Aurora

Sali Berisha ka sulmuar ashpër disa gazetarë të njohur në portalin e të birit, në një shkrim pa autor. Shkrimi, sipas Nikoll Lesit, një prej të akuzuarve, është bërë pikërisht nga Berisha.

““Koha Jonë” ndër vitet 2003-2005 ishte në ballë të kritikave ndaj pushtetit të korruptuar dhe kriminal të Fatos Nanos. Bile puna shkoi deri aty sa kryeministri Nano në vitin 2004 të kërkonte imunitetin tim dhe arrestimin si botues, ndonëse asokohe isha edhe deputet?

Apo jo i nderuar artikullshkrues i katit të 14-të të Kullës së madhe përballë TVSH-së”, shkruan Lesi, që i është përgjigjur Berishës. Ky i fundit është mërzitur veçanërisht me Lesin, pasi sipas tij, është zëri zyrtar i Ilir Metës. Por Berisha thotë se Meta nuk ka të njëjtin qendrim si Lesi në këtë çështje.

Shkrimi i plotë i Berishës:
Kurrë më parë, as në rastin e skandalit Tahiri, nuk ka ndodhur një mobilizim i tillë i paprecedentë i gazetarëve dhe medieve pranë kryeministrit Rama, për të mbrojtur në pamje të parë, një nga ministrat e tij, Fatmir Xhafajn.

Por më e “çuditshmja” është se edhe zëra që kanë krijuar perceptimin si kritik të kryeministrit, i janë bashkuar këtij koalicioni.
Emra të njohur që pretendojnë se flasin në emër të publikun, vrapojnë studio më studio e derdhin shkrime pafund nëpër portale, për të ngritur alibi nga më absurdet; të gjithë të përçartur dhe në ekstazë duke tejkaluar pa pikë turpi jo vetëm kufijtë e logjikës, profesionalizmit, por edhe të etikës.
Lufta, për të shpëtuar skemën

Fatmir Xhafaj është një politikan i vjetër, tani edhe një nga kokrrat e fundit të Partisë Socialiste i inkuadruar brenda Rilindjes. Në karrierën e tij të gjatë ai njihet si një politikan, apo edhe kur ka shërbyer e vazhdon si ministër në qeveri, që ndryshe nga shumica e kolegëve të vet, ka zgjedhur që të rrijë larg gazetarëve. Marrëdhëniet e tij me analistët dhe mediat në përgjithësi të çdo krahu kanë qenë të largëta, madje edhe të ftohta. Ndryshe nga të tjerë Xhafaj nuk është shquar kurrë si investitor, në qarqet opinionbërëse.

Por ja papritur që prej pak javësh, veçanërisht pas daljes mbi ujë të së vërtetës së vëllait të tij, Agron Geron Xhafaj, na del që Fatmiri paska një grup të gatshëm gazetarësh dhe analistësh të përbetuar që ta mbrojnë si kamikazë, përtej logjikës së argumenteve, madje po të kenë pistoleta nëpër studio, të gatshëm që ti nxjerrin për të qëlluar mbi këdo që mendon ndryshe.

Në fakt e vërteta nuk është, se ata mbrojnë ministrin e Brendshëm, as vëllanë e tij dhe madje as Edi Ramën. Në lojë këtë herë është e gjithë skema kriminale, e mafies së drogës. Zinxhiri që u hollua me rastin Tahiri dhe një grup drejtorësh policie është katandisur, deri në këputje përfundimtare.
Gazetar, apo avokatë të drogës?!

Egërsia dhe epizmi që shfaq kjo skuadrilje gazetarësh, për të mbrojtur vëllezërit Xhafaj tregon se investimi financiar është i madh. Disa nga më tipikët që po mbrojnë këtë skemë nëpërmjet një retorike absurdë, e madje me argumente idiote në funksion të alibive që i hedhin publikut, janë Mustafa Nano dhe Shpëtim Nazarko.

I pari ka një javë që ka braktisur gjithçka dhe i është përkushtuar me mish e shpirt, mbrojtjes së vëllezërve Xhafaj. Mbrëmë në emisionin “Opinion” i lemerisi të gjithë, duke përfshirë edhe Fevziun kur doli nga shinat dhe ju vërsul një djaloshi me integritet dhe profesionist në fushën e tij siç e njohin të gjithë, Gazmend Bardhin; me një fjalor rrugaçëror e shantazhues, që me shumë gjasa edhe Agron Geroni po të ishte personalisht në studio, nuk do të guxonte ta përdorte.

Nazarko nga ana tjetër, herë si zhurmues e herë si shejtan-budalla, përpiqet që ta nxjerr Xhafajn si supremen, në duart e të cilit ka ngelur fati i Shqipërisë dhe integrimi i vendit, prandaj mund ti falet çdo gjë; edhe vëllai trafikant aktiv droge.

Ka edhe të tjerë të këtij lloji, të cilët e kanë të shkruar në ballë “zhaken me para”, për të bërë avokatin e mafies së drogës, por nuk ja vlen të merresh me ata, sepse e bëjnë vetë shumë mirë punën e vetëdemaskimit.

Interesant në këtë front është rasti, i Nikoll Lesit. Ditët e fundit, edhe duke u investuar personalisht me editoriale të nënshkruar me pseudonimin mediatik të preferuar, “Spiten Prulli”, në gazetën e tij “Koha Jonë” po bëhet një avokaturë teje e fortë ndaj Fatmir Xhafajt dhe detyrimisht edhe ndaj të vëllait; sepse në fakt ai dhe veprimtaria e tij kriminale është thelbi i çështjes. Themi interesant, sepse në të njëjtën faqe ku mbrohet me tituj bombastik Xhafaj, gjen me shumicë lajme të eksponentëve zyrtarë të LSI si Petrit Vasili e Ylli Manjani, të cilët mendojnë të kundërtën.

Nga ana tjetër prej kohësh media e Lesit mban si kryelajm, çdo veprimtari të punës së presidentit, sa që të krijohet përshtypja se është zëri zyrtar i Ilir Metës.
Nuk ka ndonjë gjë të keqe në këtë pluralitet, por perceptimi “naiv” i publikut duket sikur po përpunohet drejt përfundimit, që përderisa Nikoll Lesi po mbron fort Fatmir Xhafajn dhe vëllanë e tij, kjo është edhe linja e Metës.

E vërteta është, se nëse kthehemi pas në kohë, Ilir Meta me Xhafajn kanë qenë në përplasje të hapura, veçanërisht për çështjen e projektit fillestar të Reformës në Drejtësi ( U detyruan ta rishikojnë pas Venecias dhe “kërcënimit” të kreut të LSI, për largim nga kooalicioni), në të cilën sot po del se ka ndërhyrë e falsifikuar nenin. për ekstardimin në favor të të vëllait të dënuar në Itali.

Por Lesi gjithmonë ka qenë “kokë më vete” dhe ky investim ndaj Xhafajt, mund të mos ketë lidhje fare me afeksionin e tij ndaj presidentit, por vetëm me konspiracionin që shpalos ai në shkrimet e tija; me pak fjalë Rama&Basha në koordinm, po “ja fusin” Fatmir Xhafajt!

Ndër zërat që i është bashkuar në mënyrën e tij, avokatisë “me të gjitha mjetet” të skandalit Xhafaj është edhe Andi Bushati. Duke vazhduar përpjekjen e tij titanike për të ruajtur integritetin dhe veçanërisht “paanësinë”, (jam kundër Ramës, por Saliu dhe këta të opozitës e kanë fajin!) në portalin e tij, “Lapsi.al”, në gjithë këtë histori çështja shtrohet; a është i besueshëm dëshmitari Albert Veliu!

Pra sipas Bushatit, meqenëse një ish skafist dhe trafikant droge i pa shkollë, nuk e artikulon dot qartë dhe “pa kontradikta” rolin aktiv si koka e trafikut të drogës në Vlorë e më tej të Agron Geron Xhafajt, i ndihmuar nga shefat e policisë, atëherë as Fatmiri dhe as ai vetë nuk mund të akuzohen ende!

Edhe Ben Blushi me çelësat e Top Chanel në dorë, që kur doli si flutur nga zyra me flutura e Edi Ramës, nuk kujdeset më edhe aq shumë, që të mbajë maskën e kundërshtarit pa kompromis. Edhe ky si ai partizani që ishte maskuar si partizan, që gjermanët ta merrnin për gjerman dhe të mos e ngacmonin, të vërtetën e skandalit Xhafaj “e zbulon” me sondazhe, sepse dokumentet dhe dëshmia e Babulit, nuk quhen!

Gjella, që i bashkon në një kazan
Filli, gjella, argumenti që i përbashkon të gjithë këta e të tjerë dhe mbi të cilin mbështesin alibinë e avokatisë është; se Fatmir Xhafaj na qenka ministri i Brendshëm më i suksesshëm i të gjitha kohërave dhe e ka apo se ka vëllanë trafikant droge, na duhet që të vazhdojë punën e nisur.

Në fakt kjo aureolë që i është krijuar Xhafajt, duke e krahasuar më së shumti me kohën e Tahirit është krejtësisht e gënjeshtërt. Nga të dhënat zyrtare, të të ashtuquajturit operacioni “Forca e Ligjit” tek i cilin mbahen me të madhe, 80% e të arrestuarve janë liruar nga prokuroria dhe gjykata, për mungesë provash. Deri tani në fakt kemi të bëjmë vetëm me një shoë, të ngjashëm me atë kundër lojërave të fatit, “Fundi i Marrëzisë”, i cili në përfundim vetëm sistemoi monopolet e Rilindjes në këtë fushë dhe e shndërroi Agron Xhafaj në një biznesmen, “edhe më të suksesshëm”.

Gjatë epokës Xhafaj, në fakt kemi vetëm dy ngjarje të rëndësishme në luftën kundër krimit të organizuar. Operacionin pas të cilit u shkatërrua një grup i strukturuar që dërgonte në SHBA dhe Kanada klandestinë me të gjitha mënyrat dhe rrugët dhe kapja e 613 kilogramë kokainë, në Manzë. Të parin e kreu FBI nga fillimi në fund, kurse policët e Xhafajt ishin të detyruar që të ekzekutonin arrestimet.

Çështja e kokainës është, edhe më skandaloze. Pronari i bananeve ku ishte fshehur malli, ja mbathi nga pika kufitare nën hundën e policisë dhe përveç dy punëtorëve të firmës, askush nuk është arrestuar as sot e kësaj dite. Edhe Arbër Çekajn e prangosën gjermanët, kurse hetimi nga pala jonë është bllokuar krejtësisht.

E njëjta analizë vlen edhe për organizatën e Met Kananit, i cili edhe pse bazën e kishte këtu në Shqipëri dhe madje dihej shumë mirë se me çfarë “biznesi” merrej edhe nga kolegë në PS të Xhafajt, goditjen e morri nga shërbimet sekrete dhe policia turke.

Fatmir Xhafaj sa herë del në media, numëron familje e organizata mafioze nëpër qytete të ndryshme të Shqipërisë, por deri më sot askënd nuk ka goditur, edhe pse se cilët janë e dinë edhe kalamajtë e lagjeve, ku jetojnë e vazhdojnë biznesin.

Xhafaj mburret gjithashtu dhe ka krijuar perceptimin në publik, nëpërmjet këtyre analistëve të mësipërm, sikur shkallmoi skemën e Saimir Tahirit. Nëse do të ishte kështu, goditja e parë që duhej bërë pas asaj që ndodhi me kanabisimin e vendit, duhej të ndodhte në Vlorë, kryeqytetin real të këtij operacioni kriminal, të paprecedentë në botë, që nga kultivimi dhe deri te transporti i organizuar të mijëra tonelatave drogë drejt Europës.

Me Xhafajn ministër, “u zhduk” drejtori i policisë së Vlorës Jaeld Çelaj dhe shefa të tjerë, bashkëpunëtorë të trafikantëve të drogës të cilët vazhdojnë të jenë të lirë.

Ky ministër-rambo që na qenka i pazëvendësueshëm sipas Nanos, Nazarkos, Lesit etj, pranon që teorikisht se bashkë të vëllanë janë subjekt i Ligjit të Antimafies, por praktikisht, nuk janë!!
Ky burrë me “integritet” sipas këtyre “superanalistëve”, në vitin 2002 Xhafaj i dha dorëheqjen Majkos si ministër, vetëm sepse i vëllai akuzohej për trafik droge, kurse sot që ai është i dënuar me vendim të formës së prerë dhe ka dëshmi se e vazhdon veprimtarinë kriminale, nuk paska asnjë arsye (të paktën morale e politike), për të bëjë sot të njëjtën gjë, pavarësisht e pranon apo jo Edi Rama.

As këtë dhe asnjë gjë nga ato që rreshtuam më sipër, nuk bën dot Fatmir Xhafaj. Sepse këtu nuk është më në lojë emri dhe karrigia e tij, as e Ramës; por fati i mafies shqiptare të drogës (të të gjitha llojeve) këtu e jashtë vendit.

Prandaj shpura e mësipërme mediatike me ndërgjegje apo jo, me pagesë apo për arsye të tjera, nuk është duke bërë avokatinë e Fatmir Xhafajt, as thjesht të Ramës por të vetë mafies shqiptare të drogës!
Një leksion se si bëhet gazetari e pa kapur, jua dha “profesorëve” sot ajo gazetarja e re me vetëm një pyetje, që e bëri Edi Ramën të mbetet pa zë dhe figurë dhe t`ja mbath me vrap:
Nuk paska Partia Socialiste njerëz, që nuk ka vëlla apo kushëri të lidhur me drogës që të drejtojë Ministrinë e Brendshme?!Pamfleti.com/

Tashmë “bashkëpunëtori x” ka një emër dhe një fytyrë: është Albert Veliu, një ish-skafist dhe trafikant, i cili është vënë në epiqendër të audiopërgjimit të vëllait të ministrit të brendshëm, Agron Xhafaj.

Shkruan Ardit Rada
Pasi bëri publike bisedën audio mes A.Xhafajt dhe “bashkëpunëtorit x”, PD vendosi një ditë më pas, pas reagimeve të kryeministrit dhe ministrit të brendshëm, që të publikojë një intervistë video me vetë personin denoncues të Agron Xhafajt.

Dalja publike e Albert Veliut prodhoi një numër të ri akuzash direkte ndaj vëllait të ministrit. Veliu u shpreh se Xhafaj vijon të merret me trafik, se ai ra dakord ta ndihmonte atë për të kaluar disa kilogramë hashash drejt Italisë dhe se “Agron Xhafaj kontrollon Vlorën”. Veliu nuk fshehu edhe një dozë të lexueshme mllefi ndaj A.Xhafajt, kur tha se ai nuk i kishte sjellë asnjë paketë cigare në burg dhe se jetonte mes të mirave, kurse ai vetë ishte pa punë.

Deri këtu versioni i akuzave të Albert Veliut ndjek linjën e bisedës së përgjuar me Agron Xhafajn. Akuzat e reja vetëm sa kërkojnë të përforcojnë ato të vjetrat, ndërkohë që intervista e gjatë që PD i kishte marrë Veliut, la pas jo pak dyshime për lapsuset e të intervistuarit, por edhe në lidhje me disa qëndrime të ndryshme të krerëve demokratë në lidhje me aspekte konkrete të përgjimit dhe intervistës.

Dhe në këtë rrëmujë duket se është përfshirë jo vetëm bashkëpunëtori Veliu, por edhe vetë PD. Sipas një skeme e cila mund të mos jetë kryekëput një keqorganizim apo amnezi e personave që janë marrë me këtë histori, por një përllogaritje diabolike me qitje të largët.

Dhe ja pse:
Së pari, Albert Veliu ishte kontradiktor në shumë momente gjatë intervistës. Ai qe i pasaktë, sipas dosjes së tij penale të botuar nga mediat, në lidhjet me vitet e burgut që ka bërë në Itali, me llojin dhe sasinë e drogës me të cilën është kapur dhe në lidhje me autorësinë e përgjimit. Në pjesë të intervistës ai mohonte kategorikisht se kishte gisht në përgjimin e Agron Xhafajt, ndërkohë që më pas pohonte se Xhafaj përgjoi vetveten, e më tutje, se ai ishte përgjuar nga të tjerët.

Së dyti, edhe më kontradiktore se Albert Veliu, ka qenë PD në orët e fundit, në lidhje me përgjimin audio të A.Xhafajt. Ka të paktën dy versione të zyrtarëve të lartë të PD, në lidhje me autorin e përgjimit ndaj vëllait të ministrit. Njëri që thotë se përgjimi është vepër e një gazetari dhe tjetri se ai është bërë nga shërbimet. Nga ana tjetër, kur pyeten se cilat janë provat që ata kanë rreth autenticitetit të përgjimit, demokratët mjaftohen vetëm me deklarimin se përgjimi është i vërtetë dhe i pakontestueshëm.

Kjo amulli rreth një afere kaq delikate dhe me impakt politik të lartë, vështirë të jetë fryti i një frenezie të momentit apo i një moskoordinimi të rastit brenda selisë blu. Kur u njoftua konferenca e shtypit për intervistën video të Albert Velitu, orari i parë u shty me rreth treçerek ore. Vetëm më pas, kreu i PD Basha dhe tre denoncuesit e skandalit u vunë përballë shtypit dhe shfaqën intervistën. Një material i cili kishte brenda jo pak kontradikta logjike e pasaktësi konkrete.

Ajo që duket prej së largu, në një situatë të tillë, është se në fakt, bashkë me akuzat dhe sherrin politik në ngarkesë të ministrit Xhafaj, PD ka përgatitur me kujdes edhe një strategji paralele, një plan B ose një taktikë shpëtimi të minutës së fundit. Nëse ish-trafikanti vlonjat nxjerr nga goja të pavërteta dhe pasaktësi që transmetohen pa u censuruar nga ekrani i PD, kjo nuk do të thotë se dikush harroi të marrë gërshërët me vete, por se në rast shpalljeje të panipuluar të audio-përgjimit ndaj Agron Xhafajt, do të ishte gjithsesi komode t’ja hidhje fajin një të panjohuri, më shumë sesa ta mbaje të gjithin mbi shpinë.

Natyrisht PD po riskon jo pak, duke marrë për të mirëqena akuzat e një personi me kredibilitet të ulët, por gjithsesi duke e ekspozuar Veliun publlikisht me të gjitha pasaktësitë dhe alogjizmat e tij, ajo e ka krijuar tashmë një alibi rezervë “për ditë të keqe”. Pamfleti/

Nëse keni plane për nesër, ju bëjmë me dije se fundjava do të jetë e shoqëruar me shi.

Sot pasdite (e premte, dt.18) priten reshje të dobëta në të gjithë vendin.

Sipas IGJEUM: Nesër (e shtunë, dt.19) pritet që në orët e paradites të ketë reshje të dobëta në të gjithë vendin.

Nesër (e shtunë, dt.19) temperaturat minimale dhe maksimale të ajrit pritet të arrijnë:

në bregdet: 15 / 26 °C;

në vendet e ulëta: 14 / 25 °C;

në vendet malore: 10 / 22 °C.

Sot pasdite (e premte, dt.18) dhe nesër (e shtunë, dt.19) era pritet të fryjë e lehtë deri mesatare në bregdet.