Aurora

“Nuk nxjerr më dekret si 13 tetori, që opozita thonë jo po nuk shkojmë ne se duam edhe këto edhe ato. Nëse nxjerr dekret për shpërndarjen e parlamentit, do nxjerr për shpërndarjen e qeverisë dhe do emëroj qeverinë dhe do shkoj do t’i çoj, jo me këta policët e Lleshit, që i kam identifikuar unë, por do i çoj me popullin shqiptar vetë, mbaje mend këtë që po them. Por nëse populli mendon që është mirë, që unë nuk jam normal dhe situata është shumë e mirë, kjo është diçka tjetër, se unë nuk jam aventurier”, tha sot presidenti Ilir Meta në një intervistë televizive.

Duke treguar fotot nga protesta për Teatrin, Meta tha se, “unë këta policë do i çoj në burg nesër, mbaje mend këtë që po them”.

“Unë dekretet do i zbatoj me popullin herën tjetër, nëse populli nuk është i gatshëm, është gjë tjetër. Të vish edhe ti me mua. Të çojmë kryeministrin e ri në zyrë atje nëse populli përkrah atë. Nëse populli përkrah një gangster kjo është një çështje tjetër, le të vazhdojë populli”, u shpreh Meta.

Presidenti Meta komentoi edhe ngjarjet e fundit lidhur me prishjen e Teatrit Kombëtar, duke e cilësuar si “një akt mafioz dhe të paligjshëm në të gjitha aspektet”.

“Në 13 prill 2000 u vendos si pjesë e ansamblit kulturor kompleksi i Teatrit Kombëtar dhe u vendos në mbrojtje. Është me firmën e qeverisë të kryeministrit Ilir Meta dhe ministrit Edi Rama. U vendos të merrej në mbrojtje se po shkatërrohej Tirana”, tha Meta.

Në lidhje me opozitën, Meta tha se, “unë nuk i bëj dot detyrat e të gjithëve”./atsh

Kryeministri Edi Rama deklaroi sot se shumë shpejt do të shikoni një lëvizje qytetare, e cila do të bëhet partia politike e Presidentit.

“Unë po ju them që shumë shpejt do të shikoni një lëvizje qytetare, që pak nga pak do të transformohet në një parti“, u shpreh gjatë një emisioni televiziv, Kryeministri Rama.

Rama tha se po bëhet e njëjta lëvizje siç bëri Grillo.

“Është e lidhur me gjithë këtë, me teatrin, u fol për kulturë me identitetin, me atdheun, për sovranitetin, Kushtetutën. Siç bëri ai, po ai është komedian real, Grillo, një karikaturë komike këtu do të ndodhë, sipas meje. Ajo që po ndodh dhe insistimi. Po ra Teatri, iku. Pse shkojnë atje? Hedhin firma”, u shpreh Kryeministri.

Sipas tij, “nëse kjo është një gjëmë e madhe popullore, ajo që duhet të bëjnë ato parti politike atje, është të thonë shkojmë në tryezë, bëjmë reformën zgjedhore dhe futemi në zgjedhje dhe populli do ta shporrë këtë tiran duke dëgjuar padren”.

Më tej, Kryeministri Rama bëri të ditur se situata lidhet përsëri me zgjedhjet dhe Reformën në Drejtësi.

“Po them kaq: zgjedhjet përsëri janë të lidhura. Sot Ambasada amerikane bëri një tweet. Gjysmë hermetik, po nuk është hermetik. Do ta shikoni që zgjedhjet në Shqipëri dhe ajo që quhet procesi konstruktiv në Shqipëri, procesi zgjedhor do të lidhet përsëri me dy faktorët; frika për zgjedhje, se mos humbasim se “Hamleti” ka frikë: të hysh në zgjedhje, apo të mos hysh në zgjedhje, dhe Reforma në Drejtësi përsëri”, tha Rama./atsh

“Shpresoj që fjalët për një marrëveshje prapa krahëve për të vrarë Reformën në Drejtësi në Shqipëri të mos jenë të vërteta”, deklaroi sot ambasadorja e SHBA-së në Tiranë, Yuri Kim.

Kim tha se, “Reforma në Drejtësi po bën përparim dhe duhet të vazhdojë”.

“Reforma është e dhimbshme, e ngadaltë dhe jo perfekte, por është e nevojshme, po bën përparim dhe duhet të vazhdojë”, tha Ambasadorja e SHBA-së në Tiranë./atsh

Kryetari i PD-së, Lulzim Basha ka kujtuar 47-vjetorin e revoltës në burgun e Spaçit, ku thirrja e parë e të burgosurve politik ishte Shqipëria do të bëhet si Europa.

Basha shprehet se “47 vjet më parë, kur diktatura komuniste e kishte zhytur Shqipërinë në izolimin e saj më të madh, një grup të burgosurish politikë ngritën në Spaç flamurin kuqezi, pa yllin komunist, dhe shpallën aty një zonë të lirë nga diktatura. Ato 3 ditë lirie e tronditën nga themelet Sigurimin e Shtetit, aty u thirr për herë të parë me zë të lartë se Shqipëria do të bëhej si Europa”.

“4 heronjtë martirë të Revoltës së Spaçit, Hajro Pashaj, Dervish Bejko, Pal Zefi dhe Skënder Daja, ishin lajmëtarët se shqiptarët asnjëherë s’do të pajtoheshin as me dhunën, as me diktaturën komuniste e as me çfarëdo regjimi që do synonte t’u hiqte atyre lirinë. Në dokumentet e Sigurimit të Shtetit, aty ku raportohet për dhunën çnjerëzore që diktatura përdori për ta shembur rezistencën e të burgosurve politike raportohet me tmerr paralajmërimi profetik që qëndrestarët i bënë zv/ministrit të Brendshëm të diktaturës: “Edhe ju do të përfundoni këtu, sepse është ngushtuar rrethi dhe diktatura po ha bijtë e vet”-tha ai.

Po ashtu, Basha kujton qëndresën 3 ditorë të të burgosurve politikë në revoltën e Spaçit e cila u shtyp me gjak.

“Revolta e Spaçit dhe qëndresa 3-ditore e të burgosurve të Spaçit pati një jehonë të gjerë në të gjithë vendin. Ideja e qëndresës e tmerroi regjimin diktatorial. Për të treguar këtë trashëgimi të qëndresës së shqiptarëve, të cilët nuk e pranuan asnjëherë diktaturën, fiks 11 vjet më vonë, në përvjetorin e Revoltës së Spaçit, ish-të burgosurit politikë u ngritën sërish në revoltë në burgun famëkeq të Qafë-Barit. Të burgosurit politikë po e mposhtnin makinën e regjimit, jo vetëm me qëndresë madhështore, shembull në të gjitha vendet ish-komuniste, por edhe me simbole”-tha ai.

Në vijim Basha kujton dhe revoltën e të burgosurve politik të Qafë-Bari që pasoi atë të Spaçit.

“Qafë-Bari ishte një përkujtim i denjë i revoltës së Spaçit, 11 vjet më pas, dhe që të dyja revoltat janë sot një trashëgimi politike që e gëzon çdo rezistencë qytetare kundër padrejtësisë dhe kundër çfarëdo regjimi që e gënjen mendja se mund t’ju marrë shqiptarëve të drejtat e fituara në Lëvizjen e Dhjetorit ’90. Burrat që kryen revoltat e Spaçit dhe të Qafë-Barit janë një frymëzim se kauzat fitojnë, edhe nëse ato kanë kundër falanga të armatosura. Nga Revolta e Spaçit vjen edhe paralajmërimi profetik se askush s’duhet të qëndrojë mënjanë, kur atdheu përballet me sfida të mëdha, sepse mekanizmi keqbërës i diktaturës herët a vonë do të mbërrijë edhe tek ata”, tha Basha.

Gjithashtu Basha shtoi se “nga revoltat e Spaçit dhe të Qafë-Barit ne trashëgojmë shembullin e atdhedashurisë. Duke nderuar kujtimin e martirëve të Spaçit dhe Qafë-Barit, shqiptarët nderojnë sot historinë e tyre të lavdishme të qëndresës ndaj diktaturës dhe rinovojnë angazhimin për të mos iu shmangur përgjegjësisë kombëtare që kanë, për ta shkëputur përfundimisht vendin nga kthetrat e diktaturës së hajdutëve dhe kriminelëve dhe për ta rikthyer atje ku i takon, në gjirin e Perëndimit”./atsh