Aurora

Pas ankesës në platformën e bashkëqeverisjes, nëna e një fëmije autik përfitoi KEMP-in brenda 5 ditëve, duke marrë zgjidhje për problemin e saj.

Kozeta Pana, nënë me një fëmijë autik infantil, iu drejtua dy herë platformës duke marrë zgjidhje për vonesat në komisionimin dhe më pas të pagesës së aftësisë së kufizuar për djalin e saj.

Të dyja këto çështje kanë marrë zgjidhje brenda 5 ditësh nga data e paraqitjes në platformë.

Pas vonesave dhe endjeve nëpër dyert e institucioneve prej më shumë se dy muajsh, vetëm pak ditë pasi i është drejtuar platformës “shqiperiaqeduam.al”, ajo mban në dorë certifikatën e aftësisë së kufizuar për të birin, e cila i mundëson asaj jo vetëm marrjen e pagesës së aftësisë së kufizuar, por edhe marrjen e pagesës së kujdestarisë për të.

Mbi 13 mijë raste janë zgjidhur nga të cilat 437 raste të spikatura suksesi përbëjnë rekordin pozitiv të platformës së bashkëqeverisjes për periudhën tetor 2017-korrik 2018.

Qytetarët që prej vitesh kërkonin të drejtën e tyre legjitime, ju bashkuan platformës së bashkëqeverisjes duke kontribuar njëkohësisht edhe në gjetjen dhe ndëshkimin e përgjegjësve për problematikat e shkaktuara në misionin e përbashkët për bashkëqeverisjen e Shqipërisë që duam./atsh

Në vetëm 10 muaj, falë aplikimit në platformën e bashkëqeverisjes, qytetarë të shumtë shprehën interes për nisma të ndryshme, 6 prej të cilave u ndërmorën gjatë kësaj periudhe.

Një nga nismat më të rëndësishme që u aplikua në shkolla është nisma e zhvillimit të 3 lëndëve në 6 orë, lehtësim ky nga mbingarkesa e zakonshme e shkollës për nxënësit. Kjo nismë u rekomandua nga një grup prindërish dhe mësuesish.

Një tjetër nismë e ndërmarrë ka të bëjë me ndalimin e aktivitetit të guroreve pranë zonave urbane. Kjo e fundit u sugjerua nga banorët e Urës-Vajgurore, të cilët prej një kohe të gjatë e kanë vuajtur një problem të tillë.

Një nga nismat që lidhet edhe me zhvillimin e qëndrueshëm por jo vetëm, ka të bëjë me reduktimin e përdorimit të qeseve plastike. Kjo e fundit u propozua nga një grup ambientalistësh dhe biznesmenësh që propozuan tek ministria e Turizmit, nismë kjo që parashikonte edhe ndryshime ligjore.

Siguria rrugore në rrethin e Kurbinit – Kjo nismë u sugjerua nga një grup qytetarësh që propozuan zgjidhje për shmangie aksidentesh në qytetin e Laçit.

Përmirësimi i ofrimit të shërbimit mjekësor dhe farmaceutik në Rubik- Për qendrat shëndetësore shërbimi ofrohet edhe pasditeve. Ky sugjerim erdhi falë Ndue Përlala.

Ndërsa për ruajtjen e pyjeve në sheshet e Bulqizës, propozimi erdhi nga një grup qytetarësh që shprehën shqetësimin e tyre lidhur me shfrytëzimin e pyjeve në sheshe të Bulqizës. Ministri i Turizmit dhe Mjedisit, Blendi Klosi informoi qytetarët më 21 korrik se ka nisur strukturat e posaçme në mbrojtje të mjedisit./atsh

Gazetarja Eni Vasili vjen me një profil ndryshe këtë herë si autore e librit ”Zëra nga errësira”.

Në librin e saj, shtatë personazhe, disa pasardhës të familjeve të vjetra shqiptare dhe pjesa tjetër fillimisht kundërshtarë politikë të të parëve, rrëfejnë ferrin e kampeve të internimit dhe burgjeve të regjimit komunist, ku kanë jetuar të gjithë për shumë vite.

Ky libër është plot vlera dhe për brezat pasardhës pasi tregon copëza jete dhe emocionet e atyre që kanë provuar të shkuarën e errët të komunizmit. Dëshmitë e personazheve që trajtohen në libër e bëjnë lexuesin e ndjeshëm, por njëkohësisht dhe të vetdijshëm për të mësuar fakte dhe ngjarje reale, të cilat nuk duhen të përsëriten më në shoqërinë tonë.

Gjatë promovimit të librit ditën e sotme, në një prej universiteteve private të Tiranës, mes miqsh dhe kolegësh dhe me pjesëmarrjen e veçantë të personazheve që kanë rrëfyer në librin e saj, Eni Vasili u shpreh se, ”libri është për këto personazhe të cilët kanë rrëfyer plot dhimbje dhe emocion historitë e tyre të dhimbshme”. “Jam përlotur në çdo intervistë dhe jam shokuar njëkohësisht dhe pse me një karrierë 25-vjeçare jam munduar që emocionet mos t’i tregoj, por në këtë rast ishte e pamundur”.

Ajo gjithashtu shtoi se, ”këto rrëfime tregojnë jetën tronditëse dhe pikërisht për këtë vendosa t’i shkruaja në libër. Gjithashtu vendosa t’i shkruaja pasi intervistat televizive mbeten në arkiva dhe ky libër vjen si kujtesë, pasi përballja me të shkuarën komuniste është një ndër sfidat më të rëndësishme të shoqërisë shqiptare”.

Eugjen Merlika, Klara Merlika, Daut Gumeni, Maks Velo, Rrahman Parllaku, Bashkim Shehu, Simon Miraka dhe Gjon Rrethi janë personazhet që vijnë në librin e gazetares Vasili, të cilët hedhin dritë mbi atë çfarë ka ndodhur me njeriun nën diktaturë.

Ata kanë rrëfyer vuajtjet e jetës së tyre nëpër burgjet dhe kampet e internimit gjatë diktaturës komuniste. Janë jetë të ngjashme, por edhe të ndryshme për mënyrën se si kanë sfiduar diktaturën, duke u mbijetuar torturave fizike dhe psikologjike.

Janë dëshmi shumë të rëndësishme që dokumentojnë ngjarje, që kanë shënjuar historinë e komunizmit.

Libri ”Zëra nga errësira” është një kontribut i vyer i cili hedh dritën mbi jetën e errët të njerëzëve që kanë jetuar dhe vuajtur regjimin komunist. Gjithashtu brezi i ri i cili do të marrë këtë libër në dorë do ketë një brilant të shtuar, pasi do të mësojë fakte dhe ngjarje të jetuara në atë kohë, duke reflektuar që kjo perde e errët e shoqërisë shqiptare mos të përsëritet më kurrë./atsh

Forcat tokësore përfshirë dhe batalioni special do i nënshtrohet një testimi fizik.Të gjithë ata që nuk do të kapin normat në mënyrë graduale, do t’ua u lënë vendin nënoficerëve të rinj.

Kjo është bërë e ditur nga shefi i Shtabit të Përgjithshëm gjeneral brigade Kollçaku paralajmëroi ndryshime rrënjësore në batalionin e Forcave Speciale, duke e kthyer vëmendjen nga efektivët e rinj dhe duke i kushtuar rëndësi të veçantë përgatitjes fizike.

“Në shtator – tetor do të bëhet testimi fizik i të gjithë Forcës Tokësore përfshirë edhe batalionin special. Të gjithë ata që nuk do të kapin normat në mënyrë graduale, do t’ua u lënë vendin nënoficerëve të rinj. Ne nuk do të harrojmë dhe nuk do të flakim në rrugë asnjë nga asetet më të mira që kemi në Forcat Speciale, por natyrisht për shkak të moshës dhe pamundësisë fizike, një pjesë e tyre do të vijojnë karrierën në Shkollën e Trupës, në Akademinë e Oficerëve, në Akademinë FA-ve apo në strukturat e kërkim-shpëtimit”, theksoi gjeneral brigade Kollçaku.

Në muajin shtator 2005, kur morri në dorëzim zyrën kryeministrore, Sali Berisha u pajis edhe me një jelek anti-plumb special, i cili nuk ishte pjesë e inventarit të pajisjeve të zyrës së kryeministrit, por pjesë e kompleteve të sigurisë luftarake të Gardës së Republikës, që përdoren vetëm për personalitetet shtetërore, në raste vizitash e takimesh publike, në zona me rrezikshmëri, si masë sigurie shtesë për jetën e tyre.

Mirëpo pas përdorjes së parë të jelekut gjatë një vizite në minierën e kromit në Bulqizë, Saliu nuk e hoqi më jelekun anti-plumb, për ta rikthyer në magazinën e Gardës, por e bëri pjesë të garderobës së përditshme personale, duke e veshur edhe kur shkonte në zyrë, kur shkonte nëpër mitingje e madje edhe në takimet me fëmijët në kopshte me rastin e 1 Qershorit, kur fundjavave me nipërit e mbesat në Dajt, Lalz e Vlorë, por dhe kur shkonte jashtë shtetit.

Askush nuk e dinte, që Prof. Dr. Sali Berisha vishte jelek anti-plumb, por u zbulua nga militantët e PD gjatë një mitingu në Kamëz, kur ai shkoi në ceremoninë e organizuar nga Prof. Dr. Xhelal Mziu, për emërtimin e një rruge në Bathore, me emrin “Rruga Prof. Dr. Sali Berisha”.

Gjashtë muaj pas rënies nga pushteti, në janar 2015, Drejtoria e Logjistikës e Gardës, u kërkoi oficerëve shoqërues të tij, të rikthenin jelekun anti-plumb, që kishte në përdorim Sali Berisha, por ata i treguan një urdhër të firmosur nga ish-Ministri Brendshëm Flamur Noka, sipas të cilit, Sali Berisha do ta përdorte jelekun anti-plumb, si pajim personal edhe 4 vite të tjerë, meqë kishte statusin si ish-kryeministër.

Tre ditë më parë, Garda i ka nisur Sali Berishës, një tjetër njoftim zyrtar, për të dorëzuar jelekun anti-plumb në magazinë, por burime nga brenda Gardës, thonë se Berisha ka refuzuar, duke kujtuar që është ende në rrezik për jetën, për shkak të rihapjes së gjyqeve dhe hasmërive të vjetra./Pamfleti