Aurora

Kryebashkiaku Erion Veliaj tha sot se “Lulzim Basha është ndoshta njeriu që ka humbur më shumë shanse në jetë se kushdo tjetër dhe mund ta shfrytëzonte shumë mirë punën në bashki dhe në qeveri”.

“Më vjen keq për humbjet e tij në jetë. Ne jemi njohur kur kemi qene 20 vjeç dhe unë jam 40 sot. Jeta ikën shumë shpejt dhe nëse Perëndia apo zgjedhësit të japin një shans duke të zgjedhur duhet ta maksimizosh. Nuk mund të jetë nofka jote gjumash, nuk mundet pasi është një shans që i jepet 1 në një milionë dhe koha ikën shpejt”, tha ai, në një intervistë televizive.

Veliaj tha se përvoja si kryetar Bashkie është ndër më të bukurat në jetë. Ai ndër të tjera theksoi se është një profesion që të jep kënaqësi dhe nuk do e ndryshonte me asgjë.

“Përvoja si kryetar bashkie është më e bukura në jetën timë, të vdisja dhe të lindja 100 herë këtë punë nuk do e ndryshoja, është një ndër më të bukurat. Nuk më vjen në mendjen një profesion tjetër që një vendim që merr në mëngjes jep shumë impakt në darkë dhe se si një aktivitet që ndërmerr transformon jetën e vendit ku je rritur dhe ku ke kujtime”,tha Veliaj.

Ai komentoi edhe shembjen e godinës së Gjimnazit “Sami Frashëri” në kryeqytet e cila u dëmtua nga tërmeti. Ai theksoi se kjo ishte një ndër vendimet që i ka ngjallur shumë kujtime për kohën e kaluar në këtë godinë.

“Nëse nuk do të kisha shumë nostalgjinë dhe melankolinë e prishjes së shkollës ‘Sami Frashëri’ nëse nuk do të isha vetë aty. Sa veta në qytet mund të thonë se rindërtuan shkollën ‘Sami Frashëri’. Nostalgjia është njerëzore kujtimet, arkiva e memories janë gjëra njerëzore por tashmë nuk mund të mbetemi peng i së kaluarës, ajo ishte një shkollë që është ndërtuar në vitin ’62. Ishte një shkollë që kanë qenë presidenti Meta, ish-kryeministri Nano, kreu i PD-së Lulzim Basha, shkollë që ka prodhuar kampionë të olimpiada të shumta. Vitet e vështira 97’-98’ i kam kaluar në atë shkollë, ku mësimi bëhej ose në distancë ose me orë të shkurtuara. Në atë shkollë nuk mësoje vetëm në klasë por dhe nga dinamikat përreth”, është shprehur kryebashkiaku./atsh

“Shtyrja e afatit të gjendjes së fatkeqësisë natyrore deri në 23 qershor është një domosdoshmëri në mënyrë që e gjithë kjo situatë pandemie të kalojë me sa më pak të prekur ndër qytetarë dhe bluzat e bardha”, deklaroi sot ministrja e Shtetit për Marrëdhëniet me Parlamentin, Elisa Spiropali.

Duke ofruar një tablo të asaj që po ndodh dhe pritet të ndodh në botë si pasojë e pandemisë, Spiropali tha se “pandemia e shkaktuar nga Koronavirusi i ri ka infektuar deri tani mbi 2.6 milionë njerëz në të gjithë botën, ka vrarë mbi 180 mijë dhe vazhdon të infektojë dhe të vrasë përditë, me një ritëm që i afrohet një bilanci luftë.
Të martën e shkruar, Fondi Monetar Ndërkombëtar deklaroi se ekonomia botërore pritet të tkurret 3% gjatë 2020-s, rënia më e madhe historike që prej depresionit të madh të 1930-s. Falimentime dhe papunësi masive ishin fjalët kyçe të analizës. Amerika dhe vendet kryesore evropiane do të përjetojnë goditjen më të forte – konkretisht ekonomia e SHBA pritet të tkurret me 5. 9%, vendet e eurozonës me 7.5 %, ku Italia, një nga partnerët tanë kryesore tregtarë, do tkurret me një rekord 9.1 %, Spanja 8 %, Franca 7.2 % dhe Gjermania 7 %”.

Ajo tha se qytetet kryesore të botës të shkreta, rrugë dhe sheshe të zbrazura, nga New Yorku-u në Tokyo, nga Milano ne Bombei, e dëshmojnë me saktë se çdo statistikë, forcën tinzare të këtij armiku të vogël, por të madh, të njerëzimit.

“Shqipëria e ka përballuar me dinjitet këtë luftë të papritur. Nuk na gjeti të papërgatitur, përkundrazi Shqipëria ishte vendi dytë në Europë që mbylli shkollat dhe nga të parët që mbylli kufijtë. Kufizoi lëvizjet dhe shpalli karantinën si masë të domosdoshme. Shqipëria rezulton nga vendet me sëmundshmërinë dhe vdekshmërinë më të ulët në Europë, por edhe në rajon që ka përgjithësisht një ritëm të ulët të sëmundshmërisë”, tha Spiropali.

“Spitalet tona nuk janë të tejmbushura me njerëz që luftojnë me vdekjen të varur në respiratorë. Morgjet tona nuk janë plot. Mjekët dhe infermierët tanë, falë Zotit dhe kujdesit kanë një shkallë shumë të ulët infektimi”, tha Spiropali.

“Jo se jemi pasardhës të pellazgëve mitikë e s’na gjen gjë, siçc thonë romantikët. As se rron e rron e s’vdes shqiptari, siç thonë Nolistët, apo po ra se se kemi kismet siç thonë optimist-fatalistët, por vetëm e vetëm sepse si qeveri, si shtet e si popull mund të themi me plot gojën se kemi bërë gjënë e duhur”, theksoi Spiropali.

“Masat kanë qenë drastike dhe efikase. Ashtu siç ka qenë ekzemplare rezistenca qytetare. Disiplinë, respekt për bluzat e bardha dhe udhëzimet e tyre, durim shembullor. Mbyllja në shtëpi, respektimi i fashave orare, distancimi fizik dhe shoqëror kanë shpëtuar jetë. Mirënjohje për këtë sakrificë kombëtare”, shtoi Spiropali.

“Plotësisht të vetëdijshëm se COVID-19 nuk hap plagë vetëm në mushkëri, por edhe në ekonomi kemi miratuar dy paketa që ndihmojnë 300 mijë familje dhe biznese me mbi 300 milionë dollar ndihmë direkte nga buxheti dhe garanci sovrane”, tha Spiropali.

“Jemi në një situatë të kontrolluar, por aktiviteti ekonomik dhe shoqëror, duhet të rifillojë gradualisht. Duke nisur nga java e ardhshme do të rritet me 2 orë e 30 minuta fasha orare për individët. Do të hapim një kategori biznesesh, për të lehtësuar ekonomitë familjare, hapje graduale, duke marrë një minimum dy javor nga njëra fazë tek tjetra”, tha ministrja Spiropali.

“Është absolutisht e domosdoshme që në këtë fazë të re qytetarët dhe bizneset të respektojnë rregullat dhe masat si e vetmja mënyrë e kufizimit të përhapjes së infeksionit dhe karantinimit të përhapjes së mëtejshme. Më shumë njerëz në rrugë, në punë dhe kudo. Çdo kthim pas do të ishte fatal. Situata vazhdon të jetë e paqëndrueshme pothuajse në gjithë botën edhe tek ne. Për sa më sipër, shtyrja e afatit të fatkeqësisë natyrore deri në 23 qershor është një domosdoshmëri në mënyrë që e gjithë kjo situatë pandemie të kalojë me sa më pak të prekur ndër qytetarë dhe bluzat e bardha”, tha Spiropali. /atsh