Irina

Zgjedhjet e kundërshtuara lokale në Shqipëri u zhvilluan në qetësi të plotë, pavarësisht thirrjes për bojkot nga ana e opozitës së qendrës së djathtë të drejtuar nga Lulzim Basha, i cili nuk merr pjesë pasi ka akuzuar mazhorancën socialiste për parregullsi të rënda gjatë zgjedhjeve të kaluara, shkruante dje agjencia italiane e lajmeve, ANSA.

“Ajo që është më e rëndësishme sot është mësimi historik që kjo ditë do t’i japë të gjithëve, sepse, një herë e mirë do të konfirmohet se me popullin nuk luhet, se sovraniteti i popullit nuk është një fjalë boshe. Dhe kush tenton t’ia marrë popullit sovranitetin nuk ka asnjë fund tjetër përveç se fundit me dështim dhe me turp”, tha Rama duke dalë nga qendra e votimit.

”Selitë më të rëndësishme europiane dhe ambasada amerikane kanë dërguar në terren një numër vëzhguesish për të ndjekur procesin e votimit”, shton ANSA.

‘’Shqiptarët kanë votuar në zgjedhje si asnjë herë tjetër, pasi opozita i bojkotoi ato, ndërkohë që incidente të vogla ndodhën në disa qendra votimi’’, shkruan rrjeti informative britanik, BBC.

”Për muaj të tërë opozita ka zhvilluar protesta duke kërkuar dorëheqjen e kryeministrit si edhe zgjedhje të reja të përgjithshme”, shton ai.

”Zgjedhjet u bënë edhe pse kritikët i konsideruan ato si zgjedhje jo të duhura, duke marrë parasysh mungesën e konkurrencës”, thekson BBC.

”Zgjedhjet lokale në Shqipëri… u zhvilluan në qetësi të plotë dhe pa incidente serioze”, shkruan agjencia e njohur italiane e lajmeve, agenzinova.it.

”Shqipëria mënjanoi një konflikt të mundshëm të brendshëm që nga momenti kur lideri i opozitës së djathtë, Lulzim Basha, kërcënoi për bojkotimin e procesit zgjedhor dhe për moszhvillimin e tyre, por që përfundoi duke u kërkuar qytetarëve që të mos merrnin pjesë në zgjedhje”, thekson kjo agjenci.

”Zgjedhjet për kryetarët e bashkive shqiptare, të bojkotuara nga partitë e opozitës u zhvilluan paqësisht… Përfaqësitë europiane dhe Shtetet e Bashkuara të Amerikës u bënë thirrje partive shqiptare, që të shmangin dhunën gjatë zgjedhjeve”, shkruan gazeta britanike ”Daily Mail”.

”Bashkimi Europian, që do të vendosë në vjeshtë nëse do të fillojë bisedimet e pranimit me Tiranën, ka paralajmëruar politikanët e vendit se dhuna dhe grindjet mes dy palëve do të jetë në vëmendjen e tyre dhe se ato do të ndikojnë në rrugën e anëtarësimit të Shqipërisë në BE”, shton ”Daily Mail”./atsh

Në 24 bashki, ka përfunduar numërimi i votave për kandidatët për kryetarë bashkiak dhe janë shpallur fituesit.

Kështu në Divjakë, Pustec, Memaliaj, Fushë-Arrëz, Konispol, Libohovë Kolonjë, Belsh, Himarë, Roskovec, Poliçan, Vorë, Lushnje, Skrapar, Prrenjas, Mallakastër, Malësi e Madhe, Pukë, Ura Vajgurora, Librazhdi, Gramshi dhe Tropoja, Selenicë, Has ka përfunduar procesi i numërimit të votave dhe është shpallur fituesi i votimeve lokale, ndërkohë që në 37 bashki vijon ende numërimi.

Nga të dhënat zyrtare të publikuara nga Komisioni Qendror të Zgjedhjeve në të gjithë territorin e Shqipërisë më 30 qershor votuan 771 863 qytetarë apo e përkthyer në përqindje në 21.6%.

Has
Fiton Liman Morina PS (4276 vota)

Divjakë

Fiton Fredi Kokoneshi PS (13513 vota)

Selenicë

Fiton Pëllumb Binaj PS (5819 vota)

Prrenjas

Fiton Nuri Belba PS (7054 vota)

Roskovec

Fiton Majlinda Bufi PS (7740 vota)

Vorë

Fiton Agim Kajmaku PS (6208 vota)

Fushë-Arrëz

Fiton Fran Tuci PS (2462 vota)

Kolonjë

Fiton Erion Isai PS (4279 vota)

Libohovë

Fiton Luiza Mandi PS (1275 vota)

Konispol

Fiton Shuaip Beqiri PS (3328 vota)

Belsh

Fiton Arif Tafani PS (6377 vota)

Poliçan

Fiton Adriatik Zotkaj PS (4681 vota)

Himarë

Fiton Jorgo Goro PS (4209 vota)

Malësi e Madhe

Fiton Tonin Marinaj PS (7,772 vota)

Gramsh

Fiton Klodian Taçe PS (8471)

Pukë

Fiton Gjon Gjonaj PS (3730 vota)

Ura Vajgurore

Fiton Juliana Mema PS (7,666 vota)

Tropojë

Fiton Rexhë Byberi PS (3538 vota)

Mallakastër

Fiton Qerim Ismailaj PS (5692 vota)

Librazhd

Fiton Kastriot Gurra PS (11383 vota)

Skrapar

Fiton Adriatik Mema PS (4505 vota)

Lushnje

Fiton Fatos Tushe PS (28086 vota)

Memaliaj

Fiton Gjolek Guci PS (4,206 vota)

Pustec

Fiton Pali Kolefski PS (1505 vota)/atsh

Sot fitoi e ardhmja, shteti, forca e politikës, qytetaria, shpresa; fitoi me të drejtë dhe dinjitet Shqipëria e nesërme europiane e fëmijëve tanë dhe humbi me të drejtë dhe turp Shqipëria e djeshme e politikës pa din e iman”, deklaroi sot në mbrëmje kryeministri Edi Rama.

Në daljen e parë publike pas përfundimit të procesit së votimit, Rama falënderoi të gjithë qytetarët shqiptarë.

“Të nderuar bashkëqytetarë me ose pa përkatësi e bindje politike, brenda ose jashtë atdheut, kudo ku ndodheni në këtë moment historik. Sot ishte 30 qershori i një Shqipërie që për shumë muaj përjetoi dramën e një përçarje të rëndë politike të frymëzuar, nxitur dhe organizuar për të ndaluar ecjen tonë përparanë rrugën e normalitetit shoqëror, bashkëjetesës demokratike dhe integrimit të popullit shqiptar në familjen e popujve të Europës”, tha Rama.

Sot, vijoi ai, “ishte dita e zgjedhjeve vendore të radhës e cila u kthye muaj pas muaji në ditën kulmore të një përplasjeje historike mes të shkuarës dhe të ardhmes, harbutërisë dhe qytetarisë, antishtetit dhe shtetit, pandëshkueshmërisë dhe drejtësisë, politikës së forcës dhe forcës së politikës, dhunës kërcënuese të së djeshmes dhe shpresës për të nesërmen, mes Shqipërisë së vjetër të padrejtësisë, fantazmës dhe foslileve të historisë dhe Shqipërisë së drejtë që duan të gjithë fëmijët e kësaj bote që fjalën e parë kanë thënë ‘nënë’”./atsh

(vijon)