Irina

Operatori i Sistemit të Shpërndarjes së Energjisë, me investimet në rritje vit pas viti në drejtim të përmirësimit të rrjetit dhe të cilësisë së furnizimit të qytetarëve me energji elektrike ka arritur sot të të reduktojë jo vetëm ndërprerjet e paplanifikuara dhe kohën e riparimit të dëmit të shkaktuar, por edhe nivelin e humbjeve në rrjet çka shkaktonte një gropë të madhe në buxhetin e kësaj kompanie.

Sipas të dhënave më të fundit të publikuara nga OSHEE, në saj të investimeve që në 4 vitet e fundit kanë arritur në plot 250 milionë lekë është arritur që sot të ketë 44% më pak ndërprerje të paplanifikuara të energjisë, periudhë kjo e krahasuar me dy vite më parë.

“Investimet tona, falë kontributit tuaj, nuk ulin vetëm nivelin e humbjeve dhe abuzimet, por rrisin edhe cilësinë e furnizimit me energji”, shprehet OSHEE.

Nga ana tjetër Operatori i Shpërndarjes deklaron se në në të njëjtën periudhë kohe është mundësuar që të rritet me 67% koha e riparimit të defekteve në rrjet. Konkretisht në vitin 2017 nevojiteshin mesatarisht 53 minuta ndërsa në vitin 2019 skuadrat në terren arrijnë të riparojnë defektet në një kohë mesatare prej 20 minutash.

Gjithashtu, një tjetër element mjaft i rëndësishëm është pikërisht ofrimi i shërbimit të pandërprerë, duke bërë që sot të reduktohet me afro 30% koha e kufizimeve të energjisë elektrike për abonentët. /atsh

-Ambasada e Shteteve të Bashkuara të Amerikës ka nxjerrë një lajmërim të rëndësishëm për të gjithë ata qytetarë shqiptarë që duan të aplikojnë në Lotarinë Amerikane.

Ambasada e SHBA thekson se aplikuesi kryesor i Programit të Lotarisë duhet të vendosë të dhënat e pasaportës së paskaduar në aplikimin fillestar. Nëse pasaporta juaj skadon pasi të keni kryer aplikimin dhe ju përzgjidheni, rekomandojmë të ruani një kopje të pasaportës së vjetër, nëse do t’ju kërkohet gjatë procesit.

Regjistrimet për Programin e Lotarisë DV-2021 do të jenë nga 2 tetor, ora 18:00 deri më 5 nëntor 2019, ora 18:00!

Aplikantët mund të kryejnë aplikimin elektronik në faqen zyrtare të E-DV, gjatë periudhës së regjistrimit. Udhëzimet e DV janë gjithashtu në dispozicion në faqen e internetit të Departamentit të Shtetit.

Duke filluar nga 5 maji 2020, për të parë nëse janë përzgjedhur, të regjistruarit e DV-2021 do të mund të përdorin numrin e tyre unik të konfirmimit të dhënë në regjistrim duke kontrolluar online Kontrollin e Statusit të të Regjistruarve në faqen zyrtare të E-DV-së.

Kontrolli i Statusit të të Regjistruarve do të informojë pjesëmarrësit e përzgjedhur se si të aplikojnë për vizën e Lotarisë për veten e tyre dhe anëtarët e familjes së tyre. Të përzgjedhurit do të mund të mësojnë datën e tyre të intervistës për vizë duke hyrë tek Kontrolli i Statusit të të Regjistruarve./atsh

Vendosja e moratoriumit për ndalimin e gjuetisë, sjell në vendin tonë një nga shpendët më të rrallë në botë.

Listës së shpendëve në Peizazhin e Mbrojtur Vjosë-Nartë, i është shtuar edhe 1 lloj i ri: pelikani rozë (Pelecanus onocrotoalus).

Pelikani rozë është një prej 8 llojeve të pelikanëve që ekzistojnë në botë dhe 1 prej 2 llojeve që hasen në vendin tonë, së bashku me atë që gjithkush e njeh: pelikanin kacurrel (Pelecanus crispus) apo shpendin më të madh në botë të ujërave të ëmbla.

Ndryshe nga pelikani kaçurrel, pelikani rozë nuk folezon në vendin tonë, ndonëse një koloni e shëndetshme e këtij lloji gjendet në anën greke të Prespës së Vogël dhe kësisoj mund të haset rëndom gjatë periudhës së folezimit edhe në anën shqiptare të liqeneve të Prespës në jug-lindje të vendit, në të cilat ushqehet.

Ndryshe nga pelikani kaçurrel, ky lloj është shtegtar (së paku popullata europiane) dhe dimëron kryesisht në Afrikë.

Në ligatinat bregdetare të vendit ky lloj është vrojtuar shumë rrallë dhe ky vrojtim mund të jetë i dyti (pas atij të Karavastasë në 2016) në 25-30 vitet e fundit.

Të dhënat e vitit 2018 dëshmuan se numri i shpendëve të ujit në vendin tonë është rritur ndjeshëm. Kjo edhe si pasojë e vendimeve të rëndësishme të ndërmarra nga qeveria në mbrojtje të mjedisit, siç është moratoriumi i gjuetisë./atsh