Turizem

“Në fillim të javës tjetër do të fillojnë dhe çarterat e parë të cilët janë dedikuar për turizëm nga vendet të cilat ne tashmë kemi një marrëdhënie bilaterale”, deklaroi ministri i Turizmit dhe Mjedisit, Blendi Klosi gjatë mbledhjes së Task Forcës së Turizmit i cili zhvilloi takimin e parë për këtë vit, në ambientet e Manastirit ‘Fjetja e Shën Mërisë’ në Parku Arkeologjik Kombëtar Apoloni, në fokus të së cilit ishin masat e marra dhe ecuria e turizmit gjatë këtij sezoni turistik të ndikuar nga COVID-19.

Me pjesëmarrjen e tour operatorëve dhe hotelierëve, ministri i Turizmit dhe Mjedisit Blendi Klosi dhe ministrja e Kulturës, Elva Margariti bënë të ditur detaje nga paketa e përbashkët turistike me kosto të ulët.

Ndonëse një vit i vështirë për shkak të pandemisë, Klosi shprehu besimin se “në qoftë se ne ofrojmë rregulla në plazhe, garantojmë higjienë, garantojmë mbrojtje nga pandemia, mund t’ia dalim që të kemi një sezon të pranueshëm turistik edhe në 2020-ën”.

Në fjalën e tij, Klosi tha se edhe pse po përballemi me pandeminë sikurse e gjithë bota, duhet të bashkëpunojmë jo vetëm për Fierin si destinacion turistik, por edhe për një fushatë të madhe për të vizituar Shqipërinë turistike nga turistët vendas dhe të huaj.

“Duke qenë të parët që hapëm edhe kufijtë dhe duke promovuar Shqipërinë turistike në rajon, duhet të përfitojmë një turizëm rajonal u cili ka qenë jo aty ku duhet duke menduar që kemi shumë më tepër, duhet të afrojmë turizëm për vëllezërit tanë të Kosovës, të cilët kanë qenë gjithmonë mbështetësit kryesorë të turizmit të huaj që vinin në Shqipëri, por po ashtu me Maqedoninë e Veriut, Malin e Zi, Bosnjën, Bullgarinë, Turqinë për të qenë më rajonal dhe me një ofertë të re turistike”, tha ministri.

Gjithashtu, ministri Klosi u ndal edhe në sistemin e ri të menaxhimit të vijës bregdetare duke përmbushur një nga kërkesat e vet komunitetit të hotelierëve, të operatorëve tanë turistikë si një nga prioritetet e menaxhimit të ekonomisë së jetës sonë.

Ai tha se vija bregdetare, një pasuri e jashtëzakonshme që ne kemi, duhet mirëmenaxhuar që të prodhojë më shumë para në radhë të parë për Bashkinë dhe nëpërmjet këtyre parave plazhi të pastrohet dhe të mirëmbahet më mirë si dhe të rritet siguria në plazhet tona.

“Së bashku me Bashkitë kemi monitoruar të gjithë vijën tonë edhe në kuadër të luftës së përhapjes së pandemisë, por dhe në kuadër të masave që duhet zbatuar për higjienën, plazhet tona duhet të administrohen shumë më mirë, që të sigurojnë drejt për së drejti dy problem të mëdha që ka patur gjithmonë plazhi, higjienën dhe vendosja e ruajtësve të plazhit, tha ai.

“Parimet e ndarjes së re të plazheve bregdetare dhe nga 400 km vijë bregdetare që bregu shqiptar ka, vetëm 10 deri 12% e saj shfrytëzohet, prandaj kemi hapësira të mëdha pa fund të cilat i kemi akoma si ofertë të re për turizmin për t’u zhvilluar bregu shqiptar, por që s’mund të lejohet që të vazhdojë të zhvillohet dhe menaxhohet pa asnjë kriter”, deklaroi Klosi.

Ai tha se “së bashku me forcat e ruajtjes së rendit, me inspektoriatet e ndryshme të qarkut të Fierit nën drejtimin e Prefektit do të ndërmarrim një situatë shumë më të kontrolluar të plazheve tona për të pasur mundësi që ndarja e plazheve të realizohet mbi dy parime. Parimin e administrimit nga operatorët turistikë dhe Bashkia të jetë përfituese e drejt për drejt e të ardhurave që mblidhen nga plazhet. Dhe e dyta parimi kryesor, tha Klosi është ruajtja e mos përhapjes së pandemisë në plazh dhe sigurimin nëpërmjet këtij menaxhimi të higjienës dhe të sigurisë.

Ai tha se “skema e re është realizuar dhe në plazhet e Divjakës dhe të Fierit ku kemi bërë një ndarje sipas vendimit të bashkisë se kë kemi përcaktuar zonë të gjelbër, zonë e cila do të jetë në plazhe e përcaktuar si plazh për publikun, pra si plazh që nuk do të lejohet të vendosen shezllon edhe çadra, zonë e cila do të jetë për qytetarët e tjerë që vijnë dhe duan të bëjnë plazh në mënyrën e tyre pa qenë të detyruar që të shkojnë te shezlloni dhe të paguajnë çadrën dhe zona e cila konsiderohet si zonë për t’u menaxhuar është ndarë në parcela të cilat do t’i ofrohen atyre”.

Gjithashtu, Klosi tha se kemi edhe një përmirësim të jashtëzakonshëm sa i përket sigurisë në plazhe.” Padyshim kemi përmirësim të jashtëzakonshëm, kemi ulur me 3 herë numrin e jetëve të humbura në plazhet shqiptare, por këtë vit duhet të jetë shumë më i sofistikuar”.

Klosi apeloi edhe për pastrimin e plazheve duke shtuar se “kemi nevojë që të bëjmë një operacion të madh pastrimi për të shkuar në korrik dhe gusht në një sezon intensiv më të stabilizuar”. /atsh

Në Ditën Ndërkombëtare të Mjedisit, Presidenti Ilir Meta bëri apel për të mos lejuar më që keqmenaxhimi i mbetjeve urbane dhe ndotja e ajrit të dëmtojnë jetët tona.

“Të zgjohemi dhe të mos lejojmë që betoni të zhdukë hapësirat dhe kurorat e gjelbra të qyteteve, që lejet abuzive dhe papërgjegjshmëria të sharrojnë pyjet e jashtëzakonshme, malet t’i kthejnë në gurore, detin ta ndotin dhe bregdetin ta shkatërrojnë, që HEC-et dhe shfrytëzimi pa kriter të rrezikojë zhdukjen e Vjosës, Valbonës dhe shumë lumenjve përrallorë që kërcënohen nga papërgjegjshmëria dhe korrupsioni i vendimmarrësve”, tha Meta.

Sipas tij, “Shqipërisë nuk i mungon asgjë për të qenë “diamanti” i Mesdheut dhe Europës, por të gjithë bashkë duhet të kontribuojmë për të mbrojtur çdo dhuratë që na ka falur Zoti”.

“Shqipëria është shtëpia jonë e përbashkët! Ta mbajmë të pastër e të gjelbër, dhe një vend të mirë e të shëndetshëm për të jetuar. Do të jem në mbështetje të shoqërisë civile, aktivistëve të ndershëm e patriotë dhe çdo komuniteti që duke mbrojtur mjedisin dhe bukuritë natyrore mbron të ardhmen e begatë të Shqipërisë”, tha Meta. /atsh

Këtë sezon turistik, hotelierët duhet të aplikojnë te e-Albania për stacionet e plazhit.

“Në e-Albania https://e-albania.al/ .aplikim për ushtrimin e veprimtarisë si stacion plazhi, për të garantuar sa më shumë siguri në mbrojtjen e shëndetit dhe për të mos lejuar më zaptimin e plazheve që për 30 vjet u ka nxirë pushimet njerëzve të këtij vendi”,- theksoi sot kryeministri Edi Rama, duke dhënë informacion sesi mund të aplikohet.

“Subjektet akomoduese apo të shërbimit duhet të aplikojnë në e-Albania për marrjen në përdorim të hapësirës së plazhit përgjatë gjithë sezonit 2020, duke marrë përgjegjësi për zbatimin e rregullave dhe mosshmangur asnjë detyrim ndaj qytetarëve, bashkisë, shtetit. Aplikimi është i thjeshtë dhe mund të bëhet edhe nga telefoni. Një sistem i ri këtë vit, që siguron transparencë, shmang zvarritjet po edhe allishverishet e të shkuarës dhe garanton paprekshmërinë e plazheve publike”,- u shpreh kryeministri Rama.

“Zero kosto, zero ecejake, zero rryshfet!Me https://e-albania.al/ , sezon të mbarë turistik”,- shtoi Rama.

/atsh

Ministri i Turizmit dhe Mjedisit, Blendi Klosi, deklaroi sot se “të gjitha strukturat hoteliere janë aktive, ndërsa përgatitjet për sezonin turistik kanë filluar gjerësisht”.

Në një intervistë televizive, Klosi theksoi se “ditët e fundit kam qenë në të gjithë zonën bregdetare. Këtë vit në plazhet shqiptare do të ketë një menaxhim krejt ndryshe të vijës bregdetare. Zona e bregdetit është një pasuri kombëtare dhe nuk mund të uzurpohet”.

Sipas tij, ajo që ka ndodhur në vite ka qenë uzurpim, ku çdo qytetar që shkonte për të bërë plazh duhet të gjendej përballë një njeriu që e shiste shezlongun dhe çadrën.

“Ajo që kërkohet këtë radhë është që të rriten më shumë hapësirat publike si dhe të garantohen të gjitha standardet si dushet, tualetet, rojet bregdetare”, – tha Klosi.

I pyetur nëse do të ketë rritje çmimi, Klosi tha se “jo nuk ka logjikë, është debat shterpë sepse nuk ka arsye të ketë rritje çmimesh, pasi edhe kërkesa do të jetë më e ulët. Për sa kohë do të kemi me pak vizitorë, më pak turistë është e pamundur që të rriten çmimet”.

“Shqipërinë e kemi 400 km vijë bregdetare, nga e cila më pak se 13% uzurpohet. Pra mbi 85 % është zonë e lirë. Ne shikojmë shumë plazhe si ai Dhërmiut që kanë hapësira të mëdha publike. Por edhe ata që do të marrin zonat e plazhit para hotelit do të kenë detyrimin që brenda kontratës që lidhin 80% do ta menaxhojnë me shezlongë, ndërsa 20 % do t’ia lënë publikut”, – nënvizoi Klosi.

“Në muajin qershor do të kemi turizëm tokësor, prandaj ftojmë shqiptarët e Kosovës, Malit të Zi, Maqedonisë së Veriut të vijnë në Shqipëri”, – tha Klosi.

Në lidhje me çarterat që do të vijnë në vendin tonë, ministri Klosi tha se “brenda dy javëve të para do vijën çartera nga Ukraina, Bjellorusia dhe Polonia”./atsh

Kryeministri Edi Rama informoi sot se “për sa i përket gjendjes së jashtëzakonshme nuk ka arsye për të bërë shtyrje të përgjithshme por po ekzaminojmë idenë e një zone të kufizuar vetëm në vijën bregdetare”.

Rama tha se “kjo po diskutohet për të pasur gjatë sezonit të verës mundësinë që të ushtrojmë fuqinë legjislative në përballje të kësaj situate, për të ndihmuar në mbrojtjen nga përhapja”.

“Nëse nuk do të kemi një shtyrje të përgjithshme do të kemi një zonim vetëm në vijën bregdetare pa përfshirë zonat urbane. Jo në Durrës por në plazhin e Durrësit, jo në Vlorë por në plazhin e Vlorës. Kjo është diçka që po e studiojmë sepse mendojmë se do të ishte ndihmëse për njerëzit e shtetin”, tha Rama.

Ai theksoi se “sot ka përfunduar edhe gjithë procesi i ndërtimit të platformës për të aplikuar online për administrimin e plazheve nga subjektet private, një proces i qendërzuar nga një autoritet i përkohshëm për këtë fazë. Do të bëjmë atë që duhet për të mos lejuar pushtimin e plazheve publike masivisht”.

Rama tha se “do të jemi racional sepse nuk është se do ta fshijmë fare administrimin privat të hapësirave publike, kjo do të bëhet edhe sipas kushteve të caktuara”.

“Do të kërkohet për një sipërfaqe të caktuar apo për një numër të caktuar çadrash për të cilat përgjigjet para ligjit. Kjo për të mbrojtur njerëzit. Nuk besoj se ka arsye për të shtyrë gjendjen e fatkeqësisë natyrore në gjithë vendin përveç plazhit, por akoma nuk e kemi marrë këtë vendim”, tha Rama. /atsh

Sezoni turistik këtë vit do të jetë nga 1 qershori deri më 15 nëntor, ndërsa nga dita e sotme ka nisur aplikimi në e-albania për plazhet private që do të zgjasë deri më 14 qershor.

Rregullat se si do të bëhet plazh dhe mënyra se si do të vendosen stacionet e plazhit në vijën bregdetare janë përcaktuar në vendimin e botuar sot në Fletoren Zyrtare.

Në mbështetje të ligjit “Për turizmin”, të ndryshuar, me propozimin e ministrit të Turizmit dhe Mjedisit, Këshilli i Ministrave vendosi që për vitin 2020, në kushtet e epidemisë së shkaktuar nga COVID-19, hapja e sezonit turistik si dhe dokumentacioni, procedura e miratimit, monitorimi për ushtrimin e veprimtarisë si stacion plazhi bëhen sipas parashikimeve të këtij neni.

Për mbarëvajtjen dhe monitorimin e veprimtarisë së sezonit turistik ngrihet Komiteti i Menaxhimit të Sezonit Turistik (KMST), që kryesohet nga ministri i Turizmit dhe Mjedisit dhe në përbërje të tij ka përfaqësues të nivelit të lartë nga: Ministria e Shëndetësisë dhe Mbrojtjes Sociale, Ministria e Infrastrukturës dhe Energjisë, Ministria e Mbrojtjes, Ministria e Brendshme, Ministria e Kulturës dhe Ministria e Bujqësisë dhe Zhvillimit Rural.

Detyrat e Komitetit të Menaxhimit të Sezonit Turistik janë: miratimi i hartës së stacioneve të plazheve si dhe plazheve publike, të cilat pajisen me një numër të veçantë identifikues,që publikohet në momentin e hapjes së aplikimit online, sipas listës së plazheve; monitorimi i mbarëvajtjes së sezonit turistik 2020, si dhe koordinimi ndërinstitucional për respektimin e masave në kuadër të epidemisë së shkaktuar nga COVID-19.

Në lidhje me stacionet e plazhit prioritare do të jenë subjektet që disponojnë një strukturë akomoduese që ndodhet në vijën e parë bregdetare dhe do të marrë hapësirën e plazhit para saj.

Më pas vijnë subjekti duhet të disponojë një strukturë akomoduese në afërsi të vijës bregdetare dhe në fund ata që do të marrin një stacion plazhi janë ato restorante që kanë një kapacitet shërbimi mbi 20 tavolina dhe që kanë hapësirë plazhi para strukturës.

Ndërkohë që çdo aplikues duhet të plotësojë një formular vetëdeklarimi se merr përsipër një stacion plazhi dhe të respektojë e mbajë përgjegjësi të plotë për plotësimin dhe zbatimin e masave anticovid; Krijimin e kushteve higjienike, Respektimin e hapësirave të vendosjes së çadrave sipas tipologjisë së plazhit, Vendosjen e sinjalistikës në stacionin e plazhit, Sinjalizimin e zonave të përdorimit të mjeteve lundruese për argëtim, Garantimin e sigurisë së jetës me vrojtues plazhi, përgjatë gjithë sezonit të ushtrimit të veprimtarisë së plazhit, Mirëmbajtjen e mjeteve dhe ambienteve të ndihmës së parë mjekësore dhe garantimin e protokolleve të sigurisë gjatë epidemisë Covid19, në përputhje me legjislacionin në fuqi.

Mosplotësimi i kushteve dhe kritereve ngarkon me përgjegjësi administrative dhe/apo, kur është rasti, me përgjegjësi penale kur sjell pasoja të rënda për shëndetin.

Për zbatimin e këtij vendimit ngarkohen Ministria e Turizmit dhe Mjedisit, Ministria e Shëndetësisë dhe Mbrojtjes Sociale, inspektorati përgjegjës për turizmin, inspektorati përgjegjës për shëndetësinë, Komiteti i Menaxhimit të Sezonit Turistik (KMST), grupi teknik i shqyrtimit të aplikimeve (GTSHA), njësitë e vetëqeverisjes vendore, Agjencia Kombëtare e Bregdetit si dhe Agjencia Kombëtare e Shoqërisë së Informacionit (AKSHI)./atsh