Politike

Kryetari i Partisë Demokratike, Lulzim Basha u shpreh gjatë një interviste televizive se “vendimi i Parlamentit holandez është një akt që tregon mosbesim ndaj qeverisë”.

Sipas Bashës, “Nuk ka lidhje Parlamenti shqiptar me atë që ndodhi sot në Parlamentin e Mbretërisë së Holandës”.

“Është hera e parë në botë, është e paprecedentë që një vend që ka votuar për heqjen e vizave, tani voton për rikthimin e vizave.

Është e paprecedentë. Nuk ka ndodhur diçka e tillë në botë”, – tha Basha.

“Ajo që ka ndodhur në Parlamentin e Holandës për rivendosjen e vizave për shqiptarët, ka 3 domethënie. E para, ky nuk është një akt racizmi ndaj popullit shqiptar. Ky është një akt i pastër mosbesimi ndaj qeverisë aktuale. Sepse, sipas Bashës, prej më shumë se 3 vitesh, policia holandeze dhe autoritetet e drejtësisë dhe ligjit në Holandë kanë konstatuar jo thjesht një rritje të numrit të krimeve të kryera nga rrjetet kriminale me bazë në Shqipëri, por rritje të influencës së tyre financiare dhe organizative”, – vijoi ai.

“Disa prej këtyre raporteve që janë publikuar edhe në median shqiptare tregojnë se këto rrjete kriminale duke operuar me bazë Shqipërinë, kanë futur në dorë edhe trafikun e kokainës nga Amerika Latine drejt portit të Roterdamit, apo Anversës në Belgjikë, sikundër kanë bërë edhe në qytete të tjera të rëndësishme të Europës, nga Londra në Hamburg e gjetkë”, – shtoi Basha.

“Me paratë e drogës, edhe nga Amerika Latine, këto banda janë bërë kaq të fuqishme saqë po të lexosh raportet e autoriteteve holandeze, kupton se tani kanë filluar të paraqesin një rrezik të madh edhe për pastrimin e parave”, – tha Basha.

“Një shtet i cili kërkon rikthimin e vizave do të votojë për hapjen e negociatave? Absolutisht që jo! As Holanda dhe as shtetet e tjera. Kjo është parathënie e keqe. Nëse nuk ka ndryshim të thellë, Shqipërisë prapë nuk do t’i hapen negociatat”, – tha Basha.atsh

Kryeministri Edi Rama ndodhet në Katar ku po zhvillon një vizitë zyrtare me ftesë të Emirit të Katarit, Lartësisë së Tij Sheikut Tamim bin Hamad Al Thani.

Kreu i qeverisë shqiptare u prit me një ceremoni të posaçme zyrtare ku merrnin pjesë personalitetet më të larta të shtetit.

Kryeministri Rama u prit në një takim të veçantë nga Emiri i Katarit, Lartësia e Tij Sheiku Tamim bin Hamad Al Thani.

Gjatë takimit, bashkëbiseduesit vlerësuan marrëdhëniet e mira mes dy vendeve, si dhe shprehën angazhimin e tyre për të thelluar bashkëpunimin në fusha me interes të ndërsjellë, kryesisht në turizëm dhe infrastrukturë.

Gjithashtu, zhvillimi i turizmit dhe i tregtisë së ndërsjellë, u theksua si prioritet. /atsh

https://www.facebook.com/edirama.al/videos/315840922424820/?t=0

Ambasada italiane ka njoftuar qytetarët e saj në Shqipërisë që të evitojnë grumbullimet masive gjatë protestës së paralajmëruar të opozitës në datën 21 mars, në të njëjtën ditë që do të mbahen edhe punimet e Kuvendit.

Ambasada ka bërë thirrje për kujdes maksimal në këtë ditë nga ana e qytetarëve të saj.

“Të enjten, 21 mars 2019 do të zhvillohet një protestë politike që do të përfshijë qendrën e Tiranës, në veçanti zonën e pedonales tek “Murat Toptani” dhe bulevardin “Dëshmorët e Kombit”, duke filluar rreth orës 09:00.

Rakomandohet që të evitohen tubimet dhe të ndiqen përditësimet nëpërmjet organeve të shtypit dhe në përgjithësi të përdoret kujdes maksimal.

Për më tepër sinjalizohet që manifestimi mund të ketë pasoja mbi trafikun në rrugët kryesore hyrëse të qytetit”, theksoi Ambasada italiane./atsh

“Edhe pse nuk kam asnjë përgjegjësi për këtë situatë që është krijuar, edhe pse kam bërë çdo përpjekje prej gati dy vitesh në këtë detyrë, për të parandaluar një situatë dhe një krizë të tillë, jam i gatshëm unë i pari të sakrifikoj në emër të një zgjidhjeje politike që rivendos normalitetin kushtetues, institucional, politik, demokratik në vend dhe që garanton ecjen e shpejtë drejt çeljes së negociatave në BE, jam i gatshëm për të dyja ekstremet. Që nga dorëzimi i mandatit tim si President, pasi të sigurohem që vendi ka një zgjidhje politike parimore, kushtetuese, solide që e çon përpara, e deri tek sakrifikimi i jetës sime si Salvador Alende për të ndaluar instalimin e një junte që mund ta kthente Shqipërinë 30 vite pas”.

Kështu deklaroi sot Presidenti Ilir Meta nga Pogradeci, i pyetur nga gazetarët lidhur me situatën politike në vend.

“Pra, Ilir Meta është i përgatitur dhe është i gatshëm për të dyja rrugët, sepse asnjëherë, pavarësisht nga ambiciet e tij, nuk ka rrezikuar dhe nuk mund të pranojë të rrezikojë as për karrigen e tij, dhe as për ambiciet e tij, as Shqipërinë dhe as demokracinë në Shqipëri. Unë do t’i qëndroj betimit tim që, midis pushtetit dhe demokracisë, do të mbaj gjithmonë krahun e demokracisë, sepse vetëm demokracia garanton një pushtet për popullin shqiptar, në mënyrë që të ndalojmë shpopullimin e Shqipërisë”, tha Kreu i Shtetit.

Meta theksoi e “akti i opozitës për djegien e mandateve ka qenë i papranueshëm për mua si President i Republikës”.

“Në vlerësimin dhe në bindjen time institucionale Kuvendi i Shqipërisë ka 82 deputetë të ligjshëm, përfshirë edhe 3 deputetët e opozitës, të cilët nuk pranuan të djegin mandatet sipas vendimit politik të partive përkatëse. Çdo numër tjetër përtej këtij, jo vetëm që e thellon këtë krizë, por sigurisht që nuk ndihmon as kapërcimin e kësaj situate, pasi çdo numër tjetër është i kontestueshëm në të gjitha planet”, tha Meta.

Ai shtoi se “si në planin kushtetues, në planin ligjor, në atë procedurial dhe politik, në planin moral, dhe absolutisht që në vendin tonë si një vend tërësisht proeuropian, mund të ftohen, mund të thërriten edhe një milion qytetarë, të cilët kanë mbushur moshën për të qenë deputetë e që nuk kanë frikë të plotësojnë formularin e dekriminalizimit për të votuar në parlament ligje të reformave të integrimit europian, por kjo duhet t’i sigurojë të gjithë që as nuk e fsheh këtë krizë të thellë përfaqësimi, dhe njëkohësisht as nuk e garanton, përkundrazi e minon, çeljen e negociatave midis Shqipërisë dhe Bashkimit Europian”.

Ai deklaroi se nuk mund të ketë zgjidhje për këtë krizë, as në mënyrë ultimative apo përmes retorikave që nxisin veprime të dhunshme, por vetëm me një dialog politik të shpejtë, serioz dhe të përgjegjshëm, që garanton rivendosjen e jetës politike në normalitet, duke respektuar Kushtetutën, dhe ndarjen e pushteteve. /atsh