Një video që postoi Edi Rama në Instagram, dëgjohet Kadri Roshi teksa thotë: “Dhe tani nuk kam ç’të bëj tjetër veçse të qesh, skam çfarë të bëj”.
Pjesë që është shkëputur nga video e filmit “Njeriu me top”. Ndërsa vetë Rama shkruan: “Ai momenti kur gjylet e Vetingut të prishin folenë e gjarpërinjve në Pallatin e Drejtësisë.”
Ky postim i Ramës provokoi reagimin e Lulzim Bashës me një postim në Twitter.
Sipas Bashës, vetingu është kapur nga Edi Rama. Ai paralajmëron se do iu shtypen kokat gjarpërinjve, në mos nga drejtësia, nga populli.
Kryetari i Bashkisë së Tiranës, Erion Veliaj i cilëson argumentet e përdorura nga Presidenti Meta për kthimin e ligjit për ndërtimin e Teatrit të ri Kombëtar, si kopje identike e atyre që u hartuan nga Partia Demokratike. Në një intervistë për Vizion Plus, Veliaj tha se Bashkia e Tiranës dhe qeveria, duke ndjekur thirrjen e Presidentit Meta, zhvilluan disa dëgjesa me artistët dhe arkitektët.
“Së pari, argumentet e presidentit janë kopje e argumenteve të PD. I kam parë të dyja letrat, edhe atë të Komisionit që drejtohet nga PD në Parlament, edhe të zonjës që drejton komisionin e Kulturës, edhe zotrisë që drejton komisionin e Integrimit. Në gjuhën e kompjuterit quhet copy-paste, pra ta marrësh tekstin nga diku e ta ngjisësh diku tjetër. Për këtë arsye m’u duk e pandershme që m’u kërkua të negocioj me aktorët, se po të më thoshin negocio me krerët e opozitës, do ishte më e ndershme”, tha Veliaj.
Kreu i bashkisë siguroi se menjëherë pas rivotimit të ligjit në shtator, do të nisë puna për t’i dhënë kryeqytetit një teatër modern dhe dinjitoz.
“Nëse dikush e shtyu mbylljen e perdes së këtij akti (se po flasim me gjuhë teatrale) për 40 sekonda, sepse në gjuhën teatrore këto 40 ditë janë 40 sekonda të një shfaqje, kjo nuk e humbet cilësinë e aktit. Ndaj, ky është një ngërç teknik 40 ditësh, që në gjuhën e një akti teatror është një 40-sekondësh i një vonese në perde, i siparit, por jo prishja e aktit. Besoj, akti i parë u mbyll me sukses dhe besoj se do shkojmë deri në fund, të respektojmë këtë shumicë”, tha Veliaj, duke shtuar se askush nuk mund ta mbajë peng një shumicë, pavarësisht se çfarë ofiqi ka për momentin.
“Kjo shumicë besoj në opinionin publik, në komunitetin e artistëve, në votues, që kanë votuar respektivisht Edi Ramën dhe kryetarin e Bashkisë, njërin në kryeministri, tjetrin në qeveri lokale, kjo shumicë do të duhet të respektohet. Për çdo projekt në Tiranë del një minorancë e zhurmshme, dhe një gjë që më ka mësuar kjo punë në këto tre vjet është kujdes nga minorancat e zhurmshme! Bërtasin shumë për të krijuar idenë, por po të fillosh t’i shohësh me kujdes janë pjesë të një cirku kronik, një cirku shëtitës që vjen nëpër qytet, ish-drejtorë nafte, ish politikanë të dështuar, ish aktivistë të shoqërisë. Po të shohësh është një bandë klounësh që është prezente sa herë që vjen cirku në fshat dhe meqë cirku erdhi në fshat dhe kësaj here po zhvillohet tek teatri, kjo bandë e klounëve paraqitet menjëherë në gatishmëri të cirkut të radhës”, tha ai.
Veliaj nënvizoi se politika që pengoi edhe këndin e lojërave duke nxjerrë Bujar Nishanin aty, po bën të njëjtën gjë tani me presidentin e radhës. “Politika që pengoi edhe këndin e lojërave, nxori Bujar Nishanin aty, po bën të njëjtën gjë tani me presidentin e radhës. Po mundohet të përdorë çdo mjet të partiçkave që po vjen e reduktohen dhe në pamundësi për të pasur kandidatë për zgjedhjet e ardhshme dhe në pamundësi për të pasur ide për zgjedhjet e ardhshme, po importojnë kryetarë bashkish nga qytetet e tjera, siç importonin protestues për lodrat”, theksoi Veliaj./atsh
Ministria e Financave dhe Ekonomisë ka reaguar pas kthimit për rishqyrtim në Kuvend nga Presidenti Ilir Meta të ligjit “Për të ardhurat” .
Përmes një deklarate për media ministria e Financave sqaron se ndryshimet e propozuara ne ligj, per tatimin mbi lojerat e fatit, nuk sjellin asnje ndryshim apo relaksim te tatimit per kategorite e lojerave te fatit nga ligji i vitit 2015, perkundrazi, unifikojne proceduren e tatimit, per te gjithe kategorite e lojerave te fatit, perfshire Lotarine Kombetare qe me ligjin e vjeter ka qene e perjashtuar.
Reagimi i plotë i ministrisë së Financave:
Nuk ka asnjë ndryshim në ligjin “Për lojrat e fatit” dhe asnjë relaksim sa i përket tatimit mbi lojrat e fatit, përkundrazi ka njehsim të aplikimit për të gjitha kategoritë e lojërave të fatit
Kuadri rregullator dhe fiskal i lojrave të fatit është vendosur dhe standardizuar në vitin 2015 me Ligjin 155/2015 “Për lojërat e fatit në Republikën e Shqipërise” i cili përcakton konceptet, përkufizimin dhe mënyren se si tatohen të gjitha kategoritë e lojërave të fatit.
Neni 52/2 i këtij ligji përcakton shprehimisht se të gjitha kategoritë e lojërave të fatit tatohen në masën 15 për qind mbi të ardhurat bruto.
Në ligjin e sipërcituar, Neni 4, pika 40, përcaktohet qartësisht baza e tatueshme, që është e ardhura bruto nga loja.
Eshtë ky sistem fiskal dhe rregullator të cilin Presidenti në argumentat e tij e cilëson si “regjim fiskal dhe rregullator të rreptë, që synon shtimin e barrës fiskale, me qëllim dekurajimin e këtij aktiviteti”.
Dhe është pikërisht ky sistem fiskal të cilin synon të unifikojë ndryshimi i miratuar nga Parlamenti dhe i kthyer nga Presidenti.
Kjo, sepse e vetmja kategori që bënte përjashtim nga ky rregull, ishte Lotaria Kombëtare, e dhënë me ligj të veçantë nga Qeveria Berisha në vitin 2013, nr. 95/2013 “Për miratimin e marrëveshjes së licencës për Lotarinë Kombëtare ndërmjet Ministrisë së Financave, si autoritet i autorizuar, dhe shoqërisë “Oesterreichische Lotterien”, Gmbh, nëpërmjet shoqërisë “Olg project” Shpk, sipas të cilit kjo kategori lojrash është e tatueshme në masën 10%.
Ndryshimi i propozuar, jo vetëm që nuk bie ndesh me rregullimin e vendosur në vitin 2015, por e unifikon këtë rregullimin duke përfshirë edhe Lotarinë Kombëtare në të njëjtin kuadër fiskal.
Pra, nuk ka asgjë të re përsa i përket shkallës tatimore apo bazës së tatueshme lidhur me tatimin mbi lojrat e fatit, por qëllimi i ligjëvënësit i shprehur qartë në këtë parashikim ligjor ështe përcaktimi i një regjimi fiskal dhe rregullator të njejtë, njësoj i aplikueshem, për të gjitha kategoritë e lojrave të fatit.
Presidenti, nëpërmjet mos dekretimit, ndoshta pa dashje, ka rrëzuar pikërisht parimin që synon të mbrojë, pra parimin e një sistemi të rreptë dhe njësoj i aplikueshem për të gjithë.
Nëse ndryshimet e kthyera nga Presidenti nuk do të hyjnë në fuqi, atëhere do të kemi një trajtim të diferencuar të një subjekti në treg, i cili do të vijojë të tatohet me shkallë tatimore 10%.
Dramatike e ka cilësuar situatën me sistemin gjyqësor në vend, publicisti Besnik Mustafaj, teksa ka komentuar shkarkimin e anëtarëve të Gjykatës së Lartë në kuadër të procesit të vettingut. Në rubrikën “Opinion” në studion e lajmeve në “News24”, ai tha se përgjegjësia për këtë situatë bie mbi të gjithë aktorët politikë, dhe jo vetëm, që ndërmorën reformën në drejtësi, pa marrë parasysh se mund të gjendeshin në kushte të tilla.
Sakaq, ai ka komentuar edhe zërat se kjo situatë ku ndodhet tashmë sistemi i drejtësisë, “është strategji e Ramës për të marrë nën kontroll gjyqësorin”.
“Është dramatike situata që vendi është pa nivelin e tretë të gjykimit. Sot një shqiptar nuk ka mundësinë e apelimit të një çështje. Kjo është përgjegjësi e të gjithë atyre që ndërmorën këtë reformë, klasës politike, që nuk e morën parasysh një situatë të tillë. Është shumë e rëndë që vendi të mos e ketë Gjykatën e Lartë, pra nivelin e tretë të gjykimit. Ka zëra, kritizerë, që kjo ka qenë e parashikuar nga Rama, në mënyrë që të bllokojë çështjet që mund të shkonin në Strasburg, kjo pasi një çështje nuk mund të shkojë atje nëse nuk ka kaluar të gjitha hallkat e sistemit gjyqësor në vend. Sipas këtyre akuzave, kjo është strategji e Ramës për të marrë nën kontroll gjyqësorin”, u shpreh Mustafaj.
Publicisti thotë se pas verifikimit të gjyqtarëve dhe prokurorëve, dhe shkarkimit të tyre në rastet kur ka shkelje, duhet të vijohet edhe me pjesën tjetër të procesit, pra zëvendësimin e tyre, për të mos krijuar ngërç në institucionet e drejtësisë.
“Ata që e mbështetin reformën në drejtësi, thonë se po funksionon. Kjo sepse reforma ka mbetur vetëm në fazën e shkartisjes, shkarkimeve, ndërkohë që duhet edhe ana tjetër, pra zëvendësimi i tyre. Kjo reformë ka një vit që ka filluar dhe janë verifikuar më pak se 1/5 apo 1/6 e anëtarëve të gjykatave, dhe me këto ritme do zgjasë me vite procesi. Besoj se duhet të gjendet një mekanizëm për të ecur më shpejt. Nuk e di si i zë gjumi këta politikanë, kur situata me sistemin gjyqësor në vendin tonë, është e tillë”, u shpreh ai.
Duke ngritur shqetësimin për situatën në gjyqësor, Mustafaj thotë se do të ishte tejet kritik momenti nëse vendi ynë do të ndodhej në një situatë të jashtëzakonshme politike apo të sigurisë kombëtare, ku duhet të shprehet Gjykata Kushtetuese.
“Magjistratura do të thotë se do ketë studentë që do përfundojnë për dy vite. Padyshim që ky ligj duhet të ishte miratuar, por ne sot kemi imediate krijimin e të gjitha hallkave të sistemit. Nëse nesër Shqipëria gjendet në një situatë të jashtëzakonshme politike apo të sigurisë kombëtare ku duhet të shprehet Gjykata Kushtetuese, si do t’ia bëjmë? Kjo nuk është në logjikën normale të atyre që bëjnë shtet”, u shpreh publicisti Besnik Mustafaj.
Kreu i qeverisë Edi Rama ka dhënë sinjale se në shtator pritet të ketë ndryshime të kabinetit qeverisës.
I ftuar në emisionin Përballë në TVSH, kreu i qeverisë ka rikujtuar “kontratat” e performancave mes tij dhe ministrave e zv.ministrave në kabinet, të shpalosur një vit më parë kur të majtët morën mandatin qeverisës.
Rama la të kuptohet se “kontratat” po shqyrtohen dhe vendimi do të merret në fund të muajit gusht.
Keni thënë që mandati s’është i përjetshëm, shtatori vjen dhe a do të ketë rifreskime?
Kemi futur sistemin ekontratës së performacës së Ministrave e zv.Ministrave… po shtrihet dhe në agjencitë kryesore dhe është një proces që e objektivizon performancën e gjithsekujt. Para pak ditësh kemi bërë një analizë të këtyre kontratave,. Kemi disa ovbjektiva për të cilat od të diskutojmë në fund të muajit dhe pastaj do të shikojmë sesi do të hyjnë në shtator, i cili do të jetë një vit politk shumë intensiv.
Në zgjedhje vetëm apo me aleatë?
Ne aleancën e kemi me qytetarët dhe e kemi reale. Duam ta bëjmë sa më të prekshme e sa më reale këtë aleancë. Pastaj përsa i përket kabinetit, do të shikojmë.
Kryeministri Edi Rama gjatë një interviste për emisionin “Përballë” në Televizionin Publik Shqiptar theksoi se hapja e procesit të skanimit është një arritje e madhe, pasi sipas tij edhe nëse negociatat do të ishin hapur, procesi i “Screening” do të bëhej.
“Së pari, besoj që njerëzit e kanë kuptuar sepse nuk ka qenë e vështirë për t’u kuptuar që procesi ka dy nivele. Ka një nivel të objektivitetit teknik, që është procesi që shkon në komision dhe që përfundon me raportin e komisionit dhe ka edhe një nivel tjetër të subjektivitetit politik, që është procesi që shkon nga Komisioni në Këshill, ku janë vendet anëtare që vijnë aty me gjithë bagazhin e problematikave të veta të brendshme. Dhe e vërteta është që vendet anëtare u ndanë në 25 vende që ishin për hapje të menjëhershme të negociatave dhe pastaj në vendet që ishin për një shtyrje. Por ajo që është e rëndësishme është që pavarësisht se negociatat nuk u hapën menjëherë formalisht, u hap procesi i skanimit, që ishte një kompromis i artë sa na takon, sepse faktikisht edhe nëse negociatat do të ishin hapur formalisht, ne do të bënim skanimin”, – theksoi Kryeministri.
Kryeministri u shpreh i bindur se pas 12 muajsh pune intensive në përmbushjen e objektivave të vendosura nga Brukseli, Komisioni Europian do të japë rekomandim pozitiv për Shqipërinë.
“Kjo është një mënyrë që përdoret për herë të parë për Shqipërinë dhe Maqedoninë, nuk është përdorur për të tjerët. Mos të harrojmë që Mali i Zi e ka marrë hapjen formale të negociatave dhe më pas i janë dashur 6 muaj për t’i hapur ato de facto. Serbia e ka marrë hapjen formale dhe i janë dashur më shumë se një vit për t’i hapur ato de facto, sepse procesi i skanimit është një proces goxha kompleks. Ne kemi 12 muaj që i kemi fituar dhe nuk i kemi humbur dhe çka do të ndodhë në qershor do të jetë përsëri një rezultat i asaj që ne do të kemi bërë dhe patjetër, nuk e diskutoj fare, që do të jetë me rekomandim pozitiv nga Komisioni dhe asaj që do të jetë situata brenda vendeve anëtare. Megjithatë duke patur parasysh që do të jemi në momentin, kur do të kemi të njëjtin Komision dhe vendet anëtare do të kenë kaluar zgjedhjet për në Parlamentin Europian, që ishin arsyeja kryesore e rezervës së Francës, në radhë të parë, nuk kemi arsye pse të dyshojmë seriozisht në një rezultat pozitiv”, – u shpreh Rama.
I pyetur për vendet skeptike si Danimarka, Franca dhe Holanda, nëse nuk do të jenë më të tilla pas 12 muajsh, Kryeministri theksoi se nga kompromisi i arritur mbeti i kënaqur, pasi sipas tij procesi nuk është një provim për të marrë një certifikatë se kalove klasën në Bruksel apo Europë, por një përpjekje e vazhdueshme për të ndërtuar Shqipërinë europiane.
“Qoftë Franca, qoftë Holanda, sepse Danimarka ishte si të thuash një vend që u shfaq në krah të tyre vetëm në momentet e fundit, nuk është se e kishin me Shqipërinë. Ishin në një pozicion që ishte vijimësi e natyrshme e pozicionit të tyre në raport me Europën dhe në kontekstin e brendshëm si pozicion më i përshtatshëm. Procesi nuk është një provim për të marrë një certifikatë se kalove klasën në Bruksel apo në Europë, procesi është një përpjekje e vazhdueshme për të ndërtuar këtu Shqipërinë europiane dhe në këtë aspekt, procesi nuk ka ndalim, procesi ka vazhduar me skanimin që, siç e thashë, është faza që pason çeljen formale të negociatave dhe kjo më ka bërë, na ka bërë, që të jemi të kënaqur me rezultatin”, – theksoi Kryeministri.
Duke u ndalur te plotësimi i prioriteteve të vendosura nga BE si, lufta kundër krimit të organizuar, trafikut të lëndëve narkotike, reforma zgjedhore si dhe reforma në drejtësi Kryeministri Rama theksoi se përmbushja e këtyre objektivave janë prioritet i qeverisë shqiptare.
“E para, të kemi të qartë se këto fraza do të na shoqërojnë deri kur të bëhemi anëtarë, madje këto fraza janë fraza që po shoqërojnë jetën politike të Rumanisë apo të Bullgarisë edhe sot që janë anëtarë, të jemi të qartë.
E dyta, nga pikëpamja e objektivave konkretë që ka brenda në ato fraza, ne sigurisht që do t’i bëjmë, sepse janë gjëra që do t’i bënim si me negociata, si pa negociata. Ngritja e institucioneve të reja të drejtësisë është detyrim i një procesi që ka filluar dhe që po ecën sipas parashikimeve. Thellimi i luftës ndaj korrupsionit është një proces që ka filluar dhe po ecën sipas parashikimeve, se këtu flasim për luftë ndaj korrupsionit dhe flasim për peshq të mëdhenj, po a ka diskutim që gjithë këto gjykatës dhe prokurorë që po shfaqen si “peshkaqenë” në të gjithë dimensionet e veta duke u përzënë nga pallati i drejtësisë janë pjesë e një lufte të përshkallëzuar kundër korrupsionit? Nuk mund të ketë diskutim. Sigurisht që këta kanë qenë figura në një pushtet në hije, edhe pse hija ka qenë shumë e rëndë në shpatullat e gjithkujt që ka patur punë me gjykatat, por nga pikëpamja e influencës së këtij pushteti, nga pikëpamja e korrupsionit të këtij pushteti, ky është pushteti më i korruptuar në Shqipëri. Nuk diskutohet fare. Kështu që është një proces që është kompleks”, përfundoi Kryeministri Rama.//atsh
Duke u ndalur tek akuzat e opozitës kundër këtij procesi, Kryeministri theksoi se këta të fundit kanë marrë në mbrojtje njerëz të cilët janë pastruar nga “sita” e Vetingut, duke sulmuar ata të cilët e kanë kaluar atë.
“Jo, opozita këtë po thotë çdo ditë, po bëhet keq pastrimi. Opozita ka marrë në mbrojtje njerëz të pambrojtshëm, pse janë pastruar nga fshesa e Vetingut dhe ka sulmuar të tjerë pse e kanë kaluar filtrin e Vetingut. Unë besoj që njerëzit në përgjithësi, dhe partitë politike në veçanti, nuk maten thjesht me atë që thonë, por maten me atë që bëjnë. Opozita i thotë këto, por bën tjetër gjë pastaj. Pasi i thotë këto: bën fletërrufetë kundër atyre që kalojnë filtrin dhe merr në mbrojtje ata që janë të pambrojtshëm. Besoj që asnjë nga temat që kemi sot nuk është më e rëndësishme se tema e pastrimit të Gjykatës Kushtetuese dhe ristartimit të saj me duar të pastra. Kjo është kryesorja dhe për asnjë nga ato temat e tjera unë nuk do dilja kundër Vetingut dhe për asnjë nga ato temat e tjera unë nuk do të çoja shtatë pika për të kthyer mbrapsht reformën në drejtësi”, – u shpreh kreu i ekzekutivit./atsh
“Do apo nuk do Partia Demokratike plagët po luftohen sot si kurrë më parë”, deklaroi sot Kryeministri Edi Rama, duke reaguar pas deklaratës së Kryetarit të PD-së, Lulzim Basha, lidhur me raportin e DASH për klimën e biznesit në Shqipëri.
Përmes një statusi në rrjetin social “Facebook”, Kryeministri Rama u shpreh se “PD do luftë kundër korrupsionit e lufton Vetingun”.
“Selia e Përkthimeve të Gabuara e di raportin vjetor të Departamentit të Shtetit për 170 vende, ferman kundër qeverisë. Do luftë kundër korrupsionit e lufton Vetingun. Do pushtetin e thotë kur ishim më keq ishim më mirë. Po do s’do ajo seli plagët po luftohen sot si kurrë më parë”, shkruan Rama./atsh
