Shendetesi

Shërohet një tjetër infermier nga COVID-19, shkon në 28 personeli mjekësor i shëruar

Ministrja e Shëndetësisë dhe Mbrojtjes Sociale, Ogerta Manasirliu ka ndarë lajmin e mirë që është shëruar edhe 1 infermier tjetër nga COVID-19.

Ajo ka lajmëruar se pas testit konfirmues në laboratorin e virologjisë në Institutin e Shëndetit Publik, ka dalë negativ. Manastilriu tha se numri në total i personelit mjekësor të shëruar ka shkuar në 28.

“Çdo personel i sistemit shëndetësor që e fiton betejën e tij me COVID-19 është një lajm që më gëzon pa masë! Edhe 1 infermier në Tiranë është shëruar pas testit konfirmues në laboratorin e virologjisë në ISHP. Shkon në 28 numri i personelit mjekësor të shëruar nga COVID-19″, tha Manastirliu.

Deri tani janë 165 pacientë dhe staf mjekësor që e kanë fituar betejën me COVID-19. /atsh

Shërohet një tjetër infermier nga COVID-19, shkon në 28 personeli mjekësor i shëruar Read More »

Kalo: Nëse do të vazhdojë ndërgjegjësimi do të kemi lehtësim gradual të masave

Mjeku Tritan Kalo, anëtar i Komitetit Teknik të epidemisë së shkaktuar nga koronavirusi, u shpreh se lehtësimi i masave në këto momente mund të kthehet në bumerang.

Kalo gjatë intervistës së tij ka theksuar se qytetarët duhet të ndërgjegjësohen për të shkëputur zinxhirin e infeksionit. “Kemi kaluar javën e katërt, jemi në fund të javës së pestë. Përgjithësisht kurba e rasteve tek të sëmurët me COVID është e tillë që dukuria shikohet nga fundi i javës së pestë. Jemi në atë periudhë që përcaktohet nëse do të kemi rritje, apo në atë pjesën e rrafshtë dhe më pas uljen graduale. Rritja e rasteve ka të bëjë me izolimin e tyre, por jo me numrin e të shtruarve në spital. Aktualisht kemi 52 të shtruar. Në 24 orët e fundit kemi pasur 23 të shëruar, duke e çuar në total 154, 27 janë mjekë dhe infermierë”, – tha Kalo.

“E rëndësishme është që masat e marra dhe izolimi i ndërgjegjësuar ka bërë që numri i rasteve të mos pësojë rritje të menjëhershme, çka e bën të pamundshme trajtimin në mjediset e spitaleve. Nëse do të vazhdojë ndërgjegjësimi në ato orë të lejuara, do të kemi kënaqësinë që pas disa javëve edhe te ne qeveria do të fillojë lehtësimin gradual të masave. Por lehtësimi në këto momente që flasim, mund të shndërrohet në një bumerang si në Japoni dhe Kore, që lirimi i menjëhershëm bëri që të kthehet një valë e dytë që është më vështirë për t’u përballuar”, – thekson KAlo.

“Janë 236 raste të fundit të testuara. Saktësia e tyre, tamponëve përcaktohet nga prodhuesi i tyre, ato që kemi importuar ne janë të certifikuara nga OBSH-ja dhe ndjeshmëria e tyre kalon 90%. Ne kemi përzgjedhur ato që janë më cilësor”, – tha Kalo.

Ai garantoi se “ne po e ndjekim pikë për pikë për të testuar ata që kanë simptoma, histori të kontaktit me të infektuarit, rrethi i parë, po të tjerë që janë izoluar që janë rrethi i dytë. Apo ata që vijnë nga zona të prekura. Po ka një keqkuptim mesazhi që ka dhënë presidenti i OBSH, thënia e tij është ‘testim, testim, testim kur është e domosdoshme’, por jo të gjithë popullatës, edhe Gjermania që e mendoi këtë u tërhoq, pasi dobishmëria që sjell testimi është kur dhe ku duhet”.

“I kam dëgjuar me kuriozitet mendimet e kolegëve. Në kohën që është epidemia e gripit, mes rasteve mund të ketë pasur edhe nga COVID, se simptomat janë të njëjta. Ajo që na bën të kërkojmë dhe synojmë, ekzistencën e COVID është lidhja e rastit. Vështirë të prihet me thikë nëse ka filluar në janar, shkurt apo mars. Ne i referohemi rastit të 8 marsit që kemi izoluar”, – tha Kalo.

Sipas tij, “distancimi fizik është hallka më e rëndësishme për shkëputjen e zinxhirit. Sa i përket rikthimit të infeksionit, mbi 65% të rasteve infeksioni kalon me shenja minimale si rrufë apo grip 2-3 ditor. Ne kemi futur të bëjmë disa testime në popullatë sa është niveli për të parë sa shtrihet apo është arritur imunizimi në popullatë”, – tha Kalo.

“Mjekët janë më të ekspozuarit. Unë nuk kam pasur asnjë simptomë dhe nuk kam arsye që të bëj arsye. Kuriozi i fut vetes panik të panevojshëm. Kemi pasur të infektuar, por 5 mjekë janë shëruar në 24 orët e fundit. Personeli që ka kontakt, hapi i parë është autokarantinimi dhe më pas përmes tamponit nëse janë të prekur”, – tha Kalo.

Lidhur gjendjen e pacientëve të shtruar, Kalo u shpreh se ata vuajnë mungesën e familjarëve. “Ne si personel mjekësor mundohemi që përveç suportit mjekësor të bëjmë edhe një suport psikologjik sepse është e qartë se individi i mbyllur vuan mungesën e këtij mjedisi, por duke qenë e përkohshme, ta mbushim ne këtë kohë qëndrimi në spitale. Në ditën e 12-14 përcaktojmë nëse kemi ose jo vazhdimësinë. Nëse rezultojnë negativë rikthehen në familje dhe i nënshtrohen një kontrolli të dytë. Tani nuk qarkullon vetëm COVID-19, por edhe infeksione të tjera, alergjitë stinore. Këta individë e vuajnë largësinë nga familja por ne mundohemi të krijojmë një mundësi relaksimi”, – tha ai.

Duke folur për vatrat në Elbasan e Shkodër, mjeku Kalo tha se “shifrat përditësohen çdo ditë, këto dy vatra të reja janë të lidhur me personat e infektuar, rrethi i tyre i ngushtë familjar që ka shkelur rregullat. Edhe në këto dy raste, nëse rregullat shkelen rreziku i infektimit është i lartë. Të qëndrojnë të distancuar për të shkëputur zinxhirin e infeksionit”, – vijoi Kalo.

“Do them dy mesazhe, kujdesi në QSUT është maksimal, se zbatojmë të njëjtat medikamente si e gjithë bota, por duhet të jemi të ndërgjegjësuar. Gjirokastra, Përmeti, Saranda, Erseka nuk kanë asnjë të infektuar, edhe pse ka afërsi gjeografike apo janë kthyer nga Greqia. Nëse respektohen rregullat, mundësia e shkëputjes së zinxhirit të jep rezultate të favorshme”, – garantoi Kalo. /atsh

Kalo: Nëse do të vazhdojë ndërgjegjësimi do të kemi lehtësim gradual të masave Read More »

Nënë Rukija 84-vjeçare lë Spitalin Infektiv për t’u kthyer në shtëpi

Nënë Rukija, plot 84 vjeç, ka lënë spitalin Infektiv e shëruar nga COVID-19. Lajmin e ka bërë të ditur ministrja e Shëndetësisë dhe Mbrojtjes Sociale, Ogerta Manastirliu.

Sipas saj, 8 pacientë janë kthyer në shtëpi në 24 orët e fundit të shëruar nga infeksioni.

Kjo shifër e rrit numrin e të shëruarve nga COVID-18 deri tani në 154 qytetarë dhe staf mjekësor që kanë mundur koronavirusin.

Shifrat e sotme të Ministrisë së Shëndetësisë dhe Mbrojtjes Sociale tregojnë se në 24 orët e fundit janë testuar 236 persona të dyshuar, prej të cilëve janë konfirmuar 17 raste të reja me COVID-19.

Në një komunikim me mediet paraditen e sotme, drejtoresha e Institutit të Shëndetit Publik, Albana Fico, tha se “në këto momente janë testuar 2989 raste të dyshuara dhe prej tyre janë të konfirmuar pozitivë me COVID-19, 400 raste”./atsh

Nënë Rukija 84-vjeçare lë Spitalin Infektiv për t’u kthyer në shtëpi Read More »

ISHP ribën apelin: Ruani shëndetin, lani duart

Larja e duarve dhe dezinfektimi janë çelësi për parandalimin e infeksionit nga koronavirusi COVID-19. Duke u nisur nga ky fakt sa i thjeshtë, aq edhe i domosdoshëm, Instituti i Shëndetit Publik ripërsërit edhe një herë apelin për larjen sa më të shpeshtë të duarve.

“Duhet të lani duart shpesh dhe tërësisht me sapun dhe ujë për të paktën 20 sekonda. Nëse sapuni dhe uji nuk janë të disponueshëm, mund të përdoret gjithashtu një solucion për duart me bazë alkooli (përqendrimi i alkoolit të paktën 60%)”, shprehet ISHP./atsh

ISHP ribën apelin: Ruani shëndetin, lani duart Read More »

Ambasadori Zingraf: Ruajtja e distancës shpëton jetë!

Ambasadori gjerman në Shqipëri, Peter Zingraf, shprehet lidhur me situatën aktuale që ka krijuar COVID-19, se “Ruajtja e distancës shpëton jetë!”

“Në luftën kundër koronavirusit në Gjermani, njësoj si në Shqipëri e kudo gjetkë, vlen e njëjta gjë: “physical distancing” shpëton jetë. Nuk na lejohet ta harrojmë këtë dhe duhet ta vazhdojmë të ruajmë distancën e të qëndrojmë në shtëpi!” – shprehet Zingraf.

Ne si Ambasadë, thekson ai, po japim kontributin tonë: nuk ka më vizitorë në Ambasadë, për kontaktet tona kujdesemi përmes lidhjeve telefonike dhe digjitale. Natyrisht na vjen keq që nuk mund të shkojmë në park apo breg të detit, por po kaq gëzohemi, që do të mund t’i rikuperojmë të gjitha këto pas krizës.

“Së bashku me Bashkimin Europian ne japim mbështetjen tonë për Shqipërinë në luftën kundër Koronas. Rruga e Shqipërisë çon drejt Europës, Gjermania qëndron në krah të shqiptarëve në sfidat e mëdha të të ardhmes së afërt: kapërcimi i pasojave të virusit Korona, rindërtimi pas tërmetit dhe vijimi i rrugës së reformave me sytë nga bisedimet, që na presin për anëtarësimin në BE”, shprehet ambasadori gjerman në Shqipëri, Peter Zingraf. /atsh

Ambasadori Zingraf: Ruajtja e distancës shpëton jetë! Read More »

Pipero: Rënia drastike e numrit të personave të infektuar, lajm optimist

Mjeku i njohur pranë Shërbimit Infektiv në Qendrën Spitalore Universitare “Nënë Tereza”, Pëllumb Pipero e cilësoi sot lajm optimist rënien drastike të numrave të personave të infektuar me COVID-19 në vendin tonë, por sipas tij është ende herët që të nisë festa.

Në një intervistë televizive Pipero u shpreh se “e kemi pritur si lajm optimist, por është shpejt për t’u gëzuar. Unë kam menduar se kjo javë do të ketë ulje të numrave, por jo shumë të madhe. Do jetë si të thuash si një sheshpushim. Kjo është një ecuri logjike e kurbave e epidemive në përgjithësi. Natyrisht, numrat do të kenë luhatje, një ditë më poshtë dhe një ditë më lart, por do të jetë gjithnjë poshtë asaj që ne e kemi quajtur pikun e numrave. Unë besoj që pikun kurba tek ne e ka arritur javën e kaluar. Gjithsesi është një lajm i mirë, sepse ishin rreth 180 mostra dhe kanë qenë vetëm 6 pozitive. Pra, do të thotë së është zgjeruar numri i kontakteve dhe përqindja e pozitivitetit ka rënë. Kjo është logjika e kësaj shifre”.

Lidhur me gjendjen e të shtruarve Pipero tha se “gjendja e të shtruarve është stabël. Natyrisht kemi raste në shërim e sipër dhe besoj se edhe sot do të ketë pacientë të tjerë që do të lënë spitalin. Kur them të shëruar, themi në një farë mënyrë të çliruar nga simptoma dhe nga sëmundja, por edhe nga kovidi, pasi personat janë negativë në fund të procesit, por ata duhet që të jenë edhe 2 javë në shtëpi dhe të kujdesen për veten. Ndërkohë, kemi pacientë të tjerë që vazhdojnë të luftojnë me sëmundjen duke u paraqitur nga forma nga mesatare, të lehta, të rëndë apo dy apo tri raste mjaft të rënda”.

Sipas tij, në vazhdim do të këtë raste të reja, por shtoi se ato do të jenë në një segment më të kufizuar në krahasim me javën e kaluar, kur numri i të prekurve kaloi mbi 20 persona”.

Pipero tha se Shqipëria ka kaluar gjysmën e parë të kësaj pandemie.

“Besoj se kemi kaluar gjysmën e parë të kësaj kurbe të epidemisë, që ishte më e vështirë, gjysma tjetër do të jetë më e gjatë, por do të ketë më pak numra. Çka do të thotë jo të festojmë dhe të gëzojmë, sepse është herët, por duhet të respektojmë rregullat e qeverisë dhe këshillat tona”, – tha Pipero.

Ai u shpreh se “duhet të përgatitemi, sidomos pensionistët dhe të sëmurët kronikë, që të qëndrojnë më gjatë në shtëpi dhe të gjithë të tjerët duhet të respektojnë rregullat”./atsh

Pipero: Rënia drastike e numrit të personave të infektuar, lajm optimist Read More »

Shkon në 27 numri i personelit shëndetësor të shëruar nga COVID-19

Një mjeke dhe 4 infermierë të prekur nga COVID-19, janë shëruar pas testit konfirmues.

Lajmi u bë i ditur nga ministrja e Shëndetësisë dhe Mbrojtjes Sociale, Ogerta Manastirliu, e cila thekson se në total deri tani janë shëruar 27 personel shëndetësor.

“Lajm i mirë. Edhe 5 të shëruar mes personelit shëndetësor gjatë 24 orëve të fundit. Një mjeke dhe 4 infermierë janë shëruar pas testit konfirmues nga laboratori i Virologjisë në Institutin e Shëndetit Publik”, thekson Manastirliu.

Ministrja shprehet se “shkon në 27 numri i mjekëve dhe infermierëve të shëruar nga COVID-19. Deri tani 154 qytetarë dhe staf mjekësor e kanë mundur COVID-19”./atsh

Shkon në 27 numri i personelit shëndetësor të shëruar nga COVID-19 Read More »

Manastirliu: Mirënjohje për punën e palodhur të mjekëve dhe infermierëve në vijën e parë

Mjekët dhe infermierët e spitalit Infektiv në Tiranë janë sot më shumë se kurrë heronjtë tanë, pasi ndodhen në vijën e parë të përballjes me COVID-19.

Ministrja e Shëndetësisë dhe Mbrojtjes Sociale, Ogerta Manastirliu publikoi sot një video nga puna e mjekëve dhe infermierëve në këtë spital, ku me përkushtim i shërbejnë pacientëve të konfirmuar me koronavirusin, që ka prekur gjithë vendet e botës.

“Mirënjohje për punën e palodhur të mjekëve dhe infermierëve në vijën e parë të përballjes me COVID-19”, – shprehet Manastirliu.

Mjekët me maska dhe uniformat speciale, po punojnë pa u lodhur dhe janë gjatë gjithë kohës në shërbim të pacientëve./atsh

https://www.facebook.com/OgertaManastirliu/videos/526227044763245/?t=0

Manastirliu: Mirënjohje për punën e palodhur të mjekëve dhe infermierëve në vijën e parë Read More »