Irina

Shifrat e 2019/ U goditën 22 grupe kriminale me 125 të arrestuar, 72.1 mln euro asete të sekuestruara

Aktualitet, Lajmi i fundit / /

Gjatë vitit 2019 janë goditur 22 grupe kriminale me 125 persona të arrestuar, teksa rezultojnë 72.1 mln euro asete të sekuestruara

Ministri i Brendshëm, Sandër Lleshaj gjatë punimeve të Këshillit Kombëtarë të Integrimit Europianë, të drejtuar nga Deputetja Rudina Hajdari, theksoi se shifrat e vitit 2019 tregojnë se forca goditëse e policisë është rritur

“Gjatë këtij viti janë goditur 22 grupe kriminale dhe janë arrestuar 125 persona të përfshirë në këto grupe duke treguar një trend në rritje. Përgjatë vitit të kaluar janë sekuestruar 72.1 mln euro një shifër e barabartë me paratë e paligjshme të sekuestruara përgjatë 10 viteve”-, theksoi Lleshaj

“Ky vit duhet të kishte logo vetëm Integrimin e Shqipërisë në BE. Megjithatë kjo e sotmja meriton të gjithë konsideratën. Ministria e Brendshme ka një peshë të konsiderueshme në këtë proces. Është kapitulli që merret me sigurinë dhe drejtësinë. Është ai proces që synon të lexojmë dhe kuptojmë. legjislacioni e BE. Ka pasur një goditje të madhe ndaj krimit të organizuar përgjatë këtij viti. Gjatë 2019 janë goditur 22 grupe kriminale, janë arrestuar 125 persona të përfshirë në këto grupe”-, nënvizoi Lleshaj.

“Nuk mund të kritikoj punën e paraardhësve të mi. Unë flas vetëm për punën time. Ne jemi në proces konsolidimi si shoqëri. Ajo polici dhe ajo prokurori. Puna është pjesë e një procesi. Ne kemi intensifikuar. Është shumë e rëndësishme të përmend faktin se bashkëpunimi ndërinstitucional ka sjellë këto tregues të cilët janë për t’u respektuar”-, shtoi ai.

“Përmendet edhe në raportin e DASH që parandalimi i lojërave të fatit është një ndër kontributet kryesore të kësaj qeverie në luftën kundër pastrimit të parave. Në aspektin kundër parave të paligjshme janë marrë masa të mëdha. Janë sekuestruar rreth 72.1 mln euro. Kjo shifër është pothuajse sa shifra e 10 viteve të mëparshme. Mund të themi që edhe në fushën e konfiskimit shifra është dyfish më e lartë. Po krijohen edhe kapacitete. Me të njëjtët njerëz është e vështirë të bësh të njëjtën gjë ose një gjë akoma më të madhe”-, theksoi Lleshaj.

“Ka një mori faktorësh që nxisin të rinjtë të largohen nga vendi. Sa i përket asaj që a dalin vetëm, kjo nuk ndodh sepse ligji e ndalon. Përgjithësisht ata dalin me dokumentacionin përkatës. Varfëria është problem, ne nuk mund të fshehim varfërinë në vend dhe prindërit i besojnë te familjarët e tyre fëmijët e mitur. Pyetjen e katërt e keni për armët. Shqipëria është një vend që ka përjetuar vitin 97’ ku armët kaluan në dorë të qytetarëve. Kapen përditë në shifra të mëdha. Kemi sekuestruar 322 armë, që i bie pothuajse dy armë në ditë. Ne kemi një legjislacion liberal që i mundëson qytetarëve të pajisen me armë. Nuk duhet që siguria të krijohet nga qytetarët. Por siguria duhet të mundësohet nga institucionet. Sapo ka hyrë në fuqi kodi penal që ashpërson dënimet për armë mbajtje pa leje”-, tha ministri Lleshaj.

“Duhet të bëjmë që këto pasoja të ulen ndjeshëm. Azil kërkimi është një proces që ka një histori të gjatë. Po të shohësh me hapjen e korridorit ballkanik ka pasur në rritje të madhe, por tani kemi zbritur poshtë. Megjithatë fenomeni mbetet. Franca ka politika liberale ndaj edhe numri i azilkërkuesve është i lartë. Ka shumë arsye që shqiptarët dalin jashtë”-, theksoi Lleshaj, gjatë fjalës së tij, në punimet e Këshillit Kombëtarë të Integrimit. /atsh

Shifrat e 2019/ U goditën 22 grupe kriminale me 125 të arrestuar, 72.1 mln euro asete të sekuestruara Read More »

Korçë/ Bashkimi i 200 fermerëve, krijohet ferma e mollëve më e madhe në vend

Aktualitet / /

Bashkimi i rreth 200 fermerëve dhe aplikimi i një teknologjie të re, si dhe subvencionimi me fonde nga qeveria, kanë sjell krijimin e një modeli të suksesshëm ferme në Korçë. “Sweet Farm” kultivon 15 varietete mollësh në një sipërfaqe rreth 20 hektarë tokë. Ministri i Bujqësisë dhe Zhvillimit Rural, Bledi Çuçi, vizitoi nga afër këtë sipërmarrje, e cila ka për investitor edhe një shqiptar të kthyer nga Kanadaja.

“Kjo fermë është model edhe përsa i përket organizimit sepse kemi të bëjmë me bashkimin e rreth 200 fermerëve. Është model sepse kemi një kombimin shumë të mirë të njohurive të investitorit që ka ardhur nga Kanadaja dhe të fermerëve. Ky model ka gjetur edhe rrugën e subvencionimit nga shteti shqiptar për ta sofistikuar më shumë të gjithë fermën përsa i përkjet ruajtjes nga breshëri, por edhe vaditjes me pika. Ky kombinim i shkëlqyer ka sjell një rezultat të shkëlqyer. Është një fermë që nuk qahet për shitjen e prodhimit, por gjithmonë rritet”, tha ministri Çuçi teksa theksoi se ky model duhet të aplikohet edhe nga fermerë të tjerë të vendit.

Ministria e Bujqësisë dhe Zhvillimit Rural e ka mbështetur këtë sipërmarrje me fonde në tre skema: mbjellja e 4 hektarëve fidanë, ujitja me pika dhe rrjeta mbrojtëse nga breshëri. Ministri Çuçi shprehu mbështetje të mëtejshme për zgjerimin e fermës në komponentë të tjerë si magazina frigoriferike, një linjë përpunimi për mollët, si dhe shndërrimin e saj në një pikë agroturizmi apo qendër ku mësohet më shumë per pemtarinë.

Ferma “Sweet Farm” kultivon llojet më të mira të mollëve që shiten në tregun vendas dhe të huaj si “Fuxhi”, “Starking”, “Golden”, “Brina”, “Gala”, “Grand Smith”etj. Një element dallues i tyre është se këto kultivarë nuk kanë nevojë për spërkatje. Subvencioni i dhënë nga MBZHR për këtë fermë është rreth 7.8 milionë lekë të reja. //atsh

Korçë/ Bashkimi i 200 fermerëve, krijohet ferma e mollëve më e madhe në vend Read More »

Viti i ri akademik, Shahini fton studentët: Të vijojmë komunikimin për rritjen e cilësisë së Arsimit të Lartë

Aktualitet, Arsim / /

Studentët kanë një rol të madh në rritjen e cilësisë së arsimit të lartë në vend.

Në ceremoninë që u mbajt sot në Fakultetin e Mjekësisë, në kuadër të hapjes së vitit të ri akademik 2019-2020, ministrja Besa Shahini ftoi studentët të vijojnë komunikimin me ministrinë e Arsimit, me qëllim rritjen e cilësisë së arsimit të lartë në vend.

“Ju jeni gjenerata e parë pas protestës së mbajtur nga studentët në muajin dhjetor të vitit 2018,e cila na dha një shtytje të fortë të çojmë përpara nisma për përmirësimin e cilësisë së arsimit të lartë dhe jetesës së studentëve”, deklaroi Shahini.

Duke u ndalur në disa nga politikat e qeverisë për mbështetjen e studentëve, ministrja informoi se studentët ekselentë do të përfitojnë nga politika për përjashtim të tarifave si dhe përfitim të bursave.

“Kemi bërë investim në konvikte, jo vetëm në Tiranë, por edhe në të gjithë Shqipërinë. Kemi ndarë një grant për të furnizuar laboratorët në të gjithë vendin”, tha më tej, ministrja.

Ajo solli në vëmendjen e studentëve edhe bibliotekën dixhitale, e cila është në dispozicion të studentëve e që ofron me miliona artikuj shkencorë, libra akademik, etj. Këto, sipas saj, do t’u vijnë në ndihmë studentëve për detyrat e kursit apo temat e diplomave.

Po ashtu, një tjetër politikë për lehtësimin e jetës së studentëve, sipas ministres Shahini është edhe karta e studentit, e cila bëri të ditur ajo, po aplikohet jo vetëm në Tiranë, por në të gjitha universitetet publike.

Ministrja informoi se në bazë të një sondazhi kombëtar të zhvilluar, ka rezultuar se stafi pedagogjik është në rregull, por kushtet në universitete nuk plotësojnë standardet e nevojshme.

“Duhet edhe angazhimi juaj. Ftesa ime është të vijojmë dialogun për të çuar përpara nivelin e komunikimit dhe arsimit të lartë”, deklaroi Shahini./atsh

Viti i ri akademik, Shahini fton studentët: Të vijojmë komunikimin për rritjen e cilësisë së Arsimit të Lartë Read More »

Prokurori Besim Hajdarmataj përballet me Vetingun

Aktualitet, Lajmi i fundit / /

Komisioni i Pavarur i Kualifikimit ka zhvilluar sot një seancë dëgjimore me subjektin e rivlerësimit, Besim Hajdarmataj, prokuror pranë Prokurorisë së Gjykatës së Shkallës së Parë për Krime të Rënda Tiranë.

Ish-drejtuesi i Prokurorisë së Krimeve të Rënda, Besim Hajdarmataj doli sot përballë Komisionit të Pavarur të Kualifikimit, i cili është paraqitur në seancë i vetëm pa praninë e një avokati.

KPK, ka administruar provat dhe faktet për verifikimin e pasurisë dhe vlerësimin e kriterit etik e profesional për prokurorin pranë Prokurorisë së Gjykatës së Shkallës së Parë për Krime të Rënda Tiranë.

Trupa gjykuese që përbëhet nga Brunilda Bekteshi, Roland Ilia, Suela Zhegu

Besim Hajdarmataj e ka filluar karrierën në sistemin e drejtësisë në vitin 1999 dhe përgjatë 20 viteve, ai ka mbajtur poste drejtuese në Prokurorinë e Tropojës dhe të Kurbinit. Në maj 2015, ai u emërua prokuror në Prokurorinë e Krimeve të Rënda dhe një vit më vonë mori drejtimin e kësaj prokurorie.

Në maj të vitit 2018, kryeprokurorja Arta Marku e shkarkoi Hajdarmatajn si drejtues të Prokurorisë për Krimet e Rënda, duke e zëvendësuar me Donika Prelën. Disa muaj më vonë, Marku e transferoi Hajdarmatajn në Progradec, por në fillim të vitit 2019, Këshilli i Lartë i Prokurorisë e ktheu atë pranë Prokurorisë së Krimeve të Rënda në Tiranë por këtë herë si prokuror.

Ditën e sotme Hajdarmataj do të njihet me rezultatet e verifikimit, ku me interes pritet konkluzionet për figurën dhe vendimmarrjet për dosjet.

Prokurori i Prokurorisë së Krimeve të Rënda, Besim Hajdarmataj i është shtuar listës së aplikimeve për të qenë anëtar i Strukturës së Posaçme Antikorrupsion (SPAK) me 6 mars, duke qenë një kandidat për SPAK i cili do t’i nënshtrohet Vetingut. /atsh

Prokurori Besim Hajdarmataj përballet me Vetingun Read More »

Nivicë/ Mbështetje financiare nga AZHBR, Jaho Xhebro ngre një agroturizëm fitimprurës

Aktualitet / /

Kryeministri Edi Rama, ka zgjedhur të promovojë një investimin kurajoz të Jaho Xhebro, që me mbështetjen e Agjencisë së Zhvillimit Bujqësor e Rural, në majë të maleve mes një bukurie magjepsëse, ka ngritur një agroturizëm fitimprurës, jo vetëm për familjen e tij por edhe zonën.

“Shqipëria që nuk bën lajm në media është një vend ku punohet, prodhohet, eksportohet, zhvillohet ekonomia e familjeve që i përkushtohen të ardhmes, duke e nxjerrë fitimin nga puna edhe aty ku duket sikur s’ka asnjë mundësi”, tha kryeministri Rama.

Ai përcjell rastin duke theksuar: “Ja një nga shumë e shumë shembujt e kurajos, besimit dhe punës së ndershme, në majë të maleve e në mes të një bukurie magjepsëse, ku një ngrehinë e vjetër mbijetese, sapo është kthyer në një agroturizëm fitimprurës, nga Jaho Xhebro e familja e tij, me mbështetjen e qeverisë shqiptare, përmes Agjencisë së Zhvillimit Bujqësor e Rural”.

“Tanimë nuk është më kjo familje që duhet të gjejë rrugët e pamundura për të nxjerrë prodhimet e pakta në treg, po janë vizitorët vendas e të huaj që marrin rrugën deri atje, për të shijuar natyrën e mrekullueshme dhe ushqimet bio të zonës, duke thithur ajrin e pastër të Nivicës”, shprehet kryeministri Rama./atsh

Nivicë/ Mbështetje financiare nga AZHBR, Jaho Xhebro ngre një agroturizëm fitimprurës Read More »

Ndahet nga jeta ish-gazetari i ATSH, Riza Hoxha

Aktualitet / /

Gazetari i njohur dhe ish-korrespondenti i Agjencisë Telegrafike Shqiptare, Riza Hoxha, ndërroi jetë sot në moshën 61-vjeçare, pas një sëmundje të rëndë.

Gjatë punës së tij rreth 21 vjeçare si korrespondent i ATSH-së, Hoxha mbulonte veriun e Shqipërisë, qytetet e Tropojës, Kukësit, Pukës, Hasit etj. Hoxha ka qenë një nga gazetarët e parë kuksianë të pas viteve ’90 dhe është dalluar për zhanrin e reportazheve të shkruara social-ekonomike për qarkun e Kukësit e jo vetëm.

Në lajmet e kolegut tonë binte në sy saktësia dhe shpejtësia me të cilën ai raportonte. Një vend të veçantë në punën e tij zinin informacionet dhe reportazhet nga Kosova.

Ne kolegët e tij do ta kujtojmë për kontributin e tij të madh në fushën e gazetarisë dhe veçanërisht në informacionin për ATSH.

Agjencia Telegrafike Shqiptare i shpreh ngushëllime familjes dhe të afërmve./atsh

Ndahet nga jeta ish-gazetari i ATSH, Riza Hoxha Read More »

Janar-gusht/ Mbi 115 mijë turistë gjermanë vizituan Shqipërinë

Aktualitet, Turizem / /

Shqipëria tashmë është kthyer në një destinacion të preferuar turistik për vizitorët nga e gjithë bota.

Pasuritë e vendit tonë po zgjojnë kureshtjen e vizitorëve të huaj përherë e më shumë.

Në rastin e shtetasve gjerman, shifrat e publikuara nga Instituti i Statistikave (INSTAT), përmes raportit mbi lëvizjen e shtetasve, tregojnë se vetëm në dy vitet e fundit numri i vizitorëve është rritur ndjeshëm.

Nga 102 mijë shtetas gjerman që numëroheshin të kenë hyrë në vendin tonë për periudhën janar-gusht të vitit 2018, në 8-mujorin e këtij viti kjo shifër arriti mbi 115 mijë.

Eksperienca e veçantë që u ofrohet vizitorëve nëpërmjet mundësive për argëtim, e ndërthurur me bukuritë natyrore të vendit tone, ka ndikuar pozitivisht në rritjen e numrit të turistëve ndër vite.

Numri i shtetasve të huaj që kanë hyrë në vendin tonë përgjatë tetë muajve të 2019 është rreth 4.9 milion, duke u rritur me 10.8%, në krahasim me të njëjtën periudhë të vitit 2018./atsh

Janar-gusht/ Mbi 115 mijë turistë gjermanë vizituan Shqipërinë Read More »

Unë e takova Marsidën nga Kavaja: Mos e thërrisni ku.rvë

Opinione / /

Nga Dorjana Bezat
Këtë mëngjes hyra në rrjetet sociale dhe nga një seri postimesh kuptova se dje paskësh qënë dita botërore e vajzave. E gëzofshim! Nuk e dija që ekzistonte një ditë e tillë. E nga ta dija?! A mund të ketë festë vajzash në vendin ku jetoj?!

Dy ditët e fundit i kam kaluar në Kavajë. Qytet i vogël, i lidhur fort pas fesë dhe paragjykimeve. Një qytet që në atë që unë pashë m’u duk se kishte 2 jetë. Atë që prezantohej si konservator dhe me atë jetën tjetër të pashfaqur që pëshpëritej nën zë brënda dyerve të mbyllura.

Dhe ndodh një ngjarje si ajo e 10 tetorit që jeta e fshehtë të dalë në shesh e të plasin fjalët: Ua sa turp! Një burrë mbeti i vrarë në pragun e shtëpisë së një gruaje e një tjetër burrë ishte brenda I plagosur. Një grua e martuar, me 3 fëmijë, me bashkëshortin në burg, kalonte natën me disa burra në shtëpi mes birrash e plumbash. Në turmë kësaj gruaje iu derdhën në fyt: KURVA!

Dhe jo vetëm kavajsit. Të gjithë. Të njohur e të panjohur.

Unë e takova atë grua. Është shumë e lehtë ta gjykosh e paragjykosh për veprimet e saj e për jetën që bënte.

Unë s’e bëj dot ketë. S’e bëra dot kur e pashë me rrathë të zinj në sy. Të denatyruar deri në deje.

M’u duk se frymonte një qënie që nuk ishte njeri, as femër, as nënë. Nuk di çfarë ta quaj, por ngjyra e lëkurës së saj, mënyra e jetesës, atë që ajo mendonte më lanë të kuptoja se ngjarja e së enjtes ishte drama e fundit e jetës së saj. Para se t’i thërrisni kurvë, mendojeni që e kanë martuar që 14 vjeç. Kur ajo ishte ende fëmijë u bë nënë. Teksa e pyesja për jetën e saj mes rreshtash kuptova se ajo shihte si vlerë tek partnerët e saj sa njerëz kishin vrarë. Kjo besoj tregon shumë për formimin e saj…

Po ç’mund të them për vajzën e saj 9 vjeç?! A mund të ketë ajo festë?! E pashë teksa kthehej nga shkolla me gjyshen përdore. Gjithë qyteti gumëzhinte për nënën e saj. Më kaloi para këmbëve e heshtur. Në shpinë mbante çantën e shkollës ngjyrë rozë me princesha. Sa larg jeta e saj nga përrallat…

Po vajzat e burrave që nxorën armët në këtë ngjarje?! Njëra është 14 e tjetra 6 vjeç? Uroj që ato kurrë të mos e mësojnë ç’kanë bërë baballarët e tyre.

Nuk mundem të harroj as nënën e Dritan Haxhollit. “Përse të rroj unë tani që s’e kam djalin”, më tha. Një grua e veshur kokë e këmbë me të zeza, në vaj pranonte se djali i saj nuk ishte ai që duhej, por ajo sërish e donte.

Më vonë mësova se ajo grua ishte dhunuar e rrahur nga i biri shumë herë, por ajo vazhdonte të jetonte në një çati me të, duke pritur me ankth çdo natë që ai të kthehej në shtëpi pa bërë ndonjë të pabërë me armën që mbante me vete.

E pra, ta gëzojmë festën! Por, para se të bërtasim e shtrembërojmë fytyrën duke thënë “shih kjo kurva”, le t’i hedhim pak sytë vërdallë tek familja jonë, fqinjët, lagjja, shoqëria etj., të bëjë secili pjesën e tij që të rrisim vajza dhe jo kurva.

Unë e takova Marsidën nga Kavaja: Mos e thërrisni ku.rvë Read More »