Shendetesi

Ministria e Shëndetësisë: 45 raste të reja, 2 humbje jete dhe 57 të shëruar në 24 orët e fundit

Lajmi i fundit, Shendetesi / /

Gjatë 24 orëve të fundit janë kryer 269 testime për të dyshuar të prekur me COVID-19, nga të cilat janë konfirmuar 45 raste pozitive.

Dr. Marjeta Dervishi nga Instituti i Shëndetit Publik duke informuar sot për situatën epidemiologjike të 24 orëve të fundit në vendin tonë, theksoi se “vijon të ketë shtrime të reja në spital me simptoma të rënduara si pasojë e COVID-19 dhe raste të reja pozitive të identifikuara nga epidemiologët në terren. Fatkeqësisht, një 74-vjeçare nga Shkodra dhe një 82 vjeçare nga Tirana, me disa sëmundje bashkëshoqëruese kanë humbur jetën në spitalin infektiv si pasojë e insuficiencës respiratore progresive, pavarësisht trajtimit në terapi intensive dhe përpjekjeve të stafit mjekësor”.

“Ministria e Shëndetësisë dhe Mbrojtjes Sociale u shpreh ngushëllimet familjarëve të të ndjerave”, – tha Dervishi.

Sipas saj, aktualisht në spitalin infektiv po trajtohen 71 pacientë, 10 prej tyre janë në terapi intensive, ndërsa 2 janë të intubuar në gjendje të rëndë.

Ndërkohë gjatë 24 orëve të fundit janë kryer 269 testime për të dyshuar të prekur me COVID-19, nga të cilat janë konfirmuar 45 raste pozitive.

Shpërndarja gjeografike e rasteve është si vijon: 21 raste në Tiranë, 10 në Shkodër, 4 në Elbasan, nga 3 raste Delvinë, Kurbin, nga 1 rast në Krujë, Kukës, Lezhë, Sarandë.

Lajmi i mirë është se në 24 orët e fundit janë shëruar 57 qytetarë, duke e çuar në 1516 numrin e të shëruarve që nga fillimi i epidemisë.

Në vendin tonë aktualisht janë 999 persona aktivë me COVID-19, kryesisht në Tiranë, Shkodër, Durrës.

“Numri i rasteve të rritura në 2 javët e fundit e ka vendosur sistemin shëndetësor në gadishmëri të shtuar, por në të njëjtën kohë është edhe një apel për të gjithë qytetarët për të qenë bashkëpunëtorë në këtë betejë. Ju lutemi, respektuar rregullat, duke ruajtur distancën nga njëri tjetri, duke mbajtur maskat në ambientet e mbyllura ku nuk është e mundur të ruhet distanca, duke ruajtur higjienën personale, duke ruajtur veten dhe të tjetër në mënyrë që të kufizojmë sa më shumë që të jetë e mundur përhapjen e COVID-19”, – tha Dervishi.

Ministria e Shëndetësisë dhe Mbrojtjes Sociale edhe një herë ka një lutje për qytetarët dhe bizneset të tregojnë kujdes sepse virusi është ende mes nesh.

Mos neglizhoni asnjë shenjë të sëmundjes. Në rast se ju apo një i afërm i juaji keni shenja klinike të COVID-19, telefononi në numrin e Urgjencës Kombëtare, 127.

Telefononi në linjën e gjelbër 0800 40 40 për këshillim psikologjik apo çdo informacion për COVID-19.

COVID-19 – Statistika (1 Korrik 2020)
Testime totale 27303
Raste pozitive 2580
Raste të shëruara 1516
Raste Aktive 999
Humbje jete 65 (Qarku Tiranë 36, Durrës 11, Fier 5, Vlorë 2, Shkodër 9, Kukës 1, Elbasan 1)

Shpërndarja gjeografike e rasteve aktive sipas qarqeve:
Tiranë 367
Durrës 201
Shkodër 150
Vlorë 110
Fier 47
Lezhë 42
Korçë 28
Kukës 19
Elbasan 16
Gjirokastër 7
Berat 6
Dibër 6/atsh

Ministria e Shëndetësisë: 45 raste të reja, 2 humbje jete dhe 57 të shëruar në 24 orët e fundit Read More »

Sezoni turistik/ Hapen 28 qendrat shëndetësore verore me shërbim 24 orë

Lajmi i fundit, Shendetesi / /

Nga Thethi në Ksamil, janë hapur 28 qendrat shëndetësore verore me shërbim 24 orësh, të cilat do t’u vijnë në ndihmë pushuesve.

Kryeministri Edi Rama ndau sot pamje nga këto qendra shëndetësore të cilat janë të përgatitura për t’ju ardhur në ndihmë pushuesve, me mjekë dhe infermierë të trajnuar edhe për gjendjen e epidemisë.

“Mirëmëngjes nga 28 qendrat shëndetësore verore që janë hapur me shërbim mjekësor 24 orë nga Thethi në Ksamil, për t’ju ardhur në ndihmë pushuesve, me mjekë dhe infermierë të trajnuar edhe për gjendjen e epidemisë”, tha Rama.

Shëndetësia është në gatishmëri për një sezon turistik të sigurt. 160 mjekë dhe infermierë janë trajnuar edhe për situatën e epidemisë.

“Prej datës 15 qershor ne jemi hapur 24 orë në 7 ditë të javës në qendrën shëndetësore Ksamil. Në këtë periudhë, për shkak edhe të pandemisë, masat janë të gjitha të shtuara dhe personeli është i përgatitur për të pritur çfarëdo lloj rasti që do të paraqitet”, tha një mjeke e qendrës shëndetësore Ksamil.

E njëjta situatë paraqitet edhe në qendrat e tjera shëndetësore të cila funksionojnë me shërbim 24 orësh.//atsh

Sezoni turistik/ Hapen 28 qendrat shëndetësore verore me shërbim 24 orë Read More »

Mjekët e infermierët, të pajisur me mjetet e mbrojtjes personale si ditën e parë të epidemisë

Aktualitet, Shendetesi / /

“Mjekët dhe infermierët, aseti ynë më i çmuar janë sot e gjithë ditën në vijën e parë të përballjes me COVID19, vijojnë të jenë të pajisur me mjetet e mbrojtjes personale, si ditën e parë të epidemisë”.

Ministrja e Shëndetësisë dhe Mbrojtjes Sociale, duke publikuar foto nga qendrat spitalore ku mjekët e infermierët shërbejnë, theksoi se ata vijojnë të jenë të pajisur më së miri.

“Jo vetëm në spitalin infektiv, por kudo ku ata shërbejnë, nga qendrat shëndetësore në spitale, vijojnë të jenë të pajisur me mjetet e mbrojtjes personale, si ditën e parë të epidemisë, duke ofruar shërbime për çdo qytetar në nevojë, me rihapjen e sistemit shëndetësor”,- theksoi Manastirliu

“T’i ndihmojmë të gjithë bashkë, të kufizojmë përhapjen e COVID-19, duke respektuar rregullat e thjeshta të higjienës, vendosjen e maskës dhe distancimin fizik! Bashkë kundër COVID-19″,- bëri thirrje ministrja Manastirliu. /atsh

Mjekët e infermierët, të pajisur me mjetet e mbrojtjes personale si ditën e parë të epidemisë Read More »

Shtimi i rasteve me COVID-19/ Tomini: Agresivitet më i lartë, mjekët më të mirë reanimatorë po trajtojnë të shtruarit

Shendetesi / /

Specialistja e Institutit të Shëndetit Publik, Eugena Tomini deklaroi sot se javët e fundit virusi i COVID-19 ka treguar agresivitet të lartë.

Në një intervistë televizive, Tomini theksoi se “në katër javë virusi ka treguar se po kryen rolin fiziologjik”.

“Grupet e popullatës që janë në risk, të klasifikuara edhe më parë, kanë pësuar edhe raste vdekjesh apo kanë qenë raste me një klinikë agresive. Virusi ka treguar se ka transmetueshmeri dhe agresivitet. Ka zgjeruar fashën e të prekurve ndërkohë që kemi vënë re, që kemi një zgjerim të fashës së grupmoshës, 30-40 vjeç, me simptoma të shfaqura. Kjo tregon se ky pik i rasteve në këto momente përkundrejt pikut në karantinë nuk mund të krahasohet, se kemi një rrjedhë fiziologjike të transmetimit të virusit në vend. Agresiviteti është më i lartë”, u shpreh Tomini.

“Me rajonin po të shikoni numrin e vdekjeve, e kemi në të njëjtat nivele, ku Shqipëria renditet ndër të fundit. Karantina solli atë impakt që sistemi shëndetësor të kishte kohën e parapërgatitjes, ndërkohë aktualisht ka kapacitete për të përballuar fluksin”, – tha Tomini.

Tomini u shpreh se duhet të zbatohen masat nga popullata, sistemi shëndetësor e të gjithë hallkat e tjera.

“Sistemi shëndetësor në Shqipëri aktualisht është përforcuar jo vetëm në sajë të karantinës, por edhe në sajë të mobilizimit e të anagazhimit edhe të strukturave të tjera joqeveritare në mbështetje dhe fuqizimit qoftë të sistemit reanimator, për respiratorë, monitorë, për trajtimin renaimator, ekipe dhe grupe pune. Ekspertët më të mirë sa i përket reanimacionit, janë duke punuar në grupe të përbashkët në Spitalin Infektiv për të trajtuar e menaxhuar rastet që kanë kërkuar terapi intensive”, – tha Tomini.

Sipas saj, të shtruarit në Spitalin Infektiv janë në gjendje të rëndë/atsh

Shtimi i rasteve me COVID-19/ Tomini: Agresivitet më i lartë, mjekët më të mirë reanimatorë po trajtojnë të shtruarit Read More »

Manastirliu reagon ndaj opozitës: Mos bëni politikë me koronavirusin, jepni shembull personal për zbatimin e masave

Aktualitet, Shendetesi / /

Ministrja e Shëndetësisë dhe Mbrojtjes Sociale, Ogerta Manastirliu i bëri thirrje sot opozitës të mos bëjë politikë me koronavirusin, por të ndihmojnë duke dhënë pikësëpari shembullin personal për zbatimin e masave kundër COVID, për të kontribuar në luftën me këtë virus.

Në një reagim duke iu përgjigjur akuzave të opozitës, Manastirliu e drejtoi apelin “për të gjithë “mjekët” e politikës dhe “politikanët” e mjekësisë, që shëndetin e qytetarëve e shohin veç si një armë për ta përdorur në sulmin politik të ditës”.

“Ne vazhdojmë t’u besojmë dhe të ndjekim strategjinë e ekspertëve më të mirë të shëndetit publik në vend dhe punojmë çdo ditë si ditën e parë, për të forcuar kapacitetet e sistemit shëndetësor, në përgjigje të epidemisë Sars-Cov 2”, tha ajo.

“Ne vazhdojmë të besojmë fort në ofrimin me transparencë të të dhënave, në mirëkuptimin si dhe bashkëpunimin me qytetarët, për masat e domosdoshme që nevojiten për mbrojtjen e shëndetit në këtë situatë pandemie. Sot, numri i qytetarëve të shtruar në spital është rreth 20% e kapacitetit të shtretërve të vëna në dispozicion. Po bëhet një punë heroike nga mjekët dhe infermierët që janë në vijën e parë të luftës në spitalin Infektiv në QSUT”, – nënvizoi Manastirliu.

Sipas saj, numri i fataliteteve për një milion banorë, është shumë më i ulët sesa shumica e vendeve të Bashkimit Europian dhe i dyti më i ulët ndër vendet e rajonit.

“Protokollet tona aktuale të survejancës janë të bazuara tërësisht në udhëzimet e OBSH dhe ECDC. 90% e rasteve të dyshuara izolohen dhe konfirmohen brenda 48 orëve. Ekipet e reagimit të shpejtë të shëndetit publik janë pa pushim në terren dhe janë funksionalë në të gjitha nivelet. Strategjia jonë e izolimit, në një kohë kur virusi ishte në kulmin e fuqisë së vet goditëse dhe kur ekipet tona të shëndetit publik kishin shumë pikëpyetje dhe të panjohura mbi të, rezultoi një strategji e suksesshme”, – tha Manastirliu.

Ministrja shtoi më tej se “kur ne vendosëm rihapjen e mirëmenduar dhe graduale, pas një izolimi ndër më të fortët dhe më të shpejtët, padyshim që kishim marrë parasysh se rritja e ndërveprimit dhe kontakteve do të sillte raste të infektimeve të reja. Prandaj nuk e ndalëm asnjëherë komunikimin me qytetarët, duke kërkuar ndërgjegjësim për zbatimin e masave dhe protokolleve për çdo aktivitet”.

Po kështu, vijoi ajo, ne nuk e ndalëm asnjë moment punën për forcimin e kapaciteteve spitalore dhe pajisjen me materiale të mbrojtjes personale për personelin mjekësor.

“Raportimet mbi numrin e të infektuarve, për të cilat qytetarët dhe partnerët informohen çdo ditë, vijojnë të përcillen në mënyrë të saktë dhe mbi të gjitha transparente. Ne i mirëpresim kritikat konstruktive të gjithësekujt, ashtu sikurse hedhim poshtë me neveri akuzat dhe sajesat e atyre, të cilët që nga dita kur virusi u shfaq, nuk kanë lënë ditë pa bërë politikë me të, me akuza shpesh herë kundërthënëse, duke njollosur padrejtësisht punën e mijëra ekspertëve të shëndetit, mjekëve, infermierëve, të cilët nuk e kanë ndalur asnjë çast luftën me COVID-19”,- theksoi Manastirliu.

Ministrja i bëri thirrje qytetarëve që të vazhdojnë të zbatojnë të vetmet mjete që kemi në dispozicion në luftën me COVID-19, që janë distancimi social, vendosja e maskës kudo ku distancimi social nuk mund të ruhet.

“Ndërsa kujt bën politike me koronavirusin, u bëjmë sërish thirrje të ndihmojnë duke dhënë pikësëpari shembullin personal për zbatimin e masave AntiCOVID, për të kontribuar edhe ata në luftën me këtë virus”, – tha Manastirliu./atsh

Manastirliu reagon ndaj opozitës: Mos bëni politikë me koronavirusin, jepni shembull personal për zbatimin e masave Read More »

Kalo apel mjekëve: Puna, përkushtimi dhe profesionalizmi, çelësat e zgjidhjes së kësaj sfide

Opinione, Shendetesi / /

Mjeku i njohur infeksionist Tritan Kalo apeloi sot për ndërgjegjësim si dhe kërkoi bashkëpunimin e të gjithëve në mposhtjen e kësaj sëmundjeje.

“Kohë Kovidiane. Puna, përkushtimi dhe profesionalizmi duhet të prevalojnë këto kohë në shëndetësinë tonë publike dhe jo vetëm. Si Mantelbardhë duhet t’i bëhemi krah njëri-tjetrit në këtë sfidë mbarëbotërore”, shprehet ai.

“Teorizimet për protagonizëm, por jo për zgjidhje praktike të ardhura këto javë nga burime si të brendshme po ashtu edhe të jashtme, sidomos kur ato në harkun kohor të disa javëve kundërshtojnë njëra-tjetrën, nuk sjellin ndonjë dobi në përballjen me këtë sfidë, përkundrazi Sars-Cov2/Covid-19 është ulur tashmë këmbëkryq në mesin tonë”, thekson Kalo.

“Jo me mërira dhe hatërmbetje të pavlera, që disa i sjellin në vëmendjen tonë këto kohë, kur të tëra energjitë tona intelektuale dhe jo vetëm duhen përmbledhur në mirëmenaxhimin e kësaj sfide, që ishte, është dhe ndoshta do mbetet me shumë shqetësime edhe për vende me fuqi ekonomike dhe sisteme shëndetësore më të mirëpajisura e më mirë të financuara se sistemi ynë shëndetësor”, shton Kalo.

“Mirëbesimi dhe mirëkuptimi mes nesh si kolegë si dhe i yni me publikun, i cili për asnjë çast të mos e nënvlerësojë kujdesin ndaj vetes dhe të afërmve të tij, mbeten çelësat e zgjidhjes së kësaj sfide që ka vënë në vështirësi jetën e të gjithëve. Bashkë me siguri ne do ja dalim mbanë”, përfundon Kalo./atsh

Kalo apel mjekëve: Puna, përkushtimi dhe profesionalizmi, çelësat e zgjidhjes së kësaj sfide Read More »

Ministria e Shëndetësisë apel bareve dhe restoranteve të zbatojnë protokollet higjieno-sanitare

Shendetesi / /

Ministria e Shëndetësisë dhe Mbrojtjes Sociale u bëri apel bizneseve, bar-kafe dhe restorante të zbatojnë me rigorozitet protokollet higjieno-sanitare të sigurisë.

Shefja e Survejancës dhe Shërbimit të Inteligjencës Epidemik në Institutin e Shëndetit Publik, Eugena Tomini u shpreh se “këto biznese duhet të kryejnë shërbimin vetëm në ambientet e hapura dhe jo të mbyllura, duke respektuar distancimin fizik sipas udhëzimit të autoriteteve shëndetësore.

Ajo u shpreh se “për të katërtën javë të vijimit të epidemisë vazhdon një situatë serioze e rasteve të konfirmuara pozitive me COVID-19, që kanë kërkuar shtrim në spital apo rasteve në terapi intensive”.

“Një tjetër trend në rritje janë edhe rastet që kanë pësuar humbje jete. Të gjithë këta indikatorë tregojnë që virusi po vijon me të njëjtin intensitet transmetueshmërie dhe po paraqet raste me shenja klinike. Prandaj u drejtohemi si çdo ditë, qytetarëve që të mos e ulin vigjilencën dhe të zbatojnë masat e vendosura, të mbajnë maskën kudo ku nuk është e mundur të ruhet distancimi fizik, kurse bizneset të zbatojnë protokollet e miratuara, për të ruajtur punonjësit por edhe qytetarët të cilëve u shërbejnë”, tha ajo.

Ministria e Shëndetësisë dhe Mbrojtjes Sociale fton qytetarët të tregohen të kujdesshëm për respektimin e distancës fizike me njëri-tjetrin, evitimin e kontakteve, shtrëngimit të duarve dhe përqafimeve, ruajtjen e higjienës personale.

“Mbajtja e maskës është domosdoshmëri për të parandaluar përhapjen e infeksionit në ato ambiente ku nuk ruani dot distancën. Biznese, bar, kafe, restorante, zbatoni me rigorozitet protokollet higjieno-sanitare të sigurisë. Kryeni shërbimin vetëm në ambientet e hapura dhe jo të mbyllura, duke respektuar distancimin fizik sipas udhëzimit të autoriteteve shëndetësore”, tha Tomini.

Ajo u bëri thirrje qytetarëve të evitojnë festat apo ceremonitë me më shumë se 10 persona në këto ambiente, dhe për më tepër duhet të jenë të rrethit të ngushtë familjar.

“Respektimi strikt i masave të vendosura do të ruajnë shëndetin tuaj dhe njerëzve tuaj të dashur. Nëse keni shenja të sëmundjes telefononi në numrin e Urgjencës Kombëtare 127 dhe në linjën e gjelbër 0800 40 40 për këshillim psikologjik apo çdo informacion për COVID-19”, tha Tomini./atsh

Ministria e Shëndetësisë apel bareve dhe restoranteve të zbatojnë protokollet higjieno-sanitare Read More »

Ministria e Shëndetësisë: 64 raste të reja me COVID-19, 2 humbje jete dhe 54 të shëruar në 24 orët e fundit

Lajmi i fundit, Shendetesi / /

Gjatë 24 orëve të fundit janë kryer 371 testime për të dyshuar të prekur me COVID-19, nga të cilat janë konfirmuar 64 raste pozitive.

Shefja e Survejancës dhe Shërbimit të Inteligjencës Epidemik në Institutin e Shëndetit Publik, Eugena Tomini tha sot se “shpërndarja gjeografike e rasteve është si vijon: 15 raste në Tiranë, 13 në Krujë, 11 në Shkodër, 7 në Durrës, 4 në Lezhë, nga 3 raste në Kukës, Pukë, 2 në Kurbin, dhe nga 1 rast përkatësisht në Korçë, Elbasan, Vlorë, Berat, Mat, Pogradec”.

Në vendin tonë aktualisht janë 970 persona aktivë me COVID-19, kryesisht në Tiranë, Shkodër, Durrës.

MSHMS apel për bizneset bar-kafe, restorante, zbatoni me rigorozitet protokollet higjieno-sanitare të sigurisë. Kryeni shërbimin vetëm në ambientet e hapura dhe jo të mbyllura, duke respektuar distancimin fizik sipas udhëzimit të autoriteteve shëndetësore.

Tomini tha se “në 24 orët e fundit, referuar shërbimit infektiv, një paciente 78-vjeçare nga Tirana, e transferuar nga një spital jopublik, ka ndërruar jetë në spitalin Infektiv, megjithë trajtimin intensiv në reanimacion dhe një pacient 83 vjeçar nga Durrësi, në terapi intensive, i cili vuante nga hipertensioni”. “Ministria e Shëndetësisë dhe Mbrojtjes Sociale u shpreh ngushëllimet familjarëve të të ndjerëve”, tha ajo.

Tomini u shpreh se vijon të ketë shtrime në spitalin Infektiv ku aktualisht po trajtohen 84 pacientë, 11 prej tyre janë në terapi intensive, ndërsa 2 janë të intubuar.

Pavarësisht rasteve ditore të identifikuara pozitivë, lajmi i mirë është se në 24 orët e fundit janë shëruar 54 qytetarë, duke e çuar në 1438 numrin e të shëruarve që nga fillimi i epidemisë.

COVID-19 – Statistika (29 Qershor 2020)
Testime totale 26663
Raste pozitive 2466
Raste të shëruara 1438
Raste Aktive 970
Humbje jete 58 (Qarku Tiranë 32, Durrës 10, Fier 5, Vlorë 2, Shkodër 7, Kukës 1, Elbasan 1)
Shpërndarja gjeografike e rasteve aktive sipas qarqeve:
Tiranë 358
Durrës 198
Shkodër 155
Vlorë 100
Fier 47
Lezhë 39
Korçë 28
Kukës 18
Elbasan 13
Gjirokastër 7
Berat 6
Dibër 1/atsh

Ministria e Shëndetësisë: 64 raste të reja me COVID-19, 2 humbje jete dhe 54 të shëruar në 24 orët e fundit Read More »