Politike

Kryetari i BDI-së Ali Ahmeti ka deklaruar se Maqedonia e Veriut do të bëhet anëtar i plotë në NATO, ndërsa, në nëntor ose në pranverën e ardhshme, do të debatohet dhe do të hapet negociatat për anëtarësim të vendit në BE.

Ahmeti i bëri këto komente gjatë Kuvendit zgjedhor në në Gostivar, ku theksoi se është trazuar e tërë Evropa për gabimin historik me mos-çeljen e negociatave dhe se ky është një proces i pashmangshëm.

Duke folur mbi kuvendet zgjedhore të cilat i zhvillon BDI, e të cilat janë nga fundi, Ahmeti drejtoi mesazh për ata që marrin pozita në parti: “Betejat e reja që vijnë duhet luftuar”.

“Gjithandej ku shkojë mbahen Kuvende që ua kanë zili të gjithë, kjo është vlerë, kulturë, patriotizëm e atdhetarizëm. Supë më supë, të gjithë bashkë të punojmë e të luftojmë në betejat e reja që na vijnë. Nuk do e kemi lehtë! Vijnë situata të cilat kërkojnë angazhim e trajtim, intelektual, energji të forta”. /KosovaPress/

“Ne duam që edhe në aspektin e politikës së jashtme, edhe në aspektin e ekonomisë, Shqipëria dhe Kosova të bashkërendohen sa më shumë sepse sinergjia që mund të kemi nuk është shfrytëzuar sa duhet”, deklaroi sot kryeministri i zgjedhur i Kosovës, Albin Kurti, në një prononcim për mediet, ku informoi mbi takimin e djeshëm me kryeministrin Edi Rama.

Ai tha se “u diskutua për çështjet që i kemi të përbashkëta, por gjithashtu edhe për çështjet mes dy vendeve tona”.

“Shqipëria dhe Kosova jo vetëm që do të kenë mbledhje të përbashkëta qeverie, por do t’i kenë më shpesh dhe do të kenë zbatimin e marrëveshjeve, që është edhe pjesa më e rëndësishme”, tha Kurti.

Ai shprehu besimin se “mundësitë që kemi si qeveri dhe nevojat që kanë qytetarët janë shumë më të mëdha se sa realiteti që e gëzojnë të gjithë”. “Prandaj ne duam të krijojmë sa më shumë ura dhe Kosova dhe Shqipëria t’i ndihmojnë shqiptarët që të mos jenë më, më të varfërit, më të papunët më të nëpërkëmburit jo vetëm në Ballkan”, tha Kurti.

I pyetur mbi Minishengenin Ballkanik, Kurti tha se “pres që të shoh një tekst se çfarë është ekzaktësisht”. “Më shumë më ngjan me një ide se sa me projekt. Pra duhet ta shohim projektin në letër. Tani për tani është në nivelin e idesë”, tha ai.

Lidhur me propozimin për krijimin e një Ministri Shteti në secilën qeveri për marrëdhëniet mes dy vendeve, Kurti tha se “kemi diskutuar për çështjet dhe temat që do të bashkëpunojmë, ndërsa organikogramat e qeverive vijnë më pas, në fillim është substanca dhe më pas edhe forma që duhet të marrë”.

I pyetur mbi marrëdhënien me Kryeministrin Edi Rama, Kurti tha se “ne nuk kemi pasur marrëdhënie të çrregulluara”. “Jemi njerëz të ndryshëm, jemi politikanë të ndryshëm dhe duam të bashkëpunojnë në mënyrë që dallimet që kemi, ose mospajtimet që kemi, kurrsesi nuk bën që ta rrezikojnë bashkëpunimin tonë. Sepse fundja ne nuk jemi dy persona të veçantë, por jemi dy funksione për të cilët qytetarët tanë presin që të bashkëpunojmë”, tha Kurti.

Kurti foli edhe për fillimin e bisedimeve me Serbinë, ndërsa theksoi se ato do të udhëhiqen nga ai, si Kryeministër i Kosovës.

“Periudha konkrete për fillimin e bisedimeve nuk mund të përcaktohet tani, pasi ne kemi nevojë për dialog me Brukselin, për dialog me Beogradin, duhet ta përgatisim mirë dialogun. Unë pres që të takohem me pasardhësin e Mogherinit, në mënyrë që të përcaktojmë parimet se si të ecim përpara dhe dialogu i ardhshëm të mos dështojë. Për marrëveshjen me Serbinë duhet të ndryshojë shumë më tepër Serbia se Kosova”, tha ai.

Kurti u shpreh se “ne angazhohemi për marrëdhënie të mira fqinjësore me Serbinë dhe dialogun e ardhshëm me Serbinë do ta udhëheq unë si Kryeministër i Kosovës”.

“Së pari kemi dialogun me Brukselin për dialogun me Serbinë. Unë mund të parashikoj se ky dialog do të fillojë para zgjedhjeve në Serbi që janë në pranverën e vitit të ardhshëm, por nuk mund të prisni marrëveshje para zgjedhjeve në Serbi. Ne vendosim substancën, përmbajtjen e marrëveshjes për të cilën duhet të ndryshojë Serbia, që është shumë më prioritare se sa afatet e ndryshme kohore”, tha Kurti.

I pyetur mbi tarifën 100% me Serbinë, Kurti tha se “me qeverinë e re zëvendësohet me reciprocitetin e plotë politik, ekonomik e tregtar me Serbinë”. /atsh

Mbrëmjen e kësaj të premteje ish-Kryeministri Sali Berisha ishte i ftuar në emisionin “Zonë e Lirë”.

I pyetur nëse beson se një ditë do të mbetet në histori, lideri historik i së djathtës befasoi me përgjigjen.

“Ajo ç’ka mund t’u them të gjithë atyre që na dëgjojnë, është se nuk kam punuar qoftë një orë apo ditë të vetme për historinë”, u shpreh Berisha.

“Ballkani Perëndimor nuk është “delja e zezë” e BE”, deklaroi : Kryetari i Kuvendit, Gramoz Ruçi, në Konferencën e kryeparlamentarëve të vendeve anëtare të Këshillit të Europës, Strasbourg.

“Si përfaqësues i një vendi të vogël dhe periferik të Europës së sotme, kam arsye më shumë të përfytyroj realizimin e ëndrrave të vendeve të vegjël si Shqipëria. Të vendeve që edhe pse jetojnë nën çatinë e shtëpisë së përbashkët me 47 anëtarë që quhet Këshilli i Europës, janë ende, disa jashtë dhe disa në prag, të familjes me 27-28 anëtarë që quhet Bashkimi Europian”, tha Ruçi.

“Europa është sot vendi më i bukur në botë. Programet dhe skenarët e zhvillimit të 70 vjetëve të fundit e kanë bërë kontinentin më pak konfliktual dhe më shumë solidar. Por megjithatë, Europa jonë mbetet kontinenti i asimetrive. Besoj se në dekadat që pasojnë, Europa do t’i ketë zbutur mjaft prej tyre, theksoi kreu i Kuvendit.

“Bindja ime e parë është se dy-tre dekadat e ardhshme, familja europiane do të jetë e gjitha brenda shtëpisë europiane. Europa do të vuajë më pak nga pasojat e asimetrive midis Veriut super të zhvilluar dhe Jugut, në zhvillim e përpjekje për të arritur Veriun”, u shpreh ai.

“Gadishujt e Europës, Skandinavia, Gadishulli Iberik, Apeninet dhe Ballkani nuk do të jenë më kaq të ndryshëm për nga ritmet e zhvillimit, aftësitë konkurruese, niveli i mirëqenies dhe kontributi për paqen. Ballkanasit nuk do të kenë më nevojë për negociatorë skandinavë për tú qetësuar midis tyre”, tha Ruçi.

“Europa Jug-Lindore si koncept ndoshta nuk do të ekzistojë më sepse diferencat që e lindën këtë nocion do të jenë zhdukur, të paktën zbutur shumë. Ballkani Perëndimor nuk do të jetë më “delja e zezë” për udhëheqësit europianë, por një vlerë e shtuar për familjen europiane”, theksoi Ruçi.

“Konstruktivizmi dhe jo obstruksionizmi do te jene filozofia e marrëdhënieve midis rajoneve të kontinentit tonë. Kufijtë kulturorë dhe politikë të Europës do të bëhen më pak të përfillshëm dhe do të përputhen, ndoshta, me kufijtë gjeografikë të saj. Për ata që do të mblidhen në këtë Pallat pas 70 vjetësh, arsyet që mbajnë gjallë konfliktet fetare do të jenë zbutur. Mjafton që shtetarët dhe politikanët europianë të ndjekin modelin e bashkëjetesës që ofron Shqipëria ime”, u shpreh Ruçi./atsh

Ministri i Jashtëm i deleguar Gent Cakaj ka treguar se kur do të takohet kryeministri Edi Rama dhe lideri i Lëvizjes Vetëvendosje, Albin Kurti. Ai është shprehur se ata do të takohen së shpejti, punë ditësh.

“Është çështje ditësh kur ata do të takohen dhe do të diskutojnë në hapat e mëtejmë mes Shqipërisë dhe Kosovës. Nuk mund të flas për detaje. Di se takimi ka qenë i paraparë më herët. Ka pasur një ndryshim në axhendë për shkaqe rrethanore dhe aspak politike. Takimi do të ndodhë shpejt dhe sa më parë të ndodhë aq më mirë sepse është e rëndësishme të rinergjizohet bashkëpunimi Shqipëri-Kosovë sepse kemi shumë punë për të bërë sëbashku”, tha Cakaj në abcnews.

Cakaj preferoi të mos komentonte qeverinë e ardhshme të Kosovës, por theksoi se më e rëndësishme për të është bashkëpunimi mes dy qeverive.

“Jam këtu në cilësinë e një përfaqësuesi të institucioneve shqiptare. Unë nuk mund të gjykoj për koalicionet në Kosovë. Nga perspektiva që kam më duket e parëndësishme për shkak të pozionoit që kam. Për mua është e parëndësishme si do jetë koalicioni në Kosovë, por më i rëndësishëm është si do jetë bashkëpunimi i qeverisë së Shqipërisë dhe asaj në ardhje të Kosovës”, tha Cakaj.

Pak ditë më parë kryeministri Edi Rama gjatë një konference për shtyp tha se pret me kënaqësi të takohet me Kurtin, duke shtuar se ka nevojë për një shtysë me marrëdhënien mes dy qeverive.