Turizem

Një ndër bukuritë më të veçanta në alpet shqiptare janë edhe ujëvarat, sidomos në stinën e dimrit kur uji ngrin duke ofruar një pamje magjepsëse.

Për shkak të temperaturave të ulëta që kanë përfshirë vendin tonë ditët e fundit, dy prej ujëvarave që ndodhen në fshatin turistik të Thethit, ajo e Gjeçajve dhe Grunasit, e cila është shpallur edhe monument kulture, kanë dhuruar një spektakël të vërtetë.

Administrata e Zonave të Mbrojtura në Shkodër ka publikuar sot disa fotografi nga ky fenomen natyror, që magjeps adhuruesit e natyrës.

Uji që zbret nga faqja e malit ka ngrirë deri poshtë në gropën e krijuar prej tij.
Thethi është fshati që ka më shumë ujë dhe ujëvara në Shqipëri, sepse ngado që të ecësh do të gjeni një burim uji. Në Theth janë më shumë se 80 burime uji, që nuk shterojnë asnjëherë.

Ujëvara e Grunasit

Ujëvara e Grunasit është një ndër bukuritë natyrore më të veçanta në alpet Shqiptare. Me vendimin e qeverisë Nr.676 dt 20.12.2002 është shpallur monument natyre që mbrohet nga shteti. E lartë mbi 30 metër së bashku me cirqet përreth dhe Mullirin e Blojës, formojnë një nga vendet më interesante për t’u vizituar nga çdo turist që viziton Thethin.

Kjo ujëvarë ka si karakteristikë të veçantë faktin që uji i saj buron i gjithi nga një shkëmb dhe është ujë dëbore. Për alpinistët që mund të vizitojnë burimin është një mrekulli e veçantë që nuk gjendet në asnjë ujëvarë të Europës.

Ujëvara e Gjeçajve

Gjatë rrugës tuaj për në qendër të fshatit, përveç bukurive mahnitëse që do të shikoni, kurorën me majat e maleve, do të shikoni edhe ujëvarën e Gjeçajve, e cila është sapo keni kaluar lagjen Gjeçaj rreth 30 metër, sipër rrugës nacionale, që të çon për në qendër, e cila është mjaft e bukur dhe e veçantë, rreth 25 metër e lartë./atsh

Me mbarimin e 2019-ës, të gjithë entuziastët e udhëtimeve dhe grumbulluesit e sasive të mëdha të pikëve dhe miljeve (Tier Points) po mendojnë për destinacionin e radhës, shkruan faqja online, njëkohësisht blogu amerikan i udhëtimeve, “The Points Guy” (TPG).

Pasi bëri kërkime të destinacioneve në planet, pasi shqyrtoi raporte dhe sondazhe të panumërta, TPG përgjoi rrjetin e tij të ekspertëve të udhëtimit, studioi hartat e rrugëve dhe kërkoi për disponueshmërinë e çmimeve dhe pikave të shërbimit për të gjetur aventurën tuaj të radhës për dekadën e re.

Dhe mes tyre gjendet edhe Shqipëria.

Rezultati është një listë me destinacione të pabesueshme si Etopia, Argjentina, Afrika e Jugut, Hawai, Maroku, Singapori, Kanadaja dhe Shqipëria.

TPG shkruan se Shqipëria po ngjit shkallët e klasifikimit në turizëm.

Riviera Shqiptare

”Fshatrat e bukur dhe disa nga plazhet e virgjëra të Europës po tërheqin vizitorët drejt Shqipërisë, një vend më pak i vizituar se Kroacia dhe Italia.

Zhvillimet e reja hoteliere dhe të fluturimeve mundësojnë dërgimin e turistëve në brigjet e detit Jon.

Në Indeksin e Konkurrencës së Udhëtimit dhe Turizmit për vitin 2019 nga Forumi Ekonomik Botëror, Shqipëria u ngrit me 12 pozicione nga viti 2017, ku ishte një nga vendet me përmirësimin më të madh në listë.

Në vitin 2018 u hap kompania e fluturimeve “Air Albania”, duke valëvitur flamurin shqiptar për herë të parë që nga falimentimi i ish-linjës ajrore kombëtare në vitin 2011.

Markat e mëdha hoteliere po vazhdojnë të hedhin bazat e tyre për një përmirësim të afërt të turizmit. Linja e hotelit të njohur “Hyatt”, po zhvillon një pronë në kryeqytet, ashtu si dhe “Meliá”, linjë spanjolle hotelesh, me një pronë të ardhshme në Tiranë (2021) dhe një resort në bregdetin e Durrësit.

Shqipëria është destinacion i shkëlqyer për vizitorët britanikë të cilët kërkojnë tarifa të përballueshme udhëtimi vajtje-ardhje, të klasit të biznesit.

Çfarëdo që të bëni, thjesht shkoni atje para se të gjithë të tjerët të kuptojnë se ku keni shkuar”, përfundon TPG./ atsh

Majat e maleve më të larta të rrethit të Kukësit si Gjallica, Pikëllima, Kallabaku, Maja e Kolesianit Guri i Mëngjesit të japin pamje të mrekullueshme, sidomos në stinën e dimrit kur i mbulon dëbora.

Ecja në këmbë në natyrë është shndërruar në një sport tepër të aplikuar, pasi natyra dhe territoret me shtigje të ngushta ofrojnë një kënaqësi të veçantë.

Vendet më të preferuara nga turistët janë ato me terren malor, pasi janë të përshtatshme për të bërë turizëm eksplorimi dhe ngjitje, ku oferta në Shqipëri është e larmishme.
Ermal Hallaçi, drejtues i guidës turistike të qytetit të Kukësit, tha për ATSH-në se “ditët e fundit shoqërova një grup alpinistësh prej 14 personash nga Kosova dhe Kukësi në Majën e Kallabakut, 2174 m mbi nivelin e detit”.

“Udhëtimi zgjati 7 orë në dy drejtimet dhe nisja u bë nga liqeni i Kallabakut. Ngjitja kishte pak vështirësi për shkak edhe të pranisë së dëborës”, tha Hallaçi.

Guida turistike e qytetit të Kukësit u shpreh se “Kallabaku është pjesë e Parkut Korab-Koritnik, ndërsa ka disa shtigje të cilat të çojnë në majë. Pamja është mahnitese ku syri nuk ngel pa parë vargmalet e alpeve të Sharrit që nga kjo majë i shikon dhe i identifikon pothuajse çdo majë gjithashtu Korabin që duket tamam si një kurorë mbretërore”, – theksoi Hallaçi.

Në stinën e dimrit është pikërisht momenti i përshtatshëm për shfrytëzimin e kohës ideale me borë dhe diell për ngjitje në mal.

Parku Natyror Korab-Koritnik është nga zonat më të bukura që ka rajoni i Kukësit dhe veriu i Shqipërisë. Ai shtrihet në një lartësi mbi 1300 metra mbi nivelin e detit dhe mund të gjesh gjithë bukurinë natyrore dhe peizazhet e mrekullueshme./atsh

Në Shqipëri është rritur ndjeshëm fluksi i turistëve huaj që vijnë në vendin tonë, por nuk mbetet pas edhe numri i shqiptarëve që shpenzojnë për turizëm apo udhëtime jashtë vendit.

Sipas të dhënave të publikuar nga Banka e Shqipërisë, mbi 1.2 miliardë euro shpenzuan shqiptarët për turizëm dhe udhëtime jashtë shtetit gjatë periudhës janar – shtator 2019.

Të dhënat tregojnë se krahasuar me të njëjtën periudhë të vitit të kaluar shpenzimet për turizëm jashtë shtetit janë rritur me 10,3% ose 115 milionë euro më shumë.

Shifra që shqiptarët shpenzojnë për pushime jashtë vendit ka ardhur në rritje të vazhdueshme nga viti në vit. Greqia është një ndër vendet destinacion kryesor, ku shqiptarët udhëtojnë më shumë për pushime. Por paralelisht vende të tjera të preferuara janë Turqia, Italia, por edhe shtetet e tjera të Bashkimit Europian.

Me gjithë rritjen e shpejtë të shifrës që shqiptarët shpenzojnë për udhëtime jashtë shtetit, bilanci i turizmit vazhdon të mbetet pozitiv, pasi pushuesit e huaj i sjellin ekonomisë më shumë se sa shpenzojnë shqiptarët jashtë.

Sipas Bankës së Shqipërisë për 9 muajt e parë të këtij viti ekonomia shqiptare përfitoi 1 miliard e 636 milionë euro nga turizmi ose ose 412 milionë euro më shumë se shpenzimet e shqiptarëve jashtë./atsh