Politike

Kryeministri përjashton institucionet dhe ndërton shtetin paralel, tërësisht të tijin. Firma fituese e tenderit ka të drejtën e propozimeve të ndryshimeve ligjore në sistemin tatimor e të bëjë PR-në.

Duhet të ketë 16 ekspertë që të kenë punuar 10 vjet në Ministrinë e Financave ose Administratën Tatimore të një shteti anëtar i BE. Me cilën kompani të huaj ka bërë pazar kreu i qeverisë?!
Edi Rama nuk rresht së habituri shqiptarët dhe më gjërë me atë që po i bën shtetit, ligjit dhe Kushtetutës së vendit, teksa i shkel çdo ditë në çdo gërmë të saj.

Dhe nuk po bën gjëra të rëndomta apo nga ato karikaturat që zhgarravit herë pas here gjatë mbledhjevetë qeverisë, takimeve me zyrtarë vendas apo të huaj, por po kalon dora dorës tërë frenat e shtetit në dorë të oligarkëve që janë klientelë e tij.

Këtë radhë e ka filluar me sistemin tatimor, pikërisht aty ku rrjedhin paratë që mbajnë në këmbë një shtet normal. Megjithëse Shqipëria nuk është një shtet normal, pasi ka kohë që është jo në gjunjë por shtrirë dhe në grahmat e fundit.

Dhe pikërisht për të bërë një sistem të ri tatimor apo modul të ri sikurse precizohet, kërkohet që të përjashtohet nja ligj-bërja. Parlamenti shqiptar dhe deputetët e Kuvendit dhe atë ta marrin në dorë kompanitë dhe oligarkët e Ramës.

Dhe ndërtimin e “shtetit paralel”, jashtë sistemit të Kushtetutës dhe ligjeve shqiptare, Rama e ka nisur ta bëjë përmes një institucioni që varet tërësisht prej tij.

Më konkretisht, AKSHI ose ndryshe Autoriteti i Shoqërisë Kombëtare të Informacionit, ka hapur një tender me vlerën e çmendur prej 1.87 miliard lekësh të reja.

Ky tender është hapur dhe do të funksionojë vetëm për përmirësimin e një moduli të sistemeve tatimore shqiptare, pavarësisht se po të lexohen letrat e tenderit, tashmë publik në APP, nuk kuptohet se cilit model (ekzistues apo jo) i referohet.

Do të japim detaje në ditët në vijim për këtë tender që mbart shumë problematika, por le ta nisim nga dy çështje tepër sensitive dhe që tregojnë që eleminimi i shtetit dhe ligjit ka nisur që në krye të herës.

Së pari, ky tender do t’i japë të drejtën firmës që e fiton (ofertuesi në letrat e tenderit) që të propozojë ndryshime ligjore në tërë sektorin tatimor!

Pra ajo çka është një e drejtë kushtetuese (neni 81) vetëm për deputetët e Kuvendit të Shqipërisë dhe e 20 mijë qytetarëve, do t’i jepet një subjekti privat të vetëm, cili fiton këtë tender, me sa duket të paracaktuar nga Edi Rama dhe që pret ta realizojë përmes AKSHI-t.

Jo vetëm kaq, por kjo qeveri që aq shumë e vuan PR-in kërkon që fituesi i kontratës të garantojë dhe tërë procedurat e PR-it.

Konkretisht në termat e tenderit thuhet ndër të tjera se fituesi duhet të “Përgatisë përgjigje për gazetarët dhe publikun e interesuar, duke përfshirë edhe kohën gjatë fushatës afirmative të zbatimit të sistemit të ri” apo “Mbështetje në lidhje me prezantimin publik të kuadrit të ri ligjor”.

Jemi mësuar me Ramën, por kjo është risi dhe për standardet e kësaj qeverie, ku tashmë gjithë menaxhimin e imazhit për këtë përmirësim ligjor të modulit të sistemit tatimor do ta ketë kompania fituese e paracaktuar nga Rama.

Pika tjetër janë kushtet që u kërkohen ofertuesve. Konkretisht, ofertuesi duhet të ketë 21 ekspertë kryesorë, prej të cilëve 16 duhet të kenë “Të paktën dhjetë (10) vjet përvojë pune në Ministrinë e Financave ose AdministratënTatimore të një shteti anëtar i Bashkimit Evropian”!

Pra, ofertuesi laj-thaj duhet të jetë një firmë e huaj, me njëfarë lidhje me një shtet (ballkanas me shumë gjasa) që punon me ministrinë e një shteti të Bashkimit Evropian.

Duke përjashtuar në mënyrë taksative të gjitha kompanitë shqiptare, të cilave dhe po t’ua mbledhësh gjithsej të gjithë ekspertët, nuk i bëjnë 21 të tillë e jo më të kenë 16 prej tyre që të kenë punuar madje as te Ministria shqiptare e Financave dhe në Tatime. Jo më të kenë qënë pjesë e administratës së Ministrisë së Financave apo tatimeve të një vendi të BE.

Teksa merr në analizë të gjithë këto elementë që parashikon tenderi i hedhur në “treg” nga AKSHI, vetëvetiu shtrohet pyetja: kujt të huaji ia ka garantuar këtë tender Rama? Pjesë e cilit pazar me ndërkombëtarët është ky tender?

Dhe për më tepër, është koshient AKSHI për shkeljen e ligjit dhe Kushtetutës që po bën, duke hedhur mbi 18 miliardë lekë për një tender që do të zhbëjë shtetin shqiptar dhe ligjet e tij për sa i përket sistemit të Tatimeve? Se fundja AKSHI e ka “firmën” në tender!/Pamfleti/

Gjykata e Apelit për Krime të Rënda ka lënë në fuqi vendimin e Gjykatës së Shkallës së Parë për Krime të Rënda, për sekuestron preventive të pasurive të ish-kryeprokurorit Adriatik Llalla

Gjykata e Apelit për Krime të Rënda ka rrëzuar kërkesën e ish-kryeprokurorit Adriatik Lalla për heqjen e sekuestron preventive të pronave të tij, të cilat u përllogaritin në vlerën afro 1 miliard lekë. Llalla hetohet për “shpërdorim detyre”, “deklarim të rremë të pasurisë” dhe “pastrim të produkteve të veprës penale”

Më herët, avokati i Adriatik Llallës, Sokol Hazizaj, ankimoi vendimin e Gjykatës së Shkallës së Parë për Krimet e Rënda, por duket se Gjykata e Apelit e Krimeve të Rënda ka rrëzuar këtë kërkesë.

Ish Kryeprokurori Llalla me 10 shkurt 2018 dorëzoi tek presidenti Meta, dorëheqjen nga funksionet e magjistratit dhe nga e drejta që i njeh ligji për tu emëruar në një pozicion në nivel të Apelit. Po ashtu ai në funksion të kësaj dorëheqje KPK, pranoi kërkesën e avokatit të LLallës për ndërprerjen e procesit të Vetting-ut, pasi ish kryeprokurori Adriatik Llalla u vlerësuar si person jashtë sistemit të drejtësisë./atsh

Ish- kryetari i LSI dhe aktualisht President i Republikës, Ilir Meta po bën të pamundurën që ta fusë një këmbë në qeverinë e Ramës që në shtator të këtij viti.
Teksa ka përdorur dhe një paralajmërim të Ramës për ministrat e tij se në shtator do të bëhet bilanci i punës dhe ata që nuk kanë performancë do të ikin, ish kreu i LSI po tenton përmes të gjithë mënyrave për të pasur ministrat e Monikës në qeveri.

Herë vetë përmes bllokimit të ligjeve të qeverisë e herë përmes kërcënimeve të këshilltarëve të brendshëm dhe të jashtëm të tij, Ilir Meta e ka kthyer në një “target” veror dhe në një obsesion pjesëmarrjen me patjetër në qeverisje.

LSI ka kaluar një vit jashtë qeverisë dhe Meta e Monika nuk e konceptojnë dot faktin që të kenë “shterruar” dërgesat e valixheve me para në vilën në Gjirin e Lalzit apo në pallatet në Tiranë.

Por një kërkesë e tillë është dhe për faktin se duke qënë në qeveri në këtë periudhë të vështirë Vettingu dhe zbatimi të reformës në drejtësi, ndjehen më të mbrojtur nga prangat, pasi dosjet e rënda në ngarkim të tyre vetëm burgun u rezervojnë.

Për këtë arësye Ilir Meta ka zgjedhur të kërcënojë Ramën madje dhe me përplasje civile në shtator, nëse nuk lëshon pushtet në favor të LSI por dhe të PD.

Dhe këtë kërcënim Meta ka zgjedhur ta bëjë përmes këshilltarit të tij të jashtëm Çim Peka, gazetar i Shkëlzen Berishës. Një kërcënim që Peka e ka bërë nga Pervalla, ku bashkë me Metën dhe grupin që e shoqërojnë Presidentin janë mbi një javë me pushime malore.

Këtë e tregojnë fotot dhe postimet e vetë gazetarit të Zenit, por të rikthehemi te kërcënimi. “Si tha i sëmuri mendor? Për një vit do jem unë drejtësia!! Kush mendon se në vjeshtë nuk do ketë përplasje civile është thjeshtë budalla.

Uroj që të mos dalë një Neritan tjetër t’i kthejë të revoltuarit në kërkim të demokracisë nga rruga. Nuk e di cila do jetë kostoja, por di që në fund të vitit të gjithë do thoni: Sa e lehtë paska qenë të largojmë këtë frikacak që bënte arrogantin. Do e kuptoni që ishte thjeshtë një plehrë…”, lëshon kërcënimin e parë këshilltari i Metës, përmes rrjetit social.

Duke paralajmëruar në shtator përplasje civile, Peka që është dhe një “urë lidhëse” mes Berishës dhe Metës, ka dhënë dhe qëndrimin e pjesës radikale të PD-së që ëndërron këtë përplasje civile në shtator, për të ardhur në pushtet apo për të bashkëqeverisur të gjitha partitë.

Pastaj këshilltari i Metës kalon në kërcënimin tjetër, po të postuar nga drekërat e përbashkëta me Ilir Metën në Pervallë, kërcënime që kanë të njejtin “tekst”: Qeverinë.

“Opozitës nuk i jap pushtetin dhe drejtësinë që po emëroj”, për të tjerat bisedojmë! Çfarë ka tjetër ky që e do opozita? O budallai i Surrelit, nuk e di dëmin që do bësh, por që do i japësh të gjitha, për këtë vëmë bast.

Ose do ja japësh kësaj opozite, ose do t’i marrë një opozitë tjetër. Por kur t’i marrin, bëji mirë llogaritë, se ti je dhe trim”, paralajmëron këshilltari i Metës dhe gazetari i Shkëlzen Berishës. Duke përmendur dhe “opozitën tjetër” që mund të jetë një “aliazh” radikal Meta-Berisha.

Emëruesi i përbashkët është se Meta i ka dërguar mesazh kërcënues Ramës përmes këshilltarit të tij më të afërt, që të bashkëqeverisë me Monikën ose do largohet me përplasje civile.

Ndoshta Rama e ka shqetësuar Metën, duke “flirtuar” vetëm me Bashën, dhe lënë jashtë “radarit” të vëmendjes për bashkëqeverisje Monikën por dhe grupin e Berishës në PD./Pamfleti/