Lajmi i fundit

Kryeministri Edi Rama solli në mbledhjen e jashtëzakonshme të qeverisë mëngjesin e sotëm një panoramë të pasojave të tërmetit që goditi fuqishëm mëngjesin e 26 nëntorit në vend.

Kryeministri Rama tha se në spitale aktualisht trajtohen 41 persona të lënduar nga tërmeti, 34 prej të cilëve në Spitalin e Traumës, 4 në spitalin e Durrësit dhe 3 të tjerë të transferuar jashtë vendit për kurim. Rama theksoi se ministria e Shëndetësisë ka gati dokumentet për transferim në klinika speciale në rast se mjekët e kërkojnë një gjë të tillë për të lënduarit.

“Në strukturat hoteliere janë akomoduar 2472 persona dhe harku i kësaj mikpritje shtrihet nga Durrësi deri në Gjirokasër. Numri i këtyre personave nuk janë ata që kanë humbur krejtësisht shtëpitë e tyre por që ndodhen në një situatë traumatike dhe me shtëpinë në kushte frike që jo domosdoshmërisht janë kushte objektive që lidhen me qëndrueshmërinë e ndërtesave”, theksoi Rama.

“Nuk do lëmë njerëz të traumatizuar pa shërbyer në këtë fazë të parë”, thë kryeministri Rama./atsh

Kryeministri Edi Rama në përditësimin e mëngjesit të sotëm në mbledhjen e jashtëzakonshme të qeverisë njoftoi se fatkeqësisht janë 50 qytetarët që kanë humbur jetën si rezultat i tërmetit ndërsa kanë përfunduar operacionet e kërkim-shpëtimit.

“Me shprehjet më të fuqishme të mirënjohjes për ekipet e huaja të shpëtim-kërkimit, kemi shprehur mirënjohjen më të thellë miqve dhe partnerëve që në një kohë shumë të shpejtë mobilizuan trupa super të specializuara për të shpëtuar njerëzit”, theksoi Rama.

Por, kryeministri vlerësoi edhe trupat shqiptare të shpëtim-kërkimit.

Rrënojat e hotel “Mira Mare” në Durrës ishin të fundit ku u kërkua ditën e djeshme./atsh

Ministrja e Mbrojtjes, Olta Xhaçka se ushtarët tanë në Kabul kanë nisur mbledhje e fondeve të solidaritetit për të dëmtuarit nga tërmeti i 26 nëntorit.

“Solidariteti i jashtëzakonshëm i këtyre ditëve është shtrirë deri në Afganistan”, shprehet Xhaçka.

Po ashtu Ministrja shton se “miqtë dhe aleatët tanë po kontribuojnë simbolikisht për të prekurit nga tërmeti, edhe në mbledhjen e fondeve që kanë nisur ushtarakët tanë me mision në Kabul”./atsh

Të rinjtë Vlonjatë ndezin qirinj në Sheshin e Flamurit për viktimat e Durrësit, ata nderojnë viktimat e rënë nga tërmeti.

Ky është një veprim mjaft fisnik nga ta edhe i shtohet aktiviteteve të solidaritetit nga të gjithë qytetarët e vendit për viktimat e tragjedisë së 26 nëntorit.

Në Thumanë po zhvillohet ceremonia mortore e pjesëtarëve të familjeve Cara e Greku, ku familjarë dhe qytetarë të shumtë po u japin lamtumirën e fundit.

I pranishëm në këtë ceremoni ishte edhe kryeministri Edi Rama.

“Lamtumirë! Asnjë ngushëllim për zemrat që dhembin e humbja nuk ka dert në dy familje në Thumanë, Caraj dhe Greku. Kurajë për të gjallët që në kujtime ruajnë të humburit nga ky tërmet i pabesë”, ishte mesazhi ngushëllues që përcolli kryeministri Rama.

Tre ditë pas tragjedisë që shkaktoi tërmeti i fuqishëm që goditi vendin tonë me magnitudë 6.3 Rihter sot po zhvillohet ceremonia mortore e dy familjeve, Cara dhe Greku të cilët u zunë poshtë nga rrënojat e pallateve.

Familja Cara është një nga më të prekurat e kësaj fatkeqësie, pasi 7 anëtarë të kësaj familje kanë gjetur vdekjen në gërmadhat e pallateve të shembura.

Një vajzë e afërme e njërës prej familjeve ka takuar ndër të parat kryeministrin duke shpërthyer në vaj.

Vëllai i Albert Carës, të lënduarit i cili u nis sot për një trajtim më të specializuar drejt Italisë, teksa takoi kryeministrin nuk e fshihte dhimbjen.

“Zoti e kishte shkruar që dy të na i falte dhe 7 të na i merrte. Në momentin kur ngrihemi….. besoj se do t’a kalojmë Të lutemi për ata që janë gjallë. Dhimbje pa fund. Zoti na ka ndihmuar pasi tragjedia mund të ishte më e rëndë.”, shprehet ai.

Nga tërmeti i 26 nëntorit, Alberti humbi komplet familjen e tij, bashkëshorten, 3 fëmijët (dy djem dhe një vajzë) dhe nusen e djalit, ndërkohë që humbën jetën edhe familjarë të tjerë të tij./atsh