Aurora

Të hënën në ora 11:00 pritet të mbahet mbledhja e tryezës së Këshillit Politik me temë diskutimi ndryshimet e miratuara nga Komisioni i Ligjeve në Kushtetutën e Republikës së Shqipërisë.

Fillimisht ishte Damian Gjiknuri ai që u dërgoi një e-mail anëtarëve të tjerë të Këshillit Politik duke propozuar mbajtjen e një mbledhjeje të hënën ose të martën.

“Duke ndjekur deklarimet e opozitës jashtëparlamentare në lidhje me procesin e shqyrtimit nga Kuvendi të propozimit të deputetëve të opozitës parlamentare, për ndryshimet në Kushtetutën e Republikës së Shqipërisë dhe me vullnetin për të ballafaquar pikëpamjet tona përmes dialogut konstruktiv, ju propozoj mbledhjen ditën e hënë apo të martë (përkatësisht në 20 ose 21 korrik, sipas disponimit tuaj), ora 11:00, të një tryeze të Këshillit Politik me temë diskutimi ndryshimet e miratuara nga Komisioni i Ligjeve në Kushtetutën e Republikës së Shqipërisë”, u shpreh Gjiknuri.

Më pas ka ardhur edhe përgjigja nga përfaqësuesit e opozitës jashtëparlamentare, teksa përfaqësuesit e opozitës në Këshillin Politik për Reformën Zgjedhore, Oerd Bylykbashi dhe Petrit Vasili, konfirmuan pjesëmarrjen në Këshillin Politik.

“Në emër të opozitës, mirëpresim reflektimin tuaj për të vijuar diskutimin dhe vendimmarrjen konsensuale në Këshillin Politik për çdo çështje lidhur me zgjedhjet, siç kemi rënë dakord me shkrim në Marrëveshjen Politike të 14 Janarit dhe Dakordësinë e 5 Qershorit. Paraprakisht ju konfirmojmë se dokumenti i depozituar nga një grup deputetësh të mazhorancës dhe që përmban produktin e dakordësuar në Tryezën e Këshillit Politik duhet të miratohet sa më parë dhe pa asnjë ndryshim, dhe për këtë arsye, nuk mund të rihapet asnjë çështje që është dakordësuar aty”, u shprehën përfaqësuesit e opozitës jashtëparlamentare./atsh

Kryeministri Edi Rama deklaroi sot se “marrëveshja e 5 qershorit nuk preket në asnjë pikë të saj”.

Në fjalën e tij në Kuvend, duke iu drejtuar deputetëve të opozitës parlamentare Kryeministri Rama tha se “më lejoni t’iu jap një mesazh të qartë të gjithëve ju duke filluar nga i palodhuri prej një tranzicioni të gjatë ku shpesh herë ka qenë viktimë e keqadministrimit zgjedhor, Myslym Murrizi dhe deri tek deputeti i fundit jo për nga rëndësia ai i opozitës parlamentare. Nuk mund t’i merrni të gjitha, nuk mund t’i kërkoni të gjitha dhe të gjithë së bashku duhet të bëjmë lëshimet tona. Po ua them sot që të jemi shumë të qartë është e pamundur që ne të votojmë së bashku me ju në rast se ju nuk votoni së bashku me ne dhe për ne marrëveshja e 5 qershorit nuk preket në asnjë pikë të saj”.

“E them këtë duke e përsëritur edhe këtu, mua marrëveshja e 5 qershorit nuk më pëlqen dhe për mua ajo ka një problem të madh që ne nuk kemi arritur dot të adresojmë rekomandimin kryesor të OSBE-ODIHR, që është një rekomandim i përsëritur thuajse në të gjitha raportet, pas të gjitha zgjedhjeve depolitizimi i administratës zgjedhore. Ju e dini shumë mirë që ne kemi qenë vijimësisht këmbëngulës dhe madje kemi thënë që ne do ta bëjmë depolitizimin do apo nuk do Partia Demokratike, por ajo që e dallon sistemin demokratik dhe bashkëjetesën pluraliste nga një sistem u vendos vetëm një parti është që duhet edhe të tërhiqesh, të bësh kompromise edhe të pranosh çka nuk të pëlqen për hir të një interesi më të madh”, – theksoi Rama.

Kreu i qeverisë u shpreh se “zonja Hajdari ka firmosur në Këshillin Politik dhe ka dhënë argumentet e saj dhe e di shumë mirë si dëshmitare okulare, pasi Damiani nuk është i besueshëm për Myslymin dhe për ju, nuk po e sjell këtu si dëshmitar, që deri në fund marrëveshja është penguar nga mosdakordësia pikërisht për këtë pikë dhe në fund pasi topi shkoi në fushën e Lulzim Bashës u kthye me një kusht që mund ta kishte hedhur në erë marrëveshjen nga ana e Lulzim Bashës që donte me çdo kusht që gjërat të mos të ndryshonin edhe pse faktikisht duke thënë le t’i lëmë gjërat siç janë se janë më mirë se çdo gjë tjetër ka thënë që gjithçka për të cilën ai ka luftuar, ka qenë një teatër dhe nuk kuptohet edhe pse iku nga parlamenti edhe pse gjërat paskan qenë në rregull dhe nuk kanë nevojë për ndryshime”.

“Lulzim Basha pretendon se ne pranuam këtë sepse na i futën këmbët në një këpucë. Unë vërtet këpucën e djathtë e kam 46, por këmbën e majtë nuk ma nxë. E vërteta është që ne bëmë një lëshim shumë të madh, jo sepse ne nuk kishim rrugë tjetër, por sepse kjo ishte rruga më e mirë për ta përshirë PD dhe opozitën jashtëparlamentare në procesin politik dhe është një motiv që të gjithë të kuptojmë që PS dhe unë personalisht nuk kemi një qasje autoritariste. Ishte rasti për të bërë të kundërtën nëse do ishim të tillë dhe të thoshim kush kush jeni ju, ju nuk jeni në parlament, nuk përfaqësoni askënd tjetër përveç vetes dhe rrugës tuaj të rrugës, ne nuk u njohim”, – tha Rama.

Por, shtoi Kryeministri, nga pikëpamja institucionale do ishim korrekt, por nga pikëpamja politike dhe nga këndvështrimi ynë demokratik për jetën tonë politike nuk do të ishim korrekt sepse PD është një realitet politik pavarësisht se nuk është pjesë e realitetit të sotëm parlamentar.

Duke iu drejtuar deputetëve të opozitës, Rama tha se “keni kohë të reflektoni, të kuptoni që të dyja janë të lidhura bashkë marrëveshja e 5 qershorit dhe marrëveshja për të pranuar legjitimitetin e nismës suaj, e cila për hir të vërtetës ka mbështetjen e një shumice të madhe shqiptarësh. Ne nuk e kemi pranuar se duam t’iu bëjmë juve qejfin, por e kemi pranuar se është e drejtë”./atsh

Ministrja e Shëndetësisë dhe Mbrojtjes Sociale, Ogerta Manastirliu ka shpërndarë sot mesazhin sensibilizues për COVID-19 drejtuar qytetarëve të ambasadores së Shteteve të Bashkuar të Amerikës, në Tiranë, Yuri Kim.

Kim në mesazhin e saj drejtuar qytetarëve thekson dhe njëherë nevojën e vënies së maskës në ambientet ku nuk është i mundur distancimi social.

“Ne kemi bërë një rrugë të gjatë, por lufta kundër COVID-19 ende nuk ka mbaruar. Masat e rrepta kanë ndihmuar në kontrollin e virusit, por tani nuk është koha për t’u çlodhur. Tani më shumë se kurrë duhet të sillemi me përgjegjësi. Le të bëjmë të gjithë pjesën tonë për njëri-tjetrin”, shprehet Kim në mesazhin e saj.

“Unë do të vendos maskë për ty, nis ti do ta vendosësh maskë për mua. E pranoj, ndonjëherë jam fajtore, sepse nuk e kam vendosur maskën, por nuk është kurrë vonë për të bërë gjënë e duhur. Prandaj, kur distancimi social nuk është i mundur, le të vendosim maskat dhe ta mposhtim COVID-19 së bashku”, përfundon Kim mesazhin e saj drejtuar qytetarëve./atsh