Turizem

Prej dy ditësh një grup gazetarësh nga Kosova ndodhen në qytetin bregdetar të Vlorës, në kuadër të promovimit të turizmit.

Paraditën e sotme grupi i gazetarëve vizitoi qendrën historike të qytetit, ku u prit edhe nga kryetari i bashksië së Vlorës, Dritan Leli.

“Vlora është qyteti i historisë, natyrës së mrekullueshme dhe njerëzve mikpritës. Në zonën historike në Vlorë ndodhen gazetarë nga Kosova, shqiptarë matanë bjeshkëve, ashtu siç jemi ne nga kjo anë e bjeshkëve në bregune detit në Vlorë ku historia ka një përzierje fantastike me natyrën, me njerëzit e mrekullueshëm dhe mikpritjen vlonjate”, – tha Leli.

Ai shprehu bindjen se çdo gjë e transetmuar nga gazetarët e Kosovës do të jetë një shtysë e madhe për të gjithë ata që akoma janë në dilemën se ku do të bëjnë pushimet këtë verë.

“Unë do të këshilloja të zgjidhnin Vlorën dhe jo pa qëllim në spotin publicitar që qyteti ka përgatitur me mbështetjen e bizneseve të qytetit dhe natyrisht të gazetarëve të Vlorës, kemi zgjedhur simbolikën e Farit. Do të doja shumë që në të gjithë territorin e bashkisë së Vlorës të dëgjoja atë që thashë dje në takimin me ministrin e Turizmit në Kosovë aksentin e shqiptarëve matanë bjeshkëve”, – nënvizoi Leli.

Kryebashkiaku Leli u shpreh se “kemi shumë dëshirë që Vlora të vizitohet nag turistë të huaj, të ketë vizitorë nga Italia, Polonia, Sllovenia, Austria , Danimarka, etj, por do të donim që këtë verë turizmi të flasë shqip”.

“Dy vjet më parë nuk bëhej fjalë që në këtë shesh të mund të kaloje apo të shikoje objekte që janë rikonstruktuar së fundi. Ndërkohë që duke bërë shëtitoren “Ismail Qemali” të vish në rrugën ku Ismail Qemali dhe Isa Boletini bashkë me njerëzit që shpallën pavarësinë kaluan së bashku, të bësh një ndalesë në shtëpinë e Margiosë, të zonjës së lavdishme që qëndisi flamurin. Të vish në zonën historike të Vlorës për të gjithë ne do të thotë shumë”, – theksoi Leli.

Leli foli edhe për muzeun e hibraizmit që, sipas tij do të jetë unik në botë.

“Ne do të tregojmë shembullin e bashkëjetesës që ne e tregojmë gjithmonë dhe është një nga vlerat e mëdha që ne mbartim”, – tha Leli./atsh

Kryeministri Edi Rama e konsideroi sot “tunelin e Llogorasë një vepër me rëndësi strategjike për turizmin në rivierën e Jonit.

Në shpalljen e garës ndërkombëtare për projektin inxhinierik të tunelit të Llogorasë, Rama tha se “me këtë vepër aksi Orikum-Palasë do të përshkohet në vetëm 10 minuta”.

“Tuneli i Llogorasë është një vepër e imagjinuar dhe e premtuar rëndom në çdo fushatë elektorale pas rënies së komunizmit dhe asnjëherë e materializuar për një mijë e një arsye. Edhe ne jemi zotuar që ta ndërtojmë tunelin e Llogorasë dhe sot jemi në fillim të kurorëzimit të procesit që do të çojë në mbajtjen e këtij zotimi”, tha Rama.

Kryeministri theksoi se “bëhet fjalë për një zonë strategjike për zhvillimin ekonomik dhe imazhin e Shqipërisë në botë”.

“Një zonë ku interesi është i gjithanshëm pasi nuk bëhet fjalë vetëm për një natyrë dhe klimë të mrekullueshme në kushtet e sezonit turistik të verës, por bëhet fjalë edhe për një zonë me histori e trashëgimi kulturore, sot e gjithë ditën një thesar i pazbuluar. Bëhet fjalë për zonë që gjendet në librin e Jul Qezarit, i cili shkruan se në mesditën e 5 janarit kishte zbarkuar në Palasë”, tha Rama.

Ai theksoi se “me shumë krenari, ne sot jemi gati të materializojmë këtë projekt, i cili do të krijojë një akses krejt tjetër drejt zonës dhe natyrisht do të shërbejë si një katalizator shumë i fuqishëm i zhvillimit të turizmit në gjithë rivierën joniane”.

“Faktikisht e kemi parë dhe përjetuar shumë herë në kontaktet tona me investitorët e huaj shumë të interesuar për të investuar në turizëm, sidomos pasi ne krijuam një paketë ligjore agresive, pikërisht për të tërhequr investitorët e huaj, dhe në fund biseda gjithmonë mbyllet me distancën mes vendit ku synohet të bëhet një investim dhe aeroportit më të afërt”, tha Rama.

Rama tha se “përtej faktit se aeroporti i afërt me zonën, ai i Vlorës, do të ndërtohet, dhe një tjetër aeroport shumë herë i përfolur do të ndërtohet, ai i Sarandës, por kyçi mbetet Llogoraja, sepse distanca zgjatet jo vetëm si kohë, pro edhe si vështirësi në segmentin që e njohim të gjithë, që gjarpëron për të kapërcyer malin e Llogorasë”.atsh

Kryeministri Edi Rama njoftoi sot se në datën 29 qershor do të paraqitet projekti më i rëndësishëm brenda gjithë programit të madh të transformimit, ai i korridorit blu Adriatiko-Jonian.

Rama tha se “ky projekt ka një volum investimi që nga pikëpamja e injektimit direkt në ekonomi tejkalon volumin e investimit total”.

Rama e cilësoi këtë projekt të ri, si xhevahirin më të madh të kurorës së gjithë projekteve të njëpasnjëshme që do të fillojnë të investohen.

“Korridori Adriatiko-Jonian nga Miloti në Fier, do kalojë përmes Thumanës dhe Rrogozhinës dhe më pas duke u lidhur me Shëngjinin, Velipojën, për të kaluar nga ana më panoramike e bregdetit drejt Malit të Zi”, tha Rama.

Kryeministri theksoi se “me këtë aks kryhet kapërcim epokal për Shqipërinë turistike dhe ekonominë e këtyre territoreve”. /atsh

Ndërsa ka mbërritur çarteri i parë me turistë pas hapjes së kufijve, ministri i Turizmit dhe Mjedisit, Blendi Klosi siguroi në një intervistë televizive se janë respektuar të gjitha rregullat shëndetësore, duke nisur me kontrolle të shtuara në aeroport, dhe zbatimin e masave higjieno-sanitare në hotele.

“Nuk ka arsye për kthim prapa në masat izoluese. Numrat e lartë të infektimeve tregojnë që ka shumë arsye për t’u bërë thirrje qytetarëve për kujdes ndaj jetës së tyre”, u shpreh Klosi.

“Ne ishim të parët që vendosëm të hapeshim duke hapur fillimisht kufirin me Kosovën, Malin e Zi. Qëndrimi për t’u hapur nuk ishte thjesht se ne donim por për faktin se shëndetësia është e aftë për të përballuar një shtim të numrave të të infektuarve. Nëse do të ketë shtim dhe mosdakordësi të opionionit publik që mos të respektohen protokollet shëndetësore, sigurisht që do të ketë vendime të tjera”, tha ministri Klosi.

Klosi u shpreh se gjatë kësaj jave do të vijnë dhe 3 çartera të tjerë në Shqipëri, ndërkohë që duke filluar nga java tjetër, vendi do të presë turistë edhe nga Ukraina e Polonia.

“Me kompaninë që sollën turistët si dhe kompaninë e cila ofroi këtë shërbim, është dakordësuar që të respektohen rregulla strikte të kontrollit të pasagjerëve. Nesër vjen çarteri tjetër, brenda javës do të vijnë 3 të tillë. Më pas javës tjetër do të vijnë çartera nga Ukraina dhe Polonia. Nuk ka të bëjë me numrat, janë shumë të pakta krahasuar me vjet dhe kjo vjen si pasojë e mos hapjes së fluturimeve nga vendet e tjera të Europës”, theksoi Klosi.

Sipas tij, nëse do të vijojmë me këtë ritëm të hapjes së turizmit, do të arrijmë një nivel të konsiderueshëm të turizmit që mund të zgjatet edhe në muajt shtator dhe tetor në mënyrë që të mos kemi shumë humbje. /atsh

Kryeministri Edi Rama përcolli këtë mëngjes pamje nga bukuritë magjepsëse të Syrit të Kaltër.

“Mirëmëngjes dhe me këtë peizazh nga Syri i Kaltër, ju uroj të dielë të paqtë”, u shpreh kryeministri Rama.

Syri i Kaltër është një burim uji, dukuri natyrore dhe vend turistik i shpallur monument i natyrës, që ndodhet në fshatin Muzinë të Rrethit e Delvinës, pranë rrugës nacionale Delvinë – Gjirokastër, në jug të Shqipërisë.

Syri i Kaltër është një burim me origjinë karstike me ujëra të freskëta dhe të ëmbla i rrethuar me bimësi të dendur dhe me gjelbërim të përhershëm.

Syri i Kaltër ka një thellësi më shumë se pesëdhjetë metra. Disa zhytës kanë zbritur deri në pesëdhjetë metra, por është ende e paqartë se cila është thellësia e saktë e gropës karstike.

Nga thellësia e burimit dhe veçantia e vrimës karstike uji merr ngjyrën e kaltër nën rrezet e diellit.

Syri i Kaltër njihet edhe si ‘Burim i Bistricës’ pasi është burimi fillestar i ujit të lumit të Bistricës, i gjatë 25 km, i cili përfundon në Detin Jon në jug të Sarandës./atsh

Pasi agjencitë prestigjioze të lajmeve, ajo franceze AFP dhe ajo italiane, ANSA publikuan një video me pamje nga bregdeti shqiptar, ku qytetarët dhe turistët kanë filluar plazhin, pas daljes nga izolimi për shkak të pandemisë COVID-19, edhe gjiganti europian i informacionit, EURONEWS, përzgjodhi plazhin e Durrësit për rubrikën e tij ”Kjo javë në foto”.

Kjo foto mbresëlënëse nga bregdeti i Durrësit fton turistët të frekuentojnë plazhet shqiptare. Numri i turistëve të huaj në Shqipëri ka pasur vitet e fundit një rritje të konsiderueshme.

Për shkak të vijës së gjatë bregdetare Shqipëria ofron plazhe të mrekullueshme nga veriu në jug si Velipoja, Shëngjini, Durrësi, Vlora, Himara dhe Saranda./atsh

Turizmi, në vizionin e qeverisë, shihet si sektori që do të garantojë zhvillim të qëndrueshëm ekonomik, duke siguruar punësim, nxitje të ndërmarrjeve të vogla e të mëdha, më shumë të ardhura e më shumë mirëqenie për qytetarët shqiptarë.

Ministri i Turizmit dhe Mjedisit, Blendi Klosi publikoi sot pamje nga një prej investimeve në hoteleri, i cili ofron një kapacitet prej 300 personash.

“Maks Royal G”, me kapacitet për 300 persona, dy pishina të jashtme dhe një të brendshme në Durrës. Investimet në hoteleri, një energji e re që i shtohet industrisë turistike”, u shpreh Klosi.

Për të stimuluar investimet në këtë sektor, qeveria ka hartuar edhe një kuadër ligjor e fiskal favorizues.

Ligji “Për Turizmin” ofron stimuj shumë konkurrues për investitorët e huaj.

Ligji ofron një varg ndryshimesh për sektorin e turizmit në Shqipëri, duke synuar ta shndërrojë atë në një nga sektorët më të rëndësishëm të ekonomisë në vitet e ardhshme.

Shqipëria ofron kosto konkurruese të punës, pasi paga mesatare në Shqipëri është një nga më konkurrueset në rajon.

Po ashtu ofron lehtësi administrative, pasi regjistrimi i një biznesi të ri mund të përfundojë brenda 24 orëve me një kosto minimale prej 100 lekë (<1 €) përmes modelit “One Stop Shop”.

Krahas kësaj, ofron taksa konkuruese. TVSH për strukturat akomoduese në turizëm është 6%.

Shqipëria po ashtu ka një popullsi të re dhe arsimuar. 57% e popullsisë së Shqipërisë është nën moshën 35 vjeçare.

Për investitorët, Shqipëria është një treg atraktiv në rritje, me strukturë të qëndrueshme ekonomike, politike dhe juridike, si dhe me kuadër ekonomik të liberalizuar dhe kushte të përshtatshme për të bërë biznes.

Mbi 6.4 milionë shtetas të huaj kanë hyrë në vendin në vitin 2019 duke pësuar një rritje të ndjeshme me 8.1% krahasuar me vitin 2018. Hyrjet e shtetasve të huaj më së shumti kanë pasur qëllim turizmin./atsh