Turizem

Ndërkohë që Ballkani është bërë tashmë një destinacion turistik i njohur, që rivalizon destinacionet tradicionale turistike evropiane, kishte ardhur koha e duhur që edhe Shqipëria të zinte vendin e saj të nderit midis simotrave ballkanike, me bregdetin e saj të mahnitshëm dhe një kulturë sa të bukur, po aq edhe të pasur, shkruan Molly Harris, në revistën e njohur ”PaStε”.

Riviera e Shqipërisë

“Nga prodhimet e freskëta të detit, në plazhet mbresëlënëse që zhyten në detin Jon. Qytete të tilla si Saranda, Dhërmiu dhe Ksamili janë mes qyteteve me plazhet më të frekuentuara nga turistët. Turistët mund ta kalojnë ditën edhe duke vizituar vende me peshë kulturore, në jug të Shqipërisë, siç është Parku Kombëtar i Butrintit.

Duke hyrë më në brendësi të Shqipëri gjejmë Gjirokastrën, qyteti që është tashmë pjesë e trashëgimisë kulturore të UNESCO-s. E njohur për ruajtjen e një arkitekture të stilit otoman, të vizitosh këtë qytet dhe kështjellën e tij është njëlloj sikur të udhëtosh pas në kohë.

Peizazhi i mahnitshëm

Megjithëse një vend i vogël, Shqipëria paraqet një reliev mjaft të larmishëm dhe bimësi po aq të larmishme. Duke nisur nga Bjeshkët e Namuna në veri, ose Alpet Shqiptare, relievi të jep përshtypjen se rrokulliset drejt detit. Shqipëria Qendrore përbëhet kryesisht nga fusha rrëzë malesh më të ulëta, kurse luginat lartësohen e më pas bien në detin blu të Jonit. Përveç peizazhit skenik, turistët kanë mundësi të përjetojnë kulturën shqiptare nga një fshat në tjetrin. Falë relievit të larmishëm, nëpër vend krijohen mikroklima që bëjnë të mundur rritjen e kulturave ushqimore të ndryshme nga njëra zonë në tjetrën, prandaj edhe turistët do të kenë mundësi të provojnë gatime tradicionale të shumëllojshme anembanë vendit.

Kultura e larmishme

Gjatë viteve 1809-1810, poeti anglez, Lord Bajroni, bëri një udhëtim dyvjeçar nëpër Europë, gjatë të cilit përshkoi luginat jugore të Shqipërisë dhe mbeti i mahnitur nga kultura e pasur dhe kostumet popullore, që gjithashtu variojnë nga krahina në krahinë. Kultura tradicionale ruhet edhe sot e kësaj dite, megjithatë Shqipëria ia vlen të vizitohet edhe për historinë dhe kulturën e saj moderne. Ky shtet ballkanik mbeti nën hijen e komunizmit deri në vitin 1985, kur vdiq Enver Hoxha. Paranoja dhe presioni i ushtruar nga rivali i tij i ish-Jugosllavisë, Tito, e shtynë Hoxhën të ndërtonte më shumë se 170 000 bunkerë bërthamorë anembanë Shqipërisë. Në ditët e sotme, këta bunkerë po kthehen dalëngadalë në dyqane, kafene, madje edhe dhoma hotelesh, si edhe në muze, sidomos në kryeqytetin e vendit. Ndërsa vendi ka përparuar nga periudha komuniste, kultura moderne po përqafon të tashmen pa harruar edhe të kaluarën. Për shembull, rikonstruktimi i Kalasë së Toptanëve është një përzierje e traditës së vjetër dhe asaj të re. Rrënojat e kalasë së ndërtuar në fund të shekullit XVIII janë kthyer kohët e fundit në një qendër të hapur mbushur me dyqane që shesin produkte shqiptare dhe restorante që përdorin përbërës të vendit.

Aventurë autentike

Udhëtimet ndërkombëtare janë shtuar kohët e fundit dhe bashkë me to edhe turizmi. Duke udhëtuar në zona më pak të shkelura, por mjaft të sigurta, udhëtarët mund të përjetojnë aventurën e vërtetë. Të përshtatura për alpinizëm në veri dhe për turistë të pasionuar pas kulturës në jug, bujtinat paraqesin një prej përvojave më autentike, që mund të kenë udhëtarët në Shqipëri. Turistët mund të qëndrojnë në dhoma private apo shtëpi të veçuara, të mësojnë si të gatuajnë pjata tradicionale, të luajnë lojëra tradicionale dhe të dëgjojnë muzikë popullore vendase. Vaktet ushqimore janë gosti të vërteta me fruta e perime, prodhime bulmeti, që më së shumti vijnë nga fermat vendase. Djathërat dhe reçelrat e bërë vetë, ashtu sikurse edhe gatimet tradicionale si byreku, japraku me gjethe rrushi e bakllavaja, janë veçse fillimi. Turistët nuk duhet të ngurrojnë të provojnë edhe pijen tipike veriore me lëng trëndafili.

Pavarësisht se kemi paraqitur veç katër, arsyet pse një turist duhet të vizitojë Shqipërinë janë të shumta”, përfundon Molly Harris./atsh

Hoteleria e Majorkës, e shqetësuar nga një rënie e të ardhurave nga Karaibet në vitet e fundit, ka kthyer sytë nga një tjetër destinacion për t’u zgjeruar. Një destinacion në rritje dhe shumë tërheqës, Shqipëria, ku qeveria ka futur stimuj tatimorë për investimet e huaja për zhvillimin e turizmit të vendit, shkruan revista spanjolle “Majorca Daily Bulletin”.

Muajin e kaluar kishte pasur një seri kontaktesh mes përfaqësuesve të hotelerisë dhe qeverisë. Të drejtuar nga “Iberostar”, grupe të tjera të hotelerisë përfshirë “Viva” dhe “MAC. Jet2” ishin gjithashtu të ftuar për të parë për krijimin e linjave mes Shqipërisë dhe Britanisë së Madhe.

Presidentja e “Iberostar”, Miguel Fluxa deklaroi në mars gjatë ITB-së (Panairi Ndërkombëtar i Turizmit) në Berlin se grupi i tij do të investojë 300 milionë euro gjatë pesë viteve të ardhshme në krijimin e gjashtë hoteleve me nga 3000 dhoma.

“Melia” ishte ndër grupet e para mes hotelerisë spanjolle që lëvizën dhe do të ketë dy godina kur të hapet “Melia Tirana” në vitin 2021.

Sikurse pritet, kompanitë më të vogla të hotelerisë janë në pritje dhe do të shohin çfarë ndodh para se të investojnë. Ata bënë të njëjtën gjë kur destinacione si Riviera Maya u bënë popullore./atsh

Të rinjtë e Smile Albania si dhe stafi i Administratës Rajonale të Zonave të Mbrojtura në Vlorë kanë bërë të mundur grumbullimin e afërsisht 220 kg mbetje, në një prej plazheve natyror të Karaburunit.

Administrata Rajonale e Zonave të Mbrojtura Vlorë, ju bën thirrje vizitorëve të Parkun Kombëtar Detar Karaburun të mbajnë pastër këto zona turistike

”Kur vizitoni Parkun Kombëtar Detar Karaburun Sazan merrni padyshim kujtime të bukura. Ju lutemi, kujdesuni të mos lini pas mbetjet tuaja. Është e papranueshme që në vetëm 80 m2, të një prej plazhe natyror të Karaburunit të rinjtë e Smile Albania dhe stafi i AdZM Vlorë, arrijnë të grumbullojnë afërsisht 220 kg mbetje”, thekson AdZM Vlorë.

Të rinjtë e Smile Albania, janë jo vetëm promotorë të turizmit gjatë sezonit veror, por po kryejnë edhe një mision të rëndësishëm në përçimin e mesazheve ndërgjegjësuese përmes pjesëmarrjes në operacionet simbolike të pastrimit, organizuar kudo në Shqipëri nga ministria e Turizmit dhe Mjedisit.

Të rinjtë e Smile përgjatë dy muajve kanë ndihmuar në pastrimin e të gjitha zonave bregdetare dhe turistike. /atsh

Në kuadër të forumit ekonomik në Krynica Zdrój të Polonisë, Ministri i Shtetit për Mbrojtjen e Sipërmarrjes, Eduart Shalsi zhvilloi një takim me Kryeministrin e Polonisë, Mateusz Morawiecki dhe Ministrin e Investimeve dhe Zhvillimit Ekonomik, Jerzy Kwieciński.

Ministri Shalsi bën të ditur se gjatë këtyre takimeve u bisedua për çështje me interes reciprok, por veçanërisht numri në rritje i turistëve polakë në vendin tonë.

“Përpos diskutimeve të realizuara në panel me Ministrin e Investimeve dhe Zhvillimit Ekonomik, biseduam edhe për çështje me interes reciprok duke u ndalur kryesisht tek numri në rritje i turistëve polak në Shqipëri. Një kënaqësi e veçantë ishte edhe takimi me Kryeministrin e Polonisë”, shprehet Shalsi.

Ministri po merr pjesë në punimet e forumit ekonomik në Krynica Zdrój të Polonisë nga ku përfaqësues nga shtete të ndryshme ndanë praktikat më të mira të bashkëpunimit rajonal.

Strategjia e BE-së për Rajonin Adriatiko-Jonian (EUSAIR), e cila konsiston në një platformë bashkëpunimi, ishte një ndër temat kryesore për të cilën ministri foli në konferencë.

“Forumi Ekonomik ishte edhe një rast shumë i mirë për të marrë pjesë si dëgjues në panele të tjera, ku diskutoheshin tematika shumë interesante, të vlefshme, aktuale edhe për vendin tonë”, -tha Shalsi. /atsh

Ministri i Turizmit dhe Mjedisit, Blendi Klosi, i ftuar në një studio televizive, foli mbrëmjen e sotme për incidentin e ndodhur në Porto Palermo në muajin gusht ku Mihal Kokëdhima dhunoi familjen e turistëve spanjollë që kishte ardhur në restorantin e tij për të konsumuar një drekë.

Duke folur për këtë ngjarje dhe takimin që zhvilloi me familjen spanjolle, Klosi tha se “ata ishin të shokuar nga ngjarja, familja ishte e shqetësuar. Djali ishte akoma me atë bluzën e grisur, kryefamiljari ishte i çarë në buzë, pastaj situata mori ndryshe. Video është e tillë, ata ndaluan në atë lokal nga dita e bukur, nga mikpritja e njerëzve. Të vetmin justifikim që i vinin ngjarjes është se zotëria nuk ishte në terezi. Ata nuk kishin konsumuar asnjë gotë ujë në atë lokal”, tha Klosi.

Ministri solli në vëmendje edhe reagimin e turistit spanjoll i cili është shprehur se : “Unë tashmë jam një ambasador i Shqipërisë”, për mënyrën se si të gjithë reaguan lidhur me ngjarjen.

Klosi shtoi se pas publikimit të kësaj ngjarje duhej që shteti të reagonte, jo të shpresonte të mos publikohej video. “Unë nuk e dija se cfarë familje ishte, as se kush ishte ai zotëria”, tha ministri.

Përsa i përket restorantit të Mihal Kokëdhimës i cili u shëmb nga Inspektorati Kombëtar i Mbrojtjes së Territorit, ministri tha se “ishte një ndërtim pa leje, ka qenë në proces legalizimi po ai ndërtim nuk do legalizohej. Edhe pse ka qenë djali i xhaxhait të ish-deputetit socialist nuk është legalizuar pasi ajo zonë është e një rëndësie të veçantë”.

Ministri deklaroi se deri në muajin shtator, Shqipëria u vizitua nga 6.7 milionë turistë. “Nëse kemi një arsye që kemi 6.7 milionë turistë këtë vit deri në këto momente qe po flasim, nëse kemi pasur 1.5 milionë turistë vetëm në muajin gusht, natyrisht është edhe oferta që ne kemi përsa i përket turistit të huaj”, tha Klosi.

Më tej, Klosi tha se rritja e numrit të turistëve në Shqipëri me pothuaj 1.6 milionë të huaj, nxjerrin problemet më në pah. “Por të gjitha problemet po vihen në rrugën e zgjidhjes. Kontrolli mbi bregdetin nuk ka qënë më përpara dhe as nuk bëhej fjalë që të diskutohej për t’u kontrolluar. Vendimi i qeverisë për kontrollet e plazheve, plazhet publike, stacioneve të plazhit, nuk kanë qënë dhe kjo ka ardhur nga ajo që pamë vjet. Kemi licencuar rreth 300 guida”, tha Klosi, duke shtuar se Shqipëria krahasohet me vende si Greqia, Kroacia, Italia Mali i Zi dhe Turqia që kanë 50 vjet që bëjnë turizëm, ndërsa ne deri para 5 vitesh e kishim detin të bllokuar, nuk kishte mjete lundruese”.

Përsa i përket sigurisë në plazhe, Klosi deklaroi se “ sivjet kanë humbur jetën më pak se 11 persona si pasojë e masave të marrë që nga vendosja e sistemit të rojeve në plazhe dhe menaxhimit të plazhit”.atsh

Turizmi speleologjik në mbarë botën është kthyer në një dukuri mjaft tërheqëse për vizitorët kuriozë të natyrës dhe historisë.

Shqipëria është e pasur me një larmi të madhe shpellash, ku një grup turistësh gjatë këtyre ditëve të para të shtatorit kanë zgjedhur të eksplorojnë “Shpellën e Pëllumbasit”, apo siç quhet ndryshe edhe “Shpella e Zezë”.

Kjo shpellë tashmë e kthyer në një atraksion turistik mjaft të veçantë gjendet në juglindje të Tiranës mbi grykën panoramike të Skorranës e krijuar nga lumi Erzen. Pamja në këtë vend është mjaft interesante, pasi ndërthuren bukuritë e peizazhit përreth dhe pamja mistike e shpellës. Turistët aventurier kanë bërë një itinerar në këtë vend duke eksploruar bukuritë dhe misteret e kësaj shpelle.

Gjithashtu turistët kanë shijuar dhe rrugëtimin drejt shpellës përmes shtegut i cili është i mbrojtur nga parmakë druri të ndërtuara vitet e fundit përmes një pylli të dendur shkozash. Ata gjithashtu shijuan në stolat prej druri një soditje të madhështisë së maleve të Pashkasheshit, Priskës (Skëterrës) dhe Dajtit përbri.

Shpella e Zezë e Pëllumbasit ndodhet 350 metra mbi nivelin e detit. Ajo të shfaqet befas dhe vjen duke u zgjeruar përherë dhe më shumë kur i afrohesh. Shpella e Zezë e Pëllumbasit shtrihet në një thellësi prej 300 m (e eksploruar) dhe të tërheq vëmendjen me formën e saj, por edhe me ndërtimin e brendshëm, si në thellësinë e një galerie të stërmadhe miniere.

Tavani shkëmbor është i mbushur me stalagmite gjithfarë formash dhe dyshemeja e saj me stalaktite. Interesante janë gropat në dysheme, por edhe tavani i shpellës me togëzimet gëlqerore të gurëzuara dhe me struktura nga më të çuditshmet.

Shpella e Zezë e Pëllumbasit është një ndër gjashtë shpellat më unikale në Europë./atsh

“Viti 2019 në 8-mujorin deri më 31 gusht ka shënuar plot 4 milionë e 850 mijë turistë të huaj që kanë hyrë në vendin tonë e që janë 10% më shumë së i njëjti 8-mujor i vitit 2018”, u shpreh ministri i Turizmit dhe Mjedisit Blendi Klosi gjatë një interviste televizive për mbarëvajtjen e sezonit turistik.

Klosi tha se, “gushti cilësohet si muaj i suksesshëm turistik pasi 1.5 milionë turistë të huaj kanë hyrë në vendin tonë, pra 8% më shumë se gushti i 2018. Në datat 5-25 gusht i gjithë kapaciteti në bregdet ka qenë i ezauruar”.

“Tashmë në turizmin shqiptar ka ardhur koha për rregulla të reja dhe nëse ne nuk kuptojmë që sot që kemi nevojë për një strukturim tjetër të turizmit shqiptar vitin tjetër do kemi problem më të mëdha”, vijoi Klosi.

“Ne ndjehem pozitiv për sa i përket shërbimeve në turizëm si mikpritja dhe gjithashtu po ecim shumë në strukturat akomoduese, Ka një moment të fortë zhvillimi përsa i përket hotelerisë në gjithë zonën e bregdetit, pasi ka me mijëra shtretër të shtuar të rinj në gjithë strukturën turistike të vendit”, shtoi ai.

“Ky vit gjithashtu shënoi progres përsa i përket rregullave përsa i përket hapësirave publike, menaxhimit të plazheve dhe hapësirave të mbrojtura”, përfundoi ministri Klosi. /atsh

Kërkesat për rezervime për vendin ballkanik po rriten nga viti në vit, shkruan faqja e njohur zvicerane m20min, në një shkrim kushtuar Shqipërisë.

”Sidomos kryeqyteti, Tirana, është shumë popullor për turistët zviceranë”, thekson m20min.

”Shqipëria është një destinacion turistik në rritje mes zviceranëve. Kjo është e dhëna e fundit statistikore nga platforma online Ebookers.

Mes janarit dhe korrikut 2019, kërkesat për rezervime në hotele u rritën 80%, krahasuar me vitin e kaluar.

Dhe, nëse krahasojmë vetëm për kërkesat për muajin korrik, rritja është 180% krahasuar me një vit më parë.

Sipas Ebookers, gjysma e rezervimeve u bënë për destinacionet bregdetare.

Nëse Tirana është në krye të kërkesave, Durrësi dhe Saranda janë shumë popullore për pushime në det”, përfundon faqja e njohur zvicerane m20min./atsh