Turizem

Kryetari i bashkisë së Vlorës, Dritan Leli, deklaroi sot se “ne pretendojmë të kemi një sezon turistik të suksesshëm , por e gjithë kjo ka një varësi të fortë nga ajo që ka përgjunjur njerëzimin COVID-19”.

Në një intervistë televizive, kryetari Leli tha se “situata në të cilën ndodhemi na bën të mendohemi të jemi skeptikë, të mendohemi më shumë për të lëvizur dhe absolutisht është e justifkikuar dhe e pritshme pavarësisht përpjekjeve të mëdha që ne jemi duke bërë bashkë me operatorët turistikë në të gjithë territorin e bashkisë së Vlorës, por jo vetëm në Vlorë, në të gjithë Shqipërinë janë duke u përpjekur të sjellin fluks turistësh në qytet”.

“Situata që kemi kaluar , apo që po përjetojmë akoma janë ato ngërçet tek njerëzit që bëjnë më pak skeptikë për të ndërmarrë udhëtime”, – tha Leli.

Duke folur për turizmin, Leli tha se “plazhet në qytetin bregdetar në fundjavë kanë qenë e të populluara, qyteti plot, hotelet kanë një rritje të numrit e të pronotimeve dhe shpresoj se përmirësimi i kushteve atmosferike do të sjellë më shumë vizitorë”.

Më tej ai tha se “qytetarët e Vlorës e duan cilësinë e jetës, infrastrukturën që ju shërben. 450 biznese të reja janë hapur vetëm në Lungomare. Këtu ka pasur situata vetëm të ndërtonin objekte sot ka shumë ndërtues që lejet për pallate duan t’i kthejnë në hotele për t’ju shërbyer qytetarëve. Kemi arritur në një situatë shumë pozitive ku më shumë leje i japim për hotele dhe jo për pallate”.

Lidhur me vendosjen e çadrave në plazhe, Leli tha se “midis hapësirës me çadra ka pjesë pa çadra, janë për banorët që të dalin si turistë të lirë pa pasur nevojë të paguajnë për një çadër. Kjo ka ndodhur brenda të gjithë vijës bregdetare”.

Kryebashkiaku Leli bëri të ditur se “nga zona e tunelit në drejtim të Orikumit do kemi një tjetër projekt, ku do të bëhet rikonstruksion total, do ketë 2 bypass-e që të devijohet trafiku. Do bëhet një shëtitore jo si Lungomare, por me një standard shumë të mire”.

Ai u shpreh se me rikonstruksionin e bulevardit “Ismail Qemali”, Vlora është bërë edhe një atraksion historik.

“Bulevardi Ismail Qemali është rikonstruktuar. Kur isha në Kosovë thashë të ftoj ata që e ndjejnë dhe duan të vijnë në një vend që ka shumë histori. Dhe pastaj të shkosh tek rruga historike ku kaloi Ismail Qemali kaloi tek shtëpia e Marigosë që qëndisi flamurin është diçka e papërsëritshme”, – tha Leli.

Kryebashkiaku Leli tha se “kemi shumë për të bërë, por në sezonin turistik na takon të promovojmë më tepër vlerat të tregojmë anët pozitive, se po të shikojmë problematikat janë aty dhe do vazhdojnë të zgjidhen. Por duhet të ketë një klimë pozitive për të bërë më tepër ekonomi”.

“Qasja pozitive nuk është vetëm politike, por është strategjike për të garantuar një zhvillim të qëndrueshëm të turizmit në Shqipëri Vlora është nga ato potencialet turistike më të rëndësishme qe ne kemi në gjithë territorin e vijës bregdetare dhe çdo investim ka justifikuar shpenzimin e parave publike për të shndërruar Vlorën në destinacionin turistik elitar në vitet që do të vijnë”, – tha Leli. //atsh

Policia e Shtetit ka vënë në dispozicion 550 punonjës të Policisë Rrugore, radarë, kamera, alkoolteste, automjete të uniformuara dhe motocikleta, për menaxhimin e trafikut rrugor në sezonin e verës dhe parandalimin e aksidenteve rrugore.

Në kuadër të masave të marra nga ana e Policisë së Shtetit për garantimin e rendit dhe sigurisë gjatë sezonit turistik veror 2020, Drejtoria e Policisë Rrugore ka rritur prezencën e saj në akset rrugore nacionale dhe në zonat bregdetare, për shkak të rritjes së ndjeshme të qarkullimit rrugor.

Në të gjitha akset rrugore nacionale dhe ato që lidhin zonat bregdetare, Policia Rrugore, që prej një jave është duke kryer shërbime me orë të shtuara, me qëllim përballimin e fluksit të madh të automjeteve që qarkullojnë në zonat bregdetare gjatë sezonit veror.

Ndërkaq, ditën e shtunë dhe të diel, drejtues mjetesh, pasagjerë, drejtues motomjetesh, përdorues të shumtë të rrugës të të gjitha moshave, vendas dhe turistë të huaj udhëtojnë drejt plazheve të vendit tonë.

“Policia Rrugore informon se do të jetë prezente në akset rrugore për të mbikëqyrur trafikun, për të parandaluar shkeljet dhe aksidentet, për të ndihmuar në çdo rast bllokimi të trafikut dhe për të dhënë ndihmë automobilistike ndaj kujtdo që ka nevojë. “Ndihma” që Policia Rrugore kërkon nga të gjithë drejtuesit e mjeteve është respektimi i normave të sjelljes. Mos drejtoni automjetet nën ndikimin e alkoolit apo më keq akoma, në gjendje të dehur! Vendosni përherë rripin e sigurimit dhe kaskën mbrojtëse kur drejtoni mjete/motomjete. Evitoni parakalimet e gabuara, pasi janë rreziku më potencial për aksident rrugor dhe për bllokim të trafikut. Mos përdorni celularin gjatë drejtimit të mjetit. Qëndroni në radhën e mjeteve kur ajo krijohet për shkak të ngarkesës së madhe. Dalja nga “kolona” mund t’ju kushtojë një gjobë së bashku me pezullim të lejes së drejtimit 2-4 muaj. Duke respektuar normat, vajtja dhe ardhja nga plazhet është më e shkurtër dhe pa vonesa”, informoi Policia e Shtetit.

Po ashtu, Policia Rrugore këshillon drejtuesit e automjeteve që mos të nisen të gjithë në të njëjtin orar nga plazhet drejt banesave të tyre, si dhe të përdorin edhe rrugët alternative, me qëllim shmangien e krijimit të fluksit të pandërprerë në rrugë nacionale, në hyrje apo dalje të qyteteve.

“Apelojmë për këmbësorët të respektojë me korrektësi rregullat e qarkullimit, të kalojnë në vijat e bardha dhe mbikalimet dhe aty ku ato mungojnë të kontrollojnë rrugën nga të dy senset e lëvizjes pastaj të kalojnë në krahun tjetër të rrugës”.

Policia Rrugore bën me dije se në zbatim të Udhëzimit të Përbashkët të Ministrit të Punëve të Brendshme dhe Ministres së Transportit dhe Infrastrukturës “Mbi kufizimet në qarkullimin e mjeteve të rënda për transportin rrugor të mallrave”, nuk do të lejojë lëvizjen e kamionëve në fundjavë jashtë orareve dhe akseve të përcaktuara në këtë udhëzim.

Personat fizikë dhe juridikë që operojnë në fushën e transportit rrugor të mallrave, të planifikojnë lëvizjet e tyre në ditët dhe oraret e lejuara, në akset rrugore alternative që nuk preken nga kufizimet, pasi nga ndërprerjet e qarkullimit mund t’u shkaktohen edhe dëmtime të materialeve që transportojnë, përgjegjësi që bie plotësisht mbi ta. Nga shërbimet e Policisë së Shtetit do të kërkohet zbatimi rigoroz i kërkesave të këtij udhëzimi, duke i ndëshkuar shkelësit e kërkesave të udhëzimit, si dhe ndalimi i qarkullimit të mjeteve në kundërvajtje deri në oraret e lejuara për qarkullim.

Policia Rrugore, në bashkëpunim me radiot kombëtare me sinjal të shtrirë në vend, do të vijojë njoftimet për zonat me trafik të rënduar apo nevojën për devijime në qarkullim.

Policia Rrugore fton qytetarët dhe mediet që të denoncojnë çdo rast të abuzimit me detyrën nga ana e punonjësve të saj, si dhe të denoncojnë çdo shkelje të Kodit Rrugor, duke iu garantuar reagim të shpejtë e të paanshëm./atsh

Ministri i Turizmit dhe Mjedisit, Blendi Klosi, deklaroi sot se “këtë vit turizmin patriotik e kemi shumë të nevojshëm dhe bëmë një gjë shumë të madhe e hapëm kufirin të parët në rajon. Vetëm në 20 ditët e para të qershorit janë 120 mijë pasaporta të huaja që janë futur në Shqipëri”.

Në një interviste televizive, Klosi tha se “është një shifër më pak se qershori i 2019-s, ku ishin 600-700 mijë, është një rënie e madhe e lëvizjes, por shpresojmë që në korrik dhe gusht, që ka dhe numrin më të madh të pasaportave të huaja, të ketë më shumë lëvizje”.

Sipas tij, çarteri parë turistik në Europë erdhi në Shqipëri nga Bjellorusia.

“Deri tani nga data 12 kanë ardhur 6 çarterë nga Bjellorusia. Çarteri i parë që Ukraina nxori me turistë ka ardhur në Shqipëri të premten, ndërkohë që do vijnë 5 çarterë në javë nga Ukraina. Ne bëmë disa lëvizje në kuadër të politikave që po ndjek secili shtet për të promovuar Shqipërinë si destinacion i qëndrueshëm”, – theksoi Klosi.

Ministri Klosi u shpreh se “jemi në shifra shumë të mira për sa i përket menaxhimit të koronavirusit”.

Më tej, ministri Klosi u shpreh se “dakordësitë dhe politikat e hartuara nga Ministria e Turizmit dhe Mjedisit kanë bërë që turizimi të shndërrohet në një degë të rëndësishme të ekonomisë, por që padyshim ka nevojë për ndryshime të mëdha në infrastrukturë. Ka gjithashtu nevojë për investime nga bashkitë për të trajtuar zonat e turizmit, ka nevoja shumë të mëdha për politika fiskale, për politikat e ruajtjes së jetës së qytetarëve nga pikëpamja e rendit dhe shëndetësisë”.

“Është një sektor kaq miks, i cili pa i bërë qytetet të vizitueshme, pa investimet që janë bërë në infrastrukturën rrugore, në të gjithë imazhin e Shqipërisë turistike, por edhe pa investimet e jashtëzakonshme që janë bërë nga komuniteti lokal i biznesit do të ishte e pamundur të kishte progres”, – nënvizoi Klosi.

Ministri Klosi tha se “rritja e shifrave në këto 7 vite të qeverisë së Edi Ramës krahasuar me atë që gjetëm në 2013 është e dukshme. Nga më pak se 3 milionë turistë kemi vajtur në 6.4 milionë turistë e kjo dëshmon që ka një investim të jashtëzakonshëm nga pikëpamja e zhvillimit të infrastrukturës turistike”.

“Këtë vit kemi më shumë të nevojshëm se kurrë turizmin patriotik, në mënyrë që të afërmit tanë të vijnë t’i kalojnë pushimet në Shqipëri”, – tha Klosi./atsh

Ophidiaster ophidianus, ylli i parkut detar kombëtar Karaburun-Sazan është një nga thesaret më të bukura në këtë vend,

Agjencia Kombëtare e Zonave të Mbrojtura tha sot se Ophidiaster ophidianus është një specie e jashtëzakonshme që gjendet në parkun detar kombëtar Karaburun-Sazan.

“I pajisur me 5 krahë cilindrikë dhe me përmasa të diametrit që variojnë nga 20-40 cm, ylli i detit Ophidiaster ophidianus përfaqëson një prej thesareve më të bukura të parkut detar. Gjendet në shkëmbinjtë detarë në thellësi 5 deri 25 m”, shprehet AKZM.

Po ashtu, AKZM shton se Ophidiaster ophidianus mund të ketë ngjyrë të kuqe, lejla apo portokalli.

“Karakteristikë është se nga një krah i këputur i yllit të detit mund të formohet një individ i ri. Marrin frymë nëpërmjet qeskave të vogla të quajtura papilla, të cilat gjenden në sipërfaqe të trupit”, bën të ditur AKZM. /atsh