Politike

Kryeministri Edi Rama i ka lëshuar një tjetër ftesë bashkëpunimi opozitës në të mirë të përbashkët të Shqipërisë dhe shqiptarëve, për një vendim pro çeljes së negociatave nga Këshilli i Europës. Duke iu drejtuar veçanërisht partive jashtë Parlamentit, Kryeministri tha se duhet të ulen sa më parë për të realizuar një nga kushtet e Gjermanisë, reformën zgjedhore.

“Nëse jeni patriotë të vërtetë dhe e keni të ndarë Europën nga qeveria socialiste, duhet urgjent bashkërisht të bëjmë Reformën, si fazë të parë. Jo të mbyllim Komisionin e Reformës, por t’i marrim një e nga një rekomandimet e ODIHR. Ato janë e zeza mbi të bardhë. Merren dhe futen në ligj dhe me atë letër i thuhet Gjermanisë mike, avokate e çeljes së negociatave sot, ne i kemi plotësuar të dyja këto. Pastaj vazhdojmë ne flasim për sistemin, flasim për votën e emigrantëve, të cilën edhe pa ju do e bëjmë,” tha Kryeministri.

Ai i është përgjigjur edhe kreut të PD në lidhje me ofertën e tij për zgjidhjen e krizës.

“I thotë një këmbësor që rri te hija e fikut një makine: “hap krahun”?! “Ta kemi dhënë planin, zbatoje!” Ou? Me çfarë dekreti minor e ke marrë të drejtën që të më çosh mua planin? Kë përfaqëson? Megjithatë, ata janë të mirëpritur në çdo moment. Unë ju kam të gjithëve njësoj. Juve këtu dhe ata atje. Madje për ata kam pak më shumë dhimbje dhe kujdes se ata kanë një hall më të madh,” tha Rama.

“Reformën zgjedhore mbi bazën e rekomandimeve të OSBE/ODIHR ta bëjmë menjëherë, urgjent! Ata që janë jashtë nuk e duan. Ju që jeni brenda s’keni pse mos ta doni. Ata që janë jashtë nuk e duan, sepse një nga gjërat që duam të bëjmë bashkë është që të mos ketë komisione politike. Kjo është e mirë për të gjithë, e të tjera gjëra që janë të shkruara aty. Unë e di që ju keni ide të tjera të vlefshme. Edhe ne kemi ide që mund t’i dëgjoni, s’është e thënë t’i pranoni. Edhe ata kanë ide, por s’janë këtu. Kështu që, të bëjmë Reformën Zgjedhore, të presim të plotësohet Gjykata Kushtetuese dhe Gjykata e Lartë dhe tu themi miqve gjermane, se nuk e dimë çfarë mund të ketë në vendim, mund të ketë kushte të tjera, por, për sa flasim dhe atyre që iu kemi borxhin më të madh në këtë proces, këto dy kushte t’ua bëjmë dhe le të përfitojmë pastaj pozitivisht nga qenia e tyre në krah me ne, sepse kushtet tyre janë plotësuar. S’mund të presim këtu të biem dakord për të gjitha, por të biem dakord për Europën,” tha më tej Kryeministri.

Kreu i qeverisë tha se atë që duhet të bënte çdo shqiptar që e do vendin e tij dhe do ta shohë të ecë përpara, e ka bërë Kancelarja Merkel, e cila dha shembullin më të mirë edhe ndaj paudhësisë së opozitarëve që punuan për të dëmtuar Shqipërinë edhe në sytë e parlamentarëve gjermanë.

“Një shembull për të kuptuar diferencën mes kujt do ta çojë para procesin dhe kujt bën çmos të gjejë argumente që tu mbushë mendjen atyre që e kanë në dorë të bllokojë procesin: Ata që janë në rrugë mbushën dynjanë në Shqipëri dhe nëpër botë, iu bënë spam emaileve të parlamentarëve gjermanë, “s’ka Gjykatë Kushtetuese” dhe kancelarja iu tha, – “tani i kemi kërkuar Shqipërisë të bëjë vetingun dhe të pastrojë sistemin. Shqipëria nuk ka Gjykatë Kushtetuese se spastrimi ka filluar. Është sukses që është pastruar sistemi, apo është dështim fakti që s’ka Gjykatë Kushtetuese?!” Ja si argumenton dikush që mbështet Shqipërinë edhe me sytë e ftohtë të argumenteve, jo me mendjen e çoroditur të luftës për pushtet. Një shembull i mirë për tu mbajtur mend,” u shpreh ai. /atsh

Ministri i Jashtëm i Finlandës, Pekka Haavisto, ka theksuar të mërkurën se qeveria finlandeze mbështet Shqipërinë për çeljen e negociatave me Bashkimin Europian.

Ministri finlandez, gjatë vizitës së tij në Tiranë, nënvizoi se problemet e brendshme të vendeve të BE nuk duhet të influencojnë në zgjerimin e saj drejt Ballkanit Perëndimor.

Sipas tij, Shqipëria dhe Maqedonia e Veriut ndodhen në Europë dhe BE duhet të vijojë procesin e zgjerimit në Ballkanin Perëndimor. Haavisto theksoi gjithashtu se vendi tij është mjaft i kënaqur nga bashkëpunimi me Shqipërinë.

Deklarata e Haavisto u bë sot, gjatë një konferencë të përbashkët me ministri në Detyrë për Europën dhe Punët e Jashtme, Gent Cakaj.

“Edhe për mua është kënaqësi që jam këtu në Tiranë. Patëm një bashkëbisedim të shkëlqyer me ministrin dhe stafin e ministrisë. Pikësëpari, faleminderit për ngushëllimet për viktimat e sulmit të tmerrshëm në shkollë që ndodhi në pjesën lindore të Finlandës, ku pati dhe shumë studentë të plagosur. Dua gjithashtu të shpreh keqardhjen për tërmetin që ndodhi në fund të shtatorit këtu në Shqipëri. Qeveria finlandeze dhe Bashkimi Europian kanë dërguar disa ndihma për të ndihmuar të dëmtuarit nga tërmeti”, – tha ai.

“Kjo nuk është hera e parë që takohemi, kemi pasur takime të shpeshta dhe frutdhënëse. Kemi qenë në Helsinkit. Finlanda në fillim të qershorit mori presidencën në BE. Qeveria jonë është një koalicion me pesë parti. Kemi një program ambicioz, jo vetëm në lidhje me zgjerimin e BE, por dhe sa i takon klimës dhe mjedisit, duke i vendosur BE objektiva ambicioze për t’u realizuar deri në vitin 2050. Ne jemi mbështetës të mirë, të fortë për zgjerimin e BE drejt Ballkanit Perëndimor”, – tha Haavisto.

“Ballkani Perëndimor nuk është në një cep të Europës, por është në qendër të Europës. Ne mbështesim bashkëbisedimet që po zhvillohen me Malin e Zi dhe Serbinë dhe tani duam që Shqipëria dhe Maqedonia e Veriut të nisin bisedimet. Ne nuk jemi të vetëm në marrjen e vendimit, por duhet që vendimi të ketë unanimitetin e të gjitha vendeve anëtare të BE”.

“Jemi në bisedime me gjithë vendet, por dhe me Tiranën në lidhje me progresin e bërë në shtetin ligjor, lirinë e shtypit, çështjen e të drejtave të njeriut, transparencës, jetën parlamentare, që janë shumë të rëndësishme, prandaj ju nxis të vijoni në rrugën që keni ndjekur deri tani. Këto ndryshime nuk bëhen për shkak të anëtarësimit në BE, por për zhvillimin tuaj. Ju jeni pjesë e Europës”, – theksoi Haavisto.

“Ka disa shtete në BE, që kanë problemet e tyre të brendshme, që nuk po ecin siç duhet. Por, problemet e tyre të brendshme s’kanë pse ta pengojnë procesin e zgjerimit. Ne jemi shumë të lumtur për të bashkëpunuar me Shqipërinë në shumë fusha. Jeni kandidat për Këshillin e Sigurimit në Kombet e Bashkuara, do nisni presidencën në OSBE, detyrë shumë e rëndësishme që ne në Finlandë e ndjekim me shumë vëmendje. Jeni vend anëtar i NATO-s dhe jemi shumë të kënaqur që jeni në këtë aleancë”, përfundoi Haavisto. /atsh

“Partia Demokratike nis përgatitjet elektorale për zgjedhje të parakohshme parlamentare dhe të njëkohshme vendore”, ka deklaruar kryetari i PD-së Lulzim Basha në një takim me kryetarët e degëve të PD-së, gjatë analizimit të situatës politike ne vend, ndërsa ka shtyrë protestat për shkak të integrimit në BE.

Në takim, kryetari i PD-së Basha ka theksuar së tashmë partia duhet të fillojë menjëherë përgatitjet elektorale dhe për aksion politik.

“Vendi është në një krizë të thelle shumëplanëshe dhe detyra e PD dhe opozitës është të angazhohet seriozisht për të qenë pranë njerëzve dhe për t’i hapur rrugë perspektivës europiane të Shqipërisë.Opozita ka dhënë propozimet e veta për zgjidhjen e krizës në vend, qe kalon përmes zgjedhjeve të njëkohshme parlamentare dhe lokale të parakohshme, me qeveri tranzitore që garantin standardet për zgjedhjet e lira dhe të ndershme”, shprehet Basha.

Po ashtu Basha shtoi se pranë Partisë Demokratike do të ngrihet shtabi qendror elektoral dhe politik, shtabe që do të shtrihen në mënyrë piramidale në të gjithë vendin.

“Puna do të përqendrohet në planin e ofrimit te zgjidhjes për qytetarët, denoncimeve për aferat korruptive dhe kriminale të qeverisë, bashkimi i faktorëve dhe aktoreve me potencial njerëzor dhe elektoral pranë PD, si dhe hapja e partisë për njerëz me integritet profesional e moral” tha ai.

Gjithashtu, kryetari i PD Lulzim Basha i ka paraqitur Kryetarëve të degëve një kalendar të qartë dhe konkret pune, me përgjegjësi dhe afate të qarta.

Një tjetër diskutim i kryetarit të PD-së Basha me kryetarët e degëve ka qenë edhe shtyrja e protestave për shkak të integrimit të vendit në BE.

“Për aksionin politik, që përfshin edhe protestat, është vendosur që format dhe afatet të përcaktohen në një moment të dytë për të shmangur shfokusimin nga çështjet kryesore që janë aktualisht në vëmendje: fazën finale të zgjidhjes së krizës politike dhe procesi i integrimit europian”, është shprehur Basha. /atsh