dhe vëmendje për pjesëtarët e saj.

“Përkujdesja dhe vëmendja ndaj sfidave dhe problematikave me të cilat përballen të moshuarit është detyrim i të gjithë shoqërisë sonë”, nënvizoi Kreu i Shtetit.

Presidenti Meta theksoi se institucionet shtetërore në veçanti, duhet të tregojnë më shumë respekt e përkujdesje për moshën e tretë, për hallet e tyre, pasi kontributi e përvoja e prindërve dhe gjyshërve tanë është një aset i çmuar për sot e të ardhmen.

Shoqëria jonë, veçanërisht brezi i ri, jo vetëm duhet të mësojë nga eksperienca juaj, por duhet t’i investojë këto përvoja në edukimin e brezit të ri, me ndjenjën e punës, të ndershmërisë, përgjegjshmërisë e seriozitetit, por edhe me ruajtjen e forcimin e ndjenjës sonë kombëtare”, – tha Presidenti Meta, teksa theksoi se problemi më i madh sot është mbajtja e të rinjve në vendin tonë, sepse largimi i tyre masiv do të sjellë pasoja katastrofike për shoqërinë në të ardhmen.

Gjithashtu, Kreu i Shtetit theksoi se në këtë ditë të të moshuarve duhet të vlerësojmë edhe rolin e tyre në familje dhe në shoqëri.

“Gjyshërit janë shpesh mbështetje e madhe për nipërit dhe mbesat e tyre, jo vetëm me kujdesin në rritjen e tyre, por edhe me edukimin e transmetimin e eksperiencave jetësore. Por nga ana tjetër, të moshuarit kanë nevojë për mbështetjen e familjes e të fëmijëve të tyre, veçanërisht në situata të vështira e në pamundësi shëndetësore”, u shpreh Presidenti Meta gjatë takimit./atsh

Kryetarja e Komisionit të Sigurisë Kombëtare, Ermonela Felaj deklaroi se ajo që i kërcënon më shumë sot gratë dhe vajzat është injoranca.

E pranishme në aktivitetin e zhvilluar sot nga Instituti për Gratë në Politikën e Sigurisë Kombëtare dhe Ndërkombëtare, Felaj u shpreh se, “siguria është një nocion shumë i gjerë, shumë i rëndësishëm. Projekti i këtij instituti në vetvete ka lidhje me fuqizimin e grave dhe vajzave dhe njëkohësisht me zhvillimin e gjeneratës së ardhshme të grave dhe vajzave si kontribuese aktive në fushën e sigurisë”.

“Nëse do më pyesni se çfarë i kërcënon sot më shumë gratë dhe vajzat përgjigja do ishte injoranca. Kjo është arsyeja pse mendoj se të këmbëngulësh në arsimimin gjithnjë e më të plotë të gjithë shoqërisë tonë, sigurisht edhe të gjithë vajzave dhe grave”, tha Felaj.

“Është shumë e rëndësishme po ashtu edhe të bësh politika që rrisin aksesin e vajzave dhe grave në çështjet e dijes”, u shpreh ajo.

“Ta përdorësh ligjin në funksion të këtij qëllimi dhe ne si ligjvënës na takon ta bëjmë këtë. Kjo padyshim që ka një vlerë të padiskutueshme”, shtoi ajo.

Felaj theksoi gjithashtu se, “ekstremizmi i dhunshëm është një fenomen që kërcënon gratë dhe vajzat dhe duhet luftuar me çdo kusht”.

“Aksesi i grave dhe vajzave në jetën publike është i rritur edhe në ato sektorë apo fusha ku dikur janë parë si enkas për gjininë tjetër, edhe aty shihet rritja e prezencës së grave. Ky është një shembull i mirë. Prezenca jonë e bën shoqërinë më tolerante”, tha Felaj.

“Ne flasim për gratë dhe vajzat në politikë. Natyrisht sot janë kontributore shumë më shumë se një dekadë më parë. Ka shumë gra deputete, ministre, ka shumë gra këshilltare bashkiake”, u shpreh Felaj. /atsh