Politike

“Kancelarja më konfirmoi se Gjermania do të përpiqet për hapjen e negociatave në muajin mars, gjë që e dëgjuat, e tha edhe në konferencë për shtyp qoftë për Shqipërinë dhe Maqedoninë e Veriut, natyrisht”, tha kryeministri Edi Rama para nisjes për Shqipëri pas takimit me kancelaren Angela Merkel.

Kryeministri Rama në një përmbledhje të takimit me kancelaren Angela Merkel, para kthimit për në atdhe, u shpreh se takimi ishte realisht pozitiv.

“Jo sepse kjo fjalë duhet thënë në këtë rast, por sepse qoftë në temën që ishte shtysa ime kryesore për t’i kërkuar kancelares këtë takim, pra rindërtimi pas katastrofës së 26 nëntorit, qoftë në temën e integrimit europian në funksion të çeljes së negociatave që kancelarja e diskutoi gjerësisht me mua dhe qoftë në temën e saj të preferuar bashkëpunimi dhe integrimi rajonal në kuadrin e përgjithshëm të krijuar nga Procesi i Berlinit, takimi ishte shumë domethënës”-tha Rama.

Kryeministri theksoi se: “Së pari, lidhur me Rindërtimin, Kancelarja u shpreh se Gjermania do të marrë patjetër përsipër pjesën që i takon, qoftë për konferencën e donatorëve, qoftë për më tutje. Sepse e dinë fare mirë se konferenca do të ndihmojë, por natyrisht nuk do të përmbushë tërë nevojën për të financuar Rindërtimin, pasi kjo nuk është as objektivisht e mundur, por jo vetëm kaq. Kancelarja u informua për të gjitha kontaktet e mia me vendet e tjera. Më dha disa këshilla shumë të vlefshme dhe u angazhua për të bërë edha ajo të sajën që konferenca të jetë një sukses. Nga ana tjetër duke qenë një person shumë i dhënë madje, unë them si askush që unë kam njohur ndaj statistikave dhe shifrave, Kancelarja mori çdo detaj mbi planin tonë të financimit të brendshëm të financimit si dhe dëgjoi me shumë vëmendje idetë që ne po punojmë gjatë kësaj periudhe për t’i lançuar si masa shtesë financimi pas Konferencës së Donatorëve ku do të kemi dhe një pasqyrë të qartë”.

“U shpreh pozitive për ato ide dhe na dha disa sugjerime shumë të dobishme duke na ofruar një ndihmë teknike për strukturimin e tyre”-tha ai.

Rama ritheksoi se: “Së dyti, lidhur me integrimin europian, Kancelarja jo vetëm e rikonfirmoi pozicionin e saj të fundvitit të shkuar, por edhe më konfirmoi se Gjermania do të përpiqet për hapjen e negociatave në muajin mars, gjë që e dëgjuat e tha edhe në konferencë për shtyp qoftë për Shqipërinë dhe Maqedoninë e Veriut, natyrisht”.

“Ajo shpjegoi qartë se kjo nuk është aspak e pamundur por njëkohësisht nuk mund të konsiderohet as diçka e lehtë përderisa debati i brendshëm për metodologjinë e re nuk ka përfunduar ende dhe njëkohësisht duhet punuar deri ditën e fundit për të mos ulur ritmin e punës me reformat dhe për të vazhduar të japë rezultate domethënëse. Për Kancelaren, Reforma në Drejtësi, vijimi i pastrimit të drejtësisë nga të korruptuarit përmes Vetingut dhe së fundmi edhe krijimi i SPAK-ut, janë rezultate kuptimplota që japin shpresë dhe siguri për të nesërmen e pushtetit gjyqësor në Shqipëri. Po kështu ajo u shpreh pozitivisht për ligjin special kundër krimit të organizuar dhe amendamenteve speciale ant KÇK, që do të hyjnë në fuqi në ditë e ardhshme pas konsultimeve përfundimtare me ekspertët ndërkombëtarë”, tha ai.

Po ashtu, Kryeministri Rama shtoi se: “Lidhur me temën e rajonit, Kancelarja e përsëriti qëndrimin e saj në mbështetje të nismës sonë për Shengenin rajonal dhe u interesua në detaje për ecuritë dhe kundërshtitë ndaj kësaj nisme duke iu referuar hapave më të fundit mes Beogradit dhe Prishtinës për linjën ajrore dhe atë hekurudhore. Ishim plotësisht me një mendje se të dyja këto rezultate duhet të shërbejnë të gjithëve për të kuptuar se fryma e procesit të Berlinit dhe hedhja e hapave konkret për kthimin e kësaj fryme në vendime të përbashkëta të të gjitha vendeve për lehtësimin e lëvizjes së njerëzve, mallrave, shërbimeve dhe kapitaleve ne rajonin tonë janë rruga e vetme dhe e duhur drejt së ardhmes europiane dhe rritjes së mëtejshme të mirëqenies në të gjitha vendet e Ballkanit Perëndimor. Bashkimi Europian dhe Komisioni Europian do ta mbështesin dhe konkretisht nga pikëpamja financiare këtë bashkëpunim rajonal çka e dëgjuam dhe nga presidenti i Këshillit Europian, Charles Michel, para vetëm tre ditësh në Tiranë”. /atsh

https://www.facebook.com/edirama.al/videos/229675831382336/?t=0

Lëvizja Vetëvendosje, përmes një komunikate ka njoftuar se në takimin e sotëm të mbajtur mes liderëve të VV-së dhe LDK-së, Albin Kurti dhe Isa Mustafa, nuk është arritur marrëveshje.

“Sot pasdite, në Kuvendin e Kosovës u mbajt edhe një takim ndërmjet LVV dhe LDK. Nuk u arrit marrëveshja.

Palët u pajtuan që nesër të zhvillohet një takim tjetër bashkë edhe me ambasadorët e Quint-it në Prishtinë si dhe me shefen e Misionit të BE-së. Kanë mbetur edhe tetë ditë deri në skadimin e afatit kushtetues për koalicionin qeverisës”, thuhet në njoftimin e VV-së./KosovaPress/

“Zgjedhjet parlamentare do jenë në qershor të 2021, përsa kohë kemi mazhorancë në Kuvend e institucionet e shtetit funksionojnë”, tha sot i ftuar në një emision televiziv deputeti i PS-së Arben Pëllumbi.

Në lidhje me me Reformën Zgjedhore, deputeti i PS-së tha se më e rëndësishme është të fitojë elektorati shqiptar dhe në fund të fundit humbësi t’i japë dorën fituesit.

Pëllumbi sqaroi se ka pasur raporte vëzhgimi në tre zgjedhjet e fundit, që kanë dhënë opinione që “kemi patur dëshirë t’i marrim parasysh”.

“Ne kemi patur qëndrimet tona, PD qëndrimet e veta dhe partitë e vogla qëndrimin e tyre. Në fund fare ky proces vazhdoi të ecë në rrugën institucionale. Kështu është një lajm pozitiv që opozita u rikthye në tryezë dhe biem dakord ta çojmë të gjithë bashkë deri në fund. Ne si PS jemi të hapur të diskutojmë për gjithçka”, tha ai.

Në lidhje me zgjedhjet e parakohshme dhe protestat nga ana e opozitës, Pëllumbi tha se PS e ka shprehur qëndrimin e saj. “Zgjedhjet do jenë në qershor të 2021, përsa kohë kemi mazhorancë në Kuvend, institucionet e shtetit të funksionojnë dhe elektorati shqiptar të mos na japë një mesazh të drejtpërdrejt dhe të qartë që ka nevojë të shkohet në zgjedhje të parakohshme. Këto janë kanalet demokratike që shkohet në zgjedhje të parakohshme. Pastaj nëse do shihet të bëhet një marrëveshje që unë nuk e shikoj, ne nuk na tremb asgjë si PS, pasi jemi gati që nesër të shkojmë në zgjedhje, strukturat janë në punë në organizim. Ne po përmbyllim një proces organizimi dhe rinovimi të PS-së. Por në këto momente të mos japim hamendësime. Reforma Zgjedhore të përfundojë, të japë rezultatet e veta, por për momentin nuk kemi mundësi për zgjedhje të parakohshme”, tha ai./atsh

Kryeministri Edi Rama deklaroi sot se “Ramush Haradinaj e ka kthyer shpifjen në pushkë qëkur ka lënë pushkën! Por nëse për pushkën ia kam bërë të gjitha nderimet e mundshme dhe të merituara, për shpifjet nuk mund t’i bëj asgjë tjetër përveçse ta ftoj në gjykatën e Kosovës që t’u dalë për zot atyre që ka nxjerrë nga goja”.

Kryeministri Rama reagoi për Top Channel, në lidhje me qëndrimet e kryeministrit në detyrë të Kosovës, Ramush Haradinaj në një emision televiziv, i cili pretendoi se kreu i qeverisë shqiptare ka tentuar ndarjen e Kosovës.

“Ndryshe nga Ramushi dhe nga ai soj politikanësh që s’kanë fijen e respektit as për fjalën, as për të vërtetën, as për publikun, unë nuk ulem dot në nivelin e shpifësit publik për ta luftuar bërllogun me bërllog! Pafytyrësi nuk është të shkosh në gjykatë për t’u mbrojtur nga një shpifës që të ka cenuar publikisht dinjitetin, po të përdoresh kanalet e komunikimit publik për të shpifur në mënyrë të përsëritur”, u shpreh Rama.

“Nuk është akt i turpshëm t’i nënshtrohesh gjykimit të drejtësisë si viktimë e një shpifësi që të sulmon si tradhtar të kombit me fabrikime të ulëta, po turp është të bësh agresorin ndaj dikujt tjetër për të manipuluar opinionin publik duke fabrikuar gjëra krejt të paqena”, – tha Rama.

E vërteta, vijoi Rama, është se unë kam dashur ta ndaj Kosovën, po aq sa çka dashur Ramushi ta ndajë Princ Harry-n nga Familja Mbretërore.

“Shkurt fjala, komandanti i djeshëm i UÇK-se Ramush Haradinaj, e ka merituar dhe do ta ketë për gjithë jetën respektin tim, për gjithçka i ka dhënë kauzës së lirisë së Kosovës, ndërsa politikani i sotëm Ramush Haradinaj, meriton vetëm keqardhjen time për bërllogun politik e gjuhësor ku ushtron veprimtarinë dhe pushtetin e tij. Është dëshpëruese kur sheh se si politika qorre e Ramushit e ka dëmtuar keq Kosovën në sytë e miqve të saj të mëdhenj dhe i ka dhënë Serbisë një avantazh te vazhdueshëm në arenën ndërkombëtare në raport me Kosovën”, – nënvizoi Rama.

Kreu i qeverisë tha se “uroj që padia ime të vlejë për t’u hapur sadopak sytë atyre që kanë rënë pre e bërllogut politik e mediatik të Prishtinës e të Tiranës”./atsh