Politike

Kryeministri i Kosovës, Ramush Haradinaj, gjatë vizitës së sotme në qytetin e Vlorës, iu përgjigj interesimit të gazetarëve për temën e shumë debatuar këto ditë të korrigjimit të kufijve të Kosovës.

Ai nënvizoi se, hapja e temave ose e temës së kufijve është e papranueshme për të. Duke u shprehur se, sot, në Vlorë, ai do të jetë i kujdesshëm në deklarimet e tij, Kryeministri Haradinaj iu referua historisë së Ballkanit, e cila pasqyrohet edhe në realitetin e sotëm të kufijve mes shteteve.

“Për fat të keq për popujt e Ballkanit, luftërat kanë qenë tragjike në të kaluarën dhe realiteti i sotëm është krejtësisht rezultat i atyre epilogjeve të këtyre luftërave. Prandaj, ne duhet të konsiderojmë arritjet tona, pra,  Shqipërinë dhe Kosovën dhe kudo ku janë shqiptarë. Hapja e temave ose e temës së kufijve, është e papranushme për mua”, nënvizoi ai për gazetarët e mediave të Shqipërisë dhe të Kosovës, që ndoqën vizitën e tij në Vlorë.

Duke ju referuar të gjitha deklaratave që janë bërë këto ditë për këtë temë, Zoti Haradinaj iu përgjigj në mënyrë simbolike, duke theksuar qëndrimin e tij dhe vendosmërinë për të hequr doganën mes Kosovës dhe Shqipërisë. “Ajo që unë jam pro deklaratave për këtë qëllim është që në 1 janar të heqim doganën mes Kosovës dhe Shqipërisë”, u shpreh ai.

Ndërkohë, duke iu përgjigjur një pyetjeje të ATSH-së lidhur me temën e korrigjimit të kufijve dhe atë se çfarë do të ndodhë më tej pas deklaratave të këtyre ditëve, Kryeministri Haradinaj theksoi se, ato kanë në bazë retorikën politike.

“Me qëllim po e devijoj pyetjen tuaj dhe theksoj se ajo është një retorikë politike. Beogradi bëri një retorikë, Prishtina bëri një kundër retorikë, një kundërpërgjigje. Në fund do të thosha se, kufijtë , nuk lëvizin me fjalë”, citoi ai qëndrimin e vet, ndërkohë që shtoi se, “Kufijtë janë vendosur si rezultat i ndarjes në epilogjet e luftërave”.

Ai përshëndeti Kryeministrin, Edi Rama, gjithë institucionet e Shqipërisë, gjithë politikën shqiptare edhe atë në opozitë, duke theksuar se, “Shqipëria është Atdheu ynë dhe duhet të jemi të gjithë pranë njeri tjetrit”.

Haradinaj vlerësoi edhe një herë vizitën e tij në qytetin e Vlorës, në atë që e cilësoi “Zemrën e shqiptarëve”, duke theksuar se do të donte të ishte këtu në çdo ditë të vitit.

“Sot jam vlonjat dhe ndihem më shumë se çdo herë shqiptar. Jam në Vlorë, në zemrën e shqiptarëve” u shpreh Haradinaj. Ai falënderoi Zotin Dritan Leli dhe stafin e tij, duke e falenderuar në emrin e tij dhe të popullit të Kosovës, për mundësinë për të qenë bashkë në nderim të historisë sonë të lavdishme e të çmueshme, por, siç u shpreh ai “.. edhe për mundësinë që ne, të ndërtojmë të ardhmen tonë po kaq të lavdishme, duke qenë më afër njeri tjetrit. Do të jemi çdo herë e më afër”.

Ai u bëri thirrje të gjithë qytetarëve të Kosovës, të gjithë shqiptarëve, kudo ku janë për të ardhur në Vlorë, për të pushuar në Vlorë. “Për mua, nuk do të kishte ditë të vitit që nuk do të vija në Vlorë, sot jam shumë i nderuar që jam. U bëj thirrje të gjithë qytetarëve të Kosovës, shqiptarëve kudo ku janë edhe atyre në diasporë, që të vijnë në Vlorë, në zemrën tonë. Jam i bindur që duke qenë më afër njëri tjetrit, e ndihmojmë veten”, citoi ai.

Nga ana e vet, kryebashkiaku, Dritan Leli, e cilësoi historike vizitën e Kryeministrit të Kosovës, Ramush Haradinaj, në qytetin e Vlorës.

“Sot, në Vlorë, në një ceremoni simbolike, jemi të gjithë së bashku duke vlerësuar njeriun më të madh të Kombit, Ismail Qemalin. Unë jam i bindur se, çdokush me veprën që bën, në fund fare mund të bëjë histori. Ismail Qemali, bëri historinë e madhe të shqiptarëve dhe ne jemi sot duke e vlerësuar së bashku, duke u përpjekur që, secili nga ne, në rrugën e vet të bëjë historinë e tij për të mirën e vendit për të mirën e Shqipërisë”, theksoi Leli, duke e falënderuar kryeministrin Haradinaj për vizitën e tij në qytetin e Vlorës.

Gjatë vizitës në Vlorë, Kryeministri Ramush Haradinaj, bëri homazhe dhe vendosi një kurorë në varrin e Ismail Qemalit, në Lulishten pranë Sheshit të Flamurit, ndërkohë që vizitoi edhe Muzeun Kombëtar të Pavarësisë dhe atë Historik të qytetit.

Gjatë vizitës së Kryeministrit Ramush Haradinaj në Vlorë, ishtei i pranishëm edhe Ministri i Diasporës, Pandeli Majko./atsh

Kryeministri i Kosovës, Ramush Haradinaj, mbërriti sot në Vlorë ku u prit në një takim nga kryetari i bashkisë së qytetit bregdetar, Dritan Leli, gjatë të cilit u shprehën se fryma e vëllazërimit mes dy vendeve të rritet më tej.

Gjatë takimit, ku ishte i pranishëm edhe ministri i Diasporës, Pandeli Majko, si dhe anëtarë të kabinetit qeveritar të Kosovës, kryebashkiaku Leli e cilësoi një privilegj të madh për të që kryeministri i Kosovës ndodhet në bashkinë e Vlorës.

Kreu i bashkisë së Vlorës theksoi në fjalën e tij se “ky është moment i rëndësishëm, sepse do të diskutojmë për problemet dhe hallet e përbashkëta për të gjetur hapësirë për t’i kaluar ato”.

Leli vlerësoi kontributin e Haradinajt për çështjen e shqiptarisë, duke e cilësuar punën e tij një kontribut të shkëlqyer për Kosovën dhe Shqipërinë.

Kryeministri Haradinaj shprehu kënaqësinë që ndodhet në Vlorë, të cilën e cilësoi si zemra e shqiptarisë.

“Vij në Vlorë me porosinë e bashkëpunimit të ndërsjelltë për forcimin e lidhjes mes Shqipërisë dhe Kosovë”, theksoi Haradinaj.

Kryeministri Haradinaj në nëntor të 2012 u vlerësua me titullin “Qytetar Nderi” i qytetit të Vlorës, titull që në mungesë të Haradinajt u tërhoq nga bashkëshortja e tij Anita.

“Gjej rastin t’iu falënderoj për këtë vlerësim që me keni bërë”, tha Haradinaj.

Kreu i qeverisë kosovare premtoi se do të punojmë së bashku që fryma e vëllazërimit mes nesh të rritet më tej, ndërkohë që për shumë kosovarë Vlora mbetet një destinacion për pushimet e verës”.

Kryeministri Haradinaj do të zhvillojë më pas një vizitë në Monumentin e Pavarësisë, do të vendosë kurora me lule pranë varrit të Ismail Qemalit, do të vizitojë Muzeun Historik, si dhe Muzeun e Pavarësisë./atsh

Një ditë më parë gazeta ”SOT” publikoi pasurinë e familjes “Berisha”, ku në vitin 2016 fitimet arrinin deri në 1 milion euro. Por në të njëjtat kuota renditet dhe familja “Meta”, ndërsa sot po kjo media publikon pasurinë e çiftit presidencial Meta-Kryemadhi, se si ka ndryshuar ajo ndër vite.

Ilir Meta dihet që ka qenë në politikë që në fillim të demokracisë dhe kjo duket se ka ndikuar në mirëqenien e tyre, pasi që në vitet e para kur nisi deklarimi i pasurisë, vlera e banesave është shumë e lartë. Në vitin 2003, Meta ka deklaruar një banesë të përfituar nga privatizimi si dhe një banesë me verandë+lulishte në Golem, 327 m2. Vlera në atë kohë është deklaruar 60 mijë dollarë, ku thuhet se janë marrë kredi. Por ajo që u ka dhënë më shumë të ardhura janë 13 apartamente të përfituara nga Monika Kryemadhi. Ajo ka marrë 13 apartamente në kuadër të një marrëveshje me një firmë ndërtimi.

Packa në deklaratën pranë ILDKP nuk jepen shumë qartë të dhënat, Kryemadhi rezulton pronare e truallit ku është ndërtuar pallati dhe në këmbim ka marrë 13 apartamente me vlerë totale 1444.8 m2. Shumica e tyre janë shitur nga viti në vit. Po ashtu Meta e Kryemadhi kanë deklaruar një banesë në kryeqytet me sipërfaqe 200 metër katror me vlerë 400 mijë euro.

Pjesë e deklarimit është dhe 500 m2 tokë+200m2 truall me vlerë 5 milionë lekë. Gazeta ka bërë një përmbledhje të vlerës totale të të gjitha apartamenteve të shitura e blera dhe rezulton se kapin një kosto prej afro 900 mijë eurosh. Por në këtë llogaritje nuk përfshihet shtëpia në Gjirin e Lalzit, pasi nuk dihet vlera e saj.

E kjo do thotë se fitimi arrin në mbi 1 milion euro. Shtëpia e tyre, në bregdet është bërë gjithmonë objekt debati dhe sipas deklarimeve në ILDKP, bëhet fjalë për një banesë dy katëshe me sipërfaqe 317 metra katror në Gjirin e Lalzit. Sipas deklarimit, burimi është këmbimi me sipërfaqe ndërtimore 300 metra katrore, ambiente tregtare, sipas kontratës me firmën Agi-Kons shpk, si përfitues 33 % të sipërfaqes së ndërtimit si pronar trualli. Edhe 13 apartamentet janë përfituar nga po kjo kompani.

Deklarimet sipas viteve/ Deklarimet e para në ILDKP datojnë që prej vitit 2003 dhe në këtë vit presidenti Ilir Meta ka deklaruar apartament 2+1 dhe ka pasur në pronësi vetëm 25 për qind të tij. Po ashtu ka deklaruar një banesë në Golem 327 m2 blerë 60 mijë dollarë, të cilat janë marrë kredi në bankë. Por e njëjta banesë 3 vite më pas është shitur 300 mijë euro. Po në vitin 2003 zoti Meta ka deklaruar pagën e tij si deputet dhe si ministër. Viti 2004 dhe 2005 nuk kanë sjellë ndryshime për pasurinë e presidentit aktual, ndërsa në 2006 janë shtuar të ardhurat e bashkëshortes, zonjës Monika Kryemadhi, sot drejtuese e LSI. Interesant është fakti se në vitin 2004 u themelua dhe LSI.

Kurse në vitin 2006 të ardhurat e Metës dhe Kryemadhit janë shtuar me 300 mijë euro, pasi kanë shitur banesën në Golem. Në vitin 2007 Meta ka deklaruar pagën e tij si deputet, ndërsa Kryemadhi pagën si anëtare të Këshillit Bashkiak. Por kryetarja e LSI ka deklaruar dhe blerje 500 m2 tokë+200m2 truall me vlerë 5 milionë lekë. Në vitin 2008 Meta dhe kryemadhi kanë deklaruar dhe llogaritë e tyre të para në bankë. Po ashtu kanë deklaruar dhe të ardhurat nga puna.

E njëjta situatë dhe në vitin 2009. Por në vitin 2010 dhe për koincidencë vit kur LSI ishte në qeveri me PD, pasuria e tyre ka nisur të lëvizë. Meta ka deklaruar shtesë në llogarinë Bankare Credins Bank 135.318 lekë, apartament banimi 200 metra katrorë te Rr. Barrikada me vlerë 400.000 euro, ku është deklaruar se 200 mijë euro janë marrë kredi, ndërsa 200 mijë euro kanë qenë në gjendje cash. Ka deklaruar pagën si zëvendëskryeministër dhe ministër Ekonomie, 1.768.385 lekë.

Shkollimi i fëmijëve/ Në deklarimin që Meta e Kryemadhi kanë bërë pranë ILDKP, bie në sy se kanë disa llogari edhe fëmijët e tyre, shumica të hapura për qëllime studimi. Vetëm në vitet e fundit është deklaruar se janë shpenzuar 140 mijë paund për shkollimin e tyre në Londër. Por një tjetër element që tërheq vëmendje është se pavarësisht ekzistencë së disa llogarive bankare, si Meta, ashtu dhe Kryemadhi kanë marrë overdrafte në bankë

Pavarësisht se kanë kaluar procesin e parë të Vetting-ut, SHBA dhe BE po ushtron presion për disa emra që janë ende në sistemin e drejtësisë, duke kërkuar largimin e tyre. Një qëndrim të tillë SHBA e BE e kanë shprehur përmes organeve ligjzbatuese të tyre të vendosura pranë komisioneve të Vettingut, përmes të cilëve ushtrojnë presion mbi kryeministrin Edi Rama që të heqë dorë nga njerëz të tillë si Xhezair Zaganjori dhe Bashkim Dedja.

Të rikonfirmuar në detyrë, përkatësisht Xhezair Zaganjori kryetar i Gjykatës së Lartë dhe Bashkim Dedja kreu i Gjykatës Kushtetuese, për SHBA dhe BE ata janë një investim i shkuar dëm dhe nuk mund të hedhin financimet e tyre për njerëz të tillë që kanë probleme me pasurinë. Por me sa duket nuk është vetëm pasuria ajo që është fiksuar në “radarët” e tyre, por janë dhe elementë të tjerë shtesë që i bëjnë të papërshtatshëm për drejtësinë e re Zaganjorin dhe Dedjan.

Kështu që, kapitulli i rivlerësimit për Kryetarin e Gjykatës së Lartë Xhezair Zaganjori, meqë rasti është më i freskët, nuk mund të konsiderohet i mbyllur, pavarësisht se Komisioni i Pavarur i Kualifikimit e konfirmoi atë në detyrë. Operacioni Ndërkombëtar i Monitorimit, organi i përbërë nga ekspertë europianë e amerikanë, që ndjekin procesin, i ka rekomanduar, Komisionerëve Publikë që të ankimojnë vendimin e KPK.

Përmes një njoftimi zyrtar, Komisionerët Publikë, shpjeguan se pasi t’u jetë njoftuar “vendimi me shkrim i Komisionit të Pavarur të Kualifikimit do ta shqyrtojnë atë krahas rekomandimit të Operacionit Ndërkombëtar të Monitorimit”. Vendimi për kreun e Gjykatës së Lartë u mor më 24 korrik, dhe KPK, sipas ligjit, ka afat 30 ditë, për t’ia njoftuar me shkrim Komisionerëve, të cilët nga ana e tyre kanë 15 ditë kohë, për të vendosur nëse do të bëjnë ose jo ankimim.

Nuk shpjegohet zyrtarisht ende arsyeja për të cilën ONM-ja ka sugjeruar ankimimin e vendimit, ndonëse dhe vetë Komisioni i Pavarur, gjatë seancës dëgjimore me Zaganjorin, foli për një seri problemesh që sipas tij kishte gjetur, falë një hetimi të thelluar. Sipas relacionit të bërë publik, kryetari i Gjykatës së Lartë rezultonte të kishte bërë deklarata të pasakta, të pamjaftueshme dhe fiktive si dhe kishte mungesë të burimeve financiare, lidhur me një apartament në qendër të Tiranës, një mjedis për zyrë, një bodrum dhe një dyqan.

Të gjitha në një godinë të vetme, që sipas Zaganjorit nuk ishin blerë, por ishin ndërtuar në një truall të trashëguar nga familja e bashkëshortes. Ndaj tij megjithatë, Komisioni ngriti pretendimin se nuk kishte paguar detyrimet ndaj shtetit për qeratë e perfituara, apo dhe se kishte mospërputhje për shpenzimet e shkollimit të fëmijëve, të deklaruara më të ulta se sa kishin rezultuar nga verifikimet e bëra nga vetë Komisioni.

Zaganjori, i cili përveç të ardhurave nga pagat mujore dhe qeratë, ka deklaruar dhe përfitime të larta financiare nga puna pranë një instituti në Gjermani, deklaroi se i kishte ofruar komisionit afër 40 faqe me shpjegime dhe dokumenta, për të gjitha pikëpyetjet e ngritura gjatë procesit, në fund të të cilit ai u konfirmua nga KPK.

Rasti i zotit Zaganjori është i ngjashëm me atë të kreut të Gjykatës Kushtetuese Bashkim Dedja. Edhe ky i fundit u konfirmua nga KPK por sërish ONM-ja kërkoi apelimin e vendimit. ONM depozitoi kërkesën dhe argumentet përkatëse në lidhje me ankimin kundër vendimit të Komisioni të Pavararur të Kualifikimit për Dedjan. Sipas ONM, Dedja s’arrin një nivel të besueshëm në vlerësimin e pasurisë. Gjyqtari Dedja i cili kaloi vettingun, do ti duhet që të përballet dhe me Komisionin e Posaçëm të Apelimit.

Dhe Komisioneri Publik, pasi shqyrtoi vendimin e Komisionit të Pavarur të Kualifikimit, si dhe mori në konsideratë rekomandimin e paraqitur nga OMN për të paraqitur ankim, vlerëson se bazuar në provat dhe faktet e administruara KPK, subjekti i rivlerësimit, Bashkim Dedja, nuk arrin një nivel të besueshëm në vlerësimin e pasurisë.

Nëpërmjet këtij ankimi, Komisioneri Publik kërkon nga Kolegji i Posaçëm i Apelimit të marrë në shqyrtim çështjen në seancë gjyqësore dhe në përfundim të gjykimit të ndryshojë vendimin nr. 24, datë 13.6.2018, duke vendosur shkarkimin nga detyra të subjektit të rivlerësimit z. Bashkim Dedja, kryetar i Gjykatës Kushtetuese.

Po krerët e dy gjykatave më të larta në Shqipëri nuk kanë besueshmërinë dhe mbështetjen e partnerëve tanë ndërkombëtarë dhe gjasat janë që të lënë detyrat respektive që kanë. Presioni tashmë është mbi Edi Ramën, por dhe mbi kupolën politike Berisha, Meta, Basha dhe Monika, të cilët mbështesin kryeministrin në zhbërjen e reformës në drejtësi./Pamfleti

Shtetarët vjedhin, populli paguan

Shqiptarët paskan “lindur” për të shlyer borxhet e shumta, që qeveritarët i marrin në emër të ekonomisë dhe mirëqenies së popullit, por që nuk ka ndodhur kështu dhe prej 27 vitesh po paguajmë taksa, për të paguar kreditë e marra tek bankat dhe konsorciumet e huaja për lobime partiake, rrugë, blerje energjie, shkolla, spitale, investime për mos përmbytje nga lumenjtë, blerje helikopterësh e lloj-lloj shpenzimesh të tjera, por që shtetarët i kanë bërë pasuri, biznese e luks për vete dhe shtatë brezat e ardhshëm të tyre.
Defterët e “listës së zezë” të detyrimeve financiare që ka shteti shqiptar nëpër botë, janë hapur dhe dje, me 2 korrik 2018, ka hyrë në fuqi ligji për shlyerjen e një borxhi të marrë nga Nano, Berisha e Majko në vitet 1991-1998, si detyrim shërbimesh në favor të Bankës Europiane për Rindërtim dhe Zhvillim (BERZH).

Vlera e borxheve, që kryeministrat shqiptarë i kanë marrë 20-27 vite më parë, kur Berisha ishte sa Majkua dhe Majko ishte “Gjino”, do të paguhen tani që Majko është bërë gjysh në parlament dhe kapin shumën 1 288 348,27 (një milion e dyqind e tetëdhjetë e tetë mijë e treqind e dyzet e tetë, presje njëzet e shtatë) USD.

Ja Ligji Nr. 35/2018 datë 21. 06. 2018 “Për pagesën e detyrimeve të prapambetura në favor të Bankës Europiane për Rindërtim dhe Zhvillim (BERZH)”

Kryerjen e pagesës për aksionet e nënshkruara (paid-in) dhe të pa paguara nga shteti shqiptar, të periudhës 1991–1998, në favor të Bankës Europiane për Rindërtim dhe Zhvillim (BERZH).

Shuma prej 1 288 348,27 (një milion e dyqind e tetëdhjetë e tetë mijë e treqind e dyzet e tetë presje njëzet e shtatë) USD paguhet nga buxheti i Ministrisë së Financave dhe Ekonomisë me një këst, brenda vitit 2018.

Shpallur me Dekret Nr. 10820, datë 28.6.2018 të Presidentit të Republikës së Shqipërisë, Ilir Meta/Pamfleti

Përfitojnë 170 shefa, që “lodhen” për hallet e popullit

Ndërkohë që pensionet lëmoshë të 652 mijë hallexhinjve të moshuar dhe personave invalidë, u rritën me 2.8%, ose sa një kilogramë gjizë në muaj, lajmi i fundit që ka dalë nga zyrat e qeverisë, flet për rritjen e pagave të kryebashkiakëve, prefektëve, kryetarëve të këshillave në qarqe dhe zevendësve të tyre!
Sipas burimeve të sigurta që ka marrë “Pamfleti”, thuhet se pagat e 170 “agallarëve” që drejtojnë 61 bashkitë, 12 qarqet dhe 12 prefekturat e Shqipërisë, do të rriten 30%, referuar pagës mujore që marrin aktualisht, përveç 2% shtesë mbi pagën mujore, që u jepet për çdo 1 vit vjetërsi pune, por jo më tepër se për 20 vite punë.

Kujtojmë, që pagat aktuale të drejtuesve të pushtetit lokal, janë rritur 1 vit më parë, me VKM Nr. 177, datë 08. 03. 2017, të ndara sipas numrit të banorëve që ka çdo bashki, disa prej të cilave arrijnë në nivel page ministri dhe gjenerali.

Bashkitë me 200 mijë e 1 banor, deri 400 mijë dhe 400 mijë banorë

Kryetari: 130 mijë – 162 mijë e 750 lekë
N/kryetari: 100 mijë – 138 mijë lekë
Bashkitë me 100 mijë e 1 banorë, deri 200 mijë banorë

Kryetari: 110 mijë – 150 mijë lekë
N/kryetari: 70 mijë – 125 mijë e 725 lekë
Bashkitë me 50 mijë e 1 banorë, deri 100 mijë banorë

Kryetari: 70 mijë – 125 725 lekë
N/kryetari: 60 mijë – 101 mijë e 650 lekë
Bashkitë me 20 mijë e 1 banorë, deri 50 mijë banorë

Kryetari: 60 mijë -101 mijë e 650 lekë
N/kryetari: 45 mijë – 86 mijë e 100 lekë
Bashkitë që kanë deri 20 mijë banorë

Kryetari: Nga 45 mijë – 86 mijë e 100 lekë
N/kryetari: Nga 28 mijë e 300 – 75 mijë e 500 lekë
Prefekturat

Kryetari i Qarkut: 87 mijë – 150 mijë lekë
Zv/Kryetari i Qarkut: 57 mijë e 600 – 101 mijë e 650 lekë
Prefekti i Tiranës: 130 mijë e 300 lekë
Prefektët e tjerë: 118 mijë e 300 lekë/Pamfleti/