Turizem

Në kohën kur po lehtësohen gjithnjë e më shumë masat për lëvizjen, diskutohet mundësia e hapjes së kufijve dhe nisjes së fluturimeve, njësitë akomoduese në të gjithë vendin kanë nisur të marrin masat për të plotësuar kushtet e higjienës në përputhje me protokollet shëndetësore.

Ministri i Mjedisit dhe Turizmit, Blendi Klosi publikoi sot pamje se si këto njësi akomoduese po përgatiten, si dhe po trajnojnë stafin e tyre me protokollet shëndetësore.

Ministri Klosi prej disa ditësh po zhvillon bisedime jo vetëm me operatorët turistik shqiptarë por dhe me homologët në rajon e më gjerë për të diskutuar mbi mundësitë për rivitalizimin e kësaj industrie, duke respektuar njëkohësisht edhe këshillat që jepen nga institucionet e shërbimit shëndetësor në situatën e krijuar prej COVID-19.

Gjatë kësaj jave ai zhvilloi një takim me përfaqësues të Unionit Turistik, ku u diskutua mbi modalitetet e veprimtarisë turistike të plazheve, të guidave, turizmin e brendshëm, për mundësitë e hapjes së kufijve tokësorë, linjave të dedikuara, transportin turistik në respektim të protokolleve shëndetësore.

Turizmi është një nga sektorët më të rëndësishëm në ekonominë shqiptare dhe është konsideruar nga qeveria si një nga motorët kryesorë të rritjes kombëtare. Shqipëria po rekomandohet gjithnjë e më shumë si një destinacion turistik nga operatorë turistikë të ndryshëm dhe udhëzuesit ndërkombëtarë të udhëtimit. /atsh

Ambasadorja e SHBA-ve në Tiranë, Yuri Kim mezi pret që të vizitojë vendet historike dhe kulturore shqiptare.

Ambasadorja e SHBA-ve në Tiranë, Yuri Kim ka zhvilluar një takim me ministrin e Turizmit, Blendi Klosi, për planin e hapjes së turizmit.

Kim shkruan se mezi pret edhe vetë që të vizitojë vendet historike dhe kulturore shqiptare. Në fund shkruan se shqiptarët janë më mikpritësit në botë.

“Pata një bashkëbisedim të mirë ditën e sotme me ministrin e Turizmit Blendi Klosi në lidhje me planin për hapjen e turizmit në Shqipëri, Maqedoninë e Veriut, Mali i Zi dhe Kosovë. Mezi po pres të udhëtoj nëpër Shqipëri dhe të vizitoj vendet historike dhe kulturore si dhe të takoj njerëz të mrekullueshëm. Shqiptarët janë mikpritësit më të mirë në botë”, tha Kim. /atsh

Në prag të sezonit veror dhe me një turizëm global në pikëpyetje për shkak të pandemisë, ne parashikojmë një të ardhme të suksesshme për turizmin shqiptar, shkruan Sara Perico e vadoinalbania.it, një operator turistik që promovon Shqipërinë në Itali dhe që kryesisht është i përqendruar në turizmin kulturor, natyralist dhe mjedisor.

”Në janar ishim bërë tashmë gati për sezonin, të karikuar dhe plot entuziazëm.

Programi ynë i tureve dhe ekskursioneve ishte i mbushur me propozime, njëri më interesant se tjetri dhe, gjithashtu, kishim gati edhe një gamë të gjerë hotelesh e apartamentesh për pushime.

Një punë përzgjedhëse e shkëlqyer e strukturave dhe burimeve, e bëre me kujdes dhe përpikmëri për të ofruar më të mirën, sepse ky është misioni dhe qëllimi ynë kryesor.

Ky vit, përsërisnim gjithmonë me vete, do të jetë vit i mrekullueshëm për Shqipërinë, do të jetë viti i suksesit, viti i ngritjes së pandalshme, vit në të cilin Shqipëria do t’i bashkohet përfundimisht destinacioneve më të parapëlqyera mesdhetare.

Ne ishim aq të lumtur dhe plot energji, me panaire, katalogë, bashkëpunime, sa nuk u ndalëm për asnjë çast.

Në fund të shtatorit, ne mbyllëm turneun e fundit në grup të sezonit dhe para mesit të tetorit kishim filluar të planifikonim për vitin 2020.

Dhe shifrat na dhanë shpejt të drejtë; shumë vizita në faqen e internetit dhe në janar kërkesat për kuotat ishin kaq shumë, saqë mezi arrinim t’i ndiqnim. Edhe konfirmimet e para erdhën shumë herët dhe shumë më të shumta se vitin e kaluar.

Me pak fjalë, parashikohej një sukses i paparë.

Pastaj erdhi ai, ashtu krejt papritur, si një tornado. Ky COVID-19 na zuri të gjithëve në befasi, si në nivel njerëzor, ashtu edhe në atë professional.

Në pak javë, ai u bë protagonisti i maktheve tona më të këqija, na hodhi në një det trishtimi, frike, zemërimi, pasigurie, dëshpërimi dhe melankolie.

Edhe ne u tronditëm, do të ishte marrëzi ta mohonim atë.

Datat e para të udhëtimeve tona me nisje të garantuar u anuluan, grupet private që duhej të nisnin në prill u shtynë në një datë të pacaktuar dhe kërkesat u ndërprenë befas për javë të tëra.

Dhe kështu, i gjithë sektori i turizmit, që është ndër më të dëmtuarit në botë dhe në të gjitha nivelet, nga agjencia më e vogël lokale e udhëtimeve deri te kompanitë e mëdha të menaxhimit të ushtëtimeve ndërkombëtare, të gjithë do të vuajnë për një kohë të gjatë.

Por, ajo që nuk ka munguar kurrë është shpresa që na mban gjithmonë në një nivel të lartë entuziazmi dhe dëshire për të filluar nga e para.

Na duket vetja si në vijën e nisjes, me një këmbë te frenat dhe tjetrën te gazi, gati për t’u nisur!

Të ushqyer nga shpresa se Shqipëria e ka përballuar mirë pandeminë, pjesërisht falë faktit që ka pak zona me dendësi të lartë të popullsisë, falë gatishmërisë vendimmarrëse të qeverisë dhe pjesërisht, kjo duhet pranuar, falë edhe pjesëmarrjes bashkëpunuese të popullatës.

Por çfarë do të ndodhë pas një, dy apo tre muajsh, këtë ne nuk e dimë.

Si do të shkojë kjo verë 2020, që tashmë e kemi në prag, kjo është një e panjohur e vërtetë.

Ajo që dimë është se, sido që të shkojë, viti 2020 është dhe do të mbetet viti i suksesit të madh të turizmit në Shqipëri, viti i shumë kërkesave, viti i hyrjes në mesin e destinacioneve më të kërkuara, viti i marrjes së shpërblimit!

Fakti që ky sukses u mbyt pjesërisht nga forca madhore, nuk do të thotë se nuk është një sukses, nuk do të thotë se kemi humbur gjithçka, nuk do të thotë se dëshira për të vizituar këtë vend të bukur është zvogëluar, përkundrazi, besoj se pas rimëkëmbjes Shqipëria do të dalë fitimtare, sepse gjatë kësaj periudhe të vështirë ka treguar se është në gjendje të përballojë situatat e urgjencës në një mënyrë pragmatike dhe vendimtare dhe ka treguar vazhdimisht se ka një zemër të mrekullueshme.

Pra, sido që të shkojë, tashmë Shqipëria është një histori suksesi!./atsh

Në Shqipëri gjetëm atë që kërkonim, mikpritjen legjendare dhe një nga formacionet më spektakolare shkëmbore të Europës, shkruan Hans Avontuur, për magazine.wideoyster.com, një faqe e njohur turistike holandeze që publikon shkrimet më të mira për vende të njohura turistike të botës.

”Është aq mjegull sa nuk mund të shihni pothuajse asgjë… Mbaj frymën ndërsa makina jonë 4×4 ecën me kujdes përgjatë gropave dhe përrenjve. Po synojmë të shkojmë në Theth…”.

”Thethi është një vend i fshehur ku, edhe një pasha osman, i cili kontrollonte gjysmën e Ballkanit deri në vitin 1912, e kuptoi shpejt se kjo luginë ishte tepër e largët për t’u shtypur me dorë të hekurt”.

Më në fund, ja ku është fshati. Në fund të luginës. Majat e larta dhe rrëpirat që rrethojnë fshatin, bëjnë që shtëpitë të duken shumë të vogla. Është pikërisht ashtu si e përshkroi shkrimtari holandez, Den Doolaard në vitet 1930: “Një përpjekje e njeriut për t’iu kundërvënë natyrës”.

Kjo është arsyeja pse kam ardhur në këtë rajon malor në kufirin e Shqipërisë, Malit të Zi dhe pak të Kosovës.

Unë i dua Alpet dhe kam vizituar edhe zemrën e Pirenejve në kërkim për një vend të shkretë dhe pak a shumë ajo ishte e tillë, por isha i bindur se Europa duhet të ketë vende edhe më të egra. Në një kafene në Kolashinë, në Mal të Zi dëgjova emrin “Bjeshkët e Namuna”. Doli se personi që e tha ishte një udhërrëfyes malor dhe shtoi se “kjo është pikërisht ajo që po kërkoni”.

Me të mbërritur në bujtinë, mikpritja u thellua nga një tavolinë e mbushur me ushqime të shijshme vendase, djathëra, mish të thatë, perime të pjekura në skarë, bukë të pjekur në shtëpi. Aq e ashpër dhe armiqësore sa duket bota malore nga jashtë, aq e ngrohtë dhe e butë është në brendësi të shtëpive të banorëve.

Katerina, e veshur me të zeza, thotë se ”unë kam lindur këtu. Jeta është e vështirë, por e bukur”.

Lugina e izoluar, e ndaluar për vizitorët gjatë epokës komuniste, ka një bukuri të jashtëzakonshme. Lloji i vendit ku çdo tingull jehon, ku dëgjoni gjëra që nuk janë aty dhe ku në muzg shihni pas, edhe pse e dini se askush nuk po ecën pas jush.

Këtu kanë jetuar 150 familje, ndërsa tani ka pak më shumë se 20.

Por, njerëzit dalëngadalë po kthehen, kur shohin se mund të ndërtojnë një jetë me natyrën dhe turizmin. Ka kaq shumë bukuri. Mund të ecni në çdo rrugë nga fshati dhe natyra ju përqafon.

Ndjek një rrugë malore përmes një peizazhi me gurë dhe pellgjesh me ujë të pastër si kristal.

Dëgjoj një murmuritje në distancë që duket sikur afrohet pas çdo hapi. Duke zbritur përgjatë një shkalle druri, duke u ngjitur në anën tjetër do të shihni një liqen malor blu, pothuajse të përkryer, që mbushet nga një ujëvarë…

Unë dua të shkoj edhe në luginën e Valbonës. Mund të shkohet më këmbë ose përmes rrugës automobilistike dhe ujore nga liqeni i Komanit.

Rruga me një traget të vjetër që zgjat katër orë, është si një lundrim në ëndërr, ujë i gjelbër prej smeraldi, një grykë që hapet dhe mbyllet dhe shqiponjat ”notojnë” nëpër qiellin gri.

Bie shi i butë dhe fryn një erë që të pret. Shumica e pasagjerëve gjenden brenda në të ngrohtë, por unë shkoj drejt në kuvertë për të humbur sa më pak nga ky udhëtim. Pas një orë, asgjë nuk është e më e dukshme, nuk ka asgjë që tregon praninë e njerëzve. Dhe papritmas, duket një fermë, së bashku me bagëtitë që kullosin.

Që nga viti 2015, ekziston një rrugë e mirë asfalti që të çon nga Fierza në Valbonë, e cila e ka bërë luginën më të prekshme.

Në vitin 2009 amerikania, Catherine Bohne shkoi me pushime në Valbonë, për 11 ditë, u takua me shqiptarin, Alfred në traget dhe nuk u largua më kurrë.

“Është e pabesueshme sesa bukur është këtu. Shihni kopshtet e egra, kumbullat dhe mollët, ku arinjtë duan të vijnë. Ose fshatin malor të Çeremit, ku pa energji elektrike, ujë të nxehtë ose valë telefonike, shkëputeni automatikisht nga jeta e përditshme”, thotë ajo.

Këto janë cilësitë unike të Valbonës, me të cilat ju mund të zhvilloni turizëm të qëndrueshëm, të përshtatshëm për një park kombëtar.

Shpresoj që gjithçka të qëndrojë kështu. Këtu, në kufirin e Shqipërisë, Malit të Zi dhe Kosovës, ka ende mundësi për ta mbajtur natyrën të pacenuar./atsh

“Ne do të kemi sezon turistik dhe besoj se javën e ardhshme do të kemi konkluzionet për këtë çështje”, deklaroi sot Kryeministri Edi Rama.

I ftuar në një studio televizive, Rama tha se “ne sot mund të sjellim në Shqipëri më shumë turistë se çdo herë tjetër”.

“Kërkesat janë të pafundme, presioni është shumë i madh nga vende si Hungaria, Ukraina, vendet nordike etj., por çështja është: a duhet apo jo t’i sjellim? Ata janë të organizuar me fluturime të dedikuara. Janë qeveritë e tyre që thonë në Shqipëri ne jemi gati t’i mbështesin turistët të vijnë, sepse Shqipëria ka situatën më të mirë nga të tjerët, por pyetja është a duhet apo nuk duhet”, tha Rama.

Ndërkohë, sipas tij, “janë shqiptarët që nuk do të lejohen të shkojnë asgjëkundi”. “Shqiptarët do ta ketë të pamundur përgjithësisht të bëjnë pushime jashtë për arsye të të tjerëve. Ne duam që bregdetin e vendit t’ia vëmë në dispozicion shqiptarëve në të katër anët”, tha Rama.

Kryeministri u shpreh se “sot kam bërë disa biseda telefonike me disa nga kolegët e mi në Europë dhe situata është e paqartë”. “Ata kanë vendosur 15 qershorin që Shengeni është i mbyllur, por brenda tyre ka debate nga më të ndryshmet. Të gjithë po synojnë turizëm të brendshëm apo me korridore, Austria me Gjermaninë e Danimarkën, Italinë nuk e do asnjë njeri në korridor”, tha Rama. /atsh