Lajmi i fundit

Pak minuta më parë disa përfaqësues të Partisë Demokratike u përleshën fizikisht me përfaqësues të Partisë Komuniste që kishin shkuar tek Varrezat e Dëshmorëve për t’i nderuar me foton e ish-diktatorit Enver Hoxha.

I pyetur nga gazetarët pasi bëri nderimet përkatëse, kreu i PD-së Lulzim Basha u tregua i prerë, duke thënë se Partia Demokratike ishte e angazhuar për të çuar në Kuvend një pr/ligj për ndalimin dhe dënimin e ekspozimit në çdo formë të simboleve të regjimit komunist.

“PD është e angazhuar të çojë në parlament ligjin për heqjen e simboleve të komunizmit. Kurrë më nuk do pranojmë kthimin e së shkuarës, kjo do nisë me portretin e gjakatarit Enver Hoxha”,- tha ai.

Mesa duket rezultatet e takimit të parë të grupit negociator shqiptaro-grek, dy ministrat e jashtëm Ditmir Bushati dhe Nikos Kociaz i kanë analizuar në një takim që kanë patur në Selanik ku po zhvillohet takimi i 3 ndërministror  Greqis- Shqipëri- Maqedoni- Bullgari.

E pas takimit, ministri Ditmir Bushati ripërsërit optimizmin për finalizimin e një marrëveshje të re për kufirin detare që siç thotë do të jetë më e mirë se ajo e 2009 dhe më e mirë për të dy vendet.

“Mendoj se jemi përballë një situate të favorshme ku ekzistojnë mundësitë që Shqipëria dhe Greqia të shkojnë drejt një marrëveshje të re, e cila do të jetë e mirë për të dyja vendet, dhe mbi të gjitha një marrëveshje që do të jetë e zbatueshme për të dyja vendet”.

Nga paketa e çështjeve që kërkojnë zgjidhje është dhe ligji i luftës dhe kufiri tokësor ndërsa është arritur dakortësia për njohjen e patentave të automjeteve.

Bushati lajmëron një takim tjetër me homologun brenda pak ditëve, ndërsa brenda 15 Majit pritet të mbahet dhe raundi i dytë i negociatave tashmë në Athinë.

Prefekti I Qarkut Vlorë organizoi një takim me subjektet që ushtrojnë aktivitetin e tyre në Basenin e lumit Vjosë. Në takim mori pjesë Sekretarja e Sekretariatit Kombëtar të Ujit zj. Gerta Lubonja dhe Albert Lenja.

Shfrytëzimi pa kriter I inerteve lumore gjatë këtyre viteve, ka sjellë një degradim të vazhdueshëm të lumenjve në vendin tonë, I cili po ndikon në prishjen e ekuilibrave mjedisorë, rritjen e shkallës së erozionit dhe rritjen e riskut nga përmbytjet.

Raporte dhe studime të ndryshme e evidentojnë këtë shqetësim dhe kërkojnë marrjen ë masave, për të mos patur pasoja të parikuperueshme.

Prefekti i Qarkut Vlorë vuri theksin në kthimin e ligjshmërisë së veprimtarinë në Basen, konform të gjitha rregullave të parashikuara nga ligji me qëllimin e vetëm mbrojtjen maksimale të lumenjve dhe shtretërve të tyre.

Pas dy muajsh në arrati është bërë i mundur arrestimi i Arbër Çekajt.  Ky arrestim i bujshëm u paralajmërua pak minuta më parë nga ministri i Brendshëm Fatmir Xhafaj.

Arbër Çekaj është pronari i kompanise Arbri Garden e cila ishte porositesja e kontenierit me banane nga Kolumbia, brenda te cilit u kap sasia rekord e kokaines ndonjehere në vendin tonë.

Sasia rekord 613 kg kokainë u sekuestrua në Maminas në datë 28 shkurt në një kontenier me banane të ardhur nga Kolumbia.

Në hetimin e sasisë rekord të kokainës që u kap në Durrës janë përfshirë edhe agjenci të huaja si dhe DEA amerikane pasi ka dyshime se në këtë sipërmarrje janë përfshirë grupe kriminale që operojnë brenda dhe jashtë territorit të Shqipërisë.

Kohë më parë diplomati amerikan Donald Lu është shprehur se Arbër Cekaj nga çdo këndvështrim është “peshk i madh” dhe u bëri thirrje partnerëve ta arrestojnë dhe ta sjellin para drejtësisë.

Policia e Shtetit ka reaguar me një sqarim pas lajmit të dhënë nga mediat italiane lidhur me operacionin për një grup kriminal që trafikonte droge me avione të vegjël nga Shqipëria drejt Italisë.

Sipas policisë shqiptare, bëhet fjalë për një operacion të vitit 2015 i koduar “Free-Flight”, operacion ky i zhvilluar në bashkëpunim me Policinë shqiptare, ndërkohë që së fundi priten arrestet pas apelimit që kishin bërë 7 prej personave të akuzuar në 2015.

Reagimi i Policisë së Shtetit:

Lidhur me lajmin për operacionin antidroge në Itali, rezulton se është procedim i disa viteve më parë dhe po zbatohen fletë arrestet e Prokurorit të DDA së Bolonjës pas apelimit që kishin bërë 7 prej personave të akuzuar në 2015.

Operacioni eshte i vitit 2015 i koduar “Free-Flight”, operacion ky i zhvilluar ne bashkepunim me Policinë shqiptare.

Operacioni/ Trafik droge me avion nga Shqipëria në Itali, 7 arreste:

Pritet ekzektimi i 7 arresteve pas një superoperacioni antidroge në Bolonja të Italisë.

Mediat italiane bëjnë me dije se aksioni policor ka nisur që në oret e para të mëngjesit të sotem dhe ka objektiv një grup kriminal që trafikon drogë nga Shqipëria në Itali me avion.

Pjesë e aksionit janë karabinierët e Riccione-s, nën drejtimin e antimafias së Bolonjës. Policia njofton se ka sekuestruar sasi te konsiderueshme të kokainës, marihuanës dhe hashash.

Dyshohet se transporti behej me nje avion te vogel permes ajrit nga Shqiperia ne Itali e më pas aty përpunohej, ndahej dhe trafikohej në zona të tjera.

Kuvendi i Shqipërisë mirato dje me 73 vota pro një nga lidhet më të rëndësishme dhe me impakt të drejtpërdrejtë në jetën e mijërave familjeve.

Bëhet fjalë për ligjin për strehimin social, i cili rregullon dhe krijon mundësinë për strehim të përshtatshëm dhe të përballueshëm për familjet në nevojë. Me hyrjen në fuqi të këtij ligji, njësitë e qeverisjes vendore përzgjedhin individët dhe familjet, të cilët përfitojnë për t’u përfshirë në një nga programet e strehimit.

Kategoritë shoqërore që përfitojnë janë personat me aftësi të kufizuar, të moshuarit, fëmijët, individët me statusin e jetimit, familjet e mbetura të pastreha për shkak të lirimit të banesave të ish-pronarëve, emigrantët e rikthyer, punëtorët emigrantë dhe azilkërkuesit, familjet e policëve të rënë në detyrë, punonjësit e reparteve të ndërhyrjes së shpejtë (FNSH), punonjësit e repartit RENEA, viktimat e dhunës në familje; viktimat e trafikimit/viktimat e mundshme të trafikimit; anëtarët e komunitetit rom, anëtarë të komunitetit egjiptian, të miturit në konflikt me ligjin, vajzat nëna, komunitetin LGBTI etj.

Ndërkaq, sipas ligjit, përparësi për t’u strehuar do të kenë familjet që nuk disponojnë banesë në pronësi, që banojnë në banesa që paraqesin rrezik shembjeje, që banojnë në banesa të mbipopulluara, që kanë mbetur ose rrezikojnë të mbeten të pastreha, si rezultat i fatkeqësive natyrore etj. Sipas rasteve, janë parashikuar 6 programe sociale, konkretisht programi i banesave sociale me qira, programi i banesave me kosto të ulët, programi për përmirësimin e kushteve të banesave ekzistuese, deri në një ndërtim të ri, programi për zhvillimin e zonës me qëllim strehimi etj.

Aplikimi për strehim

Përfshirja në programet sociale të strehimit bëhet nëpërmjet aplikimit në zyrën përkatëse të njësisë së vetëqeverisjes vendore të vendbanimit/ vendqëndrimit të aplikantit. Individi ose familja pa të ardhura, me të ardhura shumë të ulëta ose të ulëta, që aplikon, paraqet vetëm kërkesën për programin social të strehimit, sipas formatit të miratuar nga njësia e vetëqeverisjes vendore. Njësia e vetëqeverisjes vendore plotëson dosjen me të gjithë dokumentacionin e nevojshëm, i cili sigurohet me shpenzimet e vetë njësisë së vetëqeverisjes vendore, për këta aplikantë. Dokumentacioni për të përfituar strehim sipas çdo programi, afatet dhe procedurat përcaktohen me vendim të Këshillit të Ministrave.

Përzgjedhja

Ligji parashikon që përzgjedhja e familjeve përfituese bëhet nëpërmjet një sistemi pikëzimi i cili miratohet dhe publikohet për çdo program nga bashkia, bazuar në parimet e parashikuara në këtë ligj si dhe kriteret e bëra publike përpara fillimit të procesit të aplikimit. Në përzgjedhjen e subjekteve përfituese me anë të sistemit të pikëzimit përfshihen individë/familje të cilët përmbushin nivelin e të ardhurave të parashikuara sipas çdo programi. Bashkitë hartojnë, miratojnë dhe publikojnë sistemin e pikëzimit, për çdo vit, të specifikuar për çdo njësi të vetëqeverisjes vendore dhe për çdo program që zbatohet në ato, bazuar në kriteret e përcaktuara në këtë ligj. Kryetari i bashkisë vendore duhet të sigurojë listat e përfituesve brenda një afati dy mujor, nga data e njoftimit nga ana e subjektit publik ose privat që ofron dhe realizon një nga programet sociale të strehimit, kur ky subjekt nuk është vetë njësia e vetëqeverisjes vendore. Hartimi i listës së përfituesve kryhet nga zyra përgjegjëse ose struktura e ngarkuar nga kryetari i njësisë së vetëqeverisjes vendore. Lista e përfituesve dhe dokumentacioni përkatës vlerësohet nga komisioni i strehimit dhe miratohet nga këshilli i njësisë së vetëqeverisjes vendore.

Programi i banesave sociale me qira

Programi për përmirësimin e kushteve të banesave ekzistuese, deri në një ndërtim të ri;

Programi i banesave me kosto të ulët

Programi për zhvillimin e zonës me qëllim strehimi;

Programi për krijimin e banesave të përkohshme;

Programi i banesave të specializuara.

Kriteret e përzgjedhjes së përfituesve për t’u strehuar

Familjet me përparësi
Familjet që nuk disponojnë banesë në pronësi;

Banojnë në banesa që paraqesin rrezik shembjeje;

Banojnë në banesa të mbipopulluara, sipas përcaktimeve dhe normave në fuqi;

Kanë mbetur ose rrezikojnë të mbeten të pastreha, si rezultat i fatkeqësive natyrore;

Familjet ose individët që humbasin banesën e tyre si pasojë e zhvendosjes ose zbatimit të një vendimi gjyqësor.

Banojnë në banesa që prishen ose përjashtohen nga procesi i legalizimit si rezultat i investimeve publike.

Kushtet familjare, në bazë të të cilave përcaktohen me përparësi
Familjet njëprindërore që kanë në ngarkim fëmijë, ku përfshihen edhe vajzat nëna;

Të moshuarit, që kanë mbushur moshën e pensionit dhe që nuk përzgjidhen për t’u strehuar në institucionet publike të përkujdesjes shoqërore;

Familjet me më shumë se katër fëmijë;

Bashkëshortët, mosha e përgjithshme e përbashkët e të cilëve arrin deri në 60 vjeç.

Kushtet sociale, në bazë të të cilave përcaktohen me përparësi
Personat me aftësi të kufizuara, në përputhje me përcaktimet e bëra me vendim të Këshillit të Ministrave;

Individët me statusin e jetimit, që nga çasti i daljes nga qendrat e përkujdesjes shoqërore dhe deri në moshën 30 vjeç;

Familjet e mbetura të pastreha për shkak të lirimit të banesave ish-pronarëve;

Emigrantët e rikthyer, punëtorët emigrantë dhe azilkërkuesit;

Familjet e policëve të rënë në detyrë;

Punonjësit e reparteve të ndërhyrjes së shpejtë (FNSH);

Punonjësit e repartit RENEA;

Punonjësit e shërbimit të mbrojtjes nga zjarri dhe shpëtimin;

Viktimat e dhunës në familje;

Viktimat e trafikimit/viktimat e mundshme të trafikimit;

Anëtarët e komunitetit rom;

Anëtarë të komunitetit egjiptian;

Të miturit në konflikt me ligjin, sipas parashikimeve të Kodit të Drejtësisë Penale për të mitur, pas ekzekutimit të dënimit;

Vajzat nëna;

Individët që i përkasin komunitetit LGBTI, të cilët janë viktima për shkak të orientimit seksual ose identitetit gjinor bazuar në vendimin e organit kompetent, sipas legjislacionit në fuqi për mbrojtjen nga diskriminimi që përcakton se si pasojë e diskriminimit individi nuk ka një strehim të përshtatshëm dhe që kanë të ardhura të pamjaftueshme ose që nuk kanë fare të ardhura./Shqiptarja.com