Turizem

Me një vijë të pafundme bregdetare dhe të larmishme mund të jetë e vështirë të zgjedhësh se cili plazh në Europë është i denjë për t’u vizituar në vitin 2018.

Në këtë dilemë, turistëve iu ka ardhur në ndihmë “The Points Guy” një website udhëtimesh amerikane që depërtoi në brigjet e Europës për të gjetur disa nga pikat më të mira për çdo plazh për vitin 2018.

The Points Guy ka renditur 15 plazhet më të bukura në Europë për vitin 2018 ku surpriza është Ksamili i cili renditet në vendin e dhjetë mes plazheve mahnitëse të Spanjës, Kroacisë, Francës.

Në këto destinacione, arrihet falë linjave të reja ajrore, ku ju zgjidhni të kaloni pushimet mes ngjarjeve kulturore, të luani në rërë, të notoni në det ose thjesht të shijoni diellin në këto destinacione europiane këtë verë.

TPG shkruan në artikullin e tij për ishujt e Ksamilit se Riviera shqiptare është po aq e mrekullueshme sa Rivierat italiane apo franceze.

“Ju nuk mund të keni dëgjuar për Rivierën Shqiptare, por është po aq e mrekullueshme sa Rivierat italiane apo franceze, me përjashtim të buxhetit shumë më të mirë. Ishujt e Ksamilit janë një koleksion simpatik i ishujve të pabanuar, të cilët mund të eksplorohen vetëm me një udhëtim të shkurtër me varkë larg gadishullit të Ksamilit. Ju madje mund të notoni mes disa ishujve në ujërat e cekëta”, shkruan “The Points Guy”.

“Gjithashtu duke iu treguar miqve tuaj se jeni duke pushuar në Rivierën shqiptare, tingëllon shumë magjepsëse dhe aventureske, gjithashtu! Për të arritur këtu, linja ajrore e re Air Albania mund të fillojë të fluturojë në rrugët evropiane këtë verë./atsh

Sezoni turistik veror është prioritet për strukturat e Drejtorisë së Policisë së Qarkut të Vlorës, çka reflektohet në masat e marra dhe ato që do të merren në vazhdimësi për të garantuar rendin dhe sigurinë e nevojshme në të gjithë territorin, përgjatë plazheve dhe hapësirave të tjera që shfrytëzohen nga turistët për të kaluar pushimet.

Gjatë një komunikimi me median, Drejtori i Policisë së Qarkut të Vlorës, Gentjan Shehaj, bëri një pasqyrë të gjendjes së deri tanishme për periudhën maj-qershor, ndërkohë që publikoi planin e masave që do të zbatohen në javët dhe muajt në vazhdim, në bashkëpunim me institucionet e tjera vendore, si pjesë e strukturave funksionale të Task Forcës së ngritur për këtë qëllim, nën drejtimin e Institucionit të Prefektit të Qarkut.

“Sezoni turistik veror, për policinë është prioritar dhe për këtë qëllim janë marrë një sërë masash në bashkëpunim me Drejtorinë Vendore të Kufirit dhe Migracionit, Repartin Delta Force si dhe Repartin e Ndërhyrjes së Shpejtë Fier”, nënvizoi Shehaj. Sipas tij, ky plan masash ka si qëllim rritjen e parametrave të sigurisë përgjatë sezonit turistik veror. Në zbatim të këtyre masave është bërë riorganizimi i shërbimeve, duke u bazuar edhe në përvojën dhe problematikat e shfaqura një vit më parë. Gjithë vija bregdetare është ndarë në 10 sektorë, me strukturat përkatëse të policisë dhe me përgjegjësi të ndara respektivisht. Në këtë proces janë përfshirë 325 punonjës policie dhe për shkak të fluksit në pritje të turistëve, Drejtoria e Përgjithshme e Policisë ka vënë në shërbim të policisë vendore 100 shërbime policie shtesë, si edhe 15 mjete.

Ky plan masash, sipas drejtorit Shehaj, i është përcjellë institucionit të Prefektit të Qarkut, si edhe bashkive Vlorë, Himarë e Sarandë.

Kreu i Drejtorisë Vendore të Policisë bëri të ditur se, deri tani, janë zhvilluar një sërë takime të Task Forcës së ngritur për këtë qëllim, nën drejtimin e Prefektit të Qarkut, ku është synuar informimi i të gjitha subjekteve dhe detyrimet që ato kanë për sinjalistikën në plazhe si edhe për ndotjen akustike. Nga analiza e sezonit turistik veror të vitit të kaluar, është konstatuar se problematikat më të mëdha janë hasur kryesisht në mangësitë me sinjalistikën në plazhe. Por, nga ana tjetër edhe ndotja akustike ka qenë një shqetësim. Për këto arsye, po punohet për t’u paraprirë dhe për t’u paradalë këtyre problematikave, në mënyrë që ato të mos përsëriten dhe çdo institucion të marrë përsipër përgjegjësitë dhe të kryejë detyrimet.

Janë evidentuar 57 subjekte në risk, të cilat gjatë vitit të kaluar kanë shfaqur shqetësime në ndotjen akustike, me të cilat është komunikuar dhe u është përcjellë informacioni i nevojshëm për masat dhe detyrimet e tyre në zbatim të ligjit përkatës dhe aktit normativ respektiv të Këshillit të Ministrave.

Krahas kësaj, janë përgatitur një numër fletëpalosjesh, të cilat do të shpërndahen gjatë gjithë sezonit veror për turistët e huaj dhe ata vendas, për t’i informuar për masat dhe ndërhyrjet e policisë na raste shqetësimesh.

Paralelisht është punuar për zbatimin e detyrimeve që lindin për sinjalistikën në territorin e plazheve.

Drejtori Gentian Shehaj, garantoi të gjithë mbështetjen e strukturave të policisë për rend dhe qetësi në plazhe dhe në të gjitha hapësirat e pushimit, ndërkohë që u ofroi të gjitha institucioneve zyrtare partneritet për kryerjen e detyrave. Ai kërkoi nga qytetarët të jenë bashkëpunues gjatë gjithë sezonit e në vazhdimësi, në mënyrë që të parandalohen raste të shqetësimeve./atsh

Në këtë sezon turistik, emisioni “Tonight Ilva Tare” ishte në qytetin e Vlorës për të diskutuar zhvillimin që kanë sjellë investimet në këtë qytet dhe nevojat për të përballuar sezonin turistik. Të ftuarit vlerësuan investimet e kryera si dhe nxorën nevojën e ndërtimit të një aeroporti, porti funksional si dhe nevojën për një masterplan kombëtar për turizmin.

Emisioni “Tonight Ilva Tare” vizitoi në këtë sezon turistik qytetin e Vlorës për të folur për investimet dhe nevojat që ky qytet ka për të përmbushur nevojat e turistëve.

Presidenti i Cipa Turs, Arben Çipa, vlerësoi ndërtimin e lungomares duke thënë se ky investim risolli operatorët turistik të huaj që u larguan nga Vlora vite më parë.

Çipa: Lungomaro risolli opeeratorët e huaj turistikë, të cilët në Vlorë kanë qenë para katër vitesh. Flasim për operatorë të huaj. Nga viti i kaluar janë rikthyer.

Drejtori i Fondit Shqiptar të Zhvillimit, Benet Beci, i përshkroi gjithë investimet që Fondi ka bërë në Vlorë, duke i dhënë një fytyrë europiane qytetit.

Beci: Dukshëm rritja e vlerës së pronave pranë tyre, i shërbimit dhe punësimit në zonën e Lungomares. Sot ka dy linja të kalimit që janë krejtësisht normale në trafik gjatë kohës së sezonit sepse janë kompensuar me një investim shumë të madh dhe të rëndësishëm që është pjesa e rrugës “Dhimitër Konomi” dhe pjesa e Unazës së Vlorës. Bulevardi i Vlorës ka një komponent të fortë të një lloj ambjenti natyral të gjelbëruar për banorët. Vlora ka një hyrje jashtëzakonisht të përshtatshme të një qyteti turistik europian.

Çdo vit turizmi në Vlorë dhe në Shqipëri po shënon progres
Edhe drejtori i Aeronautikës, Alket Islami, vlerësoi progresin në turizëm të Shqipërisë dhe parashikoi se në të ardhmen do të ketë më shumë sukses.

Islami: Jo vetëm Vlora, gjithë Shqipëria që nga viti ’90 dhe këtej gjithmonë ka progres në turizëm, kushdoqoftë rrotacioni politik, vitet bëjnë të veten, turizmi bën të veten. Tani po priten frytet e asaj pune që është bërë 10 vitet e mëparshme.

Shqipëria ka nevojë për një masterplan kombëtar për turizmin
Ralf Gjoni theksoi nevojën e një masterplani kombnëtar për të zhvilluar turizmin dhe sugjeroi krijimin e një Ministrie të veçantë të turizmit.

Gjoni: Shqipëria siç e ka Mali i Zi, siç e ka Kroacia dhe vendet e zhvilluara, ka nevojë për një masterplan kombëtar. E dyta është roli i kapaciteteve shtetërore. Deri dje kemi pasur Ministrinë e Turizmit Kulturës Rinisë dhe Sporteve. Po flasim për turizmin si sektor strategjik, turizmi ka nevojë për një Ministri të dedikuar, madje edhe sot Turizmi dhe Mjedisi për mua personalisht do të isha dhe për ndarjen në të ardhmen.

Vlorës i duhet një aeroport që do t’i shërbejë jugut

Administratori i Hotel Internacional në Vlorë, Fatmir Hanxhari, kërkoi ndërtimin e aeroportit që më shumë sesa Vlorës do i shërbente 700 mijë banorëve të jugut të Shqipërisë.

Hanxhari: Vlorës i duhet një aeroport dhe jo Vlorës, jugut. Pse? Së bashku me qytetet e jugut ne bëjmë 700 mijë banorë.

Vlora ka nevojë për port funksional për krocera

Ndërsa eksperti i guidave turistike, Migel Xhelo, theksoi nevojën e një porti funksional që do të shërbente për të ankoruar krocerat e mëdha.

Xhelo: Nuk kemi një port në Vlorë. Nuk kemi një port funksional për të ardhur kroçerat, nuk ka kapacitet për ti mbajtur, plus dhe lehtësirat që dueht të bëhen në port në lidhje me anijet e huaja që vijnë apo këto velierat. Kur vinë në gjirin e Vlorës duhet të paraqiten një herë në kapiteneri, të marrin lejen, pastaj të ikin prapë në destinacionin ku duan. Kjo është një procedurë që ata i pengon, shton burokracinë dhe ata nuk e duan./oranews

Përveç që thuajse të gjithë duan të emigrojnë nga ky vend, po t’i pyesësh shqiptarët se ku do kalojnë pushimet apo ku do të donin t’i kalonin me gjasë përgjigja do jetë “jashtë shtetit”.

Mirëpo, të huajt që kanë pasur mundësi për të eksploruar Shqipërinë shprehen se vendi ynë është ideal për të kaluar pushimet. Mjaft blogje, revista dhe gazeta ndërkombëtare shkruajnë për Shqipërinë, duke e cilësuar si “perla e Ballkanit.”

Por, pse të huajt duhet të vijnë në Shqipëri? Blogerja angleze, e vetëquajtur “theBalkanista”, e cila është shtetase britanike, por prej disa kohësh jeton në Shqipëri, ka renditur 10 arsye se pse Shqipëria duhet të jetë në listën tuaj të pushimeve.

Me anë të një letre të hapur për miqtë e saj që blogerja e titullon “Pse duhet të vini në Shqipëri këtë verë!”, ajo arrin të nxjerrë në pah veçoritë më të mira të vendit tonë.

Nuk është një pistë e rrahur nga turistët
Ndryshe nga shumë destinacione të tjera turistike të Mesdheut (Maltë, Kretë, Qipro, Spanjë), Shqipëria ende nuk është “ngopur” edne me turistët dhe nuk duhet të prisni me orë të tëra për të hyrë në atraksionet turistike, as nuk duhet të bësh luftë me gjermanët për të zënë vendin perfekt në plazh dhe nuk është e mbingarkuar me komercializëm.

Ka plazhet më të mira në të gjithë Europën
Të nderuar pushues që dëshironi Italinë, Kroacinë dhe Greqinë, më vjen keq t’ju zhgënjej, por Riviera e Shqipërisë është në krye të çdo bregdeti që duhet të shikoni. Ndonëse kjo mund të jetë një deklaratë mjaft e diskutueshme, unë i qëndroj asaj, ashtu si shumica e shqiptarëve. Shkoni në Ksamil, Sarandë, Himarë dhe Dhërmi dhe pyesni veten në ujërat tepër të kaltra, rërën e argjendtë dhe pamjet e majme malore, të cilat në mënyrë të përkryer e formojnë bregdetin. Ka diçka të egër dhe të mrekullueshme për bregdetin shqiptar dhe unë ju sfidoj të gjeni diçka të krahasueshme kudo në kontinentin europian.

Koha është e mrekullueshme
Shqipëria gëzon klimën e përsosur mesdhetare me verë të gjatë të nxehtë dhe vjeshtë, dimër dhe pranverë. Nga maji e tutje, temperaturat mbesin vazhdimisht mbi 22 gradë gjatë ditës dhe arrijnë mbi 35 gradë gjatë muajit korrik dhe gusht. Temperatura mesatare vetëm zvogëlohet nën 20 gradë kur vijmë në nëntor, gjë që nënkupton që ju keni kohë të mjaftueshme për të eksploruar vendin dhe për të ‘gllabëruar’ diellin e tij të lavdishëm.

Vendasit janë miqësor
Populli shqiptar është miqësor, kureshtar, mikpritës dhe i sjellshëm. Shumë vendas janë të prirë që të shkundim imazhin negativ të padrejtë që është propaganduar për to gjatë viteve. Ata nuk janë të gjithë mafiozë dhe gangsterë, personalisht mund të them që kurrë nuk kam ndier më shumë siguri, se sa kam pasur në Shqipëri. Jini të përgatitur për t’iu përgjigjur 100 pyetjeve se kush jeni, prej nga jeni dhe pse jeni këtu – vendasin duan të dinë shumë detaje.

Ushqimi është mahnitës
Nëse jeni në bregdet, ju do të gjeni ushqim deti shumë të shijshëm, me çmime tepër të ulëta. Kuzhina ka një ndikim të madh nga Italia dhe çdo gjë, nga pica deri te makarona, është e krahasueshme me atë që do të gjesh atje. Ndërsa udhëtoni për në brendësi të vendit, kuzhina është më e bazuar në pjata mishi, por me prodhimet më të freskëta të mundshme. Për sa kohë kam qëndruar, koncepti i ushqimit të ngrirë nuk ekziston dhe gjithçka është tërësisht e freskët, e pastër dhe e përgatitur mirë.

Gjuha nuk i ngjan asgjëje që ju keni dëgjuar më parë
Shqipja është një nga gjuhët më të vjetra të gjalla dhe është krejtësisht ndryshe nga çdo gjuhë tjetër euopiane. Është shumë e vështirë të arrish të flasësh, por mund të provosh të mësosh disa fjalë pasi banorët e pëlqejnë kur të huajt përpiqen të flasin në gjuhën shqipe.

Ju mund të udhëtoni me lehtësi në disa vende të tjera
Shqipëria konsiderohet si një bazë e shkëlqyer për ata që duan të eksplorojnë zona të tjera të rajonit. Nga Pogradeci mund të kaloni në kufirin me Maqedoninë, nga Shkodra ju mund të udhëtoni në Mal të Zi dhe Kroaci, nga jugu mund të vizitoni Greqinë dhe Korfuzin, dhe nga veriu pse jo, shikoni Kosovën dhe Serbinë përtej. Ju mund të merrni me qira një makinë ose të merrni një autobus dhe të jeni në destinacionin tuaj brenda disa orëve. Italia është rreth 1 orë në një aeroplan ose ndryshe mund të merrni një traget nga Durrësi dhe të jeni atje brenda disa orëve.

Ka më shumë histori se sa duket në sipërfaqe
Nëse je një fans i historisë dhe i kulturës, atëherë mund të rezervosh një zgjatje të qëndrimit tënd në Shqipëri. Vende të Trashëgimisë Botërore të UNESCO-s, rrënojat romake, kështjellat mesjetare, muzeumet e bunkerëve komunistë dhe reliket e mbetura nga sundimi otoman, këtu i gjeni të gjitha.. Ja vlen të vizitohet qyteti i Butrintit në jug, ashtu siç është Berati, dhe qyteti i Shkodrës. Nuk ka hapësirë të mjaftueshme për të shkruar këtu të gjitha vendet historike që ju duhet t’i shihni.

Është një vend me tolerancë fetare
Edhe pse Shqipëria është një vend me shumicë myslimane, ju nuk keni nevojë të ndrydhni besimin tuaj siç mund të duhet të bëni në vende tjera myslimane. Shqiptarëve realisht nuk u intereson se cilit besim i përkisni, për sa kohë që jeni një person i mirë dhe miqësor dhe i ndershëm.

Vizitoni liqenet e saj dhe burimet natyrore
Ashtu siç ka vijën bregdetar shumë të lakmuar, Shqipëria është shtëpia e disa liqeneve më të bukura, madje edhe burimeve natyrore. Liqeni i Komanit, Liqeni i Shkodrës, Liqeni i Butrintit dhe Liqeni i Ohrit janë të gjithë të vlefshëm për t’u vizituar. Burimet e saj natyrale si Syri i Kaltër dhe një i ngjashmi i tij në Thethi janë perfekte për notim dhe relaksim dhe nëse jeni me fat ju mund të pengoheni nëpër disa ujëvarat për ato momente të përsosura Instagram.

Vendosja e sinjalistikës së nevojshme turistike për lehtësimin e vizitorëve, është hapi i parë që shënon zbatimin e programit të ri të qeverisë për zhvillimin e agroturizmit nën siglën “100 fshatrat”.

Ekspertë të ministrisë së Bujqësisë, shprehen se, janë hapur procedurat e prokurimit publik për “Përmirësimin dhe rritjen e kapaciteteve pritëse, vendosja e sinjalistikës turistike në destinacionet e agroturizmit në “100 fshatrat”, në plazhet me rrezikshmëri të lartë për shëndetin dhe sigurinë fizike, si dhe tabelat me rregullat e arta”.

Sipas ekspertëve, në hartën e 100 fshatrave që paraqet orientime të qarta për zonat agroturistike, janë përzgjedhur ato zona që kanë potencial turistike dhe si të tillë kanë nevojë për plotësimin me sinjalistikë për të lehtësuar vizitorët.

Drejtoresha e Përgjithshme e Tatimeve Vasilika Vjero bëri një deklaratë përpara mediave, gjatë së cilës përcolli mesazhe të rëndësishme për tatimpaguesit, në këtë fillim sezoni turistik.Gjatë fjalës së saj, Vjero nënvizoi faktin se gjatë sezonit turistik, shumë biznese kryesisht në zonat bregdetare, riaktivizohen dhe intensifikojnë veprimtarinë e tyre, në funksion të fluksit të qytetarëve. Një gjë e tillë shoqërohet me vëmendje të shtuar nga ana e Administratës Tatimore e cila tashmë ka filluar të jetë prezentë kudo dhe do të vijojë deri në përfundim të tij.

“Për sipërmarrjet të cilat tregojnë përgjegjshmëri në ushtrim e aktivitetit të tyre administrate tatimore do të vijojë të ketë një qasje shumë pozitive, duke reduktuar kontrollet tatimore për sa kohë ata do të vijojnë të vetëdeklarojnë dhe paguajnë rregullisht detyrimet. E kundërta do të ndodhë me ata tatimpagues, të cilët kërkojnë t’i fshihen administratës tatimore. duke krijuar së pari një pandershmëri në konkurrencë e së dyti duke shmangur detyrimet ligjore”, tha Vjero.

Sakaq, theksoi gjithashtu se gjatë prezencës së strukturave tatimore në terren është konstatuar se vijon të ketë ende tatimpagues, të cilët ushtrojnë aktivitet të paregjistruar, apo që ende nuk e kanë aktivizuar atë, që nuk lëshojnë kupon tatimor për çdo shitje, që nuk disponojnë fatura të produkteve apo shërbimeve, apo nuk regjistrojnë punonjësit.

“Dëshirojmë t’ju drejtohemi publikisht këtyre sipërmarrjeve për t’iu thënë se nuk do të ketë asnjë tolerancë nga administrata tatimore në funksion të zbatimit të ligjshmërisë së kërtyre bizneseve deri në mbyllje të aktiviteteve të tyre për një përiudhë 30 ditore çka do të dëmtonte realisht aktivitetin e tyre. Sigurisht që ne nuk e dëshirojmë një gjë të tillë, por përpara ligjit janë të gjithë të barabartë. Ndaj zero tolerancë për këdo që mendon se mund të ushtrojë aktivitet të paligjshëm apo mendon se mund t’iu devijojë detyrimeve ligjore”, tha Vjero.

Drejtoresha e Tatimeve, ftoi të gjithë qytetarët që të bashkëpunojnë në luftën kundër informalitetit, duke refuzuar pagesat nëse nuk ju jepet kuponi tatimor. Gjithashtu, çdo i punësuar mund të denoncojë raste të mospagesave të kontributeve për punën e kryer.

Kryeministri Rama e ka nisur dites sot duke ndare me ndjekesit e tij ne Facebook nje artikull te medias frenceze, qe e klasifikon vendin tonë në 10 destinacionet kryesore të turistëve francezë.

“MIRËMËNGJES 😃 dhe me këtë artikull të francezes Journal de Dimanche, që e klasifikon vendin tonë në 10 destinacionet kryesore të turistëve francezë këtë vit dhe e quan “rivalin e ri të Kroacisë”, ju uroj një javë të mbarë 😉”- shkruan Rama.