Te fundit nga zona

Ndërtimi i rrugës Orikum-Dukat, njëri prej projekteve strategjike që do të financohet në kuadër të paketës së investimeve “1 miliard”, do t’i japë një tjetër impuls zhvillimit të turizmit në këtë rajon.

Në një prononcim për ATSH-në, kryetari i Këshillit të Qarkut Vlorë, Ervis Moçka vlerëson impaktin që do të ketë ky projekt i rëndësishëm infrastrukturor në zhvillimin ekonomik të kësaj zone.

“Është një investim i nevojshëm, pasi zëvendëson rrugën aktuale prej 16 km, e cila është e amortizuar dhe në të cilën lëvizja bllokohet shumë herë për shkak të rrëshqitjeve të terrenit që bllokon dhe rrugën”, tha Moçka.

Rruga e re do të ketë një gjatësi prej 14.7 km dhe do të jetë e kategorisë C2. Kjo, sipas Moçkës, “do të thotë se ky aks do të ketë të gjitha parametrat e sigurisë, me korsi të gjera 3.5 metra etj”.

Rruga Orikum-Dukat, sipas kryetarit të Këshillit të Qarkut Vlorë, do të lehtësojë shumë lëvizjen nga Vlora drejt Llogorasë dhe plazheve turistike që gjenden përtej qafës së Llogorasë.

Orikum-Dukat është projekti i katërt i paketës “1 miliard”, dhe forma e investimit do të jetë përmes formulës Partneritet Publik Privat, ku paratë do t’i japë fillimisht kompania që do të dalë fituese në tender, e do të shlyhen në vite nga buxheti i shtetit.

Ndërkohë Këshilli i Ministrave ka miratuar bonusin prej 6% të pikëve, që i jepet shoqërisë “Gjikuria”, sh.p.k. për rezultatin teknik dhe financiar të propozimit të pa kërkuar, të paraqitur për procedurën për dhënien me koncesion/Partneritet Publik Privat për projektin e rrugës “Porti i jahteve – bay-pass Orikum – Dukat (ura e Shën Elizës)”.

Vitet e fundit, zona e bregdetit jugor ka qenë pjesë e një plani për rinovimin e përgjithshëm të infrastrukturës për të nxitur zhvillimin e turizmit bregdetar në këto zona.

Rruga nga Orikumi në Dukat aktualisht ka një gjatësi prej 16 km dhe paraqet shumë problematika, ndërsa shpejtësia mesatare në këtë aks nuk i kalon 40 km/orë. Aksi ka shumë pika rreziku që janë burim aksidentesh, sidomos zona që kalon përmes fshatrave, çka do të thotë se gjatë sezonit turistik pushuesit bllokohen vazhdimisht./atsh

Mbetjet urbane dhe të ngurta të qytetit të Orikumit janë prej vitesh një shqetësim për banorët dhe ambientalistët e kësaj zone, raporton Top Channel

Rreth 9 mijë ton mbetje grumbullohen në vit në Orikum, rreth 300 metra larg rrugës nacionale, pranë detit si dhe në bregun e Lumit të Dukatit.

Që nga gomat e automjeteve deri te kafshët e ngordhura, të gjitha përfundojnë në det me rrjedhen e lumit të Dukatit. Banorë dhe ambientalistë janë të shqetësuar.

“Bashkia na ka thënë që do të rregullohet kjo punë, por ende nuk kanë bërë gjë”, thonë banorët.

Zgjidhja përfundimtare duket e largët, pasi deri në ndërtimin e landfillit të Sherishtës, Orikumi turistik do të vuajë pasojat e mbetjeve të papërpunuara.

v.l/ Dita

Nga Ylli Mece

NDIHEM MË MIRË KËTU – NË TOKËN TIME !
—–
Unë ngela bujk i lidhur fort,mbas tokës time i tillë dhe jam,
Ashtu sikurse lidh fort e mpreh dy qetë e mi në parmëndë .
Si poetët s’ shkruaj dot ,mbase dhe shpirt të tillë nuk kam
Një gjë e di mirë,në tokën time, jam ndjerë njeri i rëndë !
—–
Më ndodh kur plugoj, ulem në ugar dhe e dredh një cigare
Nga tymi i saj, shtëllunga e duhanit rrugën e vet nis përpjetë
Si dreqin këta muzikantët për mua, nuk bënë dot një valle ?!!…
Për nder !I marrosur do çohesha e plisin do ngrija ,gjer te retë !
—-
Rastis, që nën hijen e një shelgu, shtrihem gjatë e gjërë
Lidh fort krahët në tokë e sipër tyre, vendos kokën time
Me kapelen nën sy, shaj këtë botë të pistë e të pëgërë
Të kisha një” hu”,do ta godisja për vdekje copë e thërrime!
—-
Kohët moderne, këtu në fshat, na i morën gjithë djemtë
Kush e merr vesh, se ku pudrosin rrudhat e rruspisë Evropë?!..
Trishtueshëm më shohin në sy e kushedi, ç’mendojnë dhe qetë
Ata s’dinë politikë,vec qëllojnë mizat me bisht lartë e poshtë !
—-
Na erdhi një ditë deputeti dhe shastisur nga fjala e tij , ngela
Kur më pa me shajake e qylaf, më qeshi keq e përdori ironinë
Nuk e kuptonte se ne të lidhurit me tokën, e opingat me tela
Me dyfek në krah e me parmëndën e arës kemi shkruar historinë
—-
Kohë moderne ! Në ardhshi kështu,….. po ju them :” Qofshi mallkuar”!
Njëmijë herë më modern se ju jam unë këtu,në tokën time të bekuar !

Një “banor” i ri është shtuar në lagunën e Orikumit. I quajtur nga shkencëtarët, Fishkëllyesi i murrmë, kjo specie e re, e pavrojtuar asnjëherë më parë në vendin tonë, është mjaft e rrallë në Europë.

Ministri i Turizmit dhe Mjedisit, Blendi Klosi shprehet se “ky lajm i bukur që vjen nga studiuesit e AOS dhe studiuesit hungarezë, mbështetur nga stafi i zonave të mbrojtura në Vlorë, dëshmon biodiversitetin e pasur të kësaj lagune”.

Po ashtu, tha ai, “kjo dëshmon edhe efektet e padiskutueshme pozitive të moratoriumit të gjuetisë, në shtimin e shpendëve edhe në këtë zonë”.

Rezultatet e një ekspedite në fund të muajit gusht treguan se në këtë lagunë,në Parkun Kombëtar të Llogarasë, në Gadishullin e Karaburunit dhe brigjet detare të zonës ka më shumë se 225 specie shpendësh./atsh