Lajmi i fundit

“Asnjë centimetër katror i truallit të Teatrit nuk do të preket nga asnjë privat dhe mbi të do të ndërtohet vetëm Teatri i Ri Kombëtar”, deklaron Kryeministri Edi Rama.

Rama sqaron se pjesa që do t’i jepet privatit në këmbim të një teatri të ri është pjesa përtej murit rrethues.

Duke publikuar pamje nga kjo zonë e cila duket se ka degraduar për shkak të gjendjes së mjeruar në të cilët ndodhet, Kreu i Ekzekutivit nënvizon se “është e vërtetë që matanë murit rrethues të teatrit ekzistues, ka një truall në pronë të bashkisë që do t’i jepet privatit, NË KËMBIM TË TEATRIT TË RI që privati do të ndërtojë me kapitalin e tij, pa asnjë qindarkë nga buxheti i shtetit”.

“Është folur e stërfolur, shpifur e stërshpifur, akuzuar e stërakuzuar, për truallin e teatrit që do “kafshohet” nga privati! Në fakt ASNJË CM2 i truallit të teatrit nuk do të preket nga asnjë privat dhe mbi të do të ndërtohet VETËM TEATRI I RI KOMBËTAR! Ndërsa po, është e vërtetë që matanë murit rrethues të teatrit ekzistues, ka një truall në pronë të bashkisë që do t’i jepet privatit, NË KËMBIM TË TEATRIT TË RI që privati do të ndërtojë me kapitalin e tij, pa asnjë qindarkë nga buxheti i shtetit!

Dhe trualli në fjalë është ky që do të shikoni në këtë video.

Shikojeni dhe më thoni: A është ky truall një vlerë arkeologjike, historike, kombëtare apo kulturore, që po e humbet Shqipëria me këtë partneritet Publik-Privat për Teatrin e Ri Kombëtar? Dhe nëse jo, a nuk i’a vlen që në këmbim të këtij trualli, i cili do t’i bashkëngjitet pronave private përreth, Shqipëria të përfitojë një Teatër të Ri Kombëtar të denjë për Shqipërinë që duam? Shikim të mbarë”, shprehet kryeministri. /atsh

“Na gjeti krejt të papërgatitur përfundimi i “Lungomares” dhe rritjen e volumit të punës e përballuam me mjaft vështirësi”,- më thoshte dy vjet më parë, në fillim të muajit shtator të 2017-ës, bashkëpronari i një prej lokaleve më të njohura përgjatë shëtitores në Vlorë.

Sipas tij, fluksi i klientëve në ato dy muaj u rrit ndjeshëm, çka i detyroi atë dhe ortakun, të rekrutonin personel me mangësi në formim, por me dëshirën për të punuar. Sot, dy vjet më pas, ai ndjen siguri në investimin që ka bërë, ndërkohë që, të ardhurat i janë shtuar dhe beson se do t’i shtojë edhe më tej gjatë kësaj vere.

Në sezonin veror të dy viteve të shkuara, ndërkohë që projekti i “Lungomares” sapo kishte përfunduar, kjo pjesë e bregdetit vlonjat, u bë edhe epiqendra e performancës turistike në Vlorë dhe më gjerë. Me transformimin e thellë infrastrukturor, pamjen tërheqëse estetike, dimensionin funksional dhe elementët e tjerë atraktivë, “Shëtitorja” u shndërrua në vetëm pak muaj në polin më të rëndësishëm të qytetit të Vlorës.

Sot, Lungomare është pasqyra e dinamikës së zhvillimit të qytetit, e jetës dhe argëtimit, e ekonomisë dhe shpresës. Vetëm gjatë këtij viti, përgjatë saj, u hapën dhe nisën aktivitetin 7 subjekte të reja hotelerie, ndërkohë që, krahasuar me dy vite me parë, kapaciteti akomodues hotelerik ka regjistruar një rritje me të paktën 4 herë.

Një trend i theksuar rritjeje është shënuar edhe në drejtim të lokaleve, bareve dhe restoranteve. Në gjeografinë e strukturën e këtij sektori, ka një ndryshim tërësor. Numri i subjekteve është rritur me me më shumë se 40 përqind, krahasuar me 2017-tën, ndërsa cilësia dhe në përgjithësi, standardi i shërbimit, as që mund të krahasohen. Brenda një periudhe relativisht të shkurtër, dinamika e transformimit ka qenë aq intensive sa, sot mund të thuhet me bindje që, “Lungomare” është shndërruar në një model për zhvillimin e turizmit, në një model të suksesshëm, ku, efektiviteti i investimit është mjaft i dukshëm.

Në këtë pjesë të bregdetit, kanë investuar individë dhe biznese nga Vlora, Tirana, qytete e krahina të ndryshme të Shqipërisë, ashtu si edhe nga Kosova, Italia, Turqia e vende të tjera. Në këtë këndvështrim, “Lungomare” është një mjedis ku bashkëjetojnë e konkurrojnë, filozofi të ndryshme të të bërit biznes, ku zhvillohen interesa, ku janë shkrirë kufijtë mes shteteve, ku individët nuk vlerësohen me atë se “nga vijnë”, por me “çfarë bëjnë”.

“Të ardhurat e mia dhe të ortakut tim, janë aktualisht dy herë më të larta se sa dy vite më parë”, thotë pronari i lokalit që përmenda në hyrje të shkrimit.

Ai saktëson se, transformimi i vijës bregdetare nga Skela në Ujin e Ftohtë, ka krijuar një atmosferë tjetër, ka shtuar fluksin e pushuesve, të cilët shëtisin mbrëmjeve, por edhe konsumojnë një darkë, apo një gotë verë, një pije freskuese etj.

Ndërkohë, Mesoja, bashkëpronar i një tjetër restoranti gjithashtu të njohur, e çon edhe më tej argumentin e vet.

Ai shprehet se, shtimi i fluksit të turistëve, veçanërisht atyre të huaj, u shoqërua edhe me elementë të tjerë të zhvillimit.

“E them pa ngurrim, se, ne gjatë këtyre dy viteve kemi mësuar nga të huajt. Kemi mësuar si të përgatitemi, të sillemi dhe të veprojmë në kushtet e fluksit të shtuar dhe si të jemi të sjellshëm me klientët, të cilët prenotojnë dhe janë të gatshëm të presin, mjafton që të shijojnë një darkë apo drekë të mirë e të shijshme me prodhime deti dhe verë”, thotë Meso.

Ai shton se, në periudhën e verës, janë të detyruar të punojnë vetëm me rezervime, të cilat bëhen edhe një ditë më parë dhe klientët, në pjesën më të madhe janë turistë të huaj, nga Italia, Anglia, Franca, Spanja, Rusia, Ukraina, Bjellorusia.

Ndërkohë, për Vasil Bedinin, operatorin e suksesshëm dhe të njohur të turizmit, projekti i “Lungomares”, ishte themeli i një perspektive ndryshe për turizmin. “Network-u” i hoteleve dhe restoranteve që ai ka krijuar për të përballuar kontratat dhe marrëveshjet me agjencitë turistike, e ka bazën në këtë hapësirë të Vlorës. Këtu, ku ai ka ndërtuar një nga hotelet më të njohura në të gjithë bregdetin dhe ku ka bërë bashkë simotra të tjera hotelerike, sipas një modeli bashkëkohor kooperimi.

Në këndvështrimin e tij, “Shëtitorja”, ka ndryshuar gjithë vijën bregdetare, por ka transformuar edhe mentalitetin për të shfrytëzuar bukuritë natyrore, në funksion të zhvillimit. Dhe, turizmi, si themel i këtij zhvillimi, tashmë ka një nga modelet e veta, atë model që ka bërë bashkë qytetarë nga Vlora, Shqipëria dhe mjaft vende të tjera. Për Bedinin, sezoni turistik shtrihet shumë më tepër se muajt e verës. Nga muaji maj deri në tetor, për të është një periudhë intensive dhe turistë nga vende të ndryshme të Evropës, shijojnë bukuritë e bregdetit vlonjat. Kontratat i mbyll qysh një vit më parë dhe impenjimi i vetëm gjatë sezonit për të, është të plotësojë standardet e parashikuara në marrëveshje

“Lungomare”, si një hapësirë kompakte, përfshin në vetvete resurse dhe optimizëm, realitete dhe dëshira për të synuar standarde, të krahasueshme me ato të vendeve më të përparuara.

Në vetëm dy vite, çdo pjesë e kësaj hapësire është shndërruar në mundësi për individin dhe individët në përgjithësi. Parkingjet nëntokësore në pallatet e banimit, dikur të braktisura, sot janë funksionalë dhe gjenerues të ardhurash e kapacitete punësimi sezonale. Apartamente banimi, dikur “të vdekura” në pjesën më të madhe të vitit, tashmë janë shndërruar në kapacitete të turizmit familjar. Hapësirat e kateve të para, të brezit të dytë e të tretë, në godinat e ngritura në 10 vitet e fundit, të lëna “pas dore” deri vonë, tashmë po bëhen gradualisht pjesë efektive e rrjetit të shërbimeve.

Arben Breshani, kryetar i Dhomës së Tregtisë dhe Industrisë së Qarkut të Vlorës, thotë se, në këndvështrimin ekonomik projekti i “Lungomares”, ridimensionoi parametrat e tregut të ndërtimeve, duke vënë në eficensë investime “të stacionuara” në vite. Me përfundimin e projektit, jo vetëm u riaktivizua ky treg, me një intensitet në rritje, por në skemën e tij, janë përfshirë aktorë nga vende të tjera. Krahas Italianëve, shqiptarëve nga Kosova, apo nga Maqedonia e Veriut, qytetarë nga Norvegjia, nga Gjermania, nga Polonia, Turqia, nga Rusia, Ukraina, por edhe nga vende të tjera, kanë blerë apartamente banimi në këtë pjesë të bregdetit. Në këtë mënyrë, tregu i turizmit në Vlorë ka fituar klientë të garantuar që frekuentojnë qytetin një pjesë të vitit, por edhe mundësi për shtim të fluksit nga vendet respektive, si rrjedhojë e efektit zinxhir.

Ky sezon veror në Vlorë po përjeton një dinamikë në rritje. Turistët e huaj, vijojnë të shtohen në vjimësi, ndërkohë që gjeografia e vendeve nga ata vijnë po pasurohet me emra të rinj.

Për herë të parë në Vlorë kanë mbërritur turistë nga Venezuela, ndërkohë që ka shtim të atyre nga Sllovenia e Kroacia. Dhe për ta, Vlora është e bukur, sepse, siç shprehej një çift bashkëshortësh nga Sllovenia, “ka një bregdet tërheqës, plazhe të bukura, ushqim të mirë e të shëndetshëm dhe krahas tyre edhe një hapësirë atraktive rrëzëllitëse, veçanërisht në orët e mbrëmjes, siç është “Lungomare”, ku funksionojnë lokale të mrekullueshme”.

“Lungomare ka krijuar një raport të ri mes qytetit dhe turizmit, mes mundësive dhe perspektivës gjithnjë e më të prekshme”, thotë Breshani./atsh

Gjykata e Tiranës, në kuadër të shqyrtimit të dosjes “Babalja” ka kërkuar të martën që Sekretari i Përgjithshëm i PD-së, Gazment Bardhi, të sillet forcërisht në seancën gjyqësore të radhës për dosjen në fjalë, pasi kërkohet nga prokuroria për të dhënë dëshminë e tij.

Prokuroria ka kërkuar në dy seancat e fundit praninë e Bardhit, por Sekretari i Përgjithshëm i PD-së, nuk është paraqitur. Për të dëshmuar është thirrur dhe prokurori, Besim Hajdarmataj, por ky i fundit i angazhuar në një seancë tjetër gjyqësore dhe nuk u paraqit. Për prokurorin në fjalë është kërkuar vetëm rinjoftimi i tij për seancën tjetër./atsh

Presidenti i Republikës se Shqipërisë, Ilir Meta në një konferencë për mediet, të zhvilluar sot, ka lajmëruar krijimin e forumit të ri “Unë jam arbëresh”.

Presidenti Meta deklaroi se ky forum është i një rëndësie të veçantë, lidhur me kontributin që arbëreshët kanë dhënë për të pasur këtë Shqipëri që kemi sot. Forumi do të përbëhet nga 5 anëtarë.

“Forumi ‘U’ jam Arbëresh!’ krijohet me qëllim promovimin, nxitjen dhe zhvillimin e veprimtarive si konferenca shkencore, veprimtari kulturore, artistike dhe sportive, takime ndërinstitucionale, promovimin e trashëgimisë dhe turizmit, nxitja, ruajtja dhe mësimi dhe përdorimi i gjuhës arbëreshe, forcimi i lidhjeve me shtetin amë, nxitja e studimeve dhe kërkimeve shkencore në fushën e gjuhës dhe historisë arbëreshe, nxitja dhe binjakëzimi mes bashkësive shqiptare dhe komunave arbëreshe në Itali, nxitja dhe mobiliteti midis fëmijëve, nxënësve, studentëve në veçanti”, tha Meta.

Ai shtoi se çdo institucion, pjesë apo jo e kësaj nisme, individ, ent tjetër publik apo privat, është i mirëpritur të propozojë ide dhe veprimtari me qëllim arritjen e objektivave të këtij forumi.

“Forumi ‘U’ jam Arbëresh!’ në mbledhjen e tij të parë do të zgjedhë anëtarë të Sekretariatit Ndihmës, që do të përbëhet nga 5 anëtarë të forumit. Ky sekretariat do të kryejë detyrat për organizimin dhe koordinimin e veprimtarive të iniciuara nga Institucioni i Presidentit të Republikës sipas kalendarit të veprimtarive të miratuara nga Forumi ‘U’ jam Arbëresh!’”, deklaroi presidenti.

Meta tha se puna përgatitore për të kompletuar formalizimin e këtij vendimi do të vazhdojë edhe gjatë këtyre javëve, me vendimin përfundimtar do të njiheni në fillim të muajit shtator.

“Krijimi i Forumit ‘U’ jam Arbëresh!’ është i një rëndësie të veçantë kombëtare për vetë kontributin e jashtëzakonshëm që arbëreshët kanë dhënë në shekuj për mbijetesën e kombit tonë dhe afirmimin e tij europian”, deklaroi Meta.

“Jam sot para jush për t’ju njoftuar rreth punës së bërë deri tani nga ana ime si President i Republikës, për të formalizuar në fillim në shtatorit vendimin mbi ngritjen e Forumit ‘Unë jam Arbëresh’!

“Ky forum vjen me qëllim evidentimin, ruajtjen dhe promovimin e trashëgimisë kulturore arbëreshe, pra: gjuha, traditat, folklori, ritet fetare si një prioritet me rëndësi kombëtare të jashtëzakonshme dhe pasuri e çmuar, e lashtë dhe unike e trashëgimisë kulturore botërore gjithashtu, kam vendosur ngritjen e Forumit ‘U’ jam Arbëresh!’ si një strukturë konsultative, bashkërenduese dhe promovuese në përbërje të së cilës mirëpritet kontributi i institucioneve dhe ministrive”, tha Meta.

“Forumi ‘U’ jam Arbëresh!’ krijohet nga Presidenti i Republikës dhe funksionon nën kujdesin e Tij me qëllim promovimin, nxitjen dhe zhvillimin e veprimtarive si konferenca shkencore, veprimtari kulturore, artistike dhe sportive, takime ndërinstitucionale, promovimin e trashëgimisë dhe turizmit, nxitja, ruajtja dhe mësimi dhe përdorimi i gjuhës arbëreshe, forcimi i lidhjeve me shtetin amë, nxitja e studimeve dhe kërkimeve shkencore në fushën e gjuhës dhe historisë arbëreshe, nxitja dhe binjakëzimi mes bashkësive shqiptare dhe komunave arbëreshe në Itali, nxitja dhe mobiliteti midis fëmijëve, nxënësve, studentëve në veçanti”, shtoi Meta.

“Çdo institucion, pjesë apo jo e kësaj nisme, individ, ent tjetër publik apo privat, është i mirëpritur të propozojë ide dhe veprimtari me qëllim arritjen e objektivave të këtij forumi. Forumi ‘U’ jam Arbëresh!’ në mbledhjen e tij të parë do të zgjedhë anëtarë të Sekretariatit Ndihmës, që do të përbëhet nga 5 anëtarë të forumit. Ky sekretariat do të kryejë detyrat për organizimin dhe koordinimin e veprimtarive të iniciuara nga Institucioni i Presidentit të Republikës sipas kalendarit të veprimtarive të miratuara nga Forumi ‘U’ jam Arbëresh!”, vijoi ai.

“Po kështu dëshiroj të falënderoj për angazhimin e deritanishëm në çuarjen përpara të kësaj nisme: Profesor Nasho Jorgaqin, profesor Paskal Milon, profesor Neritan Cekën, profesor Tritan Shehun, profesor Shaban Sinanin, profesor Pëllumb Xhufin, profesorët e nderuar arbëreshë Francesco Altimari dhe Matteo Mandala. Po kështu edhe përfaqësuesit e shquar për dekada të arbëreshëve në Parlamentin dhe Senatin italian Mario Brunetti dhe Cesare Marinin, Aldo Marinon dhe shumë personalitete të tjera”, tha Meta.

“Por ndërsa puna përgatitore për të kompletuar formalizimin e këtij vendimi do të vazhdojë edhe gjatë këtyre javëve, me vendimin përfundimtar do të njiheni në fillim të muajit shtator. Krijimi i Forumit ‘U’ jam Arbëresh!’ është i një rëndësie të veçantë kombëtare për vetë kontributin e jashtëzakonshëm që arbëreshët kanë dhënë në shekuj për mbijetesën e kombit tonë dhe afirmimin e tij europian”, përfundoi Meta./atsh

Ministrja e Financave dhe Ekonomisë, Anila Denaj, ka vijuar inspektimet si pjesë e zbatimit të Planit Operacional, në luftë kundër informalitetit.

Gjatë verifikimeve të kryera nga strukturat e Hetimit Tatimor, në Tiranë, në orët me aktivitet më të lartë ekonomik është konstatuar se ka përmirësim të dukshëm të treguesve edhe për shkak të rritjes së ndërgjegjësimit të subjekteve për t’u vetëkorrigjuar. Megjithatë, nuk kanë munguar edhe raste të përsëritjes së vazhdueshme të shkeljeve.

“Janë konstatuar shkelje për herë të tretë të kuponit tatimor dhe bazuar në procedurat tatimore, përgjegjësit në këtë rast do të ndiqen penalisht. Është e rëndësishme të kuptohet se duhet të pritet kupon tatimor edhe në hyrje të lokaleve të natës për të shmangur penalizimet drastike. E kërkojmë këtë pasi nuk do të donim të ishim as në pozitat e vendosjes së shiritave dhe as të ndjekjes penale”, tha ministrja Denaj.

Zëvendësdrejtori i Përgjithshëm i Tatimeve, z.Ervin Hoxha, tha se gjatë kontrolleve të ushtruara janë konstatuar lokale me xhiro të lartë, që kanë shmangur detyrimin për të prerë kupon tatimor. “Kemi vënë re tendenca për mosdeklarim dhe mos përmirësim të xhiros nga këto subjekte, që janë me risk të lartë. Ju bëjmë thirrje që të vetëpërmirësohen dhe vetëdeklarohen sepse kontrollet do të vazhdojnë në mënyrë që të përmirësojmë këtë situatë”, tha Hoxha.

Gjithashtu, një aspekt i rëndësishëm në luftën kundër informalitetit është edhe ndryshimi i ligjit të Procedurave Tatimore, si pjesë e paketës “Moneyval”, për të cilin Denaj kërkoi bashkëpunim e tatimpaguesve për zbatimin e plotë të tij.

Ministrja e Financave dhe Ekonomisë i bëri apel tatimpaguesve të regjistruar pranë Qendrës Kombëtare të Biznesit dhe Administratës Tatimore të hapin llogari bankare të biznesit të tyre, jo më vonë se 90 (nëntëdhjetë) ditë nga hyrja në fuqi e këtij ligji (data 26.07.2019) dhe ta deklarojnë atë në administratën tatimore. Ndërsa, tatimpaguesit e regjistruar rishtas janë të detyruar të hapin llogarinë bankare të biznesit/organizatës, jo më vonë se 20 (njëzet) ditë kalendarike nga e nesërmja e regjistrimit në QKB/Administratën Tatimore dhe ta deklarojnë atë në organet tatimore.

“Ju lutemi tatimpaguesve të hapin llogaritë bankare, të regjistrojnë biznesin sipas procedurave ligjore. Nëse respektojmë rregullat, respektojmë ligjet shqiptare, atëherë do të kemi më pak inspektime, një marrëdhënie korrekte dhe garantim të konkurrencës së ndershme në treg”, tha ministrja Denaj./atsh

Policia e Shtetit ka proceduar penalisht 30 zyrtarë të administratës për veprën penale “shpërdorimi i detyrës”, mes tyre kryetari i një njësie administrative në bashkinë e Fierit me akuzën e favorizimit të evazionit fiskal.

Kështu bëri të ditur sot drejtori për Hetimin e Krimeve Ekonomike e Financiare, në Departamentin e Policisë Kriminale, drejtues Lutfi Minxhozi, në një deklaratë për mediet në lidhje me masat e marra nga Policia e Shtetit për evidentimin dhe ndëshkimin e paligjshmërisë.

“Në kuadër të planit të posaçëm të masave për parandalimin, evidentimin dhe ndëshkimin e informalitetit, evazionit fiskal në turizëm, ndërtim, hidrokarbure, mallra të akcizës dhe krimeve të tjera mjedisore, në vijim të punës së përditshme u proceduan penalisht 23 nëpunës të bashkive; 3 nëpunës të sistemit fiskal; 4 nëpunës të Drejtorive Rajonale të Punësimit. Nga nëpunësit e proceduar penalisht, 5 prej tyre janë arrestuar në flagrancë, konkretisht: Kryetari i një Njësie Administrative, bashkia Fier; 4 punonjës të Tatim-Taksave, në bashkinë Shkodër. Në 80 raste, për subjekte të ndryshme janë marrë masa administrative nga Tatimet duke vendosur gjoba. Në 15 raste, organet tatimore kanë vendosur bllokimin e aktivitetit të bizneseve të paligjshëm”, nënvizoi Minxhozi.

Sipas tij, në zbatim të këtij plani të posaçëm në shkallë vendi janë ushtruar kontrolle në 801 subjekte të ndryshme, nga të cilët 467 shërbime vendpushimesh me shezlon, 162 lokale në bregdet, 83 hotele, 24 ndërtime pa leje, 4 raste për territore të pushtuara dhe në pika shpërndarëse të karburantit.

“Si rezultat i këtyre kontrolleve janë evidentuar 89 subjekte në shkelje të ligjit dhe të gjithë përfaqësuesit e tyre janë proceduar penalisht për veprat penale: fshehja e të ardhurave, moslëshim i kuptonit tatimor, ushtrim aktiviteti tregtar i paligjshëm, mospagim i taksave dhe i tatimeve, ndërtim i paligjshëm etj., të cilat ndiqen në bashkëpunim me Prokuroritë e Rretheve Gjyqësore përkatëse”, tha Minxhozi.

Lidhur me masat sipas Drejtorive Vendore të Policisë, Minxhozi u shpreh se në DVP Tiranë, janë kontrolluar 46 subjekte, janë vendosur 11 gjoba dhe 9 përfaqësues të subjekteve janë proceduar penalisht.

Në DVP Durrës janë kontrolluar 61 subjekte, janë vendosur 13 gjoba, u është bllokuar aktiviteti 4 subjekteve, si dhe janë proceduar penalisht 8 përfaqësues të subjekteve.

Në DVP Berat janë kontrolluar 15 subjekte dhe janë proceduar penalisht 2 përfaqësues të subjekteve.

Në DVP Fier janë kontrolluar 177 subjekte, janë vendosur 19 gjoba, i është bllokuar aktiviteti 1 subjekti dhe janë proceduar penalisht 3 përfaqësues të subjekteve.

Në DVP Vlorë janë kontrolluar 258 subjekte, janë vendosur 17 gjoba, është bllokuar aktiviteti në 4 subjekte, si dhe janë proceduar penalisht 22 përfaqësues të subjekteve.

Në DVP Gjirokastër janë kontrolluar 5 subjekte, të cilat janë gjetur në ligjshmëri.

Në DVP Korçë janë kontrolluar 30 subjekte dhe janë vendosur 3 gjoba, është bllokuar aktiviteti në 3 subjekte dhe 7 përfaqësues subjektesh janë proceduar penalisht.

Në DVP Elbasan janë kontrolluar 25 subjekte, 17 përfaqësues subjektesh janë proceduar penalisht.

Në DVP Kukës janë kontrolluar 17 subjekte, 1 përfaqësues subjekti është proceduar penalisht.

Në DVP Dibër janë kontrolluar 23 subjekte dhe është vendosur 1 gjobë, është bllokuar aktiviteti në 1 subjekt dhe 3 përfaqësues subjektesh janë proceduar penalisht.

Në DVP Shkodër janë kontrolluar 12 subjekte dhe të gjithë përfaqësuesit janë proceduar penalisht.

Në DVP Lezhë janë kontrolluar 132 subjekte dhe janë vendosur 16 gjoba, është bllokuar aktiviteti në 2 subjekte, si dhe janë proceduar penalisht 5 përfaqësues të subjekteve.

“Strukturat e Policisë së Shtetit në bashkëpunim me ato të Tatimeve, Doganave, Inspektoratet Qendror Teknik etj., janë duke vazhduar me intensitet në shkallë vendi kryerjen e detyrave të përcaktuar në “Planin e Posaçëm të Masave, kundër informalitetit dhe evazionin fiskal në turizëm, ndërtim, hidrokarbure, tregtimin e mallrave të akcizës”, deri në kontrollin e plotë të gjithë territorit të vendit”, u shpreh Minxhozi.

Gjatë këtij operacioni masash, vijoi ai, përveç parandalimit, evidentimit dhe ndëshkimit të subjekteve, vëmendja kryesore e strukturave të Policisë së Shtetit do të përqendrohet në zbulimin, dokumentimin dhe procedimin penal të çdo zyrtari bashkie, Tatimesh, IQT, Dogane, Punësimi etj., të cilët me dashje nuk kanë kryer detyrën për kontrollin e territorit, por kanë lejuar informalitetin, ndërtimet pa leje, ushtrimin e aktiviteteve të tregtisë së paligjshme, ushtrimin e aktivitetit tregtare pa kasë fiskale, shmangie doganore, në interes të tyre ose të personave të tretë, duke i sjellë dëme të konsiderueshme mjedisit, qytetarëve, bizneseve të ligjshme, nëpërmjet lejimit të konkurrencës së pandershme si dhe kanë sjellë dëme të konsiderueshme Buxhetit të Shtetit.

Policia e Shtetit fton qytetarët të denoncojnë çdo rast paligjshmërie në numrin pa pagesë 112, në Komisariatin Dixhital apo në adresat zyrtare në rrjetet sociale të Policisë së Shtetit, si dhe në numrin 0800 90 90 të Shërbimit për Çështjet e Brendshme dhe Ankesat (SHÇBA) në MB, duke garantuar anonimatin dhe një reagim të shpejtë e të paanshëm./atsh