Politike

I dërguari i kancelares Merkel në Tiranë, Florian Hahn ka kërkuar ritme më të shpejta për Reformën në Drejtësi.  Ai mbërriti në Tiranë mëngjesin e sotëm në një kohë kur Shqipëria pret marrjen e dritës jeshile nga Bashkimi Europian për të nisur pa kushte hapjen e negociatave.

Deputeti gjerman ka vlerësuar progresin me Vettingun, por  ka nënvizuar ritmin e ulët të procesit.

Hahn është takuar me me Presidentin Meta, kryeministrin Rama, kryeparlamentarin Ruçi, si dhe me dy krerët e koalicionit opozitar, Basha dhe Kryemadhi.

Deputeti i Merkelit ka shprehur shqetësime për Reformën Zgjedhore. Gjatë takimeve, ai u ka theksuar politikanëve shqiptarë interesin e lartë të Gjermanisë për një Reformë Zgjedhore përfundimtare e të plotë.

Opozita ka vendosur të protestojë të shtunën e 26 majit, ndërkohë që në vendin tonë organizohet një eveniment i rëndësishëm siç është ai i Mëngjesit të Lutjeve.

Dita e mbajtjes së protestës është kundërshtuar jo vetëm nga brenda PD-së, por edhe nga aleatët, për shkak të aktivitetit të Mëngjesit të Lutjeve.

Në takimin e fundit që kreu i PD –së, ka realizuar me aleatët ka munguar kreu i Partisë Republikane Fatmir Mediu. CNA.al mëson se mungesa e tij ka ardhur për shkak se ka kundërshtuar protestën e ditës së shtunë duke kërkuar që të respektohet protokolli i vedosur 6 muaj më parë për Mëngjesin e Lutjeve, ku do të jenë të pranishëm senatorë amerikanë dhe personalite të rëndësishme ndërkombëtare.

Basha e ka kundërshtuar dhe për më tepër ka refuzuar pjesëmarrjen në Mëngjesin e Lutjeve, gjë që ka sjellë përplasje me kryerepublikanin Fatmir Mediu, i cili nuk ka qenë kundër protestave, por për respektimin e axhendës së vendosur 6 muaj më parë, për aktivitetin e Mëngjesit të Lutjeve.
Kundërshtia e Bashës ka sjellë një thyerje të madhe mes dy aleatëve historikë.

Kryedemokrati Lulzim Basha akuzon kryeministrin Rama dhe ministrin e Brendshëm, Fatmir Xhafaj, se kanë vënë në lëvizje një skenar kriminal për të kërcënuar dëshmitarin X dhe gazetarin Jetmir Olldashi. Në një deklaratë për mediat nga selia blu, Basha u ka dërguar një mesazh Ramës dhe Xhafajt, duke u shprehur se nëse u ndodh gjë dëshmitarit X dhe familjarëve të tij, apo edhe gazetarit Olldashi, ata do të mbajnë përgjegjësi.

“Çdo përpjekje për të blerë dëshmitarin X i zhyt edhe më thellë Xhafajn e Ramën në skandalin ku janë përfshirë. Deklaratat nxjerrin zbuluar frikën dhe përfshirjen e tyre në këtë veprimtari kriminale për të mbuluar narko-aferën e Agron Xhafajt. Kanë vënë në lëvizje një skenar kriminal, ‘bli dëshmitarin, ose likuido dëshmitarin ose familjen e tij’.

Kjo është prova më e qartë e rënies totale të shtetit, kapjes totale të qeverisë Rama nga krimi. Hartimi dhe zbatimi i këtij skenari është arsyeja e vetme pse Xhafaj mbahet me thonj pas karriges së ministrit të Brendshëm.

I përsëris sot Ramës dhe Xhafës paralajmërimin e prerë se për çdo hap që hidhet për të vënë në presion Albert Veliun dhe familjen e tij, si dhe gazetarin, përgjegjësia do të jetë e juaja. Ndal presionin mafioz ndaj dëshmitarit X dhe gazetarit Olldashi”, tha Basha.

Sakaq, ai u bëri thirrje qytetarëve që të bashkohen në protestën e së shtunës.

“Kërcënimet ndaj tyre janë rritur ethshëm para protestës së të shtunës. E vetmja forcë që mund ta ndalë këtë të keqe është bashkimi ynë, ndaj ju ftoj të gjithëve të na bashkoheni në protestën kundër kësaj qeverie, e cila ka vepruar kundër interesave të qytetarëve të këtij vendi, duke bashkëpunuar me krimin për të mbajtur pushtetin. Të gjithë bashkë më 26 maj në orën 11:00 në sheshin “Skënderbej”, dhe bulevardin “Dëshmorët e Kombit””, e mbylli kryedemokrati Basha fjalën e tij./Pamfleti

Ish-kryeministri Sali Berisha, ka qenë sot i ftuar në emisionin “Byro Politike” në ABC News, ka komentuar deklaratat e Ramës për kokainën në Durrës.

Berisha tha se familja e Arbër Çekajt është kundërshtare me të në Tropojë dhe xhaxhai tij ka qenë kryetari i Partisë Socialiste në Kukës.

“E vërteta është se ky pronari i përket një familje kundërshtare e Sali Berishës. KA qenë themeluese e Partisë Komuniste dhe kanë bërë anti-miting për mua. Xhaxhai i tij ka qenë kryetari i Socialistëve në Kukës dhe kryetari i Këshillit në Kukës, kur këtë bashki e drejtonte PS”, ka deklaruar Berisha.

Kryetari i Lëvizjes Socialiste për Integrim në Kukës, Qemal Elezi ka dhënë dorëheqjen nga detyra e tij.
Tashmë në krye të LSI-së në Kukës është vendosur, Lavdosh Zeneli.

Kreu i komanduar i kësaj partie, Lavdosh Zeneli, bën të ditur se ish-kryetari është dorëhequr nga ky post vetm pak ditë më parë. Kjo lëvizje e ish-kryetarit, Qemal Elezi vjen pas largimit nga radhët e Lëvizjes Socialiste për Integrim të Kukësit të disa prej eksponentëve të kësaj partie, drejt Partisë Socialiste.

Qemal Elezi prej vitesh e ka drejtuar partinë Lëvizja Socialiste për Integrim, ku ka qenë edhe kandidat për deputet. Ndërsa kreu i ri i kësaj partie, i komanduar, Lavdosh Zeneli, vjen nga radhët e Lëvizjes Rinore për Integrim.

Partia Demokratike vijon përgatitjet për protestën e 26 majit, ku do të kërkojë dorëheqjen e ministrit të Brendshëm, Fatmir Xhafaj. Kryedemokrati Lulzim Basha mblodhi mesditën e sotme grupin parlamentar të PD, ku ka folur shkurt lidhur me aksionin e të shtunës.

Basha ka kërkuar të shpërndahen fletëpalosje me mesazhe kundër kryeministrit Edi Rama dhe ministrave të tij. Report Tv ju sjell më poshtë fletëpalosjet që do iu shpërndahen qytetarëve, ku shfaqen ministrat e qeverisë, ndërsa shkruhet se ata janë me krimin për para dhe pushtet.

Ndërsa në një fletëpalosje tjetër shkruhen qëllimet e protestës së opozitës, ku ndër të tjera thuhet se aksioni bëhet për një jetë më të mirë dhe për shpresë për çdo shqiptar. Sa i takon seancës plenare të ditës së enjte, mësohet se do të përsëritet e njëjta situatë si javën e kaluar.

Basha ka porositur deputetët e tij të bllokojnë foltoren, sapo ai të mbarojë fjalën në foltoren e Kuvendit. ashtu siç ndodhi edhe të enjten që lamë pas, demokratët mbajtën peng foltoren, duke transmetuar seancën live nga ‘Facebook’, ndërsa më vonë u shpërndanë, pa lejuar zhvillimin normal të seancës plenare.