Aurora

“Shqipëria, histori suksesi në betejën ndaj COVID-19”/ Mjeku Ylli: Nga masat e marra, u shpëtuan qindra jetë njerëzore e mijëra vite jetë të shëndetshme

Aktualitet, Opinione, Shendetesi / /

“Shqipëria është qartazi një histori suksesi në mbyllje të fazës së parë të epidemisë”, deklaron Alban Ylli, Anëtar i Komisionit të Mjekësisë dhe Shëndetësisë pranë Akademisë së Shkencave, kërkues shkencor në ISHP dhe pedagog i jashtëm në Universitetin e Mjekësisë, Tiranë.

Ylli thekson se “megjithëse numri i vdekjeve të raportuara është rreth 5-fish me i lartë se mesatarja e vdekjeve çdo vit nga gripi apo rreth 2 herë më i lartë se ai i vdekjeve nga gripi pandemi i 2009-s, niveli i mortalitetit ngelet shumë i ulët krahasuar me parashikimet e fillimit të marsit”.

“Niveli i vdekshmërisë në Shqipëri është dhjetëra herë më i ulët se ai i raportuar nga vendet e Europës Perëndimore si dhe ndër më të ultit në Europën Lindore. Në këtë fazë mund të vlerësohet se janë shpëtuar me qindra jetë njerëzore dhe mijëra vite jetë të shëndetshme. Një sukses për të cilin shqiptarët duhet të jenë krenarë”, deklaron mjeku Ylli.

Arsyeja kryesore e këtij rezultati që arriti Shqipëria në këtë fazë, thekson ai, është kombinim i fillimit relativisht më vonë të pandemisë dhe marrjes më të shpejtë të masave drastike të izolimit social e fizik.

“Një studim mbi këtë temë është përfunduar nga ne dhe disa kolegë të Universitetit të Hawait dhe është dërguar për publikim. Të gjitha vendet kanë përfituar nga (NBA) masat e izolimit dhe distancimit, por disa vende, si Shqipëria, ku këto masa u morën shpejt dhe nuk lejuan krijimin e një rezervuari të madh infeksioni në popullatë, përfituan më shumë. Pa dyshim se ishte edhe një çështje fati: virusi hyri më vonë, në sasi më të vogël se në disa vende perëndimore dhe u dha më shumë mundësi autoriteteve dhe gjithë shoqërisë të reagonin në kohë. Një falënderim i madh u takon gjithë qytetarëve që respektuan me ndërgjegje masat”, shprehet mjeku i njohur.

Faktorë të tjerë ndihmues, shton ai, mund të kenë qenë edhe mosha mesatare më e re, dendësia e popullatës, përqindje më e ulët e sëmundjeve kronike, faktorë të lidhur me biologjinë individuale, etj.

Ylli shton se “ndërkohë që vala e pare e pandemisë u përballua me sukses dhe stina e ngrohtë ka shumë mundësi ta frenojë qarkullimin e virusit, ngelen ende shumë të panjohura mbi sjelljen e tij në të ardhmen”.

“Evolucioni biologjik nuk e favorizon për një kohë të gjatë një virus vdekjeprurës: bashkë me vdekjet do të zhdukej edhe virusi. Për këtë arsye mutacionet që vijojnë ta shoqërojnë, mund të jenë të prirura drejt një shfaqjeje më “beninj” të virusit, të tilla që e shndërrojnë atë gradualisht në një virus endemik, më të adaptueshëm me bujtësin human. Gjithsesi, ky është vetëm një skenar, bazuar në biologjinë”.

“Një valë e dytë më e thjeshtë, nuk përjashtohet. Për këtë arsye, sistemi shëndetësor dhe gjithë shoqëria duhet të vijojnë të jenë të kujdesshëm dhe të përgatitur për skenarin më të keq”, apelon ai.

Ylli shton se “ndërkohë që pritet nga shkenca vaksina apo një trajtim i efektshëm, duhet të vijojmë të monitorojmë situatën me intensitet dhe të vijojmë të zbatojmë masat individuale te higjienës dhe distancimit. Kështu do të jemi më të sigurt dhe do të vijojmë të shpëtojmë jetë”.

Më tej, Ylli vlerëson E-grupin e ngritur pranë Akademisë së Shkencave ndërsa foli edhe për realizimin e një projekti.

“Në grup merrnin pjesë ekspertë të fushave të ndryshme që postonin në kohë reale si faktet më të fundit mbi pandeminë, ashtu edhe opinionet dhe përvojën e tyre mbi situatën. Grupi lejoi shkëmbimin e shpejtë të informacionit dhe pikëpamjeve. Ai shërbeu si një forum për debat dhe konsulta shkencore duke zëvendësuar vështirësitë e krijuara për takime fizike. Së fundi, theksoj se ky grup, mbeti profesional e pothuaj i paprekur nga “infodemia” e lajmeve te rreme, apo gjysmë të vërtetave që, deri diku, infektuan disa E-grupe të tjera”, u shpreh ai.

Nëse i referoheni projektit të studimit serologjik të propozuar, Ulli thekson se është një kontribut i rëndësishëm dhe i drejtpërdrejtë për vendin në fazën e dytë të pandemisë. “Në këtë fazë, kur masat drastike të izolimit fizik po zëvendësohen dora-dorës me një qasje tjetër, më afatgjatë, është thelbësore njohja e nivelit të imunitetit të grupeve të ndryshme të popullatës përmes studimeve të sero-prevalencës, përmes aplikimit në kampione sistematike të testeve serologjike. Si pjesë paraprake e projektit, për herë të parë, planifikohet të verifikohet validiteti i një testi të ri serologjik për COVID -19, përmes aplikimit të tij edhe në një kampion serumesh të periudhës para pandemisë. Studimi planifikohet të kryhet si një nismë e Akademisë, në bashkëpunim me Qendrën Spitalore Universitare dhe Institutin e Shëndetit Publik. Është përcaktuar metodologjia dhe është siguruar mbështetje për teknologjinë për të. Per momentin pritet vetëm zgjidhja e disa detajeve teknike dhe burokratike”, shprehet Ylli.

Akademia e Shkencave, menjëherë pas shfaqjes së COVID-19 në Shqipëri, organizoi grupin “Në ndjekje të pandemisë” me mjekë, gjenetistë, ekonomistë, biologë, matematikanë e fizikanë brenda dhe jashtë vendit, anëtarë të Akademisë, dhe përmes komunikimit arriti që të identifikojë disa nga problemet më të rëndësishme të kësaj pandemie. U mundësua, gjithashtu edhe hartimi i Buletinit Ditor të shfaqjes së pandemisë në botë dhe në vendin tonë. Këta buletine së bashku me grafikët e hartuar sidomos nga prof. Niko Kaçiroti në SHBA apo Erida Gjini në Portugali, mundësuan edhe ndjekjen e përhapjes, infektimit, vdekshmërisë dhe riaftësimit nga ky virus në shifra të përafërta me ato që u vërtetuan në praktikë. /atsh

“Shqipëria, histori suksesi në betejën ndaj COVID-19”/ Mjeku Ylli: Nga masat e marra, u shpëtuan qindra jetë njerëzore e mijëra vite jetë të shëndetshme Read More »

Besimtarët myslimanë falën sot namazin e Fitër Bajramit në të gjitha xhamitë e vendit

Aktualitet, Lajmi i fundit / /

Besimtarët myslimanë kanë falur sot namazin e Fitër Bajramit në të gjitha xhamitë e vendit.

Në kryeqytet, falja e Namazit u zhvillua te xhamia e Kokonozit, (Pazari i ri) ku ishte i pranishëm edhe kryetari i Komunitetit Mysliman të Shqipërisë H. Bujar Spahiu.

Ndryshe nga vitet e tjera, falja e Fitër Bajramit këtë vit u zhvillua në të gjithë vendin duke respektuar një protokoll të caktuar në kuadër të parandalimit të përhapjes së mëtejshme të COVID-19.

Ceremonia filloi me ligjëratën e rastit të mbajtur nga Myftiu i Tiranës, Lauren Luli, i cili pasi kërkoi mirëkuptim nga të gjithë besimtarët për masat e lartpërmendura, u fokusua mbi devotshmërinë, përkushtimin, sakrificën, solidaritetin, dashurinë dhe vëllazërinë mbarënjerëzore që simbolizon muaji i bekuar i Ramazanit.

“Sot triumfoi edhe një herë e mira ndaj të keqes, virtyti ndaj veseve të këqija, dashuria ndaj urrejtjes, respekti ndaj përçmimit, thjeshtësia ndaj mendjemadhësisë, bujaria ndaj koprracisë dhe vëllazëria ndaj përçarjes sepse ishin mirësitë e Ramazanit të cilat e zbukuruan dhe e ndriçuan mendjen dhe shpirtin e besimtarit në mënyrë që të heqë dorë nga çdo e keqe e të bëhet pishtar i së mirës dhe i dashurisë. Ky është mësimi i Kuranit, këto janë këshillat që na la me kaq përkujdesje shembulli më i lartë i njerëzimit, Muhammedi (Paqja dhe Mëshira e Allahut Qoftë mbi Të)”, – tha ai gjatë fjalës së tij.

Më tej, ceremonia vijoi me faljen e namazit të Fitër Bajramit nga kryetari i Komunitetit Mysliman të Shqipërisë, H. Bujar Spahiu.

Pas faljes së namazit, kryetari Spahiu vijoi me hutben, ku foli mbi kurorëzimin e muajit të shenjtë të Ramazanit në kushtet e pandemisë COVID-19.

Sipas tij, besimtarët mysliman përjetuan këtë vit një Ramazan ndryshe, sidomos në aspektin social por kjo nuk i privoi ata të adhuronin Zotin e Gjithësisë dhe t’i shfrytëzonin mundësitë e panumërta që ofron ky muaj në aspektin shpirtëror.

“Lutjet, adhurimet, sakrificat dhe ripërtëritja shpirtërore që përjetuam gjatë Ramazanit, na forcojnë e na motivojnë ta shohim festën e Fitër Bajramit si ditën e shpresave të reja, si ditën e të kujtuarit dhe solidaritetit me njëri-tjetrin, si ditën e ripërtëritjes së vëllazërisë, miqësisë e dashurisë për njeriun. Ditët e Bajramit janë ditë paqeje, janë ditët e gëzimit të përbashkët me familjen, me të afërmit, fqinjët, shokët dhe të gjithë njerëzit kudo në botë. Kur besimtari është në paqe me Zotin, ai është në paqe me veten e tij dhe rrjedhimisht me të gjithë ata që e rrethojnë”, – theksoi ai gjatë hutbes.

Në përfundim të kësaj ceremonie, besimtarët e pranishëm shkëmbyen mesazhe të shumta urimi ndërmjet tyre. Ndërkohë e njëjta atmosferë festive ka shoqëruar faljen e Fitër Bajramit në çdo xhami të vendit. /atsh

Besimtarët myslimanë falën sot namazin e Fitër Bajramit në të gjitha xhamitë e vendit Read More »

Xhaçka në takimin e posaçëm të OSBE-së: Shqipëria përfaqësim gjithnjë e më të lartë të grave në sektorin e mbrojtjes

Aktualitet / /

“Përfaqësimi gjithnjë e më i lartë i grave në sektorin e mbrojtjes përbën një vlerë të shtuar, në axhendën e të drejtave të grave e vajzave në shoqërinë shqiptare në tërësi”.

Kështu deklaroi ministrja e Mbrojtjes, Olta Xhaçka, në takimin e posaçëm të OSBE, kryesimin e së cilës aktualisht e ka Shqipëria.

“2020-ta shënon 20-vjetorin e rezolutës 1325 të OKB-së “Gratë, paqja dhe siguria”. Edhe më shumë vullnet politik duhet për zbatimin e plotë të rezolutës, ndërsa shifrat tona të përfaqësimit të grave e vajzave në fushën e mbrojtjes flasin më së miri për investimin e duhur për të drejtat e grave e vajzave në vendin tonë”, – theksoi Xhaçka.

Ministrja Xhaçka u shpreh se “18.6% e punonjësve në Ministrinë e Mbrojtjes dhe në Forcat e Armatosura janë gra e vajza. 14% e efektivëve të Forcave të Armatosura janë gra e vajza. 33% e rekrutimeve për kandidatë për oficerë të rinj në fund të vitit 2019 janë gra e vajza. 10% e pozicioneve drejtuese në radhët e ushtarakëve dhe 22% në radhët e civilëve mbahen nga zonja”./atsh

Xhaçka në takimin e posaçëm të OSBE-së: Shqipëria përfaqësim gjithnjë e më të lartë të grave në sektorin e mbrojtjes Read More »

Mjeku Alimehmeti ndan dy studime të rëndësishme: COVID-19 nuk transmetohet me lehtësi përmes së objekteve, deti nuk e përhap infeksionin

Aktualitet, Shendetesi / /

Koronavirusi nuk mund të transmetohet me lehtësi përmes prekjes së objekteve apo sipërfaqeve të infektuara si dhe deti nuk e përhap infeksionin.

Mjeku Ilir Alimehmeti ka ndarë këto dy lajme të rëndësishme përmes së cilave bazohet në studime të kryera në Shtetet e Bashkuara të Amerikës dhe në Francë.

“DC (Centers for Disease Control and Prevention – USA, informon se virusi nuk transmetohet me lehtësi përmes prekjes se objekteve apo sipërfaqeve të infektuara.
Megjithëse është ende e mundur, kjo mundësi është zbuluar që është shumë më e vogël se sa mendohej fillimisht. Pra, ato dorezat hiqini po patët mundësi”, bën të ditur Alimehmeti.

Ndërkaq, ai ka lajmëruar se Instituti Kombëtar i Francës për Shkencat Oqeanike nuk ka gjetur gjurmë të koronavirusit as në ujin e detit dhe as në molusqe.

“Që ta kemi të qartë, DETI NUK E PËRHAP KORONAVIRUSIN! Pse molusqet janë të rëndësishme në studim? Sepse ushqehen përmes filtrimit të ujit të detit.
Në ujërat detare derdhen ujërat e zeza që përmbajnë virusin. Nëse ky virus do të mbijetonte në det, atëherë prova bëhet pikërisht te molusqet që shërbejnë si akumulues biologjike!Forca miq! Lahuni në det, argëtohuni vetë dhe lironi fëmijët”, shprehet ai. /atsh

Mjeku Alimehmeti ndan dy studime të rëndësishme: COVID-19 nuk transmetohet me lehtësi përmes së objekteve, deti nuk e përhap infeksionin Read More »

Protesta e Aleancës për mbrojtjen e teatrit në Tiranë

Aktualitet, Problematika / /

Pasditen e sotme u zhvillua protesta e radhës e thirrur nga Aleanca për mbrojtjen e teatrit, në hyrje të pedonales në bulevardin “Dëshmorët e Kombit”.

Protesta nisi rreth orës 19:30. Para pjesëmarrësve foli regjisori Robert Budina, sipas të cilit “të gjithë ata që veprojnë dhe nuk veprojnë do të japin llogari”.

“Do të t’i sjellim njerëzit përpara Kryeministrisë dhe të gjithë do të vendosim fatin tonë. Ju i detyroheni popullit tuaj dhe duhet të bëni çdo pakt përpara kamerave dhe ta kuptojmë se çfarë bëni”, u shpreh Budina.

Budina tha se protesta është institucion. “Mos rrini më rrugëve, merrni të drejtën tuaj dhe përplasjani turinjve. Ka shumë forma. Mos u bindni. Ne do ta fitojmë betejën. Nuk mund të bësh lojë në tempullin e qytetarisë”, u shpreh ai.

Po pasditen e sotme, Aleanca për Mbrojtjen e Teatrit zhvilloi një tubim në Durrës, ku ftoi qytetarët të firmosin peticionin që Teatri të bëhet ashtu si ishte, aty ku ishte./atsh

Protesta e Aleancës për mbrojtjen e teatrit në Tiranë Read More »

Nuk duhen penalizuar qytetarë për tejkalim të afateve, Qeveria shqiptare në negociata të ngushta me autoritetet greke

Aktualitet, Opinione / /

Qeveria shqiptare është në negociata dhe kontakte të ngushta me qeverinë greke për të adresuar problemin e gjobave të vëna për qytetarët shqiptarë, që u penalizuan nga pamundësia për të lëvizur për shkak të mbylljes së kufirit si pasojë e COVID-19

Kështu deklaroi sot nga pika kufitare e Kakavijës, ministri i Brendshëm, Sandër Lleshaj, i pyetur nga gazetarët lidhur me qytetarët shqiptarë të cilët kanë kaluar afatin 90-ditor dhe janë vendosur gjoba nga shteti fqinj.

“Vetë ne si qeveri shqiptare kemi vendosur që të huajt që janë në Shqipëri dhe janë në tejkalim të afateve të mos i penalizojmë. Pra, kemi pranuar faktin që pandemia si forcë madhore duhet njohur dhe nuk duhen penalizuar qytetarë për shkak të tejkalimit të afateve të qëndrimit në pamundësi të rinovimit të dokumenteve. Shpresojmë që edhe qeveria greke do ta bëjë të njëjtën gjë”, deklaroi Lleshaj.

Ministri tha se “mesa jam i informuar kjo gjë do të ndodhë. Por kryeministri ka premtuar publikisht që gjithsesi qeveria shqiptare edhe në rast se qeveria greke nuk do të gjejë mundësi për ta adresuar këtë problem, qeveria shqiptare do të marrë përsipër kostot e të gjithë penaliteteve që janë adresuar ndaj qytetarëve shqiptarë”./atsh

Nuk duhen penalizuar qytetarë për tejkalim të afateve, Qeveria shqiptare në negociata të ngushta me autoritetet greke Read More »

Dita Botërore e Biodiversitetit/ Pasuritë natyrore të Shqipërisë kthehen në atraksion turistik

Aktualitet / /

22 maji, Dita Ndërkombëtare e Biodiversitetit është shpallur nga Asambleja e Përgjithshme e Kombeve të Bashkuara për të përkujtuar 22 majin e vitit 1992, kur u miratua teksti i Konventës së Biodiversitetit në të cilën edhe Shqipëria është palë.

Në kuadër të kësaj dite, Kryeministri Edi Rama ka publikuar një video me disa nga pasuritë natyrore në vendin tonë ku shquhet për larmi të peizazheve e atyre biologjike dhe radhitet ndër vendet me biodiversitet të lartë në Europë.

Zonat e mbrojtura, tashmë janë habitate të qeta dhe të sigurta, ku fauna shtohet e pasurohet në vazhdimësi.

Ligatinat bregdetare dhe liqenet brenda vendit janë zona veçanërisht të rëndësishme për dimërimin e llojeve migratore.

Janë rreth 70 lloje shpendë uji me një popullatë prej 180,000 individësh që dimërojnë në këto zona. Të paktën katër prej tyre (Karavastaja, Narta, Shkodra dhe Ohri), konsiderohen si zona me rëndësi ndërkombëtare për shpendët e ujit njohur si IBA (Zona të Rëndësishme për Shpendët), apo zonat Ramsar, me më shumë se 20.000 lloje shpendësh uji për një zonë.

Por, vendosja e moratoriumit të gjuetisë ishte një iniciativë që me gjithë qëndrimin kundër të gjuetarëve e rriti ndjeshëm numrin e kafshëve të egra apo zogjve shtegtarë, madje edhe të atyre në rrezik zhdukjeje në Zonat e Mbrojtura, duke sjellë në vendin tonë disa nga llojet e shpendëve më të rrallë në botë.

Listës së shpendëve në Peizazhin e Mbrojtur Vjosë-Nartë, iu shtua edhe 1 lloj i ri: pelikani rozë (Pelecanus onocrotoalus).

Pelikani rozë është një prej 8 llojeve të pelikanëve që ekzistojnë në botë dhe 1 prej 2 llojeve që hasen në vendin tonë, së bashku me atë që gjithkush e njeh: pelikanin kaçurrel (Pelecanus crispus) apo shpendin më të madh në botë të ujërave të ëmbla.

Si pasojë e moratoriumit të gjuetisë, në Parkun Kombëtar të Divjakë-Karavastasë është rritur numri i shpendëve të ujit, ku flamingot i gjejmë në këtë park si asnjëherë më parë.

Shtim të llojeve të faunës së egër kemi edhe në Kune-Vain; në Liqenin e Shkodrës, në Nartë, Butrint, Orikum, Patok, në Karpen, Seman dhe në liqenin e Tiranës.

Pasuritë natyrore, bukuria e krahinave dhe pyjeve shqiptare janë kthyer edhe në një atraksion turistik për vizitorët vendas dhe të huaj ku kanë mundësi të vëzhgojnë kafshë dhe shpendë të rrallë qëllon t’i hasësh në përditshmëri./atsh

Dita Botërore e Biodiversitetit/ Pasuritë natyrore të Shqipërisë kthehen në atraksion turistik Read More »

“Koha që mos të bëni lojëra e pazare”/ Ambasadorja Kim: Pa reformën në drejtësi dhe “Zgjedhoren”, s’mund të jeni pjesë e BE

Aktualitet, Opinione, Politike / /

Ambasadorja e Shteteve të Bashkuara të Amerikës, në Tiranë, Yuri Kim deklaroi sot se duhet të përmbyllen reforma në drejtësi dhe reforma zgjedhore me të cilat s’mund të bëhet pazar.

Në një prononcim për mediet, Kim u shpreh se, “mesazhi im është shumë i qartë”. “SHBA-të duan të njëjtën gjë që populli shqiptar do. Ne duam që Shqipëria të jetë një aleat i fortë dhe i aftë i SHBA. Ne duam që ju të jeni pjesë e familjes europiane”, tha Ambasadorja Kim në një prononcim për gazetarët ndërsa i drejtohej Kolegjit të Posaçëm të Apelimit.

Ambasadorja Kim theksoi se, “ju s’mund ta keni këtë pa reformë zgjedhore, nuk mund ta keni këtë pa reformë në drejtësi. Këto të dyja nuk janë për t’u bërë pazar. Janë domosdoshmëri. Ka ardhur koha të reshtet së bëri lojëra”.

“Është koha që të realizohet reforma në drejtësi. Është koha që të realizohet reforma zgjedhore, sikurse drejtuesit i kanë premtuar popullit shqiptar dhe njësoj si SHBA dhe populli shqiptar presin”, tha ambasadorja e Shteteve të Bashkuara të Amerikës, në Tiranë, Yuri Kim./atsh

“Koha që mos të bëni lojëra e pazare”/ Ambasadorja Kim: Pa reformën në drejtësi dhe “Zgjedhoren”, s’mund të jeni pjesë e BE Read More »