Opinione

Erjon Braçe ka reaguar sot pas akuzës së Sali Berishës se është i përfshirë në atentatin e së premtes në Shkozet ndaj prokurorit Arjan Ndoja, duke u shprehur se akuza “është sajuar nga Sali Berisha si kërcënim i drejtpërdrejtë për jetën ndaj meje e kryetarit të bashkisë Divjakë”.

“Ky është Sali Berisha dhe ky është kërcënim për jetën ndaj dy funksionarëve të lartë publikë, të dy të zgjedhur e në detyrë. Që Sali Berisha është një kriminel barbar, këtë pas 21 Janarit, daljes zot të pushkatimeve në mes të bulevardit, e thotë i madh e i vogël në këtë vend. Por, përveç pushkatimeve direkte, si në 21 Janar 2011, ky kriminel barbar, ka nxitur përmes gjuhës së tij kriminale, kërcënime për jetën, akte dhune të drejtpërdrejta deri në rrezikim të jetës, ndaj kundërshtarëve të tij politikë duke i përfshirë kriminalisht në ngjarje që nuk ekzistojnë”, shprehet Braçe.

Ky i sotmi, vijon ai, është një i tillë. “Provohet botërisht që kjo ngjarje që ka sajuar e publikuar, nuk ekziston. Po fare, fare. As nga unë, as nga kryetari i bashkisë Divjakë, zero”, tha ai.

“Vërtetohet lehtësisht; Për shkak të detyrës, çdo lëvizje e imja është nën prezencë të oficerëve të shtetit – jo të mitë por të shtetit; Çdo takim i imi me kryetarin e bashkisë dhe jo vetëm, është në prezencë të tyre, pra, për shkak të detyrës, çdo gjë është e lajmëruar në sallat operative përkatëse nga Garda e Republikës në komisariatet e policisë në territor”, tha zv.kryeministri Braçe.

“Pra, takimi i kryetarit të bashkisë Divjakë me atë person dhe i imi me atë dhe kryetarin,
as që ekziston. Fare! Është sajuar nga Sali Berisha si kërcënim i drejtpërdrejtë për jetën ndaj meje e kryetarit të bashkisë Divjakë. Mendja kriminale e Sali Berishës kërkon të drejtojë e pse jo të shkrehë pushkë kriminelësh ndaj nesh! Ti Sali Berisha po kërkon jetën tonë. Do përgjigjesh për këtë ligjërisht deri në fund. Çdo ditë nga sot, çdo orë nga dita e sotme e në vijim, unë do merrem me këtë, ty dhe ligjin. Boll më. Ke 25 vite që si kriminel ordiner bën këtë ndaj meje e çdo kundërshtari politik, si kur ke pushtet, si kur je në opozitë”, tha ai.

“Nuk dua nga paratë e tua të ndyra, do kërkoj ligjërisht burg për ty, aq sa ligji thotë për këtë krim penal që ke konsumuar sot ndaj ne të dyve. Kjo e para. E dyta, kurrë, kurrë nuk kam bërë këtë që ti ke konsumuar sot ndaj nesh. Kurrë nuk kam shenjuar jetën e kujt për ta marrë, si politikan, si qeveritar apo si qytetar i thjeshtë”, u shpreh Braçe.

“Nuk jam soji yt, as si shpifës, as si kriminel. Si qytetar e si pushtetar në raport me ligjin, jetën e dinjitetin e çdokujt, ti as që afrohesh tek unë”, tha ai.

“E treta, Fredi Kokoneshi as që njeh prokurorin, as si emër, as si person, as si prokuror, as si aktivitet, as që e njeh personin e përmendur në cilëndo rrethanë. Unë gjithashtu, as si emër e as si person kërrkund e në 48 vite jetë. Unë, po, kam folur për qëndrimin e prokurorit ndaj një zyrtari të shtetit, antiligjor e antikushtetues në hetimin e një çështjeje,
konfirmuar e tillë, siç e kam thënë, nga një gjykatë më e lartë, i paligjshëm e antikushtetues. Kaq më mjaftoi e më mjafton”, tha Braçe.

“Akti ndaj tij është kriminal. Unë, cilido pranë meje si i afërm apo mik e shok e janë aq shumë sa s’ta merr mendja, nuk kam lidhje me atë akt kriminal. Ti si kriminel barbar,
pa asnjë provë, asnjë fakt, në mënyrë kriminale dhe të qëllimtë pa asnjë referencë vendi e kohe, zero, kërkon të nxitësh një tjetër akt kriminal. Për këtë do përgjigjesh. Nuk të fal asnjë germë dhe po ta përsëris, nuk dua paratë e tua të ndyra, dua burgun për ty për këtë krim të konsumuar”, tha ai.

“E fundit, për pluhurin që përmend për mua, sërish do përballesh me ligjin, për çdo germë të fjalës, një për një. Për cilësimin trafikant të kryetarit të bashkisë Divjakë, do përballesh me ligjin. Për shkak të shpifjeve të tua dhe qelbësirave që kishe nën hyqëm, për një vit e më shumë prokuroria vuri nën hetim në të gjithë botën kryetarin e bashkisë, doli i pastër kudo, me çdo akt të çdo institucioni ndërkombëtar që u detyrua të kthejë përgjigje në Prokurorinë e Republikës”, tha Braçe.

“Letrat janë publike e të administruara në prokurori. Çdo germë edhe për këtë do kthehet në përballje ligjore dhe ti do përgjigjesh deri në fund, germë për germë”, përfundoi zv.kryeministri Braçe. /atsh

Ministrja e Shtetit për Marrëdhëniet me Parlamentin dhe zëdhënëse e Qeverisë, Elisa Spiropali, deklaroi sot se “Lulzim Basha u ankua se historia e dy vilave të tij na qenka sajuar nga qeveria”.

Spiropali thekson se “imagjinoni Edi Ramën, a kë të doni nga radhët tona, që thotë më zuri frika nga tërmeti dhe ika mora dy vila me qira në një nga zonat më të shtrenjta të Shqipërisë. Parafytyrojeni vetë tani se çfarë cikloni balte do të kishte rënë mbi Shqipëri dhe çfarë do kishin nxjerrë nga grykat tërë murtajat e opozitës, duke nisur nga gryka e Lulzim Bashës. Por më e bukura është se askush nga qeveria, por as nga Partia Socialiste s’ka thënë akoma asgjë për dy vilat e Lulzim Bashës, ndërkohë që Lulzim Basha akuzon qeverinë, se e ka sajuar këtë histori”.

“Por çfarë ka sajuar qeveria? Tërmetin që paska lëkundur e trembur aq shumë Lulin sa të ikë nga një apartament e të marrë dy vila? Apo mos vallë ka sajuar qeveria faktin se Luli qenka i vetmi që e paska tronditur tërmeti dhe ia paska bërë të pabanueshëm tripleksin e tij mbi një pallat ku s’ka asnjë shenjë tërmeti? Ose pastaj qeveria ka sajuar faktin që Luli merr dy vila me qira tek lagjja ekskluzive e ndërtuar nga njeriu që vetë Luli e ka bërë copë e çikë si oligark, ndërkohë që nga ana e tij Luli s’tregon asnjë kontratë qiraje”-, nënvizon Spiropali.

Në të vërtetë, sqaron Spiropali, qeveria s’ka kohë të merret me Lulzim Bashën, por Inspektoriati i Lartë i Deklarimit të Pasurive sot, si dhe SPAK-u nesër duhet të merren me këtë histori tipike për njeriu që është bërë simbol i asaj shprehjes “bëni si them unë, mos bëni si bëj unë”.

“Lulzim Basha akuzohet nga mediet se qiraja është një “gjethe fiku” për të mbuluar faktin, se në fakt, të dy vilat janë blerë prej tij. A është e vërtetë apo jo kjo akuzë mediatike ne nuk e dimë, por ne dimë që Lulzim Basha është i njohur për dorën e rëndë në lëvizjen e shumave të mëdha të parave. Dhe sot që flasim, ai është i pandehur për më shumë se gjysmë milioni dollarë që kanë lëvizur në emër të Partisë Demokratike, po që nuk figurojnë gjëkundi në arkën e parave të ligjshme të asaj partie”-, tha Spiropali.

Sipas saj, historia e dy vilave të Lulzim Bashës është pavarësisht fakteve, një tjetër e zakonshme e historisë së një politikani abuzues me ligjin e paranë, e përfitues kronik në një terren ku drejtësia i ka garantuar atij paprekshmërinë, por është njëkohësisht edhe historia tipike e një politikani që nuk ndalon së hapuri gropën ku bie vetë.

“Politikisht ai s’e ka problem të bjerë në gropë e të bërtasë “Fitore”, ndërsa ligjërisht do ta ketë me siguri shumë më të vështirë ta kalojë historinë e dy vilave, atë gjysmë milion dollarë të pajustifikuar, duke kënduar Himnin përballë një trupe gjykuese të dalë nga rruga e Vetingut dhe e Drejtësisë së re”-, tha Spiropali./atsh

Kryeministri Rama ka zhvilluar ditën e sotme një vizitë në shtetin fqinj, Itali ku ka pasur dhe një takim të rëndësishëm me homologun e tij italian, Giuseppe Conte.

Pas takimit, dy Kryeministrat zhvilluan një konferencë të përbashkët për shtyp ku kryeministri Rama shprehu dhe njëherë mirënjohjen e tij për vullnetin e palëkundur të Italisë në mbështetje të rrugëtimit europian të Shqipërisë.

Duke folur për procesin e anëtarësimit të Shqipërisë në Bashkimin Europian, kryeministri Rama tha se, “fatkeqësisht, Këshilli Europian nuk arriti dot të marri vendimin e duhur, duke i mohuar Shqipërisë dhe Maqedonisë së Veriut, atë që meritonin dhe natyrisht duke dhënë një mesazh dobësie dhe e thënë deri në fund, një mesazh pafuqie për të mbajtur premtimet nga ana e BE. Por, siç e ndava dhe me kryeministrin, Shqipëria nuk ka asnjë rrugë tjetër, përveçse asaj që është rruga e projektuar nga rilindasit tanë dhe e ndjekur vijimësisht nga populli ynë, rruga e të bashkimit të plotë me Europën. E në këtë rrugë, ne jemi besimplotë edhe për faktin se kemi miq të mëdhenj dhe partnerë të palëkundur si Italia”.

Ndërkohë, duke folur edhe për situatën në vend, kryeministri shprehu vullnetin e palëkundur të maxhorancës për të çuar deri në fund reformën zgjedhore sipas rekomandimeve të OSBE/ODIHR.

“Këtë rrugë ne do të vijojmë po njësoj, gjë për të cilën informova Kryeministrin edhe lidhur me përshpejtimin e procesit të reformës zgjedhore të cilën dëshirojmë padiskutim ta kryejmë, në marrëveshje me të gjitha forcat politike, por do ta përmbushnim në parlamentin e Shqipërisë, sipas të gjitha rekomandimeve të OSBE/ODIHR. E nga ana tjetër, me kënaqësi mora nga kryeministri, mbështetjen e plotë për paketën e re antikrim dhe antikorrupsion që ne po përgatisim, ku njohuritë, dija, eksperienca e Italisë mike dhe njerëzve që do të na vihen në dispozicion janë me një vlerë të paçmueshme”, theksoi Rama.

Në fund të kësaj konference të përbashkët, duke folur për bashkëpunimin ekonomik mes dy vendeve, kreu i qeverisë shqiptare thotë se “Italia është faktori kryesor i huaj në tregun shqiptar. Të gjitha shifrat flasin për këtë. Numri i italianëve që vizitojnë Shqipërinë vjen në rritje. Shifrat e vetë shtetit italian për rritjen eksponenciale të turistëve italianë në Shqipëri, çdo vit, flasin vetë. Kompanitë italiane janë të mirëpritura. Disa investime strategjike për të cilat ne kemi diskutuar janë në proces dhe ne mirëpresim padyshim kompanitë e mëdha italiane që të përfshihen në këto investime. E sigurisht që vlerësojmë pa masë edhe aspektin e dijes dhe të eksperiencës që këto kompani sjellin”. /atsh

Zëvendëskryeministri Erjon Braçe deklaroi sot se ndonëse faktet janë online, trashja e gënjeshtrës vazhdon se arka është bosh, por faktet e zhbëjnë atë.

“Trashja e gënjeshtrës! Arka është bosh. Dje ju tregova gënjeshtrën arka bosh. Ju tregova fakte, jo llafe! Kujtova se faktet mjaftojnë! Por nuk qenka e thënë; Gënjeshtra është trashur sot edhe me shumë! Është problem kur nuk heq dorë nga gënjeshtra, zhytesh në të thellë, e bën gënjeshtrën ulëritëse”, shprehet ai

Në vijim të argumentit, Braçe shtoi se: “Dje referova gjithashtu se, çdo fakt i dhënë nga unë, mund të verifikohej lehtësisht online. Por kur do të gënjesh, teknologjia nuk të ndihmon. Sot, gënjeshtra tentoi të detajohet deri në nivel prokurimesh konkrete; Për shkak të Arka Bosh Gënjeshtër, thuhet se: FSHZH ka anuluar një prokurim për përmirësimin e infrastruktures në Qerret me vlere 1 milion euro! Gënjeshtër! Procedura për këtë prokurim është në fazën e pritjes se ofertave dhe, afati i fundit për pranimin e ofertave është data 11 nëntor ora 11.00; FSHZH ka anuluar një prokurim për ndërtimin e rrugës së re përgjatë lumit Osum ne Berat me vlere 1.3 milion euro!Gënjeshtër! Procedura për këtë prokurim është në fazën e pritjes së ofertave dhe, afati i fundit për pritjen e ofertave është data 11 nëntor ora 11.00”.

“Që mos bini edhe më në gënjeshtër nesër, ka dhe një të trete; Procedura për prokurimin e rrugës Lumalas-Melcan-Porodinë është në fazën e pritjes se ofertave dhe, afati i fundit per pranimin e ofertave është data 11 nëntor ora 11.00. Ndërkohë, pretendimi se OST ka anuluar tenderin për blerjen e një transformatori me vlerë 2.5 mln euro, është një gënjeshtër në një nivel edhe më të larte; nuk ndihmon as kënd tek historia arka bosh. OST tenderon lekët e saj, jo të buxhetit te shtetit. OST nuk ka anuluar këtë procedure, e ka ne proces, afati i fundit i pritjes së ofertave është data 22 nëntor ora 10.00”, argumentoi ai.

Po ashtu Braçe theksoi se të gjitha këto janë fakte dhe verifikohen lehtësisht online. “Faktet e bëjnë gënjeshtrën të duket, faktet e bëjnë gënjeshtrën të trashet, zhbërja e gënjeshtrës është detyrim”, përfundoi ai. /atsh