Politike

Kryeministri Edi Rama ka replikuar me ndjekësit e tij në faqen e “Facebook”-ut për akuzat e opozitës dhe audio-përgjimin për të vëllain e ministrit të Brendshëm, Fatmir Xhafaj.

Disa nga komentuesit kanë kërkuar që Rama të zëvendësonte Xhafajn me një figurë të paimplikuar, por Kryeministri ka insistuar që nuk ka prova për këtë vendim. Ndërkohë që komentues të tjerë kanë thënë se ministri i Brendshëm preket nga vetingu, por, për Ramën, sqarimi ka qenë se ai nuk është efektiv policie, por ministër me mandat të kufizuar nga Parlamenti.

“Vazhdo jeto me hijen e dyshimit se nuk është gjë e keqe, madje, është e shëndetshme, po kurrë mos nxirr konkluzione mbi bazë zërash, po vetëm mbi bazë provash, nëse të intereson vërtet e vërteta!”, ka thënë Rama për çështjen “Xhafaj”.

REPLIKAT ME QYTETARËT

Blero Dalti: A nuk keni një ministër tjetër? Sipas ligjit të vetingut, Fatmir Xhafaj është shumë i nderuar, por automatikisht i shkarkuar. Dhe mos bej krahasime me opozitën, sepse keni tjetër standard. Dhe ne për këtë ju kemi votuar.

Edi Rama: Blero Dalti, sipas cilit ligj të vetingut na qenka automatikisht i shkarkuar, apo mos e di ministrin punonjës policie që ngatërron karrierën në Polici, me mandatin e përkohshëm të ministrit që është aty për një periudhë kohe të kufizuar si i zgjedhur nga Parlamenti?! Me vjen shumë keq që ende sot në Shqipëri, diskutohet një gjë e tillë, kaq elementare që askush nuk e diskuton në botën ku duam të integrohemi plotësisht.

Albano Al: Aty ku ka zë, nuk është pa gjë, pavarësisht punës pozitive që ka bërë deri tani, morali politik dhe hija e dyshimit nuk zhbëhet më. Në Partinë Socialiste ka dhe njerëz të paimplikuar moralisht apo ligjërisht dhe e vetmja rrugëzgjidhje pozitive do ishte zëvendësimi i Xhafajt me një tjetër.

Edi Rama: Albano Al, jo ore? Aty ku ka zë, nuk është pa gjë, d.m.th. shpif, shpif se diçka mbetet dhe ja ku të paska mbetur edhe ty diçka nga shpifjet! Vazhdo jeto me hijen e dyshimit se nuk është gjë e keqe, madje, është e shëndetshme, po kurrë mos nxirr konkluzione mbi bazë zërash, po vetëm mbi bazë provash, nëse të intereson vërtet e vërteta!

Anton Mirditori: Do dëshiroja vërtet, unë dhe shumica e popullit shqiptar, që të keni të drejtë ju, zoti Kryeministër, por gjërat po rrjedhin aq shpejt sa dhe të drejtë të keni, prapë nuk keni mundur të ruani pastërtinë e qeverisë dhe keni një mungesë modestie të theksuar kur i përgjigjeni pyetjeve direkte. Jemi lodhur duke dëgjuar vetëm përgjigje me kundërakuza ndaj çdo pyetjeje që ju bëhet.

Edi Rama: Anton me vjen keq që qenke lodhur, po çlodhu pak se nuk ke detyrë të më ndjekësh mua, ndërsa unë nuk lodhem dot se s’ma lejon detyra dhe sa për pastërtinë e qeverisë, atë nuk e përcakton balta që hidhet pa hesap në drejtimin tim, po vetëm e vërteta! Ndërsa mungesën e modestisë time kërkoje gjetkë, po jo te përgjigjet e “pyetjeve direkte” që më bëhen mua.

Edi Rama: Ledion Hasani, jo ore! Të gjithë njësoj, sipas teje, d.m.th.?! Një këshillë miqë- sore: Lexo më shumë dhe mëso më shumë, që kur të flasësh, të kesh më shumë për të thënë, sesa të thuash të tërë janë njësoj! As pemët nuk janë njësoj, as kafshët nuk janë njësoj, lëre pastaj njerëzit e partitë që nuk janë kurrë njësoj.

O.C: Presupozohet që ty do të ndiqnim, se të kemi dhënë votën… Të kemi ardhur nga mbrapa sa herë na doje nëpër sheshe, zotrote, e nëpër 21 Janare! S’të kemi ndonjë kusur sot të na përgjigjesh gjithë arrogancë… Nuk është faji ynë që s’na garanton më shpresë dhe siguri në këtë vend!

Edi Rama: O. C. arrogancë?! Ku e pe që ta kuptoj edhe unë (?), po unë këtu them atë që mendoj e ashtu si e mendoj, e disave u duket arrogancë të folurit pa dorashka! Mirëpo, është shumë e thjeshtë në fakt, arsyeja pse unë reagoj këtu, lidhet me respektin për këdo që është pjesë e këtij rrjeti, sepse as me detyron kush të përgjigjem, as nuk jam pa punë e as kam kohë të tepërt. Quhet RESPEKT , jo arrogancë! Sa për të ardhurat mbrapa meje, kush ka ardhur ka ardhur, sepse e ka menduar të drejtë të vijë dhe ka bërë gjënë e duhur, jo për atë “zotrote”-n që thua ti, ndërkohë që për sigurinë ji shumë e sigurt që ky vend nuk ka qenë asnjëherë më i sigurt se sot – ishin mesatarisht 155 vrasjet në vit deri përpara katër/pesë vjetësh, sot janë 55 mesatarisht dhe të gjitha shifrat e tjera të sigurisë thonë të njëjtën gjë! Edhe për shpresën flasim po deshe, po varet shumë se çfarë ke ti parasysh me atë që thua e unë këtë nuk e di.

Ilir Zela: Zoti Kryeministër, çudi si gjen kohë dhe shkruan, ti s’pate kohë t’i jepje përgjigje gazetares.

Edi Rama: Ilir Zela, jo, e ke gabim, nuk ishte çështje kohe, po ishte thyerja flagrante e etikës dhe rregullit të një konference shtypi, që e bëri të pamundur dhënien e përgjigjes nga ndërprerjet e vazhdueshme! Gazetarët kanë të drejtën e mundësinë të bëjnë çdo pyetje, po s’bën vaki askund të ndërpresin përgjigjen e kujtdoqoftë që jep një konferencë shtypi, duke replikuar me mikrofon në dorë pas çdo fjalie! Po normal që në kazanin e informimit të publikut, edhe kjo lloj sjellje pa minimumin etik, konsiderohet liri gazetareske.

Eri Hyka: Kemi detyrë që të ndjekim dhe dëgjojmë, Kryeministër, sepse të kemi zgjedhur për të drejtuar. Si dhe ju lutem dërgoni ndonjë fjalë nga ai Komisariati i Korçës “që e vdiqën, në kuptimin e plotë, tjetrin në dajak” të marrim vesh ç’u bë, se na rikthen në kohët më të errëta kjo ngjarje.

Edi Rama: Eri Hyka, dikujt që më ankohet se është lodhur duke më ndjekur, s’kam çfarë i them tjetër, përveçse të çlodhet, se nuk e ka detyrë të më ndjekë! Dhe e vërteta është se në demokraci askush nuk është i detyruar të ndjekë askënd dhe ndjekë vetëm kë ka dëshirë e kur ka dëshirë apo jo? Shumë e thjeshtë kjo, nuk kuptoj ku është problemi.

Kupola e PD nën drejtimin e Sali Berishës ka treguar qartë se për pushtet është gati të bëjë gjithçka, nga vjedhjet e deri tek vrasjet e kundërshtarëve politikë.
E ka treguar me vepra se mund të vjedhë vota, e bëri më 26 maj 1996 duke instaluar për herë të parë në Shqipëri institucionin e vjedhjes së votës.

PD ka treguar se është gati të shkatërrojë shtetin vetëm e vetëm që të qëndrojë në pushtet, apo të vijë në pushtet dhe këtë e ka treguar me tragjedinë e marsit të vitit 1997 kur shteti ra për tre ditë dhe për një muaj u vranë mbi 4 mijë njerëz, pasi armët ishin masivisht në duart e qytetarëve.
PD ka treguar se për të mbajtur pushtetin është gati të bëjë luftë civile, dhe këtë e tregoi në mars të vitit 1997 kur tentoi të vinte veriun kundër jugut, pa ia arritur, me gjithë viktimat e shkaktuara gjatë tërë këtyre muajve të tmerrshëm për historinë e vendit.

Madje ka treguar se mund të hedhë dhe ushtrinë me avionë, tanke, artileri të rëndë dhe lëndë helmuese luftarake siç bëri në marsin e vitit 1997 kundër Vlorës, Përmetit, Gjirokastrës etj.
PD ka treguar se për të ardhur në pushtet vret dhe liderin e saj, krye-themeluesin e PD siç bëri me Azem Hajdarin dhe të bëjë grush shteti siç bëri më 14 shtator 1998.
PD ka treguar se dhe blen vota me të gjitha mënyrat, dhe meqënëse shqiptarët nuk shquhen për ndonjë kujtesë të fortë le të hyjnë në google dhe të shohin se çfarë ka bërë Gazmend Dibra dhe të tjerët për të blerë votat.

Apo të shohë edhe vjedhjen në tavolinë në sytë e publikut dhe ndërkombëtarëve të mandatit të kryetarit të bashkisë së Tiranës Edi Rama nga ish kreu i KQZ sot Sekretar i Përgjithshëm i PD Arben Ristani, në favor të kryetarit aktual Lulzim Basha.

PD ka treguar sërish se për të qëndruar në pushtet është gati të vjedhë paratë e shqiptarëve për të blerë votat, siç bëri me vjedhjen e 250 milionë eurove të Rrugës së Kombit apo punishtes së Gërdecit ku u vranë për biznesin e familjes së ish kryeministrit Berisha 26 të pafajshëm dhe u plagosën mbi 300 të tjerë. Apo me aferën e CEZ-DIA, ku shteti humbi afër 500 milionë euro.

PD ka treguar se për të mbajtur pushtetin mund të vrasë dhe njerëz të pafajshëm që protestojnë paqësisht në mes të Bulevardit qëndror të kryeqytetit, përballë Kryeministrisë.
Këtë bëri më 21 janar 2011 kur vrau katër demonstrues të pafajshëm, të cilët u ekzekutuan nga Garda e Republikës me urdhër të Sali Berishës kryeministër dhe Lulzim Bashës Ministër i Brendshëm në atë kohë.

PD ka treguar se bën gjithçka për të ardhur në pushtet dhe këtë po e tregon me lobimin me para ruse në SHBA, lobimin kundër hapjes nëgociatave apo përfshirjen në bërjen opozitë përmes video-përgjimeve, siç ka ka ndodhur këto ditë me vëllain e ministrit të Brendshëm Fatmir Xhafaj.

Por si partia e parë opozitare në Shqipëri pas 45 viteve komunizëm, të cilës i atribuohet rikthimi i vlerave të Shqipëri, kurrë s’na kishte shkuar ndërmend që PD dhe lidershipi i saj të dilte kundër Zotit.
Kjo ka ndodhur sot teksa kupola e PD ka sulmuar njeriun e Zotit me argumentin se përse nuk mbështet PD-në në aksionin e saj opozitar të video-përgjimit kundër Xhafajt dhe Ramës.

Pra sot PD është përfshirë në debat me myftiun e Tiranës Ylli Gurra duke e akuzuar atë si një vegël e Ramës dhe Ballës, që ngatërroi derën e Xhamisë me atë të qeverisë.

“Jeta e çdo qytetari është e shenjtë dhe kulisat e politikës nuk duhet të turbullojnë shenjtërinë e këtij muaji, qoftë të myslimanëve, apo edhe të vëllezërve të krishterë”, do të shprehej Ylli Gura një ditë para fillimit të Muajit të Shenjtë të Ramazanit. Pas mesazhit të myftiut të Tiranës reaguan demokratët. Fillimisht përmes RD, kryeredaktori i së cilës e quan Ylli Gurrën “veglën e Edi Ramës dhe Taulant Ballës, maskuar si myfti”.

“Nuk dënon drogën, korrupsionin dhe vjedhjet që i dënon Kurani, por bën thirrje për heshtje para krimit që ka kapur shtetin. Atëhere, cilët mesazhe qeverisëse po përçon ky klerik, që ka ngatërruar derën e xhamisë me atë të qeverisë, duke u kthyer prej kohësh në një axhami?”.
Myftiu i la në heshtje kritikat ndaj tij. “Nuk i komentoj”, u shpreh ai në “Wake up”.
Kreu i grupit parlamentar demokrat, Edmond Spaho, i cili është kryesues i listës së Elbasanit, shpërndau në faqen e tij në Facebook shkrimin e Rilindjes Demokratike.

“Mos u habit, sepse Myftinia e Elbasanit vendosi një kandidat nga radhët e saj në listat për deputetë të PS-së në këtë qark. Dhe të mendosh që nëna e PS-së, PPSH-ja, zhduku kishat e xhamitë.
Për fat të keq, jo populli shqiptar, por drejtuesit e tij kanë kujtesë të vogël, e diktuar nga interesa personale, kur i bëjnë fresk komunizmit. Turp ku jemi katandisur”, shkruan Spaho.

Reagimi demokrat kundër myftiut të Tiranës nga Librazhdi ka nisur herët, ku në një prej faljeve të Bajramit, ai falënderoi kryeministrin Rama për ndërtimin e Xhamisë.
Por teksa hyn më thellë në histori, ky shpërthim i lidershipit të PD kundër fesës dhe njerëzve të Zotit nuk është i panjohur.

Duke gërmuar në dokumente dhe përmes ndonjë fotoje tek-tuk vë re se në nismën e vitit 1967 për të shembur kisha e xhamia, gjen dhe emrat e Sali Berishës lideri historik i PD, ish president dhe ish kryeministër i kësaj partie për 13 vitet e saj në pushtet pas viteve ’90.

Por gjen dhe emrin e ish ministrit të Jashtëm, ish zv.kryeministër e ish kryetar i PD, aktualisht deputet dhe njeriu më i afërt i Lulzim Bashës liderit të opozitës, vetë Tritan Shehu,
Sali Berisha në Tiranë dhe Tritan Shehu në Durrës ishin iniciatorët e shembjes së kishave dhe xhamijave si strehë e reaksionit, dhe opium për popullin.

Edhe atëherë u gjet sebepi nga Enver Hoxha, duke akuzuar njerëzit e Zotit si propagandues të luftës për shembjen e komunizmit, ndihmës që dhanë për bandat e ardhura nga jashtë për të rrëzuar sistemin komunist.

Madje u stisën dhe depo armësh në kisha dhe xhamia që më vonë u përdorën në akuzën për shkatërrimin e tyre dhe për vrasjen dhe burgosjen e njerëzve të Zotit.

Dhe tani kupola e PD po akuzon me të njejtat fakte njerëzit e zotit duke thene se janë kundër demokracisë, pasi nuk shprehen kundër kësaj qeverie të drogës, kundër Ramës e Xhafajt.
Fundja PD tashmë është kthyer në “habitatin” e vet, të ish komunistëve të vendosur Sali Berisha dhe Tritan Shehu që kontribuan fort para 50 viteve për shembjen e kishave dhe xhamijave dhe zhdukjen nga faqja e dheut të këtyre “strehave të reaksionit kundër pushtetit pupullor”.
Ky i fundit ka nderin të ketë dhe foto për këtë aksion./Pamfleti

Qeveria do të zhvendoset këtë fillim jave në qarkun e Gjirokastrës, për të kryer dy procese: llogaridhënien publike dhe mbledhjen e qeverisë në këtë qark. Të hënën veç inspektimeve në Libohove do të ketë në orën 14:00 dëgjesë me minoritetet në Dervican për ndryshimet ligjore në këtë kategori.

Në 16:00 do të ketë mbledhje qeverie në Gjirokastër, e më pas një takim llogaridhënës me banorët e këtij qyteti në Pallatin e Sportit. Në orën 19:30 do të zhvillohet një darkë me personalitetet të spikatura të qarkut, ndërsa të martën axhenda do të vijojë me një darkë të Ramës me drejtuesit e partisë.

Të martën, axhenda nis në orën 9 në një takim me të gjithë drejtorët rajonalë të këtij qarku, ndërsa në 11 do të prezantohen projektet zhvillimore të Tepelenës, e më pas do të ketë një drekë me fermerët për të promovuar skemat nxitëse në këtë drejtim në Ballaban.