Opinione

Ish-deputetja e Partisë Socialiste, Arta Dade, e njohur si një nga kritiket e “vijës së parë” të kryeministrit Edi Rama, ka komentuar me nota të theksuara negative moshapjen e negociatave të anëtarësimit të Shqipërisë në Bashkimin Evropian.

Në një intervistë për emisionin “Kjo Javë” në “News 24”, Dade tha se Shqipëria nuk i ka përmbushur “detyrat e shtëpisë” dhe se në të tilla rrethana, një kryeministër normal, duhet të bëjë verifikimin e mazhorancës përmes zgjedhjeve të parakohshme.

“Nëse ti i ke arritur këto, si nuk ke mundur tia bësh me dije këto arritje vendeve të BE, qoftë edhe vendeve që ishin kundër, pse Francën nuk e binde? Zaev tregoi se është një kryeministër që punon për vendin e vet.

Me Greqinë e zgjidhen problematikën dhe një kryeministër normal duhet të bëjë verifikimin e maxhorancës, duhet të shkojë te elektorati në mënyrë që të shohin nëse qytetarët e Maqedonisë së Veriut duan që ata ta drejtojnë sërish vendin? Kjo duhet të ndodhte edhe në Shqipëri.

Unë e kam thënë që qeverisja e Edi Ramës ka dështuar”, tha Dade.

Ministri në Detyrë për Europën dhe Punët e Jashtme, Gent Cakaj, në një konferencë për shtyp të mbajtur sot, pas vendimit negativ për hapjen e negociatave të Shqipërisë dhe Maqedonisë së Veriut me Bashkimin Europian, tha se ky vendim vjen nga vizionet e ndryshme të shteteve anëtare për të ardhmen e BE.

“Ky vendim nuk vjen nga dështimi i Shqipërisë për të qëndruar në lartësinë e nevojshme të standardeve për çeljen e bisedimeve për anëtarësim, por shfaqet në rrethana ku BE është në një proces të shqyrtimit të vetvetes”, – tha Cakaj.

“Shqipëria dhe Maqedonia e Veriut u trajtuan në mënyrë identike”, – shtoi Cakaj, – “sepse të dy vendet kanë përmbushur të gjitha kushtet e nevojshme për çeljen e negociatave dhe e dyta sepse shtyrja e këtij vendimi nuk ka të bëjë më performance, por me faktorë të tjerë që karakterizojnë BE-në”.

Duke folur për reformat shtetformuese në vend, Cakaj tha se, “Shqipëria është duke bërë një reformë në drejtësi të pakrahasueshme në rajon e më gjerë. Përsëri, ky vendim u shty sepse ky vendim nuk lidhet me meritat e vendeve aspirante”.

Duke bërë një rezyme të situatës, ministri tha se, “Këshilli Europian, në maj të këtij viti ka dhënë përgjigjen e tij të qartë pas një shqyrtimi të hollësishëm. KE ka konfirmuar se Shqipëria ka bërë gjithë çfarë është e nevojshme për të merituar çeljen e negociatave. Në qershor të 2019, për shkak të problemeve të brendshme dhe asesi për shkak të gjykimeve negative për Shqipërinë, Këshilli i Çështjeve të Përgjithshme vendosi dhe një herë shtyrjen në tetor. Ja ku jemi në tetor dhe nuk kemi marrë pëgërjen e merituar. Kjo është shtyrja e tretë për një vendim që është i thjeshtë. Nëse e ardhmja e BE është në pikëpyetje, Shqipëria nuk mund të ofrojë përgjigje”.

Pavarësisht shtyrjes së tretë, Cakaj thotë se puna në Shqipëri do të vazhdojë dhe integrimi europian i Shqipërisë është një proces i pakthyeshëm.

“Procesi i zgjerimit do të vazhdojë në mënyrë paralele me reformimin e brendshëm të BE. Shtyrja e vendimit për çeljen e negociatave nuk do të thotë që në Shqipëri duhet të ketë vonesa për të realizuar të gjitha reformat që kanë nisur. Shqipëria do të vazhdojë punën përmbajtësore në 5 prioritetet kyçe dhe po ashtu në adresimin e të gjitha çështjeve që janë paraqitur në qëndrimet zyrtare të Bundestagut. Jo thjesht se kjo është e nevojshme për rrugën europaine të Shqipërisë por seeps janë të nevojshme për ta bërë Shqipërinë europiane”, – u shpreh Cakaj në konferencë.

“Vendet anëtare mund të mos kenë forcën e mjaftueshme për të ndryshuar qëndrimin e Francës ama të gjithë konsiderojnë se Shqipëria ofron një model shembullor të reformave në rajon. Edhe një herë nënvizoj se Shqipërisë i takon ajo që është qëllimi themelor i këtij procesi, ndërtimi i Europës dhe jetësimi i idealeve të saj në Shqipëri”, – deklaroi Cakaj./atsh

Deputetja Rudina Hajdari ka reaguar ndaj vendimit të Francës për të vendosur veton ndaj Shqipërisë dhe Maqedonisë së Veriut për hapjen e negociatave të anëtarësimit në Bashkimin Europian.

Hajdari shprehet se është për të ardhur keq që shpresa e shqiptarëve për të qenë një hap më afër Europës shtyhet për një moment tjetër.

“A ka ndonjë përgjegjës në këtë vend për përkeqësimin e situatës politike dhe ekonomike? Përparësitë që ne duhet të kemi shtohen gjithnjë e më shumë. Pesë prioritetet e Komisionit Europian, vijojnë me 9 kushtet e Bundestagut, shtohen me azilkërkuesit në Francë. Sot Zoran Zaev njoftoi dorëheqjen nga posti i Kryeministrit të Maqedonisë së Veriut. Kjo është çështje morali politik dhe përgjegjësie e lartë institucionale. Po këtu tek ne, a ka moral politik dhe përgjegjësi institucionale minimale?”, shprehet Hajdari.

Deputetja i kërkon qeverisë shqiptare të hartojë një plan të detajuar masash, bazuar mbi të gjitha përfundimet e Këshillit Europian, duke përfshire shqetësimet e secilit prej vendeve anëtare që kanë qenë kundër hapjes se negociatave të Bashkimit Europian me Shqipërinë.

“Të gjitha këto masa që do merren, duhet të konsultohen sa më shpejt me institucionet kushtetuese dhe të monitorohen hap pas hapi. Ky plan veprimi duhet të ketë koston buxhetore reale për mbështetjen e këtij procesi. Në buxhet duhet të specifikohet qartë si do të përballohen shpenzimet për përmbushjen e këtyre detyrimeve,” shtoi ajo duke nënvizuar se angazhimi duhet jetë serioz dhe jo deklarativ. “Të ulemi në tryezë të flasim për çdo pikë, pa dallime politike, apo të çdo lloj përkatësie tjetër, ku në qendër të vëmendjes duhet të mbajmë qytetarin shqiptar”, shprehet deputetja Hajdari. /atsh

Ministri në Detyrë për Europën dhe për Punët e Jashtme , Gent Cakaj deklaron se pavarësisht mungesës së konsensusit në Këshill për çeljen e negociatave, Shqipëria do të vazhdojë angazhimet e saj reformatore dhe përpjekjet e mëtejme në shërbim të aspiratës evropiane.

Sipas ministrit në detyrë Cakaj, anëtarësimi me Shqipërinë nuk vjen si rrjedhojë e interpretimeve kundërthënëse lidhur me progresin e vendit, por si pasojë e vizioneve të ndryshme për reformën strukturore të Bashkimit Europian në përgjithësi.

“Nuk ka një ujdi absolute për të filluar bisedimet për anëtarësim me Shqipërinë dhe Maqedoninë e Veriut, ekziston një pajtueshmëri e plotë se të dy vendet kanë përmbushur të gjitha kushtet e paraqitura në konkluzionet e qershorit të vitit 2018” -u shpreh Cakaj. /atsh

Zv.kryeministri Erion Braçe, ka reaguar pas bllokimit që Franca i bëri hapjes së negociatave për Shqipërinë dhe Maqedoninë e Veriut

Braçe ka falenderuar të gjithë liderët e Bashkimit Europian të cilët mbështetën Shqipërinë në rrugëtimin për integrimin europian dhe për deklaratat e tyre që bënë sot në samit.

“Faleminderit shumë për gjithçka, gjithçka, gjithçka, zonja Merkel, kancelare e Gjermanisë. Faleminderit shumë që njeh historinë tonë te dhimbshme prej 1400-tës, aspiratën tonë europiane, te përjetshme, ja dëshmon kujtdo që s’na njeh, zoti Conte, kryeministër i Italisë. Faleminderit shumë për ndihmën, mbështetjen, kursin e reformave, vlerësimin dhe gjykimin e drejtë e të ndershëm, zoti Tusk, president i Komisionit Europian! Faleminderit shumë për vizionin e qartë politik për Europën e sotme e të nesërme, ndarë me ne e për ne, zoti Sassoli, president i Parlamentit Europian. Ju jemi mirënjohës pa fund! Ju na njihni, vlerësoni e gjykoni”‘, shprehet Braçe.

Nga ana tjetër Braçe i është përgjigjur edhe presidentit francez Emmanuel Macron i cili vendosi veton si e vetmi vend që të mos lejonte hapjen e negociatave për Shqipërinë dhe Maqedoninë e Veriut.

Braçe thekson se argumenti i Macron ishte se ka shumë shqiptarë azilantë në Francë dhe ky është faktor kundër Shqipërisë, por sipas tij, Macron duhet të na shohë si punëtorë pasi punët më të rënda atje i bëjnë shqiptarët.

Madje sipas Braçes, shqiptarët në Francë janë të keqpaguar e të diskriminuar.

Braçe shprehet se, “kush pretendon se na njeh prej “azilantëve”, gjykon me bezdi qënie humane thjesht si problem për çështje të politikës së brendshme, nuk na njeh hiç; duhet te hedhë sytë nga tregu i tij i punës, me siguri duhet ta dijë se nuk është çështje burokratike vizash, por ofertë në atë treg. I bëjmë ne punët tuaja, madje më të rëndat, madje duke keqpaguar e diskriminuar. Të paktën ti njihni shqiptarët si punëtorë”. /atsh