Politike

Kryeministri Edi Rama deklaroi sot se “Presidenti Ilir Meta ka marrë drejtimin e opozitës sa herë dështon Luli, ndërhyn Iliri, është fatkeqësi e madhe për institucionin”.

Në një takim me banorët e njësisë nr. 4 paraditen e sotme, Kryeministri Rama theksoi se “erdhi dita që Bujar Nishani të duket si Xhefersoni, habi e madhe. Kur ne bëmë marrëveshjen atëherë, që ishte marrëveshje e deklaruar nga të dy palët më kujtohet të nesërmen ata të Presidencës merrnin në telefon na dërgoni letrën më firmë të përbashkët që jeni dakord me shtyrjen një jave të zgjedhjeve që ishte brenda afatit të përcaktuar nga ligji zgjedhor dhe brenda kornizës kushtetuese, për të bërë këtë ndryshim e kërkonte me shkrim”.

“Ky tjetri hapni vendin se do hidhem, është habi e madhe i hodhi benzinë zjarrit me marrëzinë e shfirmosjes së vet”, tha Rama.

Kreu i qeverisë u shpreh se “sot e ka marre përgjigjen shume të qartë ajo histori nga kolegji zgjedhor se është Kolegji Zgjedhor, gjykata që vendos dhe është pa të drejtë ankimi askush nuk mud të vë në diskutim vendimin e Kolegjit Zgjedhor që vulos zgjedhjet”.

Duke komentuar takimin e sotëm të Presidentit Meta me kreun e opozitës Lulzim Basha, Rama tha se “mund të bëjnë ca të duan, por kjo s’ka asnjë rëndësi është nul, është kot këtu ka institucione nuk është çështja secili ka pjesën e vet. Presidenti nuk ka asnjë të drejtë në asnjë rresht të Kushtetutës, por kur e lexon Kushtetutën në filxhan mund të fantazosh e të bësh”.

Sipas tij, Meta mund të marrë vendim t’i shpall luftë BE dhe SHBA-së, por të gjithë njerëzit e kuptojnë, pjesa dërrmuese e neverit, pjesa tjetër e kupton po ngaqë është në pozitë tifozlliku thotë hajt mos del ndonjë gjë, faktikisht është një marrëzi.

“Problemi me këta është mirë që u çmenden, por u çmenden të gjithë përnjëherë”, tha Rama./atsh

https://www.facebook.com/edirama.al/videos/1145392442325496/?t=0

Presidenti Ilir Meta ka pritur sot në takim kreun e PD-së Lulzim Basha, i cili pranoi ftesën për t’u takuar në presidencë.

Në Presidencë, Basha mbërriti rreth orës 09:00, takim i cili u zhvillua me dyer të mbyllura.

Në përfundim të takimit, Meta ka bërë të ditur se me kreun e PD-së diskutuan mbi krizën aktuale që po kalon vendi.

“Sot prita në një takim Kryetarin e Partisë Demokratike, z.Lulzim Basha për të diskutuar mbi krizën aktuale që po kalon vendi. Kërkohet përgjegjshmëri dhe sjellje europiane nga të gjithë”, u shpreh Meta.

Pas takimit me kreun e Partisë Demokratike, Meta ka pritur në takim edhe Nënkryetarin e Lëvizjes Socialiste për Integrim, Petrit Vasili.

Meta ka ripërsëritur mesazhin se kërkohet përgjegjshmëri dhe sjellje europiane nga të gjithë.

“Në vijim të konsultimeve me partitë politike për zgjidhjen e krizës aktuale në vend, prita sot në takim Nënkryetarin e Lëvizjes Socialiste për Integrim, z.Petrit Vasili. Kërkohet përgjegjshmëri dhe sjellje europiane nga të gjithë”, është shprehur Meta pas takimit.

Një ditë më parë, presidenti ftoi për dialog kryeministrin Edi Rama dhe kreun e opozitës, Lulzim Basha në Presidencë./atsh

Kryetari i bashkisë së Vlorës, Dritan Leli, i premtoi sot banorëve të fshatrave të Xhyherinës, Sherishtës, Mekatit, Risilisë dhe Grabianit përmirësim të infrastrukturës, si dhe një sërë projektesh të tjera me synim përmirësimin e jetës së tyre.

Gjatë takimi me këta banorë, Leli theksoi se “në këtë mandat kemi ndërtuar rrugën e Risilisë, aks i cili ishte kërkesa më urgjente e banorëve të kësaj zone. Synojmë gjatë këtij 4-vjeçari plotësimin me infrastrukturë të Sherishtës pas ndërtimin të landfilldit, ndërtimin e aksit lidhës Xhyherinë – Rruga e Lumit të Vlorës”.

Kryetari Leli u shpreh se “kemi projekte konkrete për ndërhyrje në kanalet kullues dhe vaditës të fshatrave si dhe ndërhyrjen në ujësjellësa”.

Sipas tij, edhe rehabilitimi i qendrave të fshatrave ngelet sfida jonë e re. Së bashku për më shumë vëmendje për zonat rurale./atsh

Presidenti i Republikës, Ilir Meta i ka ftuar zyrtarisht në takim kryetarin e Partisë Socialiste dhe kryetarin e Partisë Demokratike për të biseduar për situatën politike në vend.

Sipas njoftimit nga Presidenca, takimi me Bashën është fiksuar të zhvillohet nesër në ora 09:00.

“Duke qenë në dijeni që Rama është i zënë me takime, Presidenti do të jetë nesër në zyrë nga ora 05:00 deri në ora 13:00 duke pritur sërish që kryeministri të gjejë kohë”, tha zëdhënësi i presidentit, Tedi Blushi. /atsh

Deputetët e Partisë Socialiste, Ervin Bushati dhe Eglantina Gjermeni kanë marr pjesë në punimet e sesionit të verës së Asamblesë Parlamentare të Këshillit të Europës

“Sot mora pjesë në punimet e sesionit të verës së Asamblesë Parlamentare të Këshillit të Europës, ku ndër të tjera diskutova edhe për situatën ne Shqipëri në Komitetin e Monitorimit”, bën të ditur deputeti Bushati.

“Prezantova para komitetit situatën politike dhe reformat e ndërmarra nga qeveria shqiptare, kryesisht ato të lidhura me reformën në drejtësi, e cila po jep produktet e saj. Gjithashtu theksova edhe rëndësinë e mbajtjes së zgjedhjeve, rëndësinë e respektimit të institucioneve dhe vijimin e reformave të nisura. Kjo është beteja e fundit për Drejtësi dhe Shqipëria nuk mund të mbahet peng nga një opozitë që qëllimisht bojkoton proceset dhe reformat”, sqaron deputeti socialist.

Sipas tij, “anëtarët e komitetit vlerësuan shkëmbimin e mendimeve dhe informacionin duke uruar që zgjedhjet e datës 30 qershor të jenë të qeta dhe sipas standardeve ndërkombëtare”.

“Gjithashtu e rëndësishme të theksoja edhe njëherë progresraportin pozitiv të Komisionit Europian: ku theksohej qartë se Shqipëria ka arritur progres të rëndësishëm në fushat e përcaktuara nga Këshilli. Ajo që vlerësohej më së shumti në raport por edhe nga gjithë ndërkombëtarët është përparimi që Shqipëria ka bërë në transformimin e madh të sistemit të drejtësisë, duke e cilësuar atë si një shembull të paprecedentë të kontrollit të gjyqtarëve dhe prokurorëve, proces ky që më në fund qytetarëve t`u kthehet besimi i munguar në sistemin e drejtësisë”, bën të ditur Bushati.

“Rekomandimi pozitiv tregon se Shqipëria i ka kryer me sukses detyrat e saj në këtë proces dhe i ka plotësuar ato me përpikëri ndaj bojkoti, rrëmujat dhe protestat aspak paqësore nuk na nderojnë por përkundrazi. Opozita duhet të tregojë qytetari dhe të kuptojë që jetojmë në demokraci. Nuk mund të sillet në mënyre destruktive dhe të pengojë zgjedhjet, por duhet t’i shërbejë qytetarëve dhe vendit”, nënvizon Bushati./atsh