Opinione

Ish deputeti i PD-së Tritan Shehu tha se Shqipëria duhet të shpallë sot gjendjen e emergjencës për koronavirusin.

“Kjo gjykoj se është e domosdoshme duke u bazuar se pari në gjendjen epidemiologjike rajonale, si dhe: Ne ecurinë e kësaj epidemie në Itali, ku tashmë ka dalë nga “Zona e kuqe” duke marrë dimensione të mëdha në të gjithë territorin, me një mortalitet të lartë rreth 4,4%, vend me të cilin neve kemi shkëmbime të gjëra dhe që ka implementuar masa energjike”-, u shpreh Shehu.

“Duke u bazuar në rritjen shumë të shpejte të rasteve të infektuara në Greqi, masave të emergjencës që sot pritet të shpallë dhe ai vend, me te cilin në gjithashtu kemi shkëmbime të mëdha. Në rastet e diagnostikuara se fundmi dhe në vendet e tjera të Rajonit. Ne kemi dobësitë të mëdha në sistemit tonë shëndetësor, gjë që manifestohet si në nivel diagnostikimi, parandalimi, ashtu dhe mjekues”, shprehet ai.

Po ashtu Shehu shton se, “pavarësisht se zyrtarisht ne “nuk kemi” akoma asnjë rast të deklaruar, në këto kushte duhet shpallur gjendja e emergjencës së pari për periudhën prej sot deri më 16 mars, praktikë kjo e aplikuar edhe nga shtete të tjera të zhvilluara”.

“Në tërësi masat duhet të jenë të nivelit të atyre të aplikuara në Itali si shtet për jashtë “Zonës së saj të Kuqe”, për të cilën sot hyri në fuqi një regjim tjetër shumë më i fortë. Kështu këto duhet të përfshijnë me transparencë vendime organizative, përmirësime urgjente të sistemit shëndetësor, dislokime adekuate fondesh, mobilizim të të gjitha resurseve njerëzore e materiale, mbyllje të shkollave, aktiviteteve sportive dhe të ngjashme përfshi ditën e sotme, etj. Është e domosdoshme që dhe Presidenti i Republikës të mbledhë Këshillin e Sigurisë Kombëtare me drejtim shëndetësor. Në këto situata duhet vepruar sa me shpejt, sepse të vazhdosh të luash rolin e “trimit” të papërgjegjshëm, mund të rrezikosh rëndë qytetarët”, tha ai./atsh

Kryetari i PD-së, Lulzim Basha deklaroi sot se do të marrë pjesë në manifestimin e 2 marsit të Presidentit Ilir Meta.

“Si qytetar i vendit tim, si bashkëshort dhe si prind, është detyra ime të mblidhem së bashku me bashkëqytetarët e mi në mbrojtje të kushtetutës”, deklaron Basha.

Më herët, Sekretari i Përgjithshëm i PD, Gazment Bardhi tha se “Kushtetuta është marrëveshja më e rëndësishme e një shoqërie që garanton bashkëjetesën tonë. Kur shkelet Kushtetuta, bie shteti, bie demokracia, cenohen të drejtat e njerëzve. Çdo qytetar duhet të reagojë. I ftoj anëtarët dhe mbështetësit e Partisë Demokratike të bashkohen në manifestimin e 2 Marsit, në mbrojtje të Kushtetutës në Bulevardin Dëshmorët e Kombit”./atsh

Sekretari i Përgjithshëm i Partisë Socialiste, Taulant Balla ftoi sot çdo të ri e të re të vendit dhe jashtë Shqipërisë, për të konkurruar në sfidën e udhëheqësve të rinj të dekadës së re 20-30.

Balla deklaroi se “Dita e tretë e Kongresit iu dedikua të rinjve. Partia Socialiste fton çdo vajzë dhe djalë të ri në çdo bashki të vendit, por edhe jashtë Shqipërisë, të bëhet pjesë e fressh-VOICE dhe të konkurrojë në sfidën e udhëheqësve të rinj të dekadës së re 20-30”.

Sipas tij, udhëheqëset e reja dhe udhëheqësit e rinj duhet të konkurrojnë sipas parimit të bashkëdrejtimit, pra një vajzë dhe një djalë së bashku do të bashkëpunojnë për të fituar mbështetjen dhe fituar sfidën.

Më tej, ai ka lajmëruar se rregullat e sfidës, për mënyrën sesi mund të bëhesh pjesë e “Zërit të të Rinjve Socialistë”. /atsh

Kryeministri Edi Rama deklaroi sot se “zbythja e krimit në folenë e krimit është prioriteti ynë dhe këtu duhet të jemi shumë të qartë që lufta jonë me krimin na ka bërë baltë pikërisht se e kemi bërë më fort se askush tjetër”.

Në fjalën e tij në Kongresin e Pastrisë Socialiste, Kryeministri Rama theksoi se “kush lufton me krimin në një vend të molepsur nga krimi siç ishte Shqipëria duhet ta marrë parasysh se do të akuzohet si më krimineli do të baltoset si më i inkriminuari kjo nuk është eksperiencë e Shqipërisë është histori e botës”.

“Prokurorët e antimafias italiane, të cilët u vranë nga mafia po të shikoni se çfarë jete kanë pasur me sulmet që u janë bërë nga krimi, nga mafia me denigrimet me baltën, kuptoni menjëherë këtë që po them. Sot ne jemi në një kapitull të ri ku mund ta materializojmë atë goditje që përpara nuk e bënim dot me këtë, janë të gjitha të lidhura bashkë”, – nënvizoi Rama.

Kreu i qeverisë u shpreh se “unë e kuptoj shumë mirë që njerëzit kanë padurim të madh për të parë drejtësinë dhe besoj se nuk them ndonjë sekret apo gjë të pasjellshme kur them se gjysma e popullit drejtësinë e lidh me ata të besëlidhjes, po nuk u lidhën ata, thotë, nuk kemi besë tek drejtësia”.

“E kuptoj këtë, por kjo nuk është as detyra jonë as mundësia jonë. Detyra jonë është të bëjmë drejtësi që pastaj merret me kë duhet të merret dhe nga ana tjetër lufta me krimin ka kaluar në një shkallë të re, sepse sot ne kemi një institucion të ri të drejtësisë kemi SPAK, nuk e kishim deri dje. Tek cili prokuror t’i çonim ne këto asetet e OFL, këto që mbledh OFL kujt t’ia çonim, tek cili prokuror mund të besonim se mund të kishim shans që këto të shkonin në gjykatë, tek cila gjykatë do të shkonin pastaj, tek gjykatat që ka liruar 28 kriminelë brenda 2019, në shkelje të ligjit i kanë liruar, nga rastet më ekstreme që janë bërë mediatike tek rastet që janë bërë më pak ose aspak mediatike. Me këta do ta luftonim”, – tha Rama./atsh

Kryeministri Edi Rama deklaroi në Uashington se “Kosova ka tashmë qeverinë e re dhe mezi pres të punoj së bashku me ta dhe është një temë që ka qenë ëndrra ime dhe çdo shqiptari të Kosovës kufiri, të bëhet tërësisht fluid”.

Në Këshillin e Atlantikut në një bashkëbisedim të hapur mbi vizitën në Uashington, Kryeministri Rama tha se “pse nuk ka qenë e mundur kjo sepse menjëherë sapo ta përmendja jo në Beograd, por këtu në Uashington dhe në Bruksel, njerëzit do më thonin mos je çmendur kjo është Shqipëria e Madhe”.

“Po kështu edhe në Beograd do ta thonin një gjë të tillë. Tashmë kemi një marrëveshje, në të cilën kufijtë mund të jenë tërësisht të hapur, ka njerëz që thonë mos duhet t’u kërkojmë leje serbëve për kufirin tonë. Çfarë është kjo? Kjo është të tallesh me njerëzit, kjo është ti marrësh njerëzit për budallenj, natyrisht duhet një marrëveshje e përbashkët dhe më pas mund ta bësh këtë gjë me gjithkënd”, – nënvizoi Rama.

Kreu i qeverisë sqaroi se “pasi binda serbët dhe Presidentin e Serbisë që të mos ta linin jashtë lëvizjen e njerëzve, sepse ata donin vetëm të përfshinin kapitalin, mallrat , lëvizjen e transaksioneve, por ndërkohë që nuk donin lëvizjen e njerëzve sepse kishin frikë nëse do të hapeshin kufijtë shqiptarët do të lëviznin dhe do të bëhej kjo Shqipëria e madhe” .
“Por kjo nuk është e vërtetë, do të kemi dy shtete, siç do të jenë 6 shtete në Ballkanin Perëndimor, por do të kemi komunikim normal ashtu si në Bashkimin Europian. Kjo do të bënte që shqiptarët të lëvizin mes njëri- tjetrit të lirë. Kjo është diçka që mund ta zgjidhim, se kur je ne qeveri është shumë ndryshe. Tashmë mund të punojmë së bashku dhe sa më shpejt të qartësojmë këtë shtrembërim lidhur me Shengenin Rajonal dhe të bëjmë përpara me kufijtë tanë”, – tha Rama.

Kryeministri theksoi se “ka edhe diçka tjetër, nuk është një BE e vogël, që të gjashtët të kenë një konsensus, të gjithë duhet të bëjnë të njëjtën gjë, jo, nuk ka veto, nuk ka paragjykim, nuk ka kushtëzim, gjithsecili mund të bëjë pjesë apo të zbatojë pjesë të saj siç do. Pra ideja është që nuk është e thënë që Kosova të bëjë me ne apo me Serbinë të njëjtën gjë. Mali i Zi është pjesë e iniciativës na pëlqen pjesa më e madhe e saj, ka gjëra që nuk na intereson, por vetëm për faktin që është shumë elastike, nuk ka nevojë të bësh çdo gjë me të njëjtin ritëm” .

“Së dyti është mjaft interesante që ambasadori Grenell nxiti marrjen e vendimit për të rivendosur fluturimet mes Prishtinës dhe Beogradit, të gjithë në Prishtinë e përgëzuan edhe unë e përgëzova, por po ta kisha thënë unë, vetëm ta kisha thënë jo ta kisha bërë ndoshta nuk do të isha këtu sot, do të më kishin prerë kokën”, – tha Rama.

“Kjo nuk ka të bëjë aspak me mendimin apo qëndrimin tim për këtë, pasi qysh prej ditës së parë e gjithë kohës kam thënë që Serbia duhet ta njohë sa më shpejt të jetë e mundur Kosovën. Për Serbinë është një makth, nga i cili Serbia duhet të çlirohet, Kosova është një realitet që nuk mund të ndryshojë. Në të njëjtën kohë na duhet të punojmë së bashku, na duhet të gjejmë se çfarë dhe ku mund të punojmë së bashku. Për këtë mund të mos biem dakord, por kjo nuk është arsye që të ngrimë gjithçka dhe t’i kthejmë shpinën njëri -tjetrit sepse nuk ndihmon askënd”, – tha Rama.

Kryeministri Rama u shpreh se “aktualisht kemi një konflikt të madh në Ukrainë dhe Presidenti i Ukrainës dhe i Rusisë ulen dhe flasin se si të hedhin hapa përpara, ata janë në luftë aty në këto zona, si mund të shmangësh të flasësh”./atsh