Irina

Familjeve të dëmtuara nga tërmeti duhet t’u rindërtojmë banesat, por familjeve në Thumanë duhet t’u garantojmë ato pallate që kishin dhe duhet të jenë natyrisht shumë të forta dhe më të mira.

Kështu deklaroi sot kryeministri Edi Rama në mbledhjen e qeverisë.

“Është një sfidë shumë e madhe duhet të bazohemi tek buxheti i qeverisë, do të bazohemi tek buxheti i bashkive sikur imponon ligji për gjendjen e jashtëzakonshme dhe për këtë po punojmë për një skemë financimi që të na mundësojë një mbulim tërësor, pa u kufizuar apo pa u mbuluar thjesht me anën tjetër që është mekanizimi i financimit të jashtëm. Me kolegët europianë kam folur dhe para se të hyja këtu, po komunikoja me kryeministren e Danimarkës , e cila më kish shkruar një mesazh të gjatë dhe po kështu me të gjithë.
Nëse Zoti nuk ka bërë ndonjë plan tjetër do të jemi për pak ditë në samitin e NATO-s dhe aty me të gjithë kemi rënë dakord , jashtë tryezës së Samitit të bëjmë një diskutim do të adresohet kjo plagë e hapur në Shqipëri dhe si ndihmohen shoqëria, shteti, njerëzit në nevojë në këtë proces rindërtimi”, – nënvizoi Rama.

Kreu i qeverisë u shpreh se “me Presidentin e Turqisë kemi rënë dakord të organizojmë një tryezë me vendet e rajonit lindor, kështu që janë dy mekanizma, mekanizimi i BE që është një mekanizëm i afirmuar dhe konfirmuar për të mbështetur dhe kemi një komponent të tretë që janë SHBA që kanë ofruar të gjithë gatishmërinë e tyre për të mbështetur”.

“Ajo që duhet të bëjmë është të fillojmë të bëjmë listat dhe të hartojmë hartën e shpërndarjes së familjeve duke garantuar transportin e tyre drejt këtyre strukturave akomoduese, ku do kujdesemi në mënyrë të vazhdueshme. Por, kjo ama kjo nuk do të zgjasë disa ditë ditë, muaj, mund të zgjasë me vite, kjo është një fazë e ndërmjetme prej disa muajsh dhe ndërkohë sfida e madhe është programi i rindërtimit”,- tha Rama./atsh

“Jam betuar që do të jem zjarrfikës dhe do t’i shërbej popullit tim, në çdo moment të vështirë të jetës që do të dal dhe do rrezikoj jetën time për të shpëtuar jetën e tjerëve. Ishin momente të vështira, por jemi betuar që do të bëjmë detyrën dhe ia dolëm të shpëtojmë jetë njerëzish nën rrënoja”.

Kështu u shpreh sot zjarrfikësi nga Vlora, Luan Kapaj, i cili ditën e djeshme së bashku me kolegët e tij nuk reshti një sekondë, duke u përpjekur të nxjerrë gjallë nga rrënojat e tërmetit, personat nën gërmadha.

“Ishte një moment i vështirë, pasi pallati ishte rrafshuar dhe kur njerëzit atje kërkojnë ndihmë ishte e pamundur mos t’i ndihmoje”, tha për mediet Kapaj.

Duke treguar për punën e tij dhe te kolegëve, Kapaj shprehet se “ishte një tunel që mezi u futëm për t’i shpëtuar, nxorëm të gjallë një grua dhe një burrë. Ishte e pamundur të mos rrezikoje jetën tënde për të shpëtuar jetën e tyre”, – theksoi ai.

“Ishte fati i tyre, por edhe detyra jonë”, – tha Kapaj.

Me keqardhje ai tregon se “shpëtuam dy jetë njerëzish, por fatkeqësisht lamë edhe dy jetë atje”.

“Sot do të vazhdojmë prapë mbase i nxjerrim të gjallë”, shpreson Kapaj.

I pyetur se çfarë ndjesie pati, Kapaj shprehet se “ne jemi mësuar me ngjarje tragjike kur tjetri të kërkon ndihme dhe ti je i detyruar ta nxjerrësh nga ai moment. Por në situatë të tillë për ti shpëtuar jetën një personi nën rrënojat e tërmetit nuk e kemi hasur”.

“Ishin momente të vështira, por ne jemi betuar dhe po bëjmë detyrën”-, tha Kapaj.

Bashkia e Vlorës e nderoi sot zjarrfikësin Luan Kapaj me titullin “Mirënjohje e Qytetit të Vlorës”, për sakrificën e jetës së tij për shpëtimin e njerëzve që ishin nën rrënoja.

Ditën e djeshme kur fuqitë e tij u duk se shterën dhe Urgjenca Kombëtare Shëndetësore, e detyroi të shtrihej mbi barelë, Luan Kapaj refuzoi maskën e oksigjenit dhe u rikthye tek gërmadhat, në kërkim të jetëve që kërkojnë shpëtim./atsh

Ambasada e Gjermanisë në Tiranë në shenjë solidariteti me qytetarët shqiptarë ka ulur flamujt në gjysmështizë.

“Bashkohemi me zinë kombëtare për viktimat e tërmetit të djeshëm dhe u shprehim të gjithë të afërmve ngushëllimet tona”, shprehet Ambasada.

Qeveria e shpalli ditë zie kombëtare 27 nëntorin nisur nga tërmeti i fuqishëm që preku vendin tonë këtë të martë duke shënuar dhjetëra viktima.

Numri i personave që kanë humbur jetën pas tërmetit të fortë që goditi vendin tonë mëngjesin e djeshëm me magnitudë 6.3 Rihter është 26.

Ministria e Mbrojtjes bën të ditur sot se “pas verifikimit të të dhënave të fundit, numri i personave që kane humbur jetën është 26, nga të cilët 12 nga Durrësi, 13 nga Kruja dhe 1 nga Lezha”.

Ndërsa nga Ministria e Shëndetësisë raportohet se 658 të lënduar nga tërmeti kanë marrë shërbim mjekësor në spitale, si pasojë e tërmetit dhe aktualisht po trajtohen 65 të lënduar, nga të cilët 8 janë në gjendje më të rënduar, nën kujdesin e mjekëve që kanë bërë një punë të jashtëzakonshme.

Ekipet e kërkim-shpëtimit nga vendi dhe ato ndërkombëtare po vazhdojnë të punojnë me kujdes për nxjerrjen e personave të mbijetuar nën rrënojat e hotelit dhe të pallatit që u shemb në lagjen “18 shtatori” të qytetit të Durrësit, si dhe në pallatin e shembur në Thumanë, Krujë pas tërmetit të fortë me magnitudë 6.3 Rihter që goditi vendin tonë mëngjesin e së martës./atsh