Lajmi i fundit

Ditët e fundit Forcat e Armatosura janë angazhuar me trupa e mjete për shuarjen e tre vatrave të zjarrit në vend.

Prej tre ditësh, efektivët e Detashmentit të Mbrojtjes Rajonale në Gjirokastër po punojnë për shuarjen e një vatre të madhe zjarri në fshatin Goranxi të njësisë administrative Dropull i Poshtëm në bashkinë Dropull.

Si pasojë e terrenit të thyer, ndërhyrja në këtë vatër e cila është riaktivizuar disa herë, ka qenë e vështirë duke djegur rreth 150 ha shkurre e kullota. Për shuarjen e kësaj vatre zjarri janë angazhuar edhe forca nga bashkitë e Dropullit, Tepelenës dhe personel i Emergjencave Civile.

Në veri të vendit trupat e Batalionit I të Këmbësorisë së Vaut të Dejës kanë bërë të munduar shuarjen e një vatre zjarri në njësinë administrative Qerret në bashkinë e Pukës. Zjarri ka djegur disa ha shkurre e kullota, por është arritur të fiket në orët e mbrëmjes së djeshme nga efektivët e Forcës Tokësore.

Gjithashtu, trupat e b1k kanë monitoruar në fshatin Dush në Vaun e Dejës një vatër të vogël zjarri, e cila fatmirësisht është shuar vetë./atsh

Në kuadër të marrëveshjes së bashkëpunimit për patrullime të përbashkëta, Drejtori i Policisë Rrugore të Kosovës dhe Drejtori i Policisë Rrugore Shqiptare, inspektuan nga afër punën e përbashkët të policimit rrugor të Kosoves me ate të Shqipërisë, kryesisht në vendet bregdetare, ku fluksi i mjeteve është më i lartë dhe prezenca e shtuar e policisë është më e nevojshme.

Në një prononcim për mediet, kreu i policisë rrugore të Kosovës, Jeton Rexhepi tha se “ne si Polici e Kosovës kemi ofruar përkrahjen për Policinë e Shtetit Shqiptar, sidomos në këtë sezon veror, në këtë periudhë në të cilën fluksi është më i madh, jo vetëm i qytetarëve kosovarë, por edhe banorëve të tjerë që vizitojnë Shqipërinë për bregdet”.

“Besoj që deri tani, tek patrullimet e përbashkëta, puna e përbashkët ka ka dhënë efektin te qytetarët të cilët janë ndjerë më mirë dhe kanë pasur komunikimin më të lehtë. Kështu që ne, do të vazhdojmë bashkëpunimin që tu lehtësojmë qarkullimin në trafik si dhe të ndihen më të sigurt jo vetëm në rrugën e Kombit, por në të gjitha rrugët e tjera”, tha ai.

Mitat Tola, Drejtori i Policisë Rrugore, tha se “ka mbi 10 vite që Policia Rrugore e Kosovës bashkëpunon me Policinë Rrugore Shqiptare, bashkëpunim shumë i frytshëm, u jep siguri drejtuesve të mjeteve nga Kosova si dhe drejtuesve të mjeteve në Shqipëri. Është një bashkëpunim që mbështetet në procedura pothuajse të njëjta të policimit rrugor, parandalimi i aksidenteve rrugore, rregullimi i trafikut, shkëmbimi i eksperiencave me synimin për një sezon turistik të qetë pa aksidente rrugore dhe pa bllokime”

Ai tha se Policia Rrugore punon vazhdimisht për të përballuar këtë fluks mjetesh që është normalisht i kuptueshëm në situata të tilla në drejtim të plazheve.

“Në kuadër të ketyre masave, janë forcuar shërbimet e policisë në rrugë, si dhe përtej tyre janë marrë masa në bashkëpunim me Entin Pronar të Rrugëve, për pezullime të përkohshme. Për shembull 2 javët e fundit, kemi pasur shqetësime në aksin rrugor Fushë Krujë – Thumanë, aksin rrugor që lidh Veriun e Shqipërisë me Tiranën, si rezultat i punimeve në Urën e Fushë Krujës, kemi pasur ngadalësime, bllokime, rëndesë trafiku. Duke filluar nga sot, në këtë aks rrugor do të pezullohet nga ora 06:00 e mëngjesit deri në orën 22:00 të mbrëmjes, kthimi i gjithë kamionëve që futen në degëzimin e Luzit për në Fushë Krujë. Pra të gjithë kamionët mbi 7.5 tonë nuk do të futen në këtë zonë rurale për t’u dhënë mundësi drejtuesve të mjeteve të vogla të kalojnë lehtë”, tha Tola.

Ai shtoi se “po koordinojmë me Entin Pronar të Rrugëve për të vendosur sistemet e sinjalizimit dhe për të njoftuar bizneset të zhvendosin dinamikën e transporteve të tyre në orët e natës, ku nuk bëhen pengesë për të tjerët dhe as ne nuk bëhemi pengesë për ata. Pas përfundimit të këtij sezoni turistik, në marrëveshjet në vitet e ardhshme do jemi më dinamikë, në sensin që mund t’i shtrijmë marrëveshjet e bashkëpunimit edhe për fundjava e për festa”./atsh

https://www.facebook.com/1502420603377639/videos/506613836742918/?t=0

Me qëllim garantimin e një sezoni veror sa më të sigurt dhe cilësor kanë vijuar takimet e Task Forcës së Turizmit, këtë herë në zonën e Himarës.

E pranishme në këtë takim ishte Ministre e Financave dhe Ekonomisë, Anila Denaj, Ministri i Bujqësisë dhe Zhvillimit Rural, Bledi Çuçi, kryetari i Bashkisë Jorgo Goro, si dhe përfaqësues të pushtetit vendor.

Gjatë fjalës së saj, ministrja Denaj, bëri një bilanc të rezultateve të arritura në kuadër të zbatimit të Planit Operacional, në luftë kundër informalitetit.

Gjatë muajit korrik në të gjithë rajonin Vlorë – Himarë dhe Sarandë, janë realizuar 755 kontrolle nga të cilat, rreth 40% kanë rezultuar me shkelje.

“Konstatojmë se ka një rritje të ndërgjegjësimit të biznesit për t’u regjistruar në organet përkatëse përpara sesa të regjistrohet në Booking.com, megjithatë pajisja me kupon tatimor mbetet shqetësues, pasi nuk është ende në nivelin e duhur. Kemi vënë re edhe një rritje të denoncimeve nga ana e qytetarëve dhe kjo tregon frymën e mirë të bashkëpunimit, e cila duhet të vazhdojë. Një problem tjetër mbetet edhe mosdeklarimi i rregullt i punonjësve, si dhe deklarimi jo i plotë i pagës. Konstatojmë që ka punonjës të cilët një pjesë të rrogës e marrin në zarf, një pjesë e marrin nëpërmjet llogarisë bankare, sikurse ka shumë biznese të cilët nuk i kanë të regjistruar të gjithë punonjësit. Një në 7 punonjës nuk i kanë të deklaruar dhe Inspektoriati i Punës vazhdon inspektimet dhe ky fenomen bëhet më shqetësues gjatë sezonit turistik, kur rritet edhe punësimi sezonal. Janë të paktën 257 të punësuar vetëm në muajin korrik për gjithë rajonin Vlorë – Himarë. Megjithatë, ky numër po të krahasohet me numrin e hoteleve që operojnë mbetet i vogël, ç’ka do të thotë që punësimet ndodhen në forma të tjera dhe mendojmë që ne mund ta rrisim më tej përpjekjen tonë për të ndërmjetësuar nëpërmjet Zyrave të Punës. Përsëri në raport me ligjshmërinë kërkesa që të gjithë të punësuarit të jenë të deklaruar dhe të paguar në 100% të vlerës së tyre të rrogës është absolute dhe ne do të vazhdojmë inspektimet dhe në këtë aspekt, përveç atyre të shkeljeve të administratës tatimore”, tha ministrja Denaj.

Ministrja e Financave dhe Ekonomisë, gjithashtu theksoi se sfidë mbetet ende rritja e aftësisë profesionale të burimeve njerëzore. Në këtë aspekt një rol të konsiderueshëm ka pasur edhe zhvillimi i shkollave profesionale, ku në Vlorë janë funksionale tre.

“Për vitin akademik numri i studentëve ishte 1,350 në të tri shkollat. Vetëm shkolla profesionale Hoteleri – Turizmit ka 625 studentë. Mbetet një numër i vogël, ç’ka do të thotë që kemi akoma punë për të bërë edhe në këtë drejtim për të rritur numrin e studentëve që dalin nga shkollat profesionale. Konstatojmë se ka një numër shumë të vogël të vajzave që janë gati 133. Mund të vijë kjo si rezultat për rajonin e jugut edhe për faktin që ka emigrim të popullsisë. Ne duhet të ngremë një politikë më afatgjatë si në raport me punësimin, ashtu edhe me rritjen e cilësisë së burimeve njerëzore”.

Një tjetër pikë ku u ndal ministrja Denaj, në takimin e Task Forcës së Turizmit ishte dhe puna që duhet të bëjë administrata tatimore për ndërgjegjësimin e subjekteve për të lëshuar kuponin tatimor.

“Në qoftë se ne të gjithë kthehemi në kërkues të zbatueshmërisë së ligjit, rrisim jo vetëm ndërgjegjësimin, por edhe luftën ndaj evazionit. Gjithashtu e rëndësishme është edhe denoncimi i rasteve abuzive përmes të gjitha mjeteve të komunikimit. Në ditët e fundit të kësaj jave, ne do të kemi një aplikacion që quhet Stop-Informaliteti dhe që shkarkohet lehtë dhe të përdoret nga të gjithë. Është koha të ndihmojmë strukturat e administratës tatimore, si dhe të anagazhohemi të gjithë në luftën kundër informalitetit, pasi qëllimi i përbashkët është rritja e të ardhurave, realizimi i më shumë investimeve publike, si dhe garantimi i konkurrencës së ndershme”.

Ministrja Denaj, i bëri thirrje bizneseve që të respektojnë me korrektësi detyrimet ligjore, si dhe të përfitojnë nga lehtësitë fiskale që ka ndërmarrë qeveria shqiptare siç është reduktimi i shkallës së TVSH-së në masën 6%, për të zhvilluar një turizëm të qëndrueshëm./atsh

Kryeministri Edi Rama deklaroi sot se lufta për çlirimin e plazheve nga zaptuesit, falë edhe qytetarëve që nuk heshtin vazhdon papushim.

Lidhur me aksionin për rivendosjen e ligjit në çdo centimetër katror të bregut të Shqipërisë, Kryeministri Rama shprehet se “ky sezon do të jetë i fundit me këtë hall të madh për njerëzit dhe turp të madh për vendin e për shoqërinë”.

“Vazhdon pa pushim lufta për çlirimin e plazheve nga zaptuesit, falë edhe qytetarëve që nuk heshtin. Ky sezon do të jetë i fundit me këtë hall të madh për njerëzit dhe turp të madh për vendin e për shoqërinë. Me ligjin e ri për vijën bregdetare, përgjegjësinë për mbrojtjen e kësaj pasurie publike, të pushuesve e të bizneseve të rregullta, pa miq nëpër bashki e pa lekë për zyrtarucët bashkiakë, do ta marrë shteti”, nënvizon Rama.

Kreu i qeverisë ka publikuar edhe dy mesazhe dhe disa fotografi që sipas tij i kanë ardhur nga qytetarë të ndryshëm, mes tyre edhe sikur lexohet në tekst edhe demokratë lidhur me luftën anti-informalitetit.

“Na zure bashkitë, por të paktën na lirove plazhet. Bashkitë i paskan pas për vete partia jonë dhe jo për demokratët e vërtetë”, shkruhet në një nga mesazhet.

Policia e Shtetit vijon aksionin anti informalitet në të gjithë zonën bregdetare, për të kthyer në dispozicion të qytetarëve çdo hapësirë publike të zënë në mënyrë të kundërligjshme, me qëllim përfitimin. /atsh

Policia e Shtetit ka zhvilluar të mërkurën homazhe në përkujtim të 10 vjetorit të vrasjes së 4 efektivëve të policisë, nga Dritan Dajti.

Familjarë, miq, të afërm dhe personalitete të Policisë së Shtetit kanë zhvilluar këtë paradite homazhe tek Varrezat e Dëshmorëve, për 4 efektivët që ranë në krye të detyrës, teksa po kryenin një operacion policor për kapjen e të kërkuarit Dritan Dajti.

Zv/Ministrja Rovena Voda, e pranishme në aktivitet, në fjalën e saj theksoi se , “Fatos Xhani, Altin Dizdari, Kastriot Feskaj dhe Sajmir Duçkollari, u shtohen yjeve të përjetshëm të mbrojtësve me jetë – të jetëve njerëzore, duke shtuar lavdinë e tyre në altarin e nderit të punonjësve të Policisë që kryejnë sakrifica sublime në emër të detyrës, duke mëshiruar cilësitë e vyera të njerëzve të devotshëm për përmbushjen e misionit të Policisë së Shtetit dhe të betimit për kryerjen e detyrës me nder dhe integritet”.

“Nderimi i tyre me titullin e lartë “Dëshmorë të Atdheut”, është një tjetër yll lavdie që ndriçon në Flamurin e Policisë së Shtetit dhe shpreh qartësisht vlerësimin e qeverisë shqiptare për njerëzit e ligjit, por edhe vendosmërinë e saj për lartësimin e emrit të dëshmorëve të policisë si dhe ruajtjen e dinjitetit të organizatës, duke njohur sakrificat ekstreme të punonjësve të saj, siç është rasti i këtyre katër dëshmorëve”, theksoi Voda.

“Dhjetë vjet më parë dora makabre e krimit nuk kurseu plumbat ndaj ruajtësve të ligjit dhe u mori jetën para kohe katër punonjësve të Policisë së Shtetit, sot dëshmorë të atdheut. Vrasja në krye të detyrës e mbrojtësve të ligjit, Fatos Xhani, Altin Dizdari, Kastriot Feskaj dhe Sajmir Duçkollari, rënë në detyrë me 7 gusht 2009, shënoi një tronditje të thellë për familjarët, kolegët e tyre në radhët e Policisë dhe miqtë e tyre. Kjo ngjarje e tmerrshme tingëlloi fuqishëm si kambanë e fortë alarmi për reagim në bllok kundër dorës së krimit dhe nevojës për drejtësi”, shtoi Voda.

“Ne nderojmë sot me solemnitet këta dëshmorë, punonjës të përkushtuar ndaj detyrës, të cilët fatkeqësisht humbën jetën heroikisht në përballje me krimin për të garantuar sigurinë e cdo qytetari dhe mposhtur egërsinë e botës së krimit. Shokët dhe kolegët e tyre, ne të gjithë, përulemi para tyre në shenjë respekti dhe nderimi të merituar. Ata, vijoi Voda, e merituan uniformën e Policisë së Shtetit dhe ishin të denjë për profesionin që kishin zgjedhur, kishin cilësi dhe zemër polici trim, manifestuan guxim dhe zell punonjësi të përkushtuar”.

“Fatosi, Altini, Kastrioti dhe Sajmiri ishin të devotshëm, nuk kishin stepje apo ndalje në plotësimin e detyrave dhe zbatimin e urdhrave, nuk dallonin e kujt është përgjegjësia por vepronin në grup. Ata manifestuan cilësitë më të larta të një punonjësi Policie por edhe vlera njerëzore që i kishte bërë shumë të dashur me kolegët, shumë të vlerësuar nga eprorët dhe të respektuar nga qytetarët”, tha Voda.

“Ceremonia e sotme, këtu në Varrezat e Kombit, synon t’u bëjë nderimin e duhur dhe të merituar, duke i rreshtuar krah heronjve dhe dëshmorëve të kombit, për të mbetur të pavdekshëm në përjetësi dhe qirinj të pashuar në rrëfimin e rrugës së sakrificave të përgjakshme për rend e qetësi publike të efektivave të Policisë së Shtetit, në përballje dhemb për dhemb me kriminelët dhe njerëzit antishtet dhe triumfin e kauzës për zbatimin me vendosmëri të ligjit”, shtoi zv/Ministrja Voda.

Ajo bëri të ditur se aktualisht janë 224 punonjës të policisë, të rënë në detyrë. “Asnjë institucion tjetër ligjzbatues i Shtetit Shqiptar, nuk ka kaq shumë të rënë e dëshmorë sa Policia e Shtetit”, tha Voda.

“Ministri i Brendshëm, zoti Sandër Lleshaj, i vetëdijshëm për këtë fakt pikëllues, që në ditët e para kur mori detyrën, organizoi takime periodike me të gjithë familjarët e punonjësve të rënë në detyrë. Qëllimi ishte të njihej me problemet dhe shqetësimet e familjarëve të tyre, fëmijëve, bashkëshorteve, prindërve. Me qëllim lehtësimin sadopak të dhimbjes dhe përballimin e vështirësive të natyrshme të jetës së përditshme, Ministria e Brendshme ka përgatitur një paketë mbështetëse ndaj familjarëve të policëve të rënë në detyrë”, tha Voda.

“Familjarët e të rënëve të Policisë nuk kanë më prindërit, bashkëshortin, njeriun e tyre të dashur, por ne do të jemi familja e tyre e madhe. Një nga premtimet që kemi bërë është vendosja e të gjithë të rënëve të Policisë në varrezat e dëshmorëve. Por kjo nuk është e gjitha. Policia e Shtetit dhe gjithë agjencitë ligj zbatuese kanë detyrimin të prodhojnë sa më shumë rend e siguri. Akti i sotëm, në nderim të dëshmorëve, në këtë ceremoni postmortore përkujtimore, shpreh vlerësimin e qeverisë dhe të Ministrisë së Brendshme për të rënët në detyrë”, tha ajo.

“Ndaj ky është momenti për një apel të fortë për këdo, të rreshtohet në krah të Policisë së Shtetit, institucioni që sakrifikon më shumë e përditë, deri sakrifica sublime, por fatkeqësisht merr mbi supe jo rrallë here, baltën e akuzave të pamerituara. Policia është dhe mbetet vetëm e Shtetit, ndaj të duam policët dhe Policinë, të respektojmë ligjin”, përfundoi Voda.

Zv/drejtoresha e Përgjithshme të Policisë së Shtetit, Aida Hajnaj, në fjalën e mbajtur prej saj, duke vlerësuar katër të rënët në detyrë, theksoi se emri i secilit prej tyre, është gdhendur me gërma të arta në memorien e historisë, në pjesën më të lavdishme të saj.

“Sot është një ditë e veçantë, ditë dhimbjeje, krenarie dhe reflektimi, dhe ndjej se jo vetëm unë, por cilido prej jush sot, do ta kishte të vështirë për të radhitur fjalët në nderim të veprës dhe sakrificës më sublime të kolegëve Fatos Xhani, Kastriot Feskaj, Sajmir Duçkollari e Altin Dizdari”, tha Hajnaj

“Ata sot nuk janë fizikisht mes nesh, mes të dashurve të tyre, por emri i secilit prej tyre është gdhendur me gërma të arta në memorjen e historisë, në pjesën më të lavdishme të saj. Ata janë nderi dhe krenaria jonë, e familjarëve të tyre, ata sot e përjetë janë Nderi i Kombit”.

“Vepra sublime e katër kolegëve që ne përkujtojmë sot, si ajo e qindra dëshmorëve të tjerë të Policisë, është burim frymëzimi për gjithë brezat, shembull i sakrificës, dinjitetit dhe përkushtimit, duke mos kursyer as veten për të mbrojtur jetën”, tha Hajnaj.

Sipas saj, “Fatosi, Kastrioti, Altini dhe Sajmiri 10 vite më parë , në Durrës dhanë jetën gjatë një operacioni shumë të vështirë për kapjen e një personi shumë të kërkuar. Ata ishin oficerë të ndershëm, të përkushtuar, të përgjegjshëm për detyrën, ndaj ata sot nderohen me krenari nga të gjithë. Kolegët tanë që tashmë prehen në altarin e kombit, u ndanë prej nesh nga plumbat e krimit të organizuar, dhe ende sot shpirti i tyre nuk gjen paqe deri në dhënien e drejtësisë së merituar për dorën vrastare”, vijoi ajo.

“Ne humbëm katër kolegë, ndër më të mirët, familjarët humbën babin e devotshëm, bashkëshortin e virtytshëm, vëllain shembullor. Qytetarët humbën shëmbëlltyrat e qytetarisë së këtij vendi”, shtoi Hajnaj.

“Të nderuar familjarë të dëshmorëve të Atdheut! Ju nuk jeni vetëm tani e asnjëherë. Ju jeni pjesë e jona dhe dera e familjes sonë të madhe, Policisë së Shtetit, nuk do te jetë kurrë e mbyllur. Vëmendja e shtuar për ju nga Qeveria dhe Ministri i Brendshëm, janë ngushëllim dhe lehtësim i dhimbjes që kolegët tanë lanë pas. Shumë fëmijë të Dëshmorëve të Policisë, po vijojnë rrugën e baballarëve të tyre dhe ky është një tjetër motivim për organizatën tone, në luftën ndaj krimit”, theksoi zv/Drejtoresha e Policisë së Shtetit.

“Dëshmorët e Policisë, janë heronjtë e vërtetë të realitetit të sotëm, pasi duke sakrifikuar gjënë më të shtrenjtë, jetën e tyre, e bëjnë këtë vend më të sigurt për të jetuar dhe punuar. Ata janë shembuj frymëzimi dhe motivimi për të gjithë ne. I përjetshëm kujtimi i tyre”, përfundoj Hajnaj.

Fatos Xhani, Altin Dizdari, Kastriot Feskaj, dhe Sajmir Duçkollari, u qëlluan për vdekje nga Dritan Dajti gjatë një aksioni për arrestimin e këtij të fundit në zonën e plazhit në Durrës 10 vite më parë.

Ndaj Dajtit u zhvillua një seancë gjyqësore e tej zgjatur, teksa muajin shkurt te këtij viti Gjykata e Apelit të Krimeve të Rënda rrëzoi vendimin për dënimin me burgim të përjetshëm ndaj Dritan Dajtit. Ky vendim i cili uli atij 1/3 e dënimit u shoqërua me reagime të shumta, ku mazhornca ri-theksoi rëndësinë çuarjes përpara të Reformës në Drejtësi dhe realizimit të sa më shpejtë të vettingut të gjyqtarëve./atsh

Mos dhënia e kuponit tatimor i ka kushtuar edhe restorantit të Yllit të peshkut në Tiranë.

Kryeministri Edi Rama është shprehur se megjithëse e do shumë se është punëtor i madh pronarin e këtij restoranti, të cilin e ka afër shtëpisë së tij, sërish ligjin e do më shumë.

Prandaj i tërheq vëmendjen Kryeministri pronarit të restorantit, herë tjetër duhet të lëshojë kupona.

Kryeministri kujton edhe shprehjen e famshme angleze që thotë se ka dy gjëra të sigurta në demokraci vdekja edhe taksat.

“Yllin e famshëm të Peshkut në Tiranë, e dua shumë se është punëtor i madh. Po Ligjin e dua edhe më shumë. Pranej Yllo, se t’kom ene katunarin tim anej nolt, men për her tjetër me kuponat. Ene mos e harro inglizin, që thot “Dy gjona jon t’vdekme për robin n’demokraci, vdekja ene taksat”, ka theksuar Rama./atsh