Turizem

Deputeti i Bundestagut gjerman, Volkmar Klein, anëtar i partisë CDU vizitoi Pogradecin, ku premtoi bashkëpunim dhe shkëmbim eksperiencash në fushën e turizmit 4-stinorë si dhe menaxhimit e ndarjes administrative.

Deputeti gjerman zhvilloi një takim me Kryetarin e Bashkisë së Pogradecit, Eduard Kapri, ku foli për punësimin e të rinjve, si dhe rolin dhe ndikimin e fondacioneve për zhvillimin ekonomik e social tek qytetarët e Pogradecit.

Edhe pse Klein e kishte vizitën e parë në Shqipëri ai zgjodhi Pogradecin si destinacion të preferuar, ndçërsa u shpreh i impresionuar me bukuritë e liqenit dhe Drilonit.

/atsh

Policia Rrugore, masa shtesë për menaxhimin e trafikut në sezonin e verës dhe parandalimin e aksidenteve. Masat i ka bere me dije Mithat Tola, Drejtor i Policisë Rrugore, Policia e Shtetit:

Në vijim të masave të marra nga ana e Policisë së Shtetit për garantimin e rendit dhe sigurisë gjatë sezonit turistik veror 2018, Drejtoria e Policisë Rrugore kërkon të tërheqë vëmendjen e përdoruesve të rrugës për ditët në vijim:

Pavarërisht të dhënave pozitive në tërësi të periudhës së deritanishme, për ngjarjet me pasoja në rrugë, nisur nga ngjarjet e tre ditëve të fundit, nisur edhe nga shkaqet e evidentuara të këtyre aksidenteve, kërkojmë të adresojmë shqetësimin tonë sa më poshtë:
– Drejtoria e Policisë Rrugore tërheq vëmendjen e drejtuesve të mjeteve të rritin kujdesin në drejtimin e mjeteve në rrugë. Të moderojnë shpejtësinë, të evitojnë sjelljet e rrezikshme në rrugë si parakalimet e gabuara dhe manovrat e papërshtatshme;

Bashkëatdhetarëve turistë që ndodhen me pushime në vendin tonë të marrin kohën e duhur për pushim dhe udhëtim, sidomos kur janë familjarisht në udhëtim me mjetet e tyre, të evitojnë përdorimin e pijeve alkoolike;

Policia Rrugore ka evidentuar faktin së në aksidentet me pasojë të evidentuara ditët e fundit, janë përfshirë këmbësorë – ndaj apelojmë këmbësorët:
të respektojë me korrektësi rregullat e qarkullimit;
të kalojnë në vijat e baradha dhe mbikalimet, pasi edhe nga vëzhgimet e patrullave të Policisë Rrugore në rrugë urbane dhe interurbane, shumica e këmbesoreve nuk i respektojnë ose i respektojnë pjesërisht normat e sjelljes në rrugë.

Në qendrat e banuara dhe në zonat rurale një tjetër kategori drejtuesish mjetesh të përfshirë në aksidente, janë edhe drejtuesit e çiklomotoreve. Shërbimet e Policisë Rrugore po vazhdojnë kontrollet për këtë kategori mjetesh, me synim evidentimin e atyre shtetasve që i drejtojnë pa lejedrejtimi përkatëse, që nuk vendosin kaskon mbrojtëse.

Tërheqim vëmendjen e grupit të çiklomotoreve që janë të punësuar për llogari të bareve dhe restoranteve – duke kërkuar nga pronarët e subjektve, plotësimin e kushteve për këta drejtues, kasko dhe veshje reflektuese të personalizuara konform kërkesave të legjislacionit shqiptar;

Në të gjitha Drejtoritë e Qarqeve dhe veçanërisht në zonat bregdetare, Policia Rrugore është duke kryer shërbime me orë të shtuara, me qëllim përballimin e fluksit të madh të automjeteve që qarkullojnë në territorin e Republikës së Shqipërisë gjatë sezonit veror.

Gjatë muajit Korrik 2018, Policia Rrugore ka arrestuar 101 drejtues mjeti për drejtim mjeti në gjendje të dehur, 164 drejtues automjetesh për drejtim pa leje drejtimi.

Ndërkohë, janë ndëshkuar rreth 7 mijë drejtues mjetesh për përdorim të celularit gjatë drejtimit të mjetit etj.

Policia Rrugore apelon të gjithë drejtuesit e automjeteve që gjatë fundjavës, ku fluksi i lëvizjes do të vazhdojë të jetë më i shtuar në disa akse rrugore, kryesisht ato që të çojnë drejt zonave bregdetare të tregojnë kujdes, të respektojnë shpejtësinë, të përdorin rripin e sigurimit, të mos përdorin celularin gjatë drejtimt të automjetit, dërsa drejtuesit e motomjeteve të përdorin kaskën mbrojtëse.

Policia Rrugore do të vijojë bashkëpunimin me radiot me shtirje kombëtare, përmes së cilave shpërdahen njoftime të vlefshme për drejtuesit e mjeteve, gjatë kohës që udhëtojnë, duke i këshilluar dhe orientuar ata për akset me më tepër trafik./korrieri

Të gjithë turistët që kanë zgjedhur jugun e Shqipërisë për pushime dhe dëshirojnë të eksplorojnë fshatrat turistikë tashmë kanë një zyrë informacioni ku mund të informohen.

Turistët që dëshirojnë të vizitojnë fshatrat turistikë të Pilurit, Kallaratin, Lukovën, Kucin, Fterrën, Vranishtin, Iliasin, Dhërmiun, Corrajn, Kudhësin, Qeparonë, Himarën, Borshin apo Vunonë mund të gjejnë informacion pranë Zyrës së Informacionit Turistik të ngritur me mbështetjen e GIZ në Himarë.

Atje turistët mund të gjejnë informacione mbi atraksionet turistike, historinë, kulturën, traditën, kulinarinë, monumentet e natyrës, arkitekturën karakteristike etj./atsh

Nga janari në Shqipëri kanë ardhur më shumë se 1.4 milionë të huaj, nga këta 300 mijë kanë vizituar Tiranën si turistë.

Këtë vit është shtuar numri i atyre që qëndrojnë disa ditë në kryeqytet, jo vetëm në hotele, por edhe apartamente. Ky lajm është bërë i ditur nga kryetari i bashkisë së Tiranës, Erion Veliaj.

Në Tiranë, 300 mijë turistë. Shtohen vizitorët që qëndrojnë disa ditë. Ky po është një superlajm. Për Tiranën, që ndoshta nuk ka det, por ka një mikpritje, jetë artistike e ushqime për t’u pasur zili”, -shkruan Veliaj në faqen zyrtare, në rrjetin social “Facebook”./atsh

Këtë javë ka nisur në terren puna për intervistimin e turistëve që vizitojnë zonat turistike në jug të vendit.

Ky anketim është pjesë e studimit të vlerësimit të impaktit dhe zhvillohet në kuadër të Projektit për Zhvillimin e Integruar Urban dhe Turizmin që financohet nga Banka Botërore dhe zbatohet nga Fondi Shqiptar i Zhvillimit.

Studimi parashikon kryerjen e rreth 1,300 intervistave me turistë çdo verë, në qendrat urbane të Sarandës, Gjirokastrës, Beratit, Përmetit dhe përgjatë korridorit turistik që kalon në këtë rajon. Ai ka nisur që në vitin 2017 dhe do të zgjasë 5 vjet deri në vitin 2022.

Qëllimi i këtij anketimi është marrja e opinioneve të turistëve lidhur me një sërë çështjesh të lidhura me nivelin dhe cilësinë e shërbimeve që ofrohen sot në tregun turistik shqiptar, destinacionet turistike, objektet e trashëgimisë historike dhe kulturore, cilësinë e informacionit të lidhur me turizmin, gastronominë, aksesin drejt zonave turistike, infrastrukturën dhe kushtet e transportit, trendin dhe modelin e shpenzimeve të turisteve gjatë qëndrimit të tyre, kohëzgjatjen e qëndrimit, etj. Anketimi i turistëve do të shoqërohet dhe me anketimin e familjeve dhe bizneseve në zonën e ndërhyrjes. Studimi do të japë një panoramë të qartë mbi efektet që po sjellin investimet në zhvillimin socioekonomik në përgjithësi dhe atij të turizmit në veçanti. /atsh

Qendrat shëndetësore verore në zonat turistike kanë ofruar shërbime mjekësore për 17,556 pushues deri tani, ndërsa shërbimi autoambulancave ka ofruar ndihmën e shpejtë për 510 qytetarë.

Këtë sezon turistik, Ministria e Shëndetësisë dhe Mbrojtjes Social ka hapur 26 qendra shëndetësore verore në zonat turistike bregdetare dhe ato malore. Përveç shërbimit 24 orë në qendrat shëndetësore verore, janë vendosur autoambulanca fikse në 17 zonat më të frekuentuara turistike, për t’iu përgjigjur në kohë pushuesve që kanë nevojë për kujdes shëndetësor. Këto të fundit i bëjnë më të sigurt pushimet për ata që zgjedhin bregdetin shqiptar, për t’u çlodhur.

Gjithashtu, spitalet pranë këtyre zonave funksionojnë me shërbim të përforcuar si dhe shërbimi i helikopterëve është në dispozicion të emergjencave. I gjithë shërbimi po koordinohet nga Qendra Kombëtare e Urgjencës Mjekësore, në mënyrë inovatore, ç’ka u përgjigjet qytetarëve në ndihmë, në kohë më të shpejtë./atsh