Opinione

Aktori i njohur Helidon Fino deklaron se duhet ndërtuar një Teatër i ri Kombëtar, pasi sipas tij, ai aktuali është i amortizuar totalisht.

Si pjesë e Teatrit prej shumë vitesh, ai thotë se duke qenë pjesë e aktiviteteve artistike përgjatë këtyre viteve, ka përjetuar situata të vështira gjatë interpretimit, për shkak se godina nuk ofronte kushtet e nevojshme as në dimër dhe as në verë.

“Në shtator bëj 24 vjet në teatër që do të thotë 24/24 orë dhe e kam shoqëruar këtë institucion në të gjitha mënyrat në aktivitetet artistike, në momente të ndryshme politike sidomos dhe në momentin kryesor të përfolur që është godina, e cila ka ardhur në një moment amortizimi total ku unë të paktën vitet e fundit sjell në memorje interpretimet e mia në skenë në -2 gradë dhe në 40 gradë, dhe kjo është fakt dhe është absolute. Mendoj dhe për të gjithë komunitetin sigurisht që nuk më ka pëlqyer ndërhyrja e politikës për këto ndarje të komunitetit sepse kur hyn politika ndan edhe një familje në dysh dhe jo më një komunitet dhe një komb”, shprehet aktori Helidon Fino në një prononcim për mediet.

Ai thekson se teatri ri duhet të ndërtohet në territorin e vet që i takon, dhe jo diku tjetër. “Kërkesa dhe kauza jonë është që Teatri Kombëtar duhet të ndërtohet i ri në territorin e vet që i takon, në sipërfaqen që i takon, në të gjithë parametrat bashkëkohor që i takojnë dhe është përgjegjësia e qeverisë që ta kryejë këtë sa më shpejt dhe jo më vonë jo vetëm për faktin që kanë kaluar mjaft vite 10-20 vjet me këtë diskutim, por mos të kalojnë dhe 18-20 vite të tjera sepse në këto diskutime dhe mundësi të vjetra duket sikur edhe brezat do t’i vjetërojnë para kohe”, shprehet aktori.

“Është e nevojshme absolutisht dhe është një moment vullneti politik, por besoj edhe kombëtar dhe i komunitetit, që teatri të ndërtohet sa më shpejt aty ku është në sipërfaqen e vet ku i takon me të gjitha parametrat. Madje madje jo vetëm kaq por doja të bëja një thirrje ministrisë dhe qeverisë e ka të nevojshme sigurisht që me teatrin e ri dhe tashmë edhe një buxhet akoma dhe më i madh sepse nuk mundet dot të interpretojmë më me gjysma skenash, me gjysma kostumesh. Dhe qeveria e ka këtë detyrë dhe duhet ta kryejë”, përfundoi aktori Fino.atsh

“Të bëhet një teatër i mirë dhe t’i lëmë ata aktorë të ushqejnë me emocione popullin”, deklaron aktori i njohur shqiptar, Reshat Arbana.

Në vijim të qëndrimeve të aktorëve të njohur që mbështesin prishjen e Teatrit Kombëtar, Kryeministri Edi Rama shpërndau sot qëndrimin e aktorit Reshat Arbana.

“Të bëhet një teatër i mirë dhe t’i lëmë ata aktorë të ushqejnë me emocione popullin. Të shohim teatër që të ngacmojë spektatorin në zemër”, thekson Arbana.

Duke ndarë këtë qëndrim, Kryeministri Edi Rama shprehet se “njëri ndër idhujt e publikut shqiptar, aktor i gjeneratës së yjeve të një kohe kur mjeshtëria artistike i jepte kuptim kornizës së absurdit socrealist, Reshat Arbana i përket historisë së skenës e të ekranit. Por raportin me vlerat e historisë dhe respektin mjeshtrat e skenës, ai nuk e sheh aspak të lidhur me muret prej tallashi të karakatinës së sotme të Teatrit Kombëtar”.

“Përkundrazi, njësoj si të tërë artistët e vërtetë të skenës, aktori i madh mbështet prej shumë kohësh ndërtimin e Teatrit të Ri Kombëtar, në hapësirën ku i vjetri e ka kryer e humbur përfundimisht funksionin e tij”, shprehet Rama./atsh

Artisti i përndjekur nga regjimi komunist, Ardian Cerga mbështet shembjen e ngrehinës ekzistuese dhe ndërtimin e Teatrit të ri Kombëtar.

“Domosdoshmëria e një teatri të ri është evidente! Po njësoj është evident fakti i gjendjes dhe strukturës së mjerueshme të ngrehinës së teatrit, e cila për fat të keq nuk afron më asgjë përveç një lloj nostalgjie paksa naive, meqë në skenën e këtij teatri kanë interpretuar kollosët e artit skenik. Kjo më sjell në mendje polemikën e një viti më parë për ndalimin e filmit shqiptar, ku shumë pak u prononcuan në mbrojtje të figurave të shquara të ekranit, të cilat sot po trajtohen sikur do të humbasin vlerën e tyre po të shemben muret e ngrehinës teatër… Qesharake!”, shprehet ai.

“Si qytetar dhe si aktor shqiptar, e shikoj të domosdoshëm ndërtimin e një teatri të ri me të gjithë parametrat që koha kërkon; gjithmonë në vendin ekzistues dhe në territorin e tij natyrisht! Ndërsa për respekt të figurave të shquara mund të krijohet brenda ambientit të teatrit të ri një hapësirë muzeale, ku të nderohen siç duhet dhe jo kështu si sot, që vetëm përdoren si alibi kundër teatrit të ri! Një teatër i ri do të thotë edhe një mentalitet i ri…”, deklaron artisti Cerga.

Duke sjell në vëmendje opinionin e artistit Cerga, kryeministri Edi Rama shprehet se “Ardian Cerga u shfaq në vëmendjen e publikut, si një profil i ri dhe jashtë kornizës së asaj kohe, kur pati fajin se i ngjante më shumë gansterëve që interpretonte Alen Deloni, se sa partizanëve apo ballistëve të Realizmit Socialist. E trajtuan si një artist të degjeneruar dhe e degdisën në Shtëpinë e Kulturës së Beratit, pa të drejtë aktrimi!”.

Po ashtu, kryeministri thekson se “edhe Ardian Cerga e ka një opinion për çështjen e teatrit dhe si të gjithë ata që duan teatrin përpara politikës dhe nuk kapen pas politikës për të bërë teatër, ai mbështet shembjen e ngrehinës ekzistuese dhe ndërtimin e Teatrit të Ri Kombëtar, ne të njëjtin territor”.atsh

Aktori i njohur Artan Imami shpreh dakordësinë dhe nevojën emergjente për një godinë të re të Teatrit Kombëtar.

Në vijim të qëndrimeve të aktorëve të njohur që mbështesin prishjen e Teatrit Kombëtar, Kryeministri Edi Rama shpërndau sot qëndrimin e aktorit Artan Imami.

“Një godinë, e cila t’u shërbejë artistëve dhe mbi të gjitha publikut, i cili edhe pse në kushte tërësisht të papërshtatshme, për asnjë moment nuk e ka braktisur skenën e teatrit. Teatri Kombëtar duhet të shfrytëzohet vetëm dhe vetëm për godinën e re të Teatrit Kombëtar, duke mos cënuar tjetërsimin e asnjë pjese të kësaj prone. Mua nuk më zë gjumi nga qejfi se do të bëhet një teatër i ri modern, në vend të këtyre pamjeve të tmerrshme që shohim me gjendjen aktuale. Më vjen ndër mend një takim i vitit ‘87 apo ‘88 me Ismail Kadarenë dhe ndërkohë që po bisedonim, dikush e pyeti se si duket niveli i teatrit. Ai ia kishte ngulur sytë në një qoshe të tavanit, ku po binte suvaja dhe thotë: Po ja, ashtu si kjo godinë”, thekson Imami.

Duke ndarë këtë qëndrim, Kryeministri Edi Rama thekson se “Artan Imami është një tjetër protagonist tanimë i hershëm i skenës së Teatrit Kombëtar, i cili është ngjitur në atë skenë qysh “kalama”, si një ndër talentet më të spikatura të gjeneratës së re të viteve ‘80 dhe sot ai ka një opinion të qartë në debatin për të ardhmen e godinës së Teatrit Kombëtar”./atsh

Aktori i njohur shqiptar Luftar Paja deklaron se “jam për Teatër të ri Kombëtar, me të gjitha përmasat që i takon një teatri nacional shqiptar”.

Në vijim të qëndrimeve të aktorëve të njohur që mbështesin prishjen e Teatrit Kombëtar, Kryeministri Edi Rama shpërndau sot qëndrimin e Luftar Pajës.

“Ne si artistë kemi harruar gjërat kryesore dhe merremi me llaçin dhe tullat. Duhet të shtojmë forcat për llaçin dhe betonin artistik. Teatri Kombëtar e ka emrin Teatri Kombëtar dhe aty nuk duhet të vijnë vetëm ata që banojnë në Tiranë, por ata që e meritojnë të vijnë në teatër. Teatri është i gjithë Shqipërisë. Qëllimi im kryesor është që të ketë një teatër siç i takon Shqipërisë”, shprehet Paja.

Duke ndarë këtë qëndrim, Kryeministri Edi Rama thekson se “Luftar Paja është një tjetër protagonist i skenës sonë kombëtare, i cili shprehet pa asnjë ngurrim në krah të shumicës së komunitetit teatror që kërkon ndërtimin e Teatrit të Ri Kombëtar”.

“Ai jep një mesazh kuptimplotë për të gjithë ata që sikur të merreshin me artin, aq sa merren me protesta për tullat e për llaçin (ajo godinë në fakt s’ka as tulla, po tallash e qereste), do kishin lënë me siguri më shumë vepra se sa fjalime për qerestenë”, thotë Rama. /atsh

Regjisori Altin Basha u shpreh sot se, duhet një godinë e re për Tetarin Kombëtar, ndërsa pjesa muzeale mund të zgjidhet brenda kësaj godine.

“Qartë dhe shqip, unë mendoj se duhet një godinë e re. Pjesa muzeale mund të zgjidhet brenda godinës së re. Si regjisor, po ju deklaroj me përgjegjësi, se ajo godinë nuk ofron mundësinë për zhvillimin e një krijimtarie cilësore teatrore dhe, për rrjedhim, një cilësi të ulët produkti për spektatorët dhe qytetarët”, u shpreh ai.

Duke ndarë këtë qëndrim, Kryeministri Edi Rama u shpreh se “regjisori Altin Basha, një ndër emrat më të spikatur të gjeneratës së re të krijuesve të skenës, mbështet njësoj si shumica dërrmuese e komunitetit teatror shqiptar, ndërtimin e Teatrit të Ri Kombëtar dhe shembjen e gërmadhës ekzistuese”./atsh

Zv.ministri i Mbrojtjes, Petro Koçi ka reaguar ndaj artistëve që kanë dalë kundër prishjes së godinës së Teatrit Kombëtar, duke protestuar prej ditësh.

Koçi thotë se është zhgënjyese gjuha arrogante dhe e tërbuar në debatin publik, sipas tij, e disa gjoja të pavarurve të cilëve ‘pavarësia’ u siguron të ardhura.

“Për mua është tejet zhgënjyese gjuha arrogante dhe e tërbuar në debatin publik e disa gjoja të pavarurve të cilëve ‘pavarësia’ u siguron të ardhura. Në vend që të dëgjojmë prej tyre modelin e fjalorit të moderuar dhe argumentues, në fakt konstatohet një llogorizim politik ku ata sillen qartazi me pëdëiste se Basha. Ka prej tyre që me shpresën për t’u bërë një ditë deputetë e nxitën Bashën drejt aventurës më dëmprurëse të mundshme për opozitën dhe procesin politik”, -thotë ai.

Më tej, zv/ministri shprehet se disa prej tyre që kanë dalë kundër projektit për Teatrin e Ri, kanë inate personale me kryeministrin e vendit, Edi Rama.

“Disa, thjesht për inate personale me Ramën janë gati të përfshihen dhe fizikisht në aksionet e opozitës për të bllokuar edhe projekte të cilat nuk janë të natyrës së mirëfillte politike duke politizuar në fakt jetën shoqërore dhe intelektuale me keq se në kohën e regjimit monist. Të qenit gjoja i pavarur nuk të jep ndonjë monopol moral dhe as të drejtën që për çdo gjë të përfshihemi si në çështjet e futbollit ku ne të gjithë jemi trajnerë e analistë me licensë. Kultura politike dhe ajo e diskursit publik ka nevojë për të moderuarit, për intelektualizmin që nuk nam bjeshkët sa here u dalin përpara. Dhe çështja e teatrit nuk i jep kujt të drejtën e monopolit moral ku disa kanë autoritetin të ta japin apo të ta heqin triskën e frontit. Me Kiço London kam punuar për atë teatër. Po. Kam punuar. Vullnetarisht. Nuk jam ekspert i bashkëpunimit publik-privat. Por nëse procesi i realizimit të teatrit të ri është kopje a atij të stadiumit jam dakort. Bota e re ngrihet gërmadhash! Prandaj edhe tribuna qendrore e stadiumit duhet të mbaje emrin e madh të Cese tonë, QEMAL STAFA!”, -përfundon zv/ministri i Mbrojtjes./atsh

Kryetari i Partisë Demokratike, Lulzim Basha ka risjellë në vëmendje deklaratën e tij të një viti më parë mbi debatin e prishjes së Teatrit Kombëtar.

Sipas Bashës, nuk bëhet fjalë për ndërtimin e një teatri të ri, por për aferë korruptive sipas tij, mes Ramës e Veliajt.

“Më poshtë deklarata ime një vit më parë me 28 korrik 2018:”Rama nuk ka asnjë interes për teatër të ri pa kulla. Afera me Teatrin Kombëtar është për kullat e për të futur në xhep 200 mln euro dhe jo për Teatrin, sepse për të nuk ka Teatër pa kulla. Vetëm për luks qeveritar, Rama ka shpenzuar aq para sa për të ndërtuar 5 teatro kombëtarë. Unë i kuptoj artistët që kërkojnë një teatër më komod. Ka disa mundësi për një teatër të ri, si në Bulevardin e ri të Tiranës. Teatri aktual restaurohet në shërbim të artit e kulturës, por dhe si monument unik i trashëgimisë kulturore të Tiranës”, -thuhet ndër të tjera në deklaratën e kryetarit të PD-së./atsh