Shendetesi

Zbulohen 35 molekula të reja për të luftuar COVID-19

Janë zbuluar 35 molekula të reja për të luftuar virusin SarsCoV2, falë një fuqie informatike.

Të përshkruara në faqen e internetit të ArXiv, studiuesit do të jenë në gjendje të bëjnë teste për të zbuluar nëse ato mund të bëhen ilaçe anti-Covid-19. Projekti po udhëhiqet nga kompania Sibylla Biotech dhe nga Instituti Kombëtar i Fizikës Bërthamore (INFN).

Molekulat, të cilat tani do të jenë në gjendje të fillojnë testimin e tyre laboratorik për të zbuluar nëse ato mund të bëhen ilaçe të ardhshme anti-Covid-19, funksionojnë duke parandaluar coronavirusin e ri që të lidhet në qelizat njerëzore.

Molekulat janë si dy xhepa që janë të vendosura në strukturën kryesore të dyerve të hyrjes të përdorura nga koronavirusi i ri për të pushtuar qelizat njerëzore, receptorin Ace2 i cili, përveç qelizave të sistemit të frymëmarrjes, gjendet në ato të shumë organeve të tjera, përfshirë zemrën dhe zorrët. /atsh

Zbulohen 35 molekula të reja për të luftuar COVID-19 Read More »

Kalo: E pamundur të manipulosh shifrat reale të të prekurve me COVID-19

Mjeku Tritan Kalo ka shpjeguar tendencën e ecurisë së rasteve me koronavirus në vendin tonë, duke e cilësuar kurbën në formën e sharrës e cila nuk është as e sheshtë, por nuk ka asnjë pikë shpërthimi ekstrem.

Në një intervistë për një nga mediet e vendit, Kalo sqaroi se manipulimet me shifrat e të prekurve nga COVID-19 janë të pamundura. I pyetur nëse mund të kalojmë periudhën pandemike në muajin maj, profesor Kalo tha se është e rrezikshme të bëhen parashikime të tilla, kjo pasi nuk dihet fundi i saj por edhe fillimi i këtij virusi nuk është qartë i përcaktuar.

“Parashikime të tilla janë fatale po të bëhen, sepse e gjithë bota është përpara një infeksioni që nuk dihet kur e ka fundin, dihet kur e ka fillimin por edhe atë fillim nuk e ka qartë të përcaktuar, ka shumë abuzime në lidhje me fillimin e pandemisë. Tendenca që thuhet për përfundimin në fillim të majit dhe që bota po fillon të hapet, niset nga fakti se numri i të shtruarve, dhe të infektuarve kanë tendence pozitive në rënie çfarë dikton ekonominë të marrë frymë por mbi të gjitha të marrë frymë mendja njerëzore e cila e mbyllur në një paraburgim virusal e bën njeriun të ketë çrregullime psikologjike. Këto çrregullime tek ne janë të shtuara edhe nga ato që janë trashëguar nga tërmeti i 26 nëntorit”.

Në lidhje më protokollin e trajtimit të pacientëve në spitalin Infektiv, prof. Kalo tha se janë duke u ndjekur protokolle të njëjta me ato që ka përdorur vendet e tjera si Kina, Koreja por sidomos Italia dhe Shtetet e Bashkuara.

“Protokollet janë të depozituara në Ministrinë e Shëndetësisë, në Taskforcë, në Shërbimin e Sëmundjeve Infektive. Protokolli është hartuar mbi bazën e të dhënave në Kinë, Kore, sidomos mbi atë italiane. Operohet me të sëmurët duke dhënë ato medikamente në përputhje me gjykimin e mjekut dhe situatës klinike, biologjike dhe skenografike, që paraqiten tek pacientë të ndryshëm. Jepen medikamente qe janë provuar si të efektshme edhe në vende të tjera, por duhet të kemi parasysh që nuk kemi një medikament specifik që vepron drejtpërdrejt mbi koronavirusin”, tha Kalo.

Kalo sqaroi se “shifrat nuk mund të manipulohen kurrë, dhe kjo është e palogjikshme. Për sa i përket testimeve, numri në përqindje i testimeve varion nga 9-12 %. Gjermania ka përqindjen më të lartë në botë për testimet. Testimi nuk është ai që zgjidh problemin. Kryesore është që së pari, të mos neglizhosh ata që kanë simptoma, së dyti, të gjithë personat e kontaktit dhe të atyre të kontaktit të dytë, që janë ata rrethorë-periferikë, por që hipotetikisht mund të kenë patur kontakte me kontaktin e personit të sëmurë. Po ta bësh si duhet këtë lloj shtrirje testimi, pozitiviteti do të kalojë në vlera më të larta. Kryesore është të testohet cilësisht dhe të mos neglizhohet asnjë vatër që shfaq këto shqetësime”.

Në lidhje me shtimin e testimeve në vend mjeku Tritan Kalo deklaroi se do të ketë rritje të testimeve në vend por që zgjerimi i tyre varet nga 3 elementë siç janë : niveli i infektimit në vend, kapacitetet laboratorike dhe mundësia e sigurimit të kiteve.

“Jam në dijeni që do të ketë zgjerim të testimeve, të paktën me sa jam në dijeni. Grupet përcaktohen pak nga pak dhe zgjerimi i tyre bazohet në nivel infektimi, në kapacitete laboratorike, dhe në mundësitë e sigurimit të kiteve. Thelbësore në këtë situatë është ndërgjegjësimi i njerëzve. Kyçi i artë është tek përgjegjësia e qytetarëve”. /atsh

Kalo: E pamundur të manipulosh shifrat reale të të prekurve me COVID-19 Read More »

Rrëfimi i kryeinfermierit Ilir Versula për ATSH: Si e mposhtëm frikën nga koronavirusi, në shtëpi mbaj maskë për të mbrojtur djalin 3-vjeçar

Ilir Versula punon si kryeinfermier në pavijonin e dytë të shërbimit Infektiv në Qendrën Spitalore Universitare “Nënë Tereza”, i njohur ndryshe edhe si spitali COVID 1.

Në një rrëfim për Agjencinë Telegrafike Shqiptare, Versula i cili prej 12 vitesh punon në QSUT, tregon vështirësitë e të qenurit në frontin e parë të luftës ndaj COVID. Ai e nis punën çdo ditë në orën 7 të mëngjesit për ta përfunduar atë në orët e vona të mbrëmjes.

“Unë e nis punën që orën 7 të mëngjesit deri në orët e vona. Nuk ka një orar fiks kur duhet të lësh punën, por në varësi të situatës. Ka pasur plot raste që kam ndenjur edhe tërë natën. Edhe ne, si të gjithë njerëzit kemi frikën se mos infektohemi por kjo frikë është deri kur mbërrijmë në punë, më pas ikën kjo frikë. Duke i shërbyer pacientëve ne heqim edhe frikën tonë. Gjëja e parë që bëra si kryeinfermier në ditët e para, ishte t’i hiqja frikën pjesës tjetër të infermierëve. Në fakt, kemi pasur një shembull kurajoje për këtë gjë. Profesoreshë Najada na tregoi më së miri që edhe pse gjithçka ishte situatë e re dhe e panjohur për ne, ajo që në ditën e parë hynte tek çdo i sëmurë në gjendje të lehtë apo të rënduar. Profesoreshë Najada që nga dita e parë e deri tani, nuk ka hezituar në asnjë moment të hyjë tek çdo i sëmurë dhe t’i shërbejë çdo të sëmuri. Një shembull i vërtetë kurajoje”, rrëfeu Versula për ATSH-në.

Ai tregon se pasi përfundon punën, i duhet të qëndrojë me maskë në shtëpi për të garantuar siguri për djalin 3-vjeçar. “Unë kam një djalë 3 vjeç dhe e kam mjaft të vështirë të ruaj distancën me të. Nuk e kisha menduar kurrë që do të jetonim në një situatë kaq shumë të vështirë. Djalin e kam në shtëpi por menjëherë pasi përfundoj punën, gjëja e parë që bëj është të bëj banjo. Më pas vendos menjëherë maskën dhe e mbaj atë gjatë gjithë kohës edhe në shtëpi. Nuk mund ta mohoj që për një djalë 3 vjeç që kërkojë të luajë më babanë e tij, kjo nuk është normale por t’i qëndrosh larg tij, është sfidë e madhe për mua”, u shpreh Iliri.

“Prindërit nuk i kam takuar që prej ditës së parë, pra të konfirmimit të rastit të parë në Shqipëri me COVID. Pasi mbaroj punën, i përshëndes në distancë por nuk mund t’i takoj si më parë apo të mund të qëndroj në shtëpi tek ta. Mundohem të mos rrezikoj prindërit, sepse jam çdo ditë në shërbim të pacientëve që janë pozitivë ndaj COVID-19″, tregon ai.

Ditët e para për të gjithë personelin, përfshirë edhe kryeinfermierin Versula, ishin tejet të vështira edhe për një fakt tjetër.

“Në fillim ishte shumë e vështirë, sepse ishte diçka e re dhe e panjohur për të gjithë mjekët dhe infermierët. Gjëja e parë ishte të hiqnim frikën e vetë personelit dhe duhet të hyje vetë ti i pari tek pacientët, që të mund të bënin të njëjtën gjë edhe infermierët e tjerë. E panjohura me këtë virus, ishte frika e parë për të gjithë ne. Kështu që, menjëherë organizova punën duke dhënë shembullin tim, më pas pjesa tjetër bëri të njëjtën gjë. Problemi i ditëve të para ishte edhe sepse kishte fluks të sëmurësh por tanimë gjendja është stabilizuar. Duke mbështetur njëri-tjetrin, ia dolëm mbanë që të kishim një organizim në mënyrën sesi duhej përballuar kjo situatë”, tregon kryeinfermieri.

Për Versulin, të gjitha pajisjet mjekësore që personeli mjekësor mban veshur tërë kohën janë të sikletshme për shkak se të shkaktojnë edhe vështirësi në frymëmarrje apo dëgjim. Por, motivi i vetëm që ua lehtëson këtë gjë, është shërimi i pacientëve.

“Ne të gjithë jemi të pajisur me të gjitha masat mbrojtëse të nevojshme për t’u ruajtur nga ky virus. Por, përveç frikës nga mënyra sesi i heqim masat mbrojtëse pasi mbyllim punën, është edhe mënyra sesi i mbajmë ato gjatë kohës që jemi në shërbim të pacientëve. Maskat janë të sikletshme, të kufizojnë shikimin për shkak të syzeve, të kufizojnë dëgjimin, të japin dhimbje koke të vazhdueshme sepse syzet janë të shtrënguara pas kokës, të lodhin, të vrasin nga shtrëngimi si dhe të japin vështirësi në frymëmarrje. Por, këto nuk kanë rëndësi për ne, sapo mësojmë që një tjetër pacient është shëruar. Pavarësisht vështirësive të maskave, ne do të bëjmë gjithçka që është e mundur për të shëruar çdo pacient të sëmurë. Në punë nisem me zemrën që pacientë të tjerë do të shërohen edhe sot. Jemi bërë njësh bashkë me pacientët. Nuk ka intereson frika jonë por shërimi i tyre”, u shpreh ai.

Në fund të intervistës për ATSH-në, Versuli ka një mesazh për të gjithë qytetarët.

“Qytetarët duhet të na japin një dorë. Ne jemi duke shërbyer por ata duhet të tregohen të përgjegjshëm dhe të kujdesshëm për shëndetin e tyre dhe të të afërmve të tyre”./atsh

Rrëfimi i kryeinfermierit Ilir Versula për ATSH: Si e mposhtëm frikën nga koronavirusi, në shtëpi mbaj maskë për të mbrojtur djalin 3-vjeçar Read More »

ANSES: Mos përdorni dezinfektues mbi frutat e perimet, rrezik intoksikimi

Në kontekstin e pandemisë COVID-19, Autoriteti Kombëtar i Ushqimit në vazhdimësi ka publikuar materiale shkencore, mbi sigurinë e ushqimit dhe Covid-19.

Më poshtë ANSES , Agjencia Franceze e Shëndetit dhe Sigurisë në Ushqim, Mjedis dhe Punë ka dhënë rekomandime për ushqimin, blerjen dhe pastrimin.

A mund të ha fruta dhe perime të papërpunuara pa ndonjë përgatitje të mëtejshme?

ANSES ekzaminoi mundësitë e sëmundjes COVID-19 a transmetohet përmes ushqimit, në bazë të të dhënave shkencore në dispozicion. Këtu janë përgjigjet, për pyetjet më të shpeshta.

A mund të sëmuren kafshët në fermë dhe të na infektojnë?

Nuk ka prova se kafshët në fermë, ose ushqimet që rrjedhin prej tyre, luajnë një rol në përhapjen e virusit që shkakton COVID-19. Çdo transmetim përmes ushqimit do të ishte i mundur vetëm nëse ushqimi ishte ndotur nga një pacient ose një person i infektuar me virus, kur e prekni atë me duar të kontaminuara ose e ekspozoni atë në pikat infektive të prodhuara gjatë kollitjes ose teshtitjes.

A mund të na sëmurë ushqimi i kontaminuar?

Aktualisht nuk ka asnjë provë shkencore që sugjeron që virusi mund të na kontaminojë përmes aparatit tretes. Sidoqoftë, mundësia që trakti respirator të infektohet, kur përtyp ushqim të kontaminuar nuk mund të përjashtohet plotësisht. Nëse jeni i sëmurë, duhet të shmangni trajtimin e ushqimit dhe gatimit për të tjerët.

A është vërtet e nevojshme të gatuani frutat dhe perimet?

Jo. Pas blerjes, frutat dhe perimet duhet të lahen plotësisht me ujë të pijshëm para se të gatuhen ose hahen. Asnjëherë mos përdorni dezinfektues të tillë si zbardhues ose pastrues, pasi ato mund të jenë toksike nëse nuk shpëlahen siç duhet. Është e panevojshme të përdoret uthull e bardhë për të shpëlarë frutat dhe perimet, pasi nuk ka efekt virucidal. Pas larjes së ushqimit me ujë të pijshëm, fshirja e tij me një peshqir letre me ndihmon në heqjen e çdo grimce virale. Kur është e mundur, frutat dhe perimet që duhet të konsumohen të papërpunuara, të qërohen.

Si duhet të përgatiten perimet nëse nuk duhen ngrënë të papërpunuara?

Filloni duke larë perimet tuaja në ujë të pijshëm.
Gatimi i plotë në një temperaturë të brendshme prej 70 ° C rekomandohet për të mos aktivizuar shumë mikroorganizma. Ai gjithashtu mund të shkatërrojë çdo virus SARS-CoV-2 potencialisht i pranishëm (ky virus i veçantë është i ndjeshëm ndaj një temperature prej 63 ° C për 4 min.).
Mos harroni të lani perimet në ujë të pijshëm dhe t’i fshini me një peshqir letre për të zvogëluar rrezikun e transmetimit përmes kontaminimit të tërthortë, për shembull përhapjen e virusit në duart tuaja.

A zbatohen këto rregulla të higjienës edhe për paketimin?

Paketimi i ushqimit mund të jetë kontaminuar kur trajtohet nga një person i infektuar (prekur me duar të papastra, teshtitje, etj.). Edhe pse virusi që shkakton sëmundjen nuk mund të mbijetojë për më shumë se tre orë në sipërfaqet e paketimit, mund të merrni masa paraprake shtesë duke fshirë paketimin me një leter të lagur. Për sa kohë që produktet e paketuara nuk kanë nevojë për frigorifer, gjithashtu mund t’i lini për dy ose tre orë pasi t’i çoni në shtëpi nga dyqanet. Për ushqimet që duhet të mbahen në frigorifer, hiqeni paketimin e jashtëm (p.sh. kartonin rreth enëve me kos) përpara ruajtjes kur është e mundur. Natyrisht, duart duhet të lahen plotësisht para dhe pas trajtimit të kësaj paketimi.

A është uthulla e bardhë e efektshme në shkatërrimin e viruseve në paketim?

Studimet kanë treguar që uthulla e bardhë është e paefektshme në shkatërrimin e viruseve në ushqim ose paketimet e tyre.

Çfarë masash paraprake duhet të marr kur kthehem në shtëpi nga dyqanet?

Së pari, duhet të lani duart. Edhe pse virusi që shkakton sëmundjen nuk mund të mbijetojë për më shumë se tre orë në sipërfaqet e paketimit, mund të merrni masa paraprake shtesë duke fshirë paketimin me një peshqir letre me një përdorim të lagur. Për ushqimet që duhen mbajtur në frigorifer, kurdo që të jetë e mundur, hiqni paketimin e jashtëm (p.sh. kartonin rreth enëve me kos) dhe pastroni produktet me një peshqir të lagur letre para ruajtjes. Mos harroni të lani duart përsëri menjëherë me pas.

A duhet ta ngroh përsëri bukën?

Buka piqet në një temperaturë të lartë gjatë përgatitjes, gjë që eliminon viruset. Pjekesit, si profesionistët e tjerë të ushqimit, janë shumë të vetëdijshëm për rregullat e higjenës (larja e rregullt e duarve dhe / ose veshja e dorezave gjatë shërbimit, bukë e vendosur në canta, etj.). Rreziku i transmetimit të virusit është i papërfillshëm në këto kushte, kështu që nuk ka nevojë të ri-ngrohni bukën tuaj.
Nëse jeni i sëmurë, duhet të merrni të gjitha hapat për të shmangur trajtimin e bukës dhe përgatitjen e ushqimit.

A mund të kontaktohet COVID-19 përmes kontaktit me sipërfaqet e kontaminuara?

Disa studime të kryera në kushte eksperimentale që ndryshojnë nga ato të hasura në jetën e përditshme, kanë treguar që virusi mund të mbetet infektiv në shkallë të ndryshme në sipërfaqe të inerteve. Rreziku i kontaktit me virusin duke trajtuar objektet e kontaminuara nuk mund të përjashtohet teorikisht, por është i ulët. Kjo është arsyeja pse është e rëndësishme të ndiqni këto rregulla: mos e prekni fytyrën gjatë blerjes dhe lani duart kur të ktheheni në shtëpi dhe pasi të vini ne vendet e tyre artikujt ushqimor.

Cila është mënyra më e mirë për të pastruar sipërfaqet e kontaminuara potencialisht?

Sipërfaqet e kontaminuara potencialisht mund të pastrohen me produkte shtëpiake të zakonshëm (sapun, pastrues, etj.). Nëse përdorni zbardhues, trajtojeni me kujdes këtë produkt pasi është shumë oksidues dhe kaustik për lëkurën, mukozën dhe materialet e tjera.
Telefonat (në kontakt të drejtpërdrejtë me duart dhe fytyrën), tastierat e kompjuterit, tabletat me ekran me prekje dhe dorezat e dyerve mund të jenë vektorë për transmetimin e virusit dhe duhet të pastrohen me një produkt të përshtatshëm (për shembull, letrat e lagura dezinfektuese që mund të përdoren në prekje) – copa, peshqirë letre të njomur në 70 ° – 70% – alkool për materiale të tjera)/atsh

ANSES: Mos përdorni dezinfektues mbi frutat e perimet, rrezik intoksikimi Read More »

35 pacientë të shtruar në spitale, asnjë në respirator

Kryeministri Edi Rama deklaroi sot se “në këtë moment që flasim nuk kemi asnjë pacient në respirator, që është edhe sfida më e vështirë në përballjen me COVID-19”.

Në një komunikim direkt me qytetarët, Kryeministri Rama foli për situatën aktuale të të infektuarve me COVID-19 në Shqipëri.

“Me shumë rëndësi është që gjithmonë të kujtohemi se e gjithë kjo përpjekje, sakrificë, stres që na ka krijuar një situatë krejt e befasishme në fund të ditës vlerësohet me rezultatin që na jep në vijën e zjarrit, aty ku bëhet edhe përballja e madhe për të mbrojtur jetë të kërcënuara. Në spitalet që janë të përgatitura për të luftuar me këtë armik të padukshëm”, tha Rama.

Kryeministri theksoi se “aktualisht janë 35 pacientë gjithsej në spitale, një numër goxha i ulët krahasuar me kërcënimin potencial”. “Kemi vetëm 7 pacientë në reanimacion dhe asnjë në respirator”, tha Rama. /atsh

35 pacientë të shtruar në spitale, asnjë në respirator Read More »

Ministria e Shëndetësisë: 16 raste të reja, shkon në 766 numri i të prekurve

Ministria e Shëndetësisë dhe Mbrojtjes Sociale ka bërë të ditur se nga rezultatet e testimeve në 24 orët e fundit janë konfirmuar 16 raste pozitive me COVID-19, duke e çuar numrin e të infektuarve në 766.

Ekspertja e Institutit të Shëndetit Publik, Dr. Eugena Tomini, tha sot në komunikimin e drejtpërdrejtë me mediet se “gjatë 24 orëve të fundit janë testuar 270 persona të dyshuar me COVID-19. Nga rezultatet e testimeve janë konfirmuar 16 raste pozitive me COVID19, nga të cilat 9 raste janë në Tiranë, 5 raste në Krujë, 1 raste në Shkodër dhe 1 rast në Berat”.

Sipas saj, deri në këto momente janë testuar 8028 raste të dyshuara dhe prej tyre janë të konfirmuar pozitivë me COVID-19, 766 raste.

“Nga 281 pacientët aktivë me COVID19 në vendin tonë vetëm 10 % po trajtohen në dy spitalet COVID ndërsa rreth 90% e tyre janë në vetëizolim me simptoma të lehta ose janë pa simptoma dhe monitorohen në mënyrën sistematike nga mjeku i familjes”, – tha Tomini.

Tomini u shpreh se “deri tani 30 qytetarë e kanë humbur betejën me këtë sëmundje, megjithë përpjekjet e stafit mjekësor”.

“Harta e të prekurve nga COVID-19 zgjerohet në Tiranë, Krujë Shkodër dhe Berat”, – shtoi ajo.

Shpërndarja gjeografike e rasteve pozitive dhe e shërimeve, është si vijon:

Bashkia Të prekur Të shëruar
Tiranë 318 202
Shkodër 108 71
Krujë 102 9
Durrës 42 38
Fier 37 32
Kurbin 31
Korçë 19 18
Elbasan 18 15
Kukës 18 10
Lezhë 14 14
Has 14 12
Kavajë 9 8
Lushnje 7 4
Vlorë 5 4
Pukë 5 4
Mirditë 5 3
Rrogozhinë 4 4
Tropojë 4 4
Berat 4 2
Mallakastër 1 1
Mat 1 /atsh

Ministria e Shëndetësisë: 16 raste të reja, shkon në 766 numri i të prekurve Read More »

24 të shëruar gjatë 24 orëve të fundit, 455 në total fituan betejën

Gjatë 24 orëve të fundit, 24 pacientë të tjerë i janë shtuar listës së të shëruarve, duke e çuar totalin e të shëruarve nga COVID-19 në 455.

Ekspertja e Institutit të Shëndetit Publik, Dr. Eugena Tomini, në komunikimin e drejtpërdrejtë me mediet tha sot se “24 orët e fundit, 24 pacientë të tjerë i janë shtuar listës së të shëruarve duke e çuar totalin e tyre në 455”.

Sipas saj, pavarësisht luhatjeve të të dhënave ditore situata vazhdon të jetë e kontrolluar.

“Tregues për këtë janë numri i qëndrueshëm i shtrimeve në spitale dhe numri i ulët i pacientëve që kanë pasur nevojë për frymarrje të drejtuar. Që kjo situatë të vazhdojë të jetë e kontrolluar dhe në kushtet e lehtësimit të disa masave, Ministria e Shëndetësisë dhe Mbrojtjes Sociale i bën thirrje të gjithë qytetarëve që të vazhdojnë të respektojnë masat e vendosura, të respektohet distancimi fizik dhe ruajtja e higjienës personale”, – tha Tomini.

Tomini u shpreh se “këto masa duhet të respektohen makimalisht edhe brenda rretheve familjare, duke shmangur vizitat tek të afërmit për çdo lloj arsye”.

Nëse keni shenja të sëmundjes COVID19 telefononi numrin e urgjencës 127. Për çdo pyetje apo informacion rreth COVID19 telefononi në linjën e gjelbër 0800 40 40./atsh

24 të shëruar gjatë 24 orëve të fundit, 455 në total fituan betejën Read More »

Pëllumb Pipero: Ja kur do t’i rikthehemi normalitetit të mëparshëm

Doktori i njohur, Pëllumb Pipero është i ftuar mbrëmjen e sotme në emisionin “Open” në Top Channel ku foli për hapjen graduale. Pipero tha se nuk ka vend për të dramatizuar situatën, por realitetit të mëparshëm do t’i kthehemi kur të dalë vaksina.

“Unë nuk shikoj se ka vend për të dramatizuar situatën. Tani normalitetit që kemi pasur nuk mund t’i rikthehemi deri në momentin që të kemi një vaksinë.

Por nuk ka vend për dramatizme. Unë besoj jam më radikal. Unë nuk jam pro këtyre maskave me ndarje xhami etj, por unë them që mjafton vetëm një maskë, kjo pasi virusi përhapet me anë të spërklave”, tha Pipero.

Pëllumb Pipero: Ja kur do t’i rikthehemi normalitetit të mëparshëm Read More »