Turizem

Bujtinat, model suksesi për punësim kudo në Europë

Turizem / /

Kryeministri Edi Rama inkurajoi përmetarët në takimin “Bashkia që duam” të përqafojnë modelin e hapjes së shtëpive tradicionale në bujtina, si një model suksesi që po ndiqet kudo në Europë dhe botë për rritjen e punësimit.

Ai dha disa shembuj hotelesh që po ndërtohen në Përmet, për të mikpritur turistët e huaj dhe vendas, si shembull i një industrie mikpritjeje që do të jetë instrumenti më efikas për të luftuar papunësinë, varfërinë dhe largimet nga zona.

“Nuk duhet shumë për të kthyer një shtëpi të varfër në një instrument fitimi, duke hapur derën, duke krijuar kushtet që të vijnë njerëz të tjerë aty për të gjitha ato gjëra që e bëjnë Përmetin një mrekulli: natyrën e mrekullueshme, trashëgiminë kulturore, mikpritjen dhe traditat”, tha Rama.

“Agroturizmi, por edhe bujtinat në zonat historike dhe shtëpitë tradicionale përbëjnë një nga shtigjet e reja dhe shumë të sukseshëm kudo në rajon dhe në Europë për punësimin, ekonominë familjare dhe transformimin e vendit”, theksoi Rama.

Ai shtoi se ka ende probleme me infrastrukturën në disa fshatra. “Do shkojmë në çdo cep të qytetit dhe Përmetit si bashki, për të bërë të mundur që të përfitojnë të gjithë nga ky ndryshim, dhe ata që do të vijnë të jenë shumë më të shumtë në numër”, tha Rama. /atsh

Bujtinat, model suksesi për punësim kudo në Europë Read More »

Rrugëtimi i oficerit amerikan rreth 100 vite më parë në gjurmët e Via Egnatia

Histori, Turizem / /

Udhëtimi në rrugën e famshme “Egnatia” nuk është i ri.

Disa historianë me emër kanë udhëtuar në gjurmët e saj me qëllim identifikimin, por më së shumti për të shkruar mbi ngjarjet historike që kanë ndodhur në këtë rrugë antike.

Drejtori i Agjencisë së Bregdetit, Auron Tare ka shpërndarë një foto të një oficeri amerikan i cili ka udhëtuar në gjurmët e Via Egnatia rreth 100 vite më parë.

“Kjo foto e një oficeri amerikan 100 vite të shkuara në gjurmët e Via Egnatias tregon tërheqjen e madhe që ka kjo udhë historike për të gjithë udhëtarët e lexuar që kanë shkelur këtë vend. Një foto e rrallë 100 vite të shkuara bërë nga Misioni Amerikan në Shqipëri i ardhur pës Luftës së Parë”, shprehet Tare.

Tare thekson se, “100 vite më pas në udhën ku shkeli Cezari, Pompeu, Bruti, Shën Pali, Normanët, Sulltanët e kështu me radhë organizuam të parën ekspeditë shkencore me 40 studentë dhe profesorë të Universitetit të Arkitekturës së Venecias. Në gjurmët edhe të studiuesve shqiptarë që kanë kërkuar mbi këtë udhë historike rizbuluam peizazhet e mrekullueshme dhe gjurmët antike”.

”Shqipëria ka në gjirin e saj një thesar të jashtëzakonshëm si Via Egnatia që fatkeqësisht askush nuk i ka dhënë rëndësi apo t’i kushtojë ndopak vëmendje. Një udhë mbretërore e cila mund të ishte një magnet për turizmin kulturor dhe zhvillimin ekonomik të zonave nga ku ajo kalon”, përfundon Tare. /atsh

Rrugëtimi i oficerit amerikan rreth 100 vite më parë në gjurmët e Via Egnatia Read More »

“E bukura e Adriatikut” hap sezonin e kroçerave në Durrës

Aktualitet, Turizem / /

“La Belle de L’Adriatique” mbërriti sot paradite në Durrës, duke hapur sezonin e turistëve me kroçera në qytetin bregdetar.

Anija me 134 turistë francezë në bord mbërriti nga ishulli i Korfuzit, ndërsa mësohet se gjatë fundjavës së kaluar ajo është ankoruar edhe në Sarandë dhe Vlorë.

Turistët e huaj përveç qendrave arkeologjike dhe historike të Durrësit do të vizitojnë sot edhe qytetin e Tiranës.

Kroçera me gjatësi 111 metra dhe me flamur belg do të ankorohet në Durrës edhe shtatë të shtuna radhazi. Ky është viti i tretë i lundrimit të kroçerës “La Belle de L’Adriatique” drejt Durësit.

Sezoni turistik në portin e Durrësit këtë vit ka nisur më shpejt dhe do të zgjasë mbi 9 muaj. Deri tani në APD është njoftuar mbërritja e 25 kroçerave dhe velierave turistike, të cilat do ta vizitojnë portin e Durrësit nga muaji shkurt deri në nëntor të këtij viti./atsh

“E bukura e Adriatikut” hap sezonin e kroçerave në Durrës Read More »

Mbërrin në Vlorë kroçera e parë me 183 turistë

Aktualitet, Turizem / /

Në portin detar të Vlorës mbërriti për herë të parë për këtë vit kroçera “La Belle De L’Adriatique”.

Sipas portit të Vlorës, 183 turistëve iu është ofruar informacion në lidhje me portin dhe zonat turistike të qytetit.

Pas vizitës në port dhe në qytetin e Vlorës, turistët do vizitojnë Apoloninë e Fierit dhe qytetin e Beratit.

Masat e marra gjatë sezonit të fundit turistik për lehtësimin e lëvizjes dhe ankorimit të mjeteve turistike kanë bërë të mundur që gjatë 2018 numri i jahteve, kroçerave dhe anijeve turistike në vendin tonë të rritet ndjeshëm krahasuar me 2017. /atsh

Mbërrin në Vlorë kroçera e parë me 183 turistë Read More »

Vlora kryeqendër e destinacionit turistik

Aktualitet, Turizem / /

Realizimi i investimeve të rëndësishme në zhvillimin e infrastrukturës, e kanë kthyer Vlorën, perlën e rivierës shqiptare, në destinacionin kryesor turistik të Shqipërisë.

Kryetari i Bashkisë Vlorë, Dritan Leli, u shprh sot në takimin “Për Bashkinë që duam” që po zhvillohet në Vlorë, me pjesëmarrjen e kryeministrit Edi Rama dhe të qytetarëve të shumtë që kanë mbushur qendrën e qytetit, se “vlonjatët kanë treguar që dinë të rrinë në krahun e duhur të historisë dhe sot janë duke treguar se ata duan prosperitetin e Vlorës, të Shqipërisë dhe duan flamurin”.

“4 vite më parë në këtë shesh, askush nuk e besonte që do ta transformonim Vlorën me vepra që vetëm me mbështetjen e qeverisës u bënë realitete. Qendra e re historike e Vlorës, Lungomare, Bulevardi i ri janë investime që kanë bërë Vlorën qytetin modern me standarde, gati për sezonin e ri turisti”, – tha Leli.

“Lungomare sot është investimi historik, krenaria e Vlorës. Çdo qytetar vlonjat qëndron në krah të Rilindjes të vlerave të ndryshimit dhe zhvillimit që po transformon Vlorën dhe të gjithë vendin “- theksoi në fjalën e tij Leli./atsh

Vlora kryeqendër e destinacionit turistik Read More »

Rama: “Shtegu i Mullinjve” në Dhërmi, atraksioni më i ri turistik

Aktualitet, Turizem / /

“Shtegu i Mullinjve” në Dhërmi është kthyer në një atraksion të ri turistik për vizitorët vendas e të huaj, që vizitojnë bashkinë e Himarës.

Kryeministri Edi Rama uroi mirëmëngjes me pamjet mahnitëse nga ky shteg që do të tërheqë mijëra turistë për të vizituar dhe shijuar pamjet fantastike që ofron.

“Mirëmëngjes dhe me këto pamje nga Shtegu i Mullinjve në Dhërmi, atraksioni më i ri turistik në bashkinë e Himarës, ju uroj një ditë të mbarë”, thekson Rama.

Dhërmiu, i shtrirë buzë detit Jon, midis gjelbërimit të ullinjve dhe agrumeve të shumta, ka një bukuri madhështore. Dhërmiu gjendet në fund të një plazhi më shumë se pesë kilometra të gjatë, plazh i cili përfundon në një kodër, mbi të cilën ngrihet manastiri i Shën Theodhorit. Fshati përbëhet nga tri lagje: Kondraqa, apo Kallami që është lagjja e parë për ata që vijnë nga Llogoraja; vijuar nga Gjileku – lagjja e dytë dhe Dhërmiu – lagjja e tretë dhe më e madhja, e cila i ka dhënë edhe emrin fshatit.

Fshati i Dhërmiut ndodhet 52 km në jug të Vlorës, 72 km në veri të Sarandës dhe rreth 210 km nga kryeqyteti, Tirana. Nga ana administrative, Dhërmiu bën pjesë në bashkinë e Himarës. /atsh

https://www.facebook.com/edirama.al/videos/326644697971349/?t=0

Rama: “Shtegu i Mullinjve” në Dhërmi, atraksioni më i ri turistik Read More »

Parku kombëtar detar Karaburun-Sazan, destinacion për edukimin mjedisor

Turizem / /

Parku kombëtar detar Karaburun-Sazan është i vetmi i tillë në Shqipëri. Parku ofron atraksione të shumta natyrore, kulturore, historike dhe turistike.

Qendra e vizitorëve e Parkut Kombëtar Detar Karaburun-Sazan, gjithmonë e më shumë po kthehet në një pikë interesi për edukimin mjedisor, jo vetëm për arsimin parauniversitar, por edhe për ekspeditat universitare.

Kjo qendër sot u vizitua nga studentët e masterit të degës Gjeo-Mjedis, Fakulteti i Gjeologji-Minierave. Ata u njohën me vlerat e zonës si destinacion turistik gjithashtu dhe me biodiversitetin e larmishëm që ajo ofron.

Kjo zonë mund të vizitohet nëpërmjet udhëtimeve ditore që zhvillojnë operatorët turistikë që nisen nga porti i Vlorës. Kjo ofron mundësi reale për të vizituar parkun dhe ofruar një ditë ndryshe në gjirin e Vlorës.

Parku kombëtar detar Karaburun-Sazan gjatë sezonit turistik veror, ishte destinacioni më mbresëlënës për 45000 turistë vendas dhe të huaj.

Parku kombëtar detar Karaburun-Sazan, destinacion për edukimin mjedisor Read More »

Parqet natyrore, pika të forta të zhvillimit të qëndrueshëm turistik

Aktualitet, Turizem / /

“Parqet natyrore janë pika të forta të zhvillimit të qëndrueshëm turistik dhe ekonomik, ndaj dhe nevojitet përfshirja e banorëve që jetojnë afër këtyre zonave për zhvillimin e tyre”.

Kështu deklaroi sot prefekti i qarkut Gjirokastër, Astrit Aliaj, gjatë takimit të parë të Komitetit Rajonal të Menaxhimit të Zonave të Mbrojtura Mjedisore.

“Bashkëpunimi dhe përfshirja e banorëve që jetojnë afër këtyre zonave të mbrojtura është shumë i rëndësishëm, sepse asnjë zonë nuk mund të mbrohet e zhvillohet pa kontributin e banorëve, që kanë jetuar e menaxhuar në kohë këto zona”, tha ai.

Një pikë e fortë e përmbushjes së këtyre detyrave, sipas Prefektit, “është edhe edukimi dhe sensibilizimi i brezit të ri dhe të gjithë banorëve, për rëndësinë e veçantë që mbartin këto zona”.

“Çdo institucion kompetent, por edhe mediet lokale duhet të punojnë fort në drejtim të promovimit të vlerave të Zonave të Mbrojtura, si një pasuri e përbashkët që na ka falur natyra”, tha Prefekti Aliaj.

Komiteti Rajonal i Menaxhimit të Zonave të Mbrojtura Mjedisore e shtrin veprimtarinë e tij në territorin e qarkut Gjirokastër dhe në pjesën e Zonës së Mbrojtur që shtrihet edhe në qarkun e Korçës, sipas rrjetit të zonave të mbrojtura mjedisore të miratuara, përfshirë këtu edhe parqet natyrore bashkiake.

Aktualisht në territorin e qarkut Gjirokastër ka rreth 62492 ha Zona të Mbrojtura, ose rreth 22% e territorit, ku përkatësisht janë të ndara në katër zona të mbrojtura të kategorive të ndryshme sipas Qendrës Botërore të Ruajtjes së Natyrës:

– Rezerva Strikte Natyrore “Bredhi i Kardhiqit” (kategoria I), bashkia Gjirokastër;
– Parku Kombëtar “Bredhi i Hotovës-Dangëlli” (kategoria II), bashkia Përmet;
– Monumenti i Natyrës “Bredhi i Sotirës” (kategoria III), bashkia Dropull;
– Parku Natyror “Zagori” (kategoria IV), bashkia Libohovë./atsh

Parqet natyrore, pika të forta të zhvillimit të qëndrueshëm turistik Read More »