Problematika

Ministri i Brendshëm, Sandër Lleshaj, gjatë një komunikimi me drejtuesit qendrorë dhe drejtorët vendorë të Policisë dhe ata të Kufirit dhe Migracionit për luftën antikanabis, masat kundër migracionit të paligjshëm, si dhe çështje të rendit e sigurisë publike, theksoi se integriteti i Policisë është formula drejt suksesit.

Ministri Lleshaj e nisi komunikimin me një çështje që, siç tha ai, ka filluar të marrë vëmendje të shtuar, migracionin e paligjshëm dhe trafikimin.

“Ditët e fundit është goditur një rrjet trafikimi emigrantësh të paligjshëm, rrjet që përfshinte dhe punonjës e drejtues të lartë të policisë së shtetit. Lufta e Policisë së Shtetit për të goditur rastet e inkriminuara në radhët e saj në dobi të rritjes së integritetit të saj është prioritet, pasi integriteti është formula e vetme që do na çojë tek suksesi dhe misioni i Policisë së Shtetit”, – tha Lleshaj.

“Migracioni ka pësuar rritje, ashtu si në të gjithë Europën. Flukset migratore shndërrohen edhe në viktima të trafikut dhe duke rritur veprimtarinë kriminale. Kjo veprimtari kërkon një vëmendje të shtuar të policisë dhe Ministrisë së Brendshme”, – vijoi ai.

“Mbetet detyrë e madhe që të gjitha strukturat, por veçanërisht të migracionit dhe kufirit, policia kriminale dhe e rendit të rrisin bashkëpunimin me njëri-tjetrin, të forcojnë kontrollet dhe punën operative për të goditur, aty ku është e nevojshme të goditet. Rasti i para disa ditëve nga SHBÇA është një sinjal që duhet vlerësuar nga të gjithë për të parë nivelin e angazhimit integritetit dhe përgjegjësinë për ushtrimin e detyrë për ata që kanë përgjegjësi të kësaj natyre. Duhet në mënyrë të fortë të merren masa për migracionin e paligjshëm dhe veprimtarisë kriminalë që fshihet pas. Jemi bërë dëshmitarë të pranisë së këtyre emigrantëve që lëvizin lirshëm në rrugët e vendit, të pa kontrolluar, pa adresuar. Ky kontingjent personash, duhet të adresohet dhe të merren masat përkatëse ligjore, që ky fluks të ndalet që në kufi dhe sipas kritereve ligjore, për ata që kanë vërtetë nevojë”, – theksoi ministri Lleshaj.

Lidhur me luftën ndaj kultivimit dhe trafikimit të kanabisit, Lleshaj tha se fundi i qershorit është dhe limiti për ta mbyllur këtë betejë.

“Tentativa për ta mbajtur gjallë këtë fenomen nuk ka vdekur. Fenomeni është goditur rëndë. Por, shpresat e ndokujt për të gjetur hapësirë nuk ka vdekur. Informacionet e ndryshme që marrim edhe për këtë vit tregon se ka tentativa të shkurtra, që konsistojnë në zonat të ndryshme të vendit të cilat tregojnë që nevoja për një agresivitet të shtuar në luftën kundër kultivimit dhe trafikimit të kanabisit është e lartë dhe duhet të merren masat e nevojshme për azhornimin e planeve, që ekzistojnë dhe për t’i zbatuar me efektivitet të lartë”, – tha Lleshaj.

“Shtimi i kapaciteteve, dronet, monitorimet ajrore dhe përmes bashkëpunimit me FA, duhet të shërbejnë si motivim për të rritur intensitetin e luftës në këtë sektor që duhet të mbyllet shumë shpejt. Ne duam që brenda muajit qershor të mbyllet përpjekja e Policisë së Shtetit me kanabisin. Pas kësaj s’do merremi më me bimët, por me personat përgjegjës. Lufta ndaj kanabisit nuk është e vetmja përgjegjësi e Policisë së Shtetit, që është organ ligjzbatues. Kjo do të thotë që policia duhet të kujdeset për veprimtarinë kriminale që në thelbin e saj ka shumë aktorë, mes të cilëve kemi edhe zyrtarët që administrojnë territorin. Kërkohet që për çdo rast kultivimi të kanabisit në çdo cep të territorit të nisin procedimet penale jo vetëm për trafikuesit e kultivuesit, por edhe për zyrtarët që janë në atë cep të territorit ku kryhet ajo veprimtari kriminale”, – vijoi Lleshaj.

“Kemi parë gjatë kësaj periudhe që ka patur rezonanca të ndryshme nga autoritete vendore, që shpesh kanë qenë mjaft bashkëpunuese, ku policia është mbështetur në informacion me kërkesa e ndihmë në terren, por ka patur dhe raste kur autoritetet vendore e konsiderojnë këtë si punë të policisë, gjë që nuk pranohet, pasi në çdo rast ku identifikohet një vepër penale e kësaj, duhet të referohen jo vetëm personat e kapur, por dhe përgjegjësit e territorit. Lufta ndaj kanabisit bëhet në kuadër të një plani kombëtar për luftën ndaj kanabisit dhe angazhimi duhet të jetë kombëtar. Detyra juaj duhet të jetë për të identifikuar ata të cilët nuk marrin pjesë në këtë detyrim ligjor dhe ti vini përpara përgjegjësisë ligjore ato që hezitojnë për shkak të paaftësisë, papërgjegjshmërisë, apo bashkëpunimit kriminal apo të papërshtatshëm me elementët kriminal”, – u shpreh ministri i brendshëm.

Lufta ndaj krimit mjedisor duhet të shihet me prioritet, tha ministri Lleshaj.

“Konstatoj për fat të keq se kjo luftë nuk ka gjetur vëmendjen e duhur. Tashmë jemi në situatën që krimi mjedisor është vepër penale që parashikohet qartësisht nga një numër i madh nenesh në kodin penal. Duhet të theksoj që në pikëpamje të politikës penale. Dëmi publik në shumë raste tejkalon ndjeshëm dëmin që sjell nga krime të caktuara. Dëmi që vjen nga krimi mjedisore sjell pasoja ekstreme për jetën e shëndetin e qytetarëve dhe goditja ndaj tij duhet të jetë pa kompromis, e pa ndërprerë. Ndotja e lumenjve, një ndër fenomenet më të rënda në Shqipëri. Çdo gjë që ne hedhim në lumë, ose e gjejmë në det, ose na kthehet në tryezë, ku ushqehemi”, – tha ai.

“IKMT çdo javë duhet të realizojë raporte me shkrim për aksionet e kryera në të gjithë vendin, në çdo drejtori vendore, ku duhet të ketë përditë ndërhyrje kundër krimit mjedisore, aq më tepër kur hyjmë në sezonin turistik, ku synohet të kompensohet sado pak dëmi i shkaktuar tek qytetarët nga izolimi për shkak të pandemisë. Për turizmin mbetet detyrë e rëndësishme që policia të mbështesë autoritetet e ndryshme edhe këtë sezon veror”, – tha ministri Lleshaj

Sa i takon OFL, Lleshaj tha se “Operacioni Forca e Ligjit, është maja e shigjetës që duhet të godasë krimin e organizuar aty ku atij i dhemb fort, financat dhe pasurinë e tij. Pati një periudhë të ndryshimit të ritmit për shkak të pandemisë dhe kërkohet që të gjithë strukturat të vijojnë me ritëm të shtuar për të vijuar misionin e ngarkuar nga ligji për këtë mision. Këtu kërkohet që e gjithë puna të realizohet sipas një radhe ku të parët të jenë ato që kanë llogari më të madhe me ligjin”.

“Ne sigurisht këtë vit kemi treguesit më të mirë sa i takon luftës kundër krimit të organizuar. Shtimi intensitetit të lëvizjes, do të shtojë edhe mundësitë e grupeve kriminale për të goditur. Rastet e ditëve të fundit, tregon që krimi tenton të shfrytëzojë çdo hapësirë të mundshme për të goditur”, – tha Lleshaj.

“Drejtoria e standardeve profesionale, SHÇBA si dy trupa të specializuara për integritetin, duhet të vendosin të gjitha ingranazhet në punë, që kushdo të kuptojë qartë që hapësirë për punonjës të cilët nuk meritojnë dinjitetin e uniformës nuk do ketë. Çdo drejtues është përgjegjës për të garantuar që strukturat që ka në varësi dhe që mban përgjegjësi ligjore, duhet të jenë të pastra nga korrupsioni, letargjia… etj.”, – vijoi ministri i Brendshëm. /atsh

Ministrja e Arsimit, Sportit dhe Rinisë, Besa Shahini dënoi rëndë ngjarjen ku një 65-vjeçar abuzoi me një 15-vjeçare dhe tha se rasti i është përcjellë organeve të drejtësisë.

Gjatë fjalës së mbajtur sot në Kuvend, Shahini theksoi se, “ne kemi përgjegjësi institucionale të ndryshojmë kulturën në shkolla, ashtu sikurse gjithë secili nga ne ka përgjegjësi të ndryshojë kulturën individuale në rrethin e tij”.

“Grupi i organizatave joqeveritare për mbrojtjen e grave, më ka nisur një e-mail ku kërkojnë që Ministria e Arsimit të përgjigjet për rastet individuale të abuzimit me fëmijët. Dua të bëjë të qartë, – tha Shahini, – se as sot, as dje, as kurrë për sa jam unë ministre, Ministria e Arsimit nuk do të prononcohet për rastet individuale të abuzimit, sepse kjo kontribuon në riabuzimin që po i bëni viktimave, duke kërkuar detaje të abuzimit dhe duke i identifikuar ato”.

Ministrja tha se, strukturat arsimore do të flasin gjithmonë për fenomenin dhe marrjen e masave parandaluese dhe ndëshkuese në mbështetje të fëmijëve dhe të të rinjve.

Ajo i bëri apel edhe organizatave joqeveritare të rrisin informacionet sensibilizuese dhe informuese për personat që duhet të mbrojnë. Këto organizata paguhen nga donatorët dhe qeveria për të mbrojtur gratë dhe fëmijët dhe për të raportuar rastet e dhunës.

“Kemi kërkuar hetim urgjent administrativ për protokollet që zbatohen nga OJF-të që paguhen nga buxheti i shtetit për të ofruar shërbim publik për mbrojtjen e fëmijëve. Ministria e Arsimit ka kërkuar gjithashtu që Urdhëri i Psikologut të raportojë për trajnimet, që ka zhvilluar për çështjet e ngacmimit seksual, me psikologët sidomos ato që punojnë në gjykata dhe ata që punojnë në shkolla si dhe ju kemi dërguar bashkive kriteret që duhet të plotësojnë rojet dhe stafi sanitar, për personat që punësohen nëpër shkolla”, – tha Shahini.

Sipas saj, bashkitë duhet të kenë parasysh që stafi që punon në shkolla të jetë me integritet.

“Kemi kërkuar nga autoriteti i medieve audiovizive që të marrin masa urgjentisht ndaj medias që kishte botuar të plotë dëshminë e një të mituri të abuzuar, dëshminë policore”, – tha Shahini.

Ajo i bëri apel AMA-s të mos presë nxitje nga Ministria, por të veprojë për këto raste që siç tha ajo, “abuzojnë për së dyti duke raportuar këto detaje që shkelin të drejtat bazike të fëmijëve”.

Ministrja tha se, përpara pandemisë në bashkëpunim me institucionet e linjës ka nisur një investigim serioz të të gjitha hallkave parandaluese dhe reaguese të këtyre rasteve dhe kemi dërguar siç tha ajo, “një platformë të cilën do të ta parashtrojmë në parlament në mënyrë që ta përmirësojmë këtë sistem”.

“Ne si Ministri e Arsimit kemi vendosur të dyfishojmë numrin e psikologëve dhe punonjësve socialë nëpër shkolla, dhe të nisim një fushatë informuese për nxënësit për të drejtat e tyre se si i mbron rregullorja e arsimit parauniversitar, ashtu dhe Kodi Penal”, – tha Shahini.

“Por dua të përsëris, KJO NUK MJAFTON. Nëse duam të parandalojmë ngacmimin, abuzimin, dhunën dhe diskriminimin e fëmijëve, grave dhe grupeve të brishta, duhet që secili nga ne të punojë për të luftuar sistemin patriarkal që denigron grupet e brishta dhe mundëson abuzimin”, – u shpreh ajo. //atsh

Ministrja e Arsimit, Sportit dhe Rinisë, Besa Shahini ka reaguar ndaj rastit të abuzimit seksual ndaj një të miture në Babrru, duke marrë masa të menjëhershme të shkarkimit nga puna të stafit të shkollës të përfshirë direkt apo jo në ngjarje.

Në reagimin e saj, ajo thotë se “jam zemërthyer për secilin rast të ngacmimit apo abuzimit seksual me të mitur, të cilin nuk kemi arritur ta parandalojmë. Për secilin rast të zbuluar apo denoncuar janë marrë menjëherë këto masa: pezullim apo shkarkim nga puna menjëherë, e të gjithë stafit të shkollës të cilët kanë qenë të përfshirë direkt apo indirekt në këto raste (përfshirë drejtues, psikologë apo mësues kujdestar që nuk kanë qenë të përfshirë në rast, por kanë patur për detyrë të kujdesen për mirëqënien e nxënësve). Hetim i thelluar i gjendjes së përgjithshme në shkollë përmes intervistave me nxënës, prindër dhe komunitetin shkollor. Ofrimi i shërbimit psiko-social, dhe mbështetje e përgjithshme shkollore dhe pas shkollore, për viktimat e ngacmimit apo abuzimit”.

Më tej, ajo thekson se organet e drejtësisë kanë ndjekur penalisht secilin nga rastet e denoncuara.

“Pra, nuk ka “kulturë mosndëshkueshmërie” në Shqipëri ndaj rasteve të abuzimit seksual, siç ishin shprehur disa OJF. Kur rastet denoncohen, personat përgjegjës ndëshkohen menjëherë”, u shpreh Shahini.

Por, qartazi sipas saj, “ka kulturë fshehjeje dhe mosraportimi, deri sa bëhet shumë vonë. Kjo është ajo që po synojmë ta ndryshojmë, së paku në shkollë, në hapësirat që do të duhej të ishin të sigurta për të gjithë fëmijët”.

“Dua të përsëris mesazhin që dhashë ditën e hënë: përgëzoj nxënësit tanë që kanë gjetur kurajon të denoncojnë bullizmin, dhunën apo abuzimin që kanë përjetuar. Kjo është e vetmja mënyrë që të rriturit dhe institucionet të kenë mundësi të dënojnë këtë dhunë dhe të sigurohen që nuk do të ndodhë më në të ardhmen”, tha ministrja Shahini.

“Shpesh viktimat nuk denoncojnë dhunën që kanë përjetuar, sepse ndihen me faj apo me turp për atë që u ka ndodhur. Por, faji dhe turpi i takojnë abuzuesit.

Që shkolla të shndërrohet në hapësirë të sigurtë, ne po dyfishojmë numrin e psikologëve dhe punonjësve socialë dhe po trajnojmë ata për adresimin e ndjeshëm te çështjet e ngacmimit dhe abuzimit seksual. Si dhe po bëjmë edhe një fushatë sensibilizuese për nxënësit, që t’i njohim ata me mbrojtjen që u ofron si rregullorja e arsimit parauniversitar, ashtu edhe Kodi Penal”, u shpreh ministrja Shahini.

Shahini theksoi se nuk zgjidhjet kjo çështje vetëm me Kodin Penal. “Duhet të ndryshojë gjithë kultura, mënyra se si shoqëria jonë trajton gratë, vajzat, grupet e brishta shoqërore. E gjithë kjo duhet të ndryshojë”, tha ajo.

“Media luan një rol kyç në këtë mes. Do të dëshiroja shumë që media të raportonte në mënyrë të drejtë rastet e abuzimit seksual. Ajo që kam parë deri tani ka qenë një tmerr i vërtetë. Përshkrim detajesh identifikuese të viktimave dhe fajësim indirekt i viktimave. Tmerr! Por, është ky raportim, që është reflektim i kulturës së përgjithshme të trajtimit të kësaj teme të ndjeshme, që na bën të kuptojmë se sa shumë punë kemi për t’u shndërruar në një shoqëri më të mirë, për gratë, për grupet e brishta dhe për fëmijët tanë”, u shpreh Shahini.

Ish-deputetja Albana Vokshi, më herët u shpreh se rasti i 15-vjeçares së dhunuar nga roja i shkollës, tregon se shteti ka dështuar. Vokshi i kërkoi ministres së Arsimit, Besa Shahini, të reagonte lidhur me ngjarjen./atsh

Nën drejtimin e kryetares Ermonela Felaj, Komisioni për Sigurinë Kombëtare në mbledhjen e sotme online zhvilloi një seancë dëgjimore lidhur me situatën e dhunës në familje përgjatë periudhës së pandemisë dhe situatën e emigrantëve në pikat e kalimit kufitar gjatë kësaj periudhe, masat e marra dhe zbatimi i tyre.

Lidhur me situatën e dhunës në familje përgjatë periudhës së pandemisë, para Komisionit raportoi Romina Kuko, zëvendësministre në Ministrinë e Brendshme.

Kuko, në prezantimin përmbledhës që lidhej me çështjet e dhunës përgjatë kësaj periudhe, bëri gjithashtu një analizë krahasimore me dy vitet e fundit dhe foli për masat e shtuara për mbrojtjen e viktimave gjatë periudhës së pandemisë.

“Me shpalljen e pandemisë përpiluam një plan të posaçëm duke pasur parasysh dhe analizat e riskut të zhvilluara së bashku me partnerët ndërkombëtarë, për kujdesin kundër dhunës në këtë situatë”, u shpreh Kuko.

Gjatë kësaj periudhe, vijoi Kuko “Policia e Shtetit ka marrë dhe ka trajtuar gjithsej 441 telefonata për dhunë në familje në numrat 129 dhe 112; në mars, 131 telefonata, prill 151 dhe në maj 159 telefonata.”

Po ashtu, Kuko iu përgjigj interesimit të anëtarëve të komisionit, lidhur me rehabilitimin e viktimave të dhunës, fushatat ndërgjegjësuese, punën në shkolla, punën me shoqërinë civile dhe organizatat joftimprurëse, bashkëpunimin me qeveritë vendore etj.

Më tej komisioni vijoi me dëgjesën e raportimit të zëvendësministres tjetër në Ministrinë e Brendshme, Rovena Voda lidhur me situatën e emigrantëve në pikat e kalimit kufitar në periudhën e pandemisë, masat e marra dhe zbatimin e tyre.

Voda tha në lidhje me numrin e emigrantëve të paligjshëm se këtë vit ka qenë në rritje në krahasim me vitin e kaluar, për periudhën janar dhe 15-ditëshi i parë i muajit mars.

“Ka pasur një rënie të numrit gjatë periudhës së shpalljes së gjendjes së pandemisë por kontrollet tona në kufi kanë qenë të vazhdueshme edhe gjatë kësaj periudhe” theksoi Voda.

Komisioni vijoi me pyetje në lidhje me bashkëpunimin me vendet e tjera kufitare, masat mbrojtëse të parandalimit në kufi, respektimit të protokolleve, kontrollet kufitare etj. /atsh