Politike

Kryeministri Edi Rama deklaroi sot se opozita nuk do të mundet të pengojë dot hapjen e negociatave dhe drejtësinë.

Duke folur në takimin elektoral në Himarë, Rama tha se “këta mund ta kenë dëmtuar Shqipërinë sot për sot, përkohësisht, për të marrë në tetor negociatat për anëtarësim. Por nuk e ndalojnë dot. S’kanë shans ta ndalojnë dot”.

“Shqipëria do të ulet në tavolinë me BE dhe Shqipëria do hapë bisedimet. Dhe bisedimet fillojnë me drejtësinë. Dhe BE do t’i thotë Shqipërisë OK keni bërë reformën në drejtësi bravo, po bën vetingun bravo. Tani na trego pak funksionon sistemi i drejtësisë i barabartë për të gjithë. Ju që doni të hyni në familjen tonë. Në familjen tonë drejtësia është e barabartë për të gjithë. Drejtësia në Francë nuk pyet a je President a s’je President? Presidentët në Francë kanë qenë dhe janë në hetim dhe i nënshtrohen drejtësisë. Drejtësia nuk pyet në Itali a je kryeministër, a s’je kryeministër? Shkon atje dhe i nënshtrohesh drejtësisë. Drejtësia nuk pyet në asnjë nga vendet e BE dhe do duhet që Shqipëria të provojë që nëse do të bëhet vend i BE ka një drejtësi ku i gjati nuk e sheh do nga lart poshtë drejtësinë. I shkurtri nuk i fshihet do drejtësisë. I forti përpara drejtësisë është njësoj si i dobëti. Zyrtari i lartë përpara drejtësisë s’ka asgjë më shumë sesa njeriu i zakonshëm”, tha Rama.

Kjo, u shpreh Kryeministri, “është lufta jonë historike dhe ky është ai tërmeti që e kemi paralajmëruar që ditën e parë kur ne PS nisi këtë reformë dhe të gjithë ishin kundër. Që nga baba Xhikja tek Saliu, tek Xhuljeta, tek fallxhorja, tek të gjithë me radhë, kundër. Dhe u detyruan të vijnë të votojnë atje ndryshimet kushtetuese, kur ua futën partnerët të 4 këmbët në një këpucë. Votim i paharrueshëm. Gjithë ata burra atje. Kokën poshtë kartonin jeshil lart. Ja këta janë”.

Kjo, theksoi Rama, “është historikja e qeverisjes sonë, drejtësia. Përpjekja për të bërë shtet. Nuk bëhet shteti për një vit as për 5 vjet. Shtetet që ne shohim kur kalojmë detin janë bërë me qindra vjet. Procesi ynë do marrë shumë më pak kohë se sot jemi në mes të Europës dhe nuk kemi nevojë të shpikim. Mjafton të mësojmë dhe të adoptojmë atë që të tjerët e kanë bërë para nesh”.

“Dhe atyre që thonë, hë mo kjo reforma në drejtësi. E di unë shumë mirë. Ju ka ardhur në majë të hundës me ato karnavale dhe duan drejtësi. Në 30 qershor të shkojnë dhe ua zhysin votën siç e meritojnë ata. Dhe të jenë të sigurt që drejtësia, e ka thënë populli mund të vonojë, por nuk harron. Ndërkohë që drejtësia që ka vonuar për 30 vjet tani duhesh kujtuar dhe po vjen hap pas hapi. Do i shikoni. Hap pas hapi. Nuk do t’i shpëtojnë drejtësisë. Jo të djegin KZAZ-të. Jo të bëjnë provokime e të flasin me dy standarde. Që të dalin të mbajnë ato fjalimet absurde që ne nuk e njohim 30 qershorin, po ne do rezistojmë. Po Edi Rama është plagosur për vdekje, po ne nuk duam konflikt. Këto lloj fjalimesh të një stili mafioz, me kode mund të vazhdojnë t’i mbajnë, por unë nuk e kam me ta. Ata e kanë marrë rrugën e tyre. Ata do të bien të gjithë në gropën që i hapën Shqipërisë. Donin ta fusnin Shqipërinë në gropë për të marrë peng zgjedhjet për të krijuar kaos. Duke shpërndarë nëpër botë fotografitë e shëmtisë së tyre që organizonin atje në Bulevard me punonjësit e bashkive sikur të ishte një revolucion me djegie. Duke bërë që njerëzit që mezi e kanë pritur këtu sezonin turistik të fitojnë më pak këtë vit për shkak të atyre”, tha Rama.

Unë, theksoi Rama, “e kam pikërisht me këta njerëz, e kam me demokratin më ekstremistë të Himarës, nuk e di kush është fare. Që nuk ushqehet nga SHQUP-i. Nuk ha përsheshin e Lulit siç e hanë ata që i kanë veshët si parafango. I keni parë si i kanë veshët. E keni parë atë Salianjin, sikur ka tre kokë. Një kokë edhe. E kam me demokratët që hapin dyqanin këtu. Hap dyqanin në mëngjes. Me demokratët që kanë hapur shtëpitë dhe i vijnë ato e-mailet që na falni po për arsye të situatës ne duhet të anulojmë rezervimin. Çfarë i thoni gruas ju demokratët ekstremistë kur shkoni në darkë në shtëpi dhe ju thotë ajo shiko se sikur nuk po vijnë aq sa duhet të vinin. Si i thoni ju gruas? Mi ka marrë lekët Luli. Apo ja kam falur lekët revolucionit. Si i thoni ju?”

“Është shumë e thjesht. Vajtja mbas berihajt. Rama ik e Rama ik dhe unë mbeta duke ikur. Dje isha në Fier. Sot erdha këtu.Do iki në Vlorë. Këtë punë kam. Po këta që shkojnë si mbas berihait. Hajdeni të shtunën se do e rrëzojmë. Pastaj më rrëzojnë këndojnë dhe himnin, fitore, fitore, fituam, fituam. Ra, ra, ra. Iku, iku, iku. Vjen e hëna ou. Mblidhen ta rrëzojmë prapë. Pastaj pasi nuk rrëzohet prapë. Thonë po sikur të mblidhemi në darke se mbase e ka fajin orari. Keni parë ju njerëz që mblidhen natën për të bërë rrëzime qeverish ja këta janë”, u shpreh Rama.

Duke folur për presidentin Meta, Rama tha se, “ai i 5-s së mëngjesit nuk u zgjua për të dalë në zyrë, ai nuk ka fjetur fare. Kur nuk fle në 5, ha paçe me Fahri Balliun. U bë Presidenca si ajo pica telefon 24 orë. Pres në 5 të mëngjesit thotë se jam i shqetësuar për kombin. Ha paçe Ilir me Fahriun. Kafen turke merre kokërr këto ditë, deri të dielën se iku kjo punë. 30 qershori është aty, është i popullit, jo i partive. Partitë kanë detyrë të dalin para popullit kur duan të zgjidhen. Populli zgjedh. Nuk ka këtu ta kthejmë botën përmbys që partitë të zgjedhin popullin. As që partitë vendosin se kur do ti zgjedhë populli”./atsh

“Data 13 tetor 2019 e dekretuar për mbajtjen e zgjedhjeve vendore, u vendos sepse kjo është data më e shpejtë për të garantuar të drejtën e opozitës për të marrë pjesë në zgjedhje, por edhe për të garantuar përfshirjen në procesin e administrimit të zgjedhjeve”, iu drejtua sot Presidenti Ilir Meta, Kryeministrit Edi Rama.

Në një shënim të hapur publik, Kreu i Shtetit u shpreh se kërkesa e tij për t’u takuar me Kryeministrin Rama, ishte pikërisht për të vendosur bashkë datën e re të zgjedhjeve vendore.

“Ti më ke privuar padrejtësisht, si në planin institucional, ashtu edhe në atë njerëzor, nga mundësia për t’u takuar bashkë. Jam thellësisht i indinjuar dhe njëkohësisht i brengosur që pritjes sime sot, nga ora 05:00 e mëngjesit, ti iu përgjigje me një të larë në pishinë vetëm 200 metra larg Presidencës. Doja ta vendosnim bashkë datën e zgjedhjeve dhe kam që nga data 8 qershor 2019 që të pres e të pres, me shpresë”, tha Meta.

Ai tha se “nuk mund ta linte Shqipërinë pa një datë të zgjedhjeve vendore dhe t’u mohonte shqiptarëve të drejtën për të votuar në mënyrë të qetë, në paqe dhe me alternativa”.

“Ne të dy e dimë mirë, nga ata që vendosin për të ardhmen europiane të Shqipërisë, se nuk ka çelje të negociatave me Bashkimin Europian me zgjedhje monopartiake, siç ia ke marrë vrapit t’i bësh ti, përkundrazi”, tha Meta.

Ai kujtoi se “në 17-18 tetor 2019 ne presim mbledhjen e Këshillit Europian, që do të mund të vendosë për çeljen e negociatave për Shqipërinë dhe Maqedoninë e Veriut”.

“Ti thua se data e dekretuar nga unë është dhuratë me rastin e ditëlindjes së Doktorit më 15 tetor. Ti e di që unë nuk ta kam fshehur asnjëherë, as ty dhe as publikut, dobësinë që kam për Doktorin. Njerëz jemi, kemi edhe pika të dobëta. Por edhe ti nuk është se e “urren” aq shumë, sa aktron para kamerave dhe militantëve të tu. Aq më tepër që marrëveshjet më të mëdha në këtë vend i keni bërë ti dhe Doktori, siç ishte edhe ajo brenda natës që ndryshoi themelet e Kushtetutës, që ishte votuar me referendum nga i gjithë populli, dhe pasojat e të cilës i vuajmë edhe sot”, tha ai.

Natyrisht, vijoi Meta, “që nuk ka lidhje as me 18 tetorin, ditën e lindjes së udhëheqësit të fundit komunist, Ramiz Alia, i cili, pavarësisht formimit të tij komunist, nuk besoj se e ke harruar, tregoi përgjegjshmëri të lartë me shtyrjen e zgjedhjeve në vitin 1991, duke i krijuar hapësirat e duhura opozitës për të marrë pjesë në to, për të mirën e vendit”.

“Ndaj të lutem Edi tregohu vizionar, reflekto dhe mos na zhgënje”, thotë në fund Presidenti. /atsh

Kryeministri Edi Rama gjatë një takimi elektoral në Fier, u shpreh se, opozita do rrëzohet vetë te gropa që ka hapur për të rrëzuar Shqipërinë.

“Lajmi i mirë është që filxhani plasi dhe ofensiva dështoi. Lajmi i mirë është që gropa që kanë bërë thuajse gati për të fundosur Shqipërinë, është gropa ku do të bien vetë një nga një”, – tha Rama.

“Ne ndahemi sa të doni tek shumë gjëra, që na bëjnë ne socialistë e ata demokratë. Por, ne nuk mund të ndahemi kurrë me shqiptarët dhe shqiptarët s’duhet të ndahen kurrë me ne për drejtësinë e drejtë”, – tha Rama.

“Unë e thashë se çmenduria e parë do pasonte të dytën. U bë 13 tetor. Thashë 21, po 21 del e hënë, ndërhyri dhe fallxhorja dhe u bë 13. Në fakt kjo është e dhimbshme, por me këta karagjozë ne duhet edhe të qeshim, sepse historia e këtij karagjozllëku do mbahet mend gjatë, ndërsa është vërtetë e dhimbshme, pasi përmes kësaj u bë nami këtu, se do plaste ’97-ta. Por kjo nuk lidhet me zgjedhjet. Zgjedhjet janë pengu, për të marrë peng Shqipërinë, për të mos lejuar Shqipërinë për të marrë negociatat me BE”, – tha Rama.

“Haxhiu i parë i kishte tmerr Perëndimorët, Haxhiu i dytë, ka tmerr OMN. Njësoj janë dhe në këtë pikë. Pse e gjitha kjo? Si ka mundësi që e gjithë kjo valë protestash u shoqërua me një furi balte mbi fytyrën e Shqipërisë jashtë kufijve?” – tha Rama.

“Si ka mundësi që këta gëzoheshin, kur fotografitë me molotovë, të atyre protestave të popullit imagjinar të bashkive, të një partie rrugëhumbur, me disa të rinj po rrugëhumbur, të paguar për t’i vënë zjarrin godinave, për të treguar se do bëhej nami, dilnin jashtë vendit. Jo për të më larguar mua, se e dinin mirë, si Saliu, si Meta, si fallxhorja, ashtu edhe Xhuljeta, se qeveria nuk ikën me protesta. Një qeveri e zgjedhur që ka shumicën në parlament, nuk hidhet me protesta. Le të marrin buldozer e të shkatërrojnë godinat, apo t’i hedhin në erë, nuk ikën qeveria”, – tha Rama.

“Ata s’e kanë me qeverinë dhe kokën time. Këto i përdorin për ata rrugëhumburit e tjerë që do sjellin në bulevard. Hajdeni sot se do e rrëzojmë, hajdeni të shtunën se do e rrëzojmë, dhe pasi këndohej himni, të nesërmen vijonte jeta normalisht. Këto thirrje u realizonin me tendencën për t’i thënë atyre jashtë, që duan të ulen për të hapur negociatat me ne, se si mund të uleni në tryezë me këtë vend që është rrëmujë, me narkoshtetin”.

“Miqtë tanë me të drejtë mund të dekurajohen me skena të tilla, ku askund në historinë e demokracive europiane, si askund dhe në Ballkan, ikën opozita nga parlamenti dhe marrin molotovin, çmenden komplet. Ato që kanë pikëpamje tjetër për Europën fërkojnë duart nga këto skena”, – tha Rama.

“Këta karagjozë janë të gatshëm të provojnë gjithë marrëzitë e tyre dhe po i bëjnë Shqipërisë atë që armiqtë tanë nuk ia kanë bërë. Pse e kanë tmerr momentin e uljes në tryezë e BE? Sepse ulja është njësoj sikur të dërgosh fjalë për të kërkuar dorën për martesë, dhe ajo familja e madhe thotë hajde na provoni se jeni të besueshëm për t’u bërë pjesë e jona, na tregoni se jeni besnikë ndaj vlerave dhe parimeve tona. Na tregoni se jeni si ne, që kjo ka sukses për të dyja palët. Dhe këtu është lepuri që fle, ose më saktë rri zgjuar në barkun e katër aventurierëve”, – nënvizoi Rama.

“Ato s’të thonë më bëj Vetingun, por thonë më provo, ti Shqipëria, se ti ke një sistem drejtësie që sado i gjatë apo i shkurtër të jesh, nëse ke probleme për t’iu përgjigjur drejtësisë, duhet të dalësh përpara drejtësisë. Sado i fortë të jesh, nuk i shmangesh dot drejtësisë qoftë president, kryeministër, ish-president, ish-kryeministër apo ish-ministër qofsh. Nëse Shqipëria e provon këtë, atëherë është e gatshme për hapin e radhës”, – tha Rama.

“Pra, rritet presioni ndaj sistemit të drejtësisë dhe ja kjo është pika që lidh Partinë Socialiste me interesat e mëdha të vendit dhe këtë e kam me demokratët. Cila parti nuk është lëkundur në asnjë hap për Reformën në Drejtësi? Kërkoni sa të doni, por vetëm Partia Socialiste do t’ju dalë”, – tha Rama.

“Një demokrati që në mëngjes hap dyqanin, sipërmarrjen, punon arën, pyetja që i bëj unë është, ti je njeri i zakonshëm që shikon se si partia jote është armikja e Reformës në Drejtësi, PD që lindi si shpresa jote e madhe, që i fale zemrën e mendjen, mbështetjen e votat, është katandisur sot, si grupet komuniste që nuk e kishin marrë vesh se kishte rënë regjimi dhe i dilnin në shtigje dallgës popullore, sepse janë kundër teje, janë kundër që këtu të ketë një drejtësi të barabartë për të gjithë”, – tha Rama.

“Sot kjo PD, që merr peng njerëzit e zakonshëm, duke futur ankthin e sëkëlldinë, i godet drejtpërdrejtë pjesën më të rëndësishme ekonomike të vitit, kjo opozitë arrin në pikën që të pretendojë që zgjedhjet nuk u bëkan në momentin që kush hidhet përpjetë dhe çmendet kërkon të mos bëhen zgjedhjet. Që po ta pranonim këtë, s’do kishim zgjedhje kurrë”, – tha Rama.

“Kjo është fatura që ne duhet të përballojmë, kjo është dhimbja që duhet të kapërcejmë, se kemi marrë përsipër të tronditim themelet e një sistemi, pasi kemi marrë përsipër të bëjmë një shtet për të gjithë. Prandaj është e rëndësishme që më 30 qershor edhe pse nuk e do Subashin dhe s’ke kë të votosh, pasi nuk ta sollën Dacin, ti duhet të shkosh të votosh e t’i vësh vizën Armandos (Subashit), ama, konfirmo që Shqipëria është e jotja, nuk është e katër aventurierëve, që janë tallur me ty duke thënë Rama ik ik ik, se unë do iki në Vlorë”, – tha Rama.

Në fund, Rama tha se opozita që bërtet ka frikë dhe do tretet nga frika që ka. “Ata bërtasin shumë, kërcënojnë shumë. Janë të parët në histori që vinin në parlament, jo për të folur, po për të gjuajtur, të parët në histori që kur futeshin në parlament udhëheqjen e kishin ato pa tru, por që tregonin krahët”.

“E kthyen Kuvendin në një mejhane që gjuanin vezë, shishe uji, merr letrat e hidhi përpjetë e vër ulërimën. E mbani mend kush ishte? Fallxhorja, që del e ngre sytë nga Zoti. O Zot, shpëtoi shqiptarët nga shitblerja e votës. O vdeksha unë për ty, sikur Zoti të merrej me fushatë elektorale, Zoti do ta fuste në shtëpi të mos shikonte asnjë zgjedhës. Ata kanë frikë, kanë shumë frikë. E keni parë filmin “Beni ecën vetë”, që Beni vogël flet me zë të lartë, jo për të trembur ujkun, por për të trembur frikën e vet. Nga frika e tyre do treten”, – përfundoi Rama. /atsh

Kryeministri Edi Rama tha pasditen e sotme nga takimi elektoral në Vorë për zgjedhjet lokale të 30 qershorit se me dekretimin nga ana e Presidentit të një date të re zgjedhjesh, ka edhe një lajm të mirë.

“E kuptuan që kjo lojë mbaroi. Lajmi i mirë i datës së re është vetëm një, që më 30 qershor votimet do jenë qetësi.

Mund të ketë ndonjë budalla këtu e atje që akoma s’e ka marrë vesh që kjo punë ka mbaruar dhe që data e re është muhabet filxhani, por të gjithë ata që e kanë kuptuar rëndësinë e këtyre zgjedhjeve e dinë që 30 qershori është shuplakë historike ndaj gjithë karnavaleve të shtabit të revolucionit të mbledhur atje në Presidencë.

Të dalin të gjithë, socialistë e demokratë, e sidomos demokratët e t’i japin një mesazh Lulit që kështu nuk shtyhet dhe t’i japin mundësi PD të rilindë, ose të mbajnë Lulin dhe me rrenat e Lulit të jetojnë çdo ditë”, – tha Rama. /atsh